Rebeka vwo ẹguọnọ ri Jihova. Odẹ ọshare rọyen, Aizik. Aizik ji vwo ẹguọnọ ri Jihova. Mavọ yen Rebeka ru mrẹ Aizik? Mavọ yen o djerephia nẹ ọ guọnọ ru obo re vwerhen Jihova oma? E jẹ avwanre yono kpahen Rebeka.

Ebraham vẹ Sera yen vwiẹ Aizik. Ayen dia Kenan, ihwo rehẹ ẹkuotọ na ga Jihova-a. Ebraham guọnọre nẹ ọmọ rọyen rọvwọn ohwo rọ ga Jihova. O de ji odibo rọyen, ọ sa dia Elieza, nẹ ọ ra guọnọ aye vwọ kẹ Aizik vwẹ orere re se Haran, asan rẹ iniọvo rẹ Ebraham dia.

Elieza vẹ idibo rẹ Ebraham efa yin kpẹ oyan na. Asan na sheri mamọ. Ayen krun emu vẹ eghwa buebun phiyẹ ikamẹl ihwe vwo nene oma. Mavọ yen Elieza ru sa mrẹ aye ro fori vwọ kẹ Aizik? Ọke rẹ Elieza vẹ idibo ichekọ na vwo te orhare ọvo vwẹ Haran, ayen da domaji keridie Elieza riẹnre nẹ ihwo che rhi vo ame vwẹ etiyin. Ọ da nẹrhovwo rhe Jihova nẹ: ‘Ọmọtẹ re me cha vuẹ nẹ o vo ame kẹ vwẹ, o de ghini vo ame rẹ me vẹ ikamẹl na cha da, kọyen ọmọtẹ ru wọ jẹre.’

O rhe kri-i, Rebeka de rhi vo ame. Baibol na tare nẹ o vwo erhuvwu mamọ. Elieza vwọ vuẹ nẹ ọ kẹ ọyen ame da, Rebeka da ta: ‘Oyoma. Mi che vo ame kẹ wẹ, ọtiọyen ji te eranvwe wẹn.’ Eranvwe re se ikamẹl da ame mamọ. Di roro  owian ọgangan ri Rebeka wianre ro se vwo vo ame kẹ ayen eje da! Wọ mrẹ Rebeka vwevunrẹ uhoho na rovwo vo ame kẹ ikamẹl na?— O gbe Elieza unu rọvwọ mrẹ obo ri Jihova kpahen phiyẹ ẹrhovwo rọyen na.

Elieza da ghwẹ ekuakua iyoyovwin kẹ Rebeka. Rebeka de se Elieza vẹ idibo ichekọ kpẹ uwevwin rayen. Elieza da ta oboresorọ Ebraham vwo jo rhe kugbe obo ri Jihova kpahen phiyẹ ẹrhovwo rọyen. Ọke rẹ orua ri Rebeka vwo nyo nẹ Aizik guọnọ Rebeka rọvwọn, oma da vwerhen ayen mamọ.

Kẹ wo rori nẹ oma vwerhen Rebeka nẹ Aizik guọnọ rọvwọn?— Rebeka riẹnre nẹ Jihova yin ji Elieza rhe. Kọyen sorọ, ọke rẹ orua ri Rebeka vwọ nọ sẹ ọ guọnọ kpẹ Kenan ra rọvwọn Aizik, ọ da tanẹ: ‘E, me guọnọ ra.’ O de nene Elieza yanran. Ayen vwo te Kenan, ọ da rọvwọn Aizik.

Jihova ku ebruphiyọ kuẹ Rebeka keridie o ru obo rọ guọnọre. Ikpe buebun vwọ wan nu, Rebeka da rhe diẹ oni rode ri Jesu! Wọ da vwẹrokere Rebeka vwo ru obo re vwerhẹn Jihova ivun, ko ji ku ebruphiyọ ku we.