Die wo ruẹ siẹrẹ oshọ de mwu we?— Ọkiọvo wọ djẹ brẹ ọsẹ vẹ oni wẹn ra. Jẹ ohwo ọfa je herọ wọ je sa djẹ bru ra. O vwo ẹgba vrẹ ihwo ejobi. Wọ riẹn ohwo yena?— E, ọyen Jihova Ọghẹnẹ. E jẹ e yono kpahen ọmọshare ọvo re se Devid. Oshọ mwuro-o, keridie ọ riẹnre nẹ Jihova cha vwẹ ukẹcha vwọ kẹ ọkeneje.

Vwo nẹ ọkiemọ rhe, ọyen ọsẹ vẹ oni ri Devid vwo yono nẹ o vwo ẹguọnọ ri Jihova. Fikirẹ ọnana, oshọ rhe mwu Devid ọke ro vwo hirhopharoku imwoshọ-ọ. Ọ riẹnre nẹ Jihova rọ diẹ ugbeyan rọyen cha chọn ọyen uko. Ẹdẹ ọvo rẹ Devid vwọ vwẹrote igegede, okpohrokpo rode ọvo de mwu ogodẹ ọvo! Wọ riẹn obo ri Devid ruru? Ọ da vwọ tua okpohrokpo na, ọ da vwẹ ugbobọ rọyen vwo hwe! Vwẹ ọke rẹ okorhi ji vwo mwu ogodẹ rọyen ọvo, Devid de ji hwe! Ono wo rori nẹ ọ chọn Devid uko?— E, Jihova.

O ji vwẹ ọke ọfa rẹ Devid vwo dje uduefiogbere ọgangan phia. Ihwo rẹ Izrẹl nene ihwo rẹ Filistia họnran. Ọvo usun rẹ isodje ri Filistia na ọyen arhuaran! Odẹ rọyen Golayat. Arhuaran nana kọ reyẹ Jihova vẹ ihwo rẹ Izrẹl vwọ jehwẹ. Golayat de se isodje rẹ Izrẹl nẹ ayen gba yanrhe rhi nene họnre. Ẹkẹvuọvo, oshọ rọyen de mwu ihwo rẹ Izrẹl ejobi. Ọke rẹ Devid vwo nyo kpahọn, ọ da vuẹ Golayat: ‘Mi che nenuwe họnre! Jihova cha chọnvwuko, wo che ghwu!’ Wọ sa tanẹ Devid fiudugbere?— E, o fiudugbere dẹn. Wọ guọnọ riẹn obore phiare, ọyena vwọ wan nu?

Devid da reyẹ ophiẹn rọyen, ọ da je sane ibi ikuta iyorin re pha rionrionrion, o de bru arhuaran na ra. Ọke rẹ Golayat vwọ mrẹ oborẹ Devid havwen te, kọ reyọ vwọ jehwẹ. Ẹkẹvuọvo Devid da vuẹ nẹ: ‘Wo mwẹ ọlọkọ bruvwe cha, ẹkẹvuọvo mi bru we cha vẹ odẹ ri Jihova!’ O de phi ubi-ukuta ọvo phiyẹ ophiẹn na, o de djuo jẹ ọ djẹ brẹ Golayat ra, o de siobọno. Ubi-ukuta na de she arhare rọyen! Arhuaran na de ghwu gberotọ! Oshọ de  mwu ihwo rẹ Filistia na eje, ayen da djẹ ghwru. Mavọ yen Devid rọ dia ọmọtete sevwo phi arhuaran na kparobọ?— Jihova chọnruko. Jihova vwo ẹgba vrẹ arhuaran yena shesheri!

Die yẹn ikuegbe ri Devid na yonuwe?— Jihova vwo ẹgba vrẹ ihwo ejobi. Ọyen ugbeyan wẹn. Siẹrẹ oshọ de mwu we, karophiyọ nẹ Jihova sa chọnwuko vwo fiudugbere!