Egbowian mrẹ owian djẹ-ẹ. Ukperẹ ọtiọyen, oma vwerhen ayen rẹ ayen vwọ wiowian fikirẹ ọdavwẹ rayen vẹ ọ rẹ ihwo efa; ọ da tobọ dianẹ ihwo efa vwẹ ẹro ri sakamu vwo nẹ owian tiọyena.

Vwọrẹ uyota, akpeyeren vọnre vẹ oghwa. Vwẹ akpọ rẹ ihwo buebun da mrẹ owian djẹ, wọ cha mrẹ erere siẹrẹ wọ da dia ọgbowian.—Aghwoghwo 3:13.

“Me rhe mrẹvughe nẹ ohwo da wian gangan, ọ cha nẹrhẹ o vwo evunvọnvwẹ. Ẹwẹn rẹ evunvọnvwẹ tiọyena nẹrhẹ mi rhi vwo ẹguọnọ rẹ owian. Wo de vwo omamọ ẹwẹn vẹ owenvwe ọgangan kpahen owian, ọ cha chọn wẹ uko vwo vwo omamọ odẹ.”—Reyon.

UCHEBRO RI BAIBOL: “Vwẹ evun rẹ owian ejobi erere herọ.”—Isẹ 14:23.

Vwo ẹro abavọ vwo ni owian womarẹ wọ vwọ reyọ owọẹjẹ nana vwo ruiruo.

Vwo ẹwẹn ra vwọ nabọ wiowian fiotọ. Ọ dianẹ wo ruiruo ra ghare kẹ wẹ vwẹ uwevwin, iruo ra kẹ wẹ vwẹ isikuru yẹrẹ iruo wọ vwọ mrẹ igho, mu ẹwẹn wẹn phiyọ oborẹ wo ruẹ. Siẹrẹ wọ da sa nabọ ruiruo ọvo fiotọ, guọnọ idjerhe efa wo vwo ruo kpata yẹrẹ yovwinphiyọ. Wọ da nabọ tẹn ona rẹ owian wẹn, ọ cha nẹrhẹ wọ riavwerhen rẹ owian na.

UCHEBRO RI BAIBOL: “Wọ mrẹ ohwo rọ riẹn iruo rọye o che mudia vwẹ obaro rẹ ivie; o che mudia vwẹ obaro rẹ orharhe rẹ ihwo-o.”—Isẹ 22:29.

Obo ri che nẹ obuko rọyen rhe. Vwẹ ọke buebun, wọ da nabọ wiowian wẹn, ihwo efa je cha mrẹ erere no rhe. Kerẹ udje, wọ da nabọ muomaphiyọ iruo ra ghare kẹ wẹ vwẹ uwevwin, ọ cha nẹrhẹ owian na pharhe vwọ kẹ orua wẹn eje.

UCHEBRO RI BAIBOL: “Ẹrhovwo herọ kẹ ọkokẹ nọ ohwo ra kẹ.”—Iruo Rẹ Iyinkọn Na 20:35.

Ru bunphiyọ. Ukperẹ wo ghwe vwo ruiruo ra ghare kẹ wẹ ọvo, davwẹngba wo vwo ru vrẹ obo re rhẹro rọyen mie we-e. Eriyina, wẹ kọyen sun akpeyeren wẹn; kidie wẹ yin brorhiẹn wo vwo ru bunphiyọ, ọ dianẹ kẹ a gba wẹ vwo ruo-o.—Matiu 5:41.

UCHEBRO RI BAIBOL: “Ọ dianẹ ke me gba wẹ ruo-o, ẹkẹvuọvo jo nẹ otọ rẹ evun wẹn rhe.”—Filimọn 14.

Vwo ẹro abavọ. Ihwo re dia egbowian dia evwiẹrẹ-ẹ yẹrẹ ayen wian oma brẹkuẹ-ẹ. Ayen vwo ẹro abavo, oma vwerhen ayen vwẹ ọke rẹ ayen da wiowian ọgangan vẹ ọke rẹ omaerovwon dede.

UCHEBRO RI BAIBOL: “Oyovwi kẹ obọ ọvo rọ vọnre vẹ ufuoma nọ abọ ivẹ rọ vọnre vẹ owian vẹ odju re nene họnra.”—Aghwoghwo 4:6.