Ọkiọvo ophu mwẹ ihwoevo siẹrẹ avwanre da vuẹ ayen kpahen Jihova, efa reyẹ avwanre vwọ jehwẹ. Ọnana sa nẹrhẹ avwanre dobọ rẹ aghwoghwo rẹ ota rẹ Ọghẹnẹ ji. Wọ mrẹ oma wẹn vwevunrẹ ẹdia tiọyen dẹvore?— Baibol na vuẹ avwanre kpahen ọshare ọvo ro vwo ẹguọnọ ri Jihova, dedena ọ joma dobọ rẹ ota-eghwoghwo ji. Odẹ rọyen Jerimaya. E jẹ e yono kpahọn.

Ọke rẹ Jerimaya vwọ hẹ eghene, Jihova da vuẹ nẹ o si ihwo rọyen orhọ kpahen erọnvwọn ebrabra rẹ ayen ruẹ. Iruo nana bẹnre vwọkẹ Jerimaya mamọ, fikirẹ ọtiọyena oshọ de mwo. Ọ da vuẹ Jihova nẹ: ‘Me riẹn obo me cha ta-a, mẹvwẹ ọmọtete mamọ.’ Ẹkẹvuọvo Jihova da ta kẹ nẹ: ‘Wọ djoshọ-ọ. Me cha chọnwuko.’

 Jerimaya de ghini si ihwo na orhọ nẹ a cha vwẹ oja re ayen siẹrẹ ayen rhe kurhẹriẹ-ẹ. Wo rori nẹ ihwo na ru obo ri Jerimaya vuẹ ayen na?— Kakaka. Ophu mwu evo, efa da reyọ vwọ jehwẹ. Evo tobọ guọnọ nẹ a teyọn hwe! Mavọ wo rori nẹ ọnana djobọte Jerimaya te?— Oshọ mwuro, ọ da ta: ‘Me rha cha tota kpahen Jihova ọfa-a.’ O ghini ru ọtiọyen?— Ẹjo, o ru ọtiọye-en. O vwo ẹguọnọ ri Jihova mamọ, fikirẹ ọtiọyena, ọ rha sa dobọ rẹ ota-eghwoghwo ji-i. Ọnana da nẹrhẹ Jihova sẹro rọyen.

Kerẹ udje, ihwo evo do Jerimaya phiyẹ orhare ọyaya, ibehre ọvo yen herọ. O vwo emu rọ re-e, o ji vwo ame rọ da-a. Ihwo na da yanjovwo vwẹ etiyin nẹ o ghwu. Ẹkẹvuọvo, Jihova sivwinro.

Die yen udje ri Jerimaya yonuwe?— Dedevwo nẹ o vwo ọkiọvo rẹ oshọ vwo mwu Jerimaya, jẹ ọ dobọji rovwo jẹ ota ri Jihova eghwoghwo-o. Siẹrẹ wo de ghwoghwo ota rẹ Ọghẹnẹ ihwo je sa reyẹ owẹ vwọ jehwẹ yẹrẹ ophu se mwu ayen. Ọnana sa nẹrhẹ oma vo wẹ yẹrẹ oshọ mwu we. Wo jẹ ọyena nẹrhẹ wọ dobọ rẹ ota-eghwoghwo jẹ-ẹ. Jihova cha chọnwuko ọkeneje kirobo rọ chọn Jerimaya uko.