Oka rẹ ohwo rẹ wọ hepha vrẹ odẹ vẹ oborẹ wọ hepha vwẹ otafe. O churobọ si iwan wẹn, esegbuyota wẹn kugbe uruemu wẹn. Vwọrẹ uyota, oka rẹ ohwo rẹ wọ hepha ghwe dje obo rẹ wọ hepha vwẹ obevun vẹ otafe.

Wo de vughe oka rẹ ohwo rẹ wọ hepha dẹn, ku wo se mudia chochọn rẹ esegbuyota wẹn, ukperẹ wọ vwọ vwẹ uphẹn vwọ kẹ edje wẹn nẹ ayen sun.

“Ihwo buebun pha kerẹ idọbebi ra mrẹ vwẹ ushoghwa ra da shẹ iwun. Ọ dia idọbebi na yen sane iwun re kuẹphiyọ aye-en; ihwo yen kuo phiyọ ayen.”—Adrian.

“Mi rhi yono obo ri mi se vwo mudia kẹ obo ri yovwirin ọ da tobọ dianẹ ọ lọhọre-e. Oborẹ igbeyan mẹ ruẹ vẹ obo ri me vẹ ayen ruẹ kuẹgbe nẹrhẹ mi vughe uvi rẹ igbeyan mẹ.”—Courtney.

UCHEBRO RI BAIBOL: “We hirhe oma phihọ ohwo rẹ akpọ nana ọvo-o ẹkẹvuọvo gbe wene iroro rẹ udu rẹ ovwan phihọ ọkpokpọ.”—Rom 12:2.

Roro kpahen oka rẹ ohwo rẹ wọ hepha enẹna kugbe oka rẹ ohwo wọ guọnọ dia vwọrẹ wọ vwọ fuẹrẹn ẹgba wẹn, ẹdia wọ da vwiẹrẹ kugbe oborẹ wo vwo imuẹro rọyen. A vwọ tonphiyọ e jẹ a kpahenphiyọ enọ nana.

Ẹgba: Ena sansan vọ yen mi vwori? Ẹdia vọ yen mi de ruẹ yovwẹn? (Kerẹ udje: Me yan muẹ ọke? mi se suẹn oma mẹ? mẹvwẹ ọgbowian? mi ruẹse?) Erọnvwọn iyoyovwin vọ yen mi ruẹ?

IROROẸJẸ: Wọ mrẹ bẹnbẹn wo wo vwo oniso rẹ iruemu iyoyovwin ru wo vwori? Nọ ọsẹ yẹrẹ oni wẹn yẹrẹ ugbeyan wọ vwẹroso kpahen oborẹ ayen vwo oniso rọyen vwẹ oma wẹn kugbe oboresorọ.

UCHEBRO RI BAIBOL: “Ẹkẹvuọvo e jẹn dohwo diruo rọye davwini, ko mrẹ obo rọ vwọ yeyan kẹ Omobọ rọye ọvo ọ gbe dia ọrivẹ rọye-e.”—Galesha 6:4.

Ovwiẹrẹ: Iruemu vọ yen ofori nẹ me wian phiyọ? Ọke vọ yen ọ ma vwọ lọhọ kẹ vwẹ mi vwo ru obo re chọre? Ẹdia vọ yen me da ma guọnọ omaẹriẹnsuon?

UCHEBRO RI BAIBOL: “Avwanre da ta nẹ avwanre ru umwemwu-u, yẹ avwanre phiẹn oma rẹ avwanre.”—1 Jọn 1:8.

Imuẹro: Iwan iyoyovwin vọ yen mi nene, kẹ diesorọ? Mi vwo imuẹro kpahen Ọghẹnẹ? Die yen kẹ vwẹ imuẹro nẹ Ọghẹnẹ ghini herọ? Iruemu vọ yen mi rorori nẹ e chọre, kẹ diesorọ? Imuẹro vọ yen mi vwori kpahen obaro na?

UCHEBRO RI BAIBOL: “Ọmrẹvughe kọye re cha rhẹrẹ owẹ; ẹruọ kọye ri che sun we.”—Isẹ 2:11.