Ọ lọhọre ọkeneje wo vwo nyupho rẹ ọsẹ vẹ oni wẹn?​— Ọ diẹ ọkeneje ọ vwọ lọhọ-ọ. Wọ tobọ riẹn nẹ Jesu nyupho ri Jihova kugbe ọsẹ vẹ oni rọyen?— Wọ da vwẹrokere, kọ lọhọ kẹ wẹ wo vwo nyo ota rẹ ọsẹ vẹ oni wẹn. E jẹ avwanre yono kpahen ọnana.

Tavwen Jesu ki rhiẹ otọrakpọ na, ọ vẹ ọsẹ rọyen Jihova gba dia obodjuvwu. Ẹkẹvuọvo, Jesu ji vwo ọsẹ vẹ oni ọke rọ vwọ hẹ otọrakpọ na. Odẹ rayen Josẹf vẹ Meri. Wọ riẹn obo rẹ ayen sa vwọ dia ọsẹ vẹ oni rọyen?—

Jihova phi arhọ ri Jesu phiyẹ evun ri Meri rere e se vwo vwiẹ vwẹ otọrakpọ na. Ọnana igbevwunu! Ememerha na, Jesu kọ rhua phiyọ vwẹ evun ri Meri, kirobo rẹ ọmọ rhua vwẹ evun rẹ oni rọyen. Evun na vwọ gba emeranvwe irhirin, e de vwiẹ Jesu. Ọtiọyen Meri vẹ ọshare rọyen Josẹf rhe vwọ dia ọsẹ vẹ oni ri Jesu vwẹ otorakpọ na.

Ọke rẹ Jesu vwọ hẹ ẹgbukpe 12, o de ru orọnvwọn ọvo ro djere phia nẹ ọ nabọ vwo ẹguọnọ kpahen ọsẹ rọyen, Jihova. O ru ọnana ọke ro vwo nene orua rọyen yan oyan ogrogron kpẹ Jerusalẹm vwẹ ọke rẹ orẹ ọwanvrẹ na. Rẹ ayen vwo rhivwin kpo, Josẹf vẹ Meri ke guọnọ Jesu. Wọ riẹn asan rẹ Jesu ra re?—

Josẹf vẹ Meri de rhivwin kpẹ Jerusalẹm kpakpata ra guọnọ Jesu. Ẹwẹn rayen rhe totọ-ọ, kidie ayen je mrẹ-ẹ. Ẹdẹ erha vwọ wan nu, ayen da rhe mrẹ vwevunrẹ uwevwin rẹga na! Wọ riẹn oboresorọ Jesu vwọ hẹ evunrẹ uwevwin rẹga na?— Keridie, etiyin ọyen o de se yono kpahen Jihova. O vwo ẹguọnọ ri Jihova, ọ je guọnọ ru obo re vwerhọn oma. Ọke ri Jesu vwọ tobọ te ọshare dede, O ji nyupho ri Jihova ọkieje. Jesu nyupho rẹ ọsẹ rọyen vwẹ ọke rọvwọ dia bẹnbẹn vwọ kẹ dede, rọ diẹ ọke rovwo fo nẹ ọ rioja fikirẹ avwanre. Jesu ji nyupho ri Josẹf vẹ Meri?— E, Baibol na tare nẹ o nyupho rayen.

Die yen udje ri Jesu yonuwe?— Ofori nẹ wo nyupho rẹ ọsẹ vẹ oni wẹn, ọ da tobọ bẹn kẹ wẹ dede. Wo che ru ọtiọyen?—