VWỌ KẸ EMIỌVWỌN
7: Iwan
OBORẸ O MUDIAPHIYỌ
Iwan yen iruemu rẹ ohwo brorhiẹn nẹ ọyen che yerin akpọ rọyen nene. Kerẹ udje, wọ davwẹngba vwọ ta uyota vwẹ emu eje? Ọ da dia ọtiọyen, kọyen o muẹro nẹ wọ je guọnọ yono emọ wẹn iwan yena.
Iwan ji churobọ si obori suẹn uruemu rẹ ohwo. Kerẹ udje, ohwo ro yeren akpọ nene omamọ rẹ iwan dia ọgbowian, ọ ghwa ohwo ria-a, o ji dje erorokẹ kẹ ihwo efa—ọkiemọ yen ọ da phẹrẹ e vwo vwo iruemu nana.
UCHEBRO RI BAIBOL: “Yono ọmọ phihọ idjerhe ro che nene, ọ da ghwanre nure ọ rha cha yan jovwo-o.”—Isẹ 22:6.
OBORESORỌ Ọ VWỌ GHANRE
Vwẹ ọke avwanre nana ra vwọ vwẹ ikọmputa ruiruo mamọ na, omamọ rẹ iwan pha ghanghanre. Oni ọvo re se Karyn tare nẹ, “A sa mrẹ erharhe erọnvwọn vwevunrẹ ifonu mamọ, emọ rẹ avwanre se chidia kẹrẹ avwanre dede jẹ ayen ni erọnvwọn ri je fo vwẹ ifonu rayen!”
UCHEBRO RI BAIBOL: “Omiro gua, kẹ eye ri vwo ọhọ ri se vwo vughe emu esiri vẹ ọbrabra.”—Hibru 5:14.
Omamọ rẹ iruemu je pha ghanghanre. Iruemu nana churobọ si ra vwọ ta eta kerẹ “biko” vẹ “wẹ kobiruo”, o ji churobọ si re vwo dje ọdavwaro phia kpahen ihwo efa. Iruemu nana kanre akpọ na kidie ihwo buebun vwo omavwerhonvwẹn kpahen ekuakua rẹ ugboma kerẹ ifonu vwọ vrẹ ihworakpọ.
UCHEBRO RI BAIBOL: “Kirobo wọ guọnọre ne ru kẹ wẹ, ji ru ọtiọye kẹ ihwo efa rhe.”—Luk 6:31.
OBO WO SE RU
Dje omamọ rẹ iwan wẹn kẹ ayen. Kerẹ udje, ehiahiẹ djerephia nẹ ighene sa kẹnoma kẹ re vwo bru ehware tavwen a ke rọvwọn siẹrẹ e de yono ayen jovwo re nẹ uruemu tiọyena chọre.
IROROẸJẸ: Reyọ obo re phiare vwẹ ọke yena vwọ tuẹn otaẹtakuẹgbe phiyọ. Kerẹ udje, wo de nyo iyẹnrẹn rẹ ozighi, wọ sa ta: “O gbevwunu rẹ ihwo vwo muẹ oka rẹ ophu tiọyena kpahen ihwo efa. Die wo rorori nẹ ọyen nẹrhẹ ihwo vwo oka rẹ uruemu tiọyen?”
“Ọ pha bẹnbẹn vwọ kẹ emọ ayen vwọ jẹ ojẹ rẹ obo re brare vẹ obo ri yovwirin siẹrẹ ayen rha riẹn ofẹnẹ rẹ obo re brare vẹ obo ri yovwiri-in.”—Brandon.
Yono ayen omamọ rẹ iruemu. Imitete dede se yono obo re dje ọdavwaro phia kẹ ihwo efa, je ta eta kerẹ “biko” vẹ “we kobiruo.” Ọbe re se Parenting Without Borders tare nẹ “Emọ da riẹn nẹ ayen ẹbẹre ọvo rẹ ihwo rẹ orua, isikuru vẹ ekogho rayen, ọnana che mu ayen vwo dje uruemu esiri phia ro che fierere kẹ ihwo efa ukperẹ omobọ rayen ọvo.”
IROROẸJẸ: Vwẹ owian kẹ emọ wẹn vwevunrẹ uwevwin rere ayen vwọ riẹn ọghanrovwẹ ra vwọ vwẹ ukẹcha kẹ ihwo efa.
“Emọ rẹ avwanre da wian owian rẹ uwevwin enẹna, ọ rha cha bẹn kẹ ayen ayen ọvo vwọ wian ọke rẹ ayen ọvo da dia re-e. Ọke yena re, a vwọ vwẹrote owian yẹrẹ oghwa ro te ayen gbe cha dia emu ọrhorha kẹ aye-en.”—Tara
