Vwẹ ẹwẹn roro nẹ wọ hẹ evunrẹ orere ri Jẹriko. Orere na hẹ evunrẹ ẹkuotọ ri Kenan. Ihwo rẹ ẹkuotọ na ga Jihova-a. Aye ọvo re se Rehab dia evunrẹ orere nana.

Ọke rẹ Rehab vwọ hẹ ọmọtete, ọyen o vwo nyo obo ri Mosis sun emọ rẹ Izrẹl nẹ Ijipt wan Abadi Ọvwavware na. O ji nyo kpahen obo ri Jihova chọn ayen uko vwo phi ivwighrẹn rayen kparobọ. Asaọkiephana, o nyori nẹ emọ rẹ Izrẹl si kẹrẹ Jẹriko!

Vwẹ ovwọnvwọn ọvo, eshare rẹ Izrẹl ivẹ da yanran ra bẹbẹ ni orere ri Jẹriko. Ayen de kpẹ uwevwin ri Rehab. O de se ayen ro uwevwin rọyen. Vwẹ ason yena, ovie ri Jẹriko de nyo nẹ ihwo evo ro orere na rhi bẹbẹ no, o de ji nyo nẹ ayen hẹ uwevwin ri Rehab. Ovie na de ji ihwo nẹ e re mwu ayen rhe. Rehab de siẹ eshare ivẹ na nu vwẹ obenu ruwevwin rọyen, ọ da vuẹ eshare rẹ ovie na ji rhe nẹ: ‘Eshare na rhiẹ etinẹ, ẹkẹvuọvo ayen yanran re. Ovwan de brokpakpa, ovwan se mwu ayen!’ Wọ riẹn oboresorọ Rehab vwo siẹ ayen nu?— Keridie o se Jihova gbuyota. Ọ riẹnre nẹ Jihova cha reyẹ otọ ri Kenan vwọ kẹ ihwo rẹ Izrẹl.

Tavwen eshare na ki nẹ uwevwin ri Rehab, ayen de ve kẹ nẹ ọke rẹ ayen da cha ghwọrọ Jẹriko, emuvuọvo che te vẹ orua rọyen oma-a. Kẹ wọ riẹn oborẹ ayen vuẹ rẹ nẹ o ru?— Ayen da ta kẹ: ‘Churu ufi ọvwavware nana si ovakpo rẹ uwevwin wẹn. Wo de ru ọtiọyen, ihwo ejobi rehẹ evunrẹ uwevwin wẹn che sivwin rhọ.’ Rehab de ru oborẹ eshare na vuẹ rẹ nẹ o ru. Kẹ wọ riẹn obore phiare?—

Ẹdẹ ibro vwọ wan nu, ihwo rẹ Izrẹl da yan riariẹ orere na riẹinriẹin. Ẹdẹ esan yẹn ayen yan riariẹ orere na, obọvo ẹdọke. Vwẹ ẹdẹ righwrẹn, ayen da yan riariẹ orere na abọ ighwrẹn. Ọke yena ayen de kperi gangan. Jihova de ruo, igbẹhẹ rẹ orere na da guọghọ totọ. Ẹkẹvuọvo, uwevwin re churu ufi ọvwavware si ovakpo rọyen na sheri-i! Wọ mrẹ igbẹhẹ na ri she totọ vwevunrẹ uhoho na?— Rehab kugbe orua rọyen sivwin rhọ!

 Die yen ikuegbe ri Rehab yonuwe?— Rehab se Jihova gbuyota fikirẹ erọnvwọn rigbunu ro nyo kpahọn. Wo ji yono erọnvwọn buebun kpahen Jihova asaọkiephana. Wo se Jihova gbuyota kerẹ Rehab?— Avwanre riẹnre nẹ wo sere gbuyota!