Wọ riẹn uvie ra tota kpahan na?—E, Uvie rẹ Ọghẹnẹ, ọyen che ru akpọ na phiyẹ paradaisi. Wọ guọnọ yono kpahen Uvie nana?—

Kuvie kuvie vwo ovie ro suon. Ovie na yin suẹn ihwo rẹ ẹkuotọ na. Wọ riẹn ohwo rọ cha dia ovie rẹ Uvie Ọghẹnẹ?— Jesu Kristi. Ọ diẹ obodjuvwu. O rhe che kri-i, ko che sun ihwo ejobi re diẹ akpọ na! Wo rori nẹ oma cha vwerhen avwanre siẹrẹ Jesu da dia ovie rẹ akpọ na?—

Oma cha vwerhen avwanre mamọ! Vwevunrẹ Paradaisi, ohọnre vẹ ofovwin rha cha dia-a. Ihwo ejobi che vwo ẹguọnọ rẹ ohwohwo. Ega vẹ ughwu rha cha dia-a. Irhuẹro cha mrorẹ, idin che nyẹme, ikpono che vrẹn yan, ayen cha djonẹ ji pho kraikrai. Emu cha vọn asan-eje. Eranvwe vẹ ihworakpọ cha dia kugbe. Irivwin che vrẹnushi. Ihwo buebun rẹ avwanre yono kpahen vwevunrẹ ibroshọ nana kerẹ Rebeka, Rehab, Devid kugbe Ilaija ji che vrẹnushi!  Wọ guọnọ mrẹ ayen vwẹ ọke rẹ ayen de vrẹnushi?—

Jihova vwo ẹguọnọ kpahen owẹ, ọ je guọnọ nẹ oma vwerhen owẹ. Siẹrẹ wo de yono kpahen Jihova, je yọnrọn irhi rọyen, ku wọ dia bẹdẹ bẹdẹ vwevunrẹ paradaisi! Ọyena je we?—