Oboravwọtua vrẹ evwerhẹn ghevweghe; orọnvwọn wọ de guọnọ nẹ ọ phia. Oboravwọtua dẹn churobọ si iroroẹjẹ, a vwọ nuẹ kugbe owian ọgangan.

A sa fobọ yanmuẹ oboravwọtua na evo (ọ sa reyọ ẹdẹ yẹrẹ udughwrẹn evọ), efa reyọ ọmọke (emeranvwe evo), evo je sa reyọ ọke grongron (ẹgbukpe ọvo yẹrẹ vrẹ ọtiọyen). A sa yanmuẹ oboravwọtua re cha reyọ ọke grongron siẹrẹ a da yanmuẹ ẹkẹn itete re bru kẹ oma.

Wọ da yanmu ẹkẹn ru wo bru kẹ oma, ọ cha nẹrhẹ uduefiogbere wẹn ganphiyọ, o che ru oyerinkugbe wẹn vẹ ọ rẹ igbeyan wẹn ganphiyọ je nẹrhẹ wo vwo omavwerhovwẹn.

Uduefiogbere: Wọ da yanmu ẹkẹn itete ru wo bru kẹ oma, ọ cha nẹrhẹ wo vwo uduefiogbere wo vwo bru ẹkẹn ride kẹ oma. Ọ je cha nẹrhẹ wo fiudugberi vwo hirharoku egbabọse; kerẹ e vwo phi ọnyẹ rẹ otu kparobọ.

Oyerinkugbe: Oma vwerhen ihwo ayen da hẹ ohri rẹ ihwo ri vwo oborẹ ayen vwọtua vwẹ akpeyeren; kọyen ihwo re riẹn oborẹ ayen guọnọre ri ji vwo owenvwe rẹ ayen vwọ wian kpahọn. Vwọba, idjerhe ro me yovwin kparobọ re vwo ru oyerinkugbe gan, ọyen re vwo mu ugbeyan rẹ ohwo rọ vwọtua oborẹ avwanre je vwọ tua na.

Omavwerhovwẹn: Wo de bru ẹkẹn kẹ oma je yanmuo, ọ kẹ ohwo omavwerhovwẹn.

“E vwo vwo oboravwọtua je vwe. Ọ nẹrhẹ mi vwo obo ri mi ruẹ ji vwo obo re me vwọtua. A da yanmu ẹkẹn re bru kẹ oma, ka sa tanẹ, ‘E, mi ghini ruo! Mi ruo obo ri mi veri.’ ”—Christopher.

UCHEBRO RI BAIBOL: “Ohwo rọ rhẹrẹ odju sa kọ-ọn; kugbe ohwo ro nẹ aruọke se vuẹ-ẹ.”—Aghwoghwo 11:4.

Reyọ owọẹjẹ nana vwo ruiruo rere wọ sa vwọ yanmu ẹkẹn wo bru kẹ oma.

Jokaphiyọ. Si ẹkẹn wo bru kẹ oma phiyotọ, rere wo si ayen kpahen ohwohwo vwo nene ọ rẹ wọ guọnọ ke ru.

Iroroẹjẹ. Vwọ kẹ ẹkẹn ọvuọvo, gbe ru enana:

• Bru ọke wọ cha vwọ yanmuo.

• Muegbe rẹ owọẹjẹ na phiyotọ.

• Vwẹ ẹwẹn roro imuoshọ re sa vwomaphia, rere wo roro kpahen oborẹ wo se vwo phi ayen kparobọ.

Jowọ. Wọ hẹrhẹ ọke erọnvwọn eje vwo shephiyọ tavwen wọ ke tonphiyọ-ọ. Nọ oma wẹn, ‘Die yen orọnvwọn rẹsosuọ mi che ru me sa vwọ yanmu ẹkẹn mi bru kẹ oma?’ Ọtiọyena gbe ruo. Vwo oniso rẹ ẹyan-obaro wẹn, wọ vwọ yanmuẹ owọẹjẹ ọvuọvo.

UCHEBRO RI BAIBOL: “Iroro rẹ ohwo rọ vwẹ ẹro te otọ je yovwo-o, ẹkẹvuọvo ohwo ro bru okpakpa che fiabọ.”—Isẹ 21:5.