Uvi otaẹtakuẹgbe vwomaphia siẹrẹ wẹ vẹ emọ wẹn da ta ota kpahen iroro rehẹ ubiudu rẹ ovwan.

E vwo nene ighene ta ota kugbe sa dia bẹnbẹn. Ọke emọ vwọ hẹ imitete, ayen vuẹ esẹ vẹ ini rayen erọnvwọn eje. Ẹkẹvuọvo, ayen vwọ ghwanra na kẹ ayen sioma uko, ayen gbe ta ota kẹ esẹ vẹ ini rayen kirobo ri jovwo-o, ọtiọyena esẹ vẹ ini rayen rha riẹn obo rẹ ayen roro yẹrẹ obo ri ru aye-en. Kọ ghwa họhọ nẹ wo mudia ẹbẹre ọvo rẹ urhie rode, ọmọ wẹn ko rhe mudia ẹbẹre o chekọ rẹ urhie na. Siẹrẹ emu tiọyen da phia, gba riẹn nẹ ọnana yen ọke ro me fo wo vwo nene ọmọ wẹn ta ota!

Muegbe wo vwo nene ọmọ wẹn ta ota ọkieje. Ru ọtiọyen ọ da tobọ dia uherevie rẹ ason yen ọmọ wẹn vwọ guọnọ nene uwe ta ota.

“Wọ sa ta, ‘Me vẹ owẹ hẹ uwevwin na rhanvwe urhiọke! Ọke nana yen wọ vwọ guọnọ ta ota?’ Ẹkẹvuọvo, diesorọ e vwo brenu ọke emọ rẹ avwanre da guọnọ rhievun kẹ avwanre? Ọ dia ọna yen obo re emiọvwọn eje guọnọre?”—Lisa.

“Dede nẹ me vwẹ ovwerhẹn mẹ vwọ heha-a, jẹ ọkievo uherevie ason yen mẹ vẹ emọ mẹ sa vwọ nabọ ta ota kuẹgbe.”—Herbert.

UCHEBRO RI BAIBOL: “E jẹn ohwo ọvuọvo guọnọ erhuvwu rẹ oma rọye-e, ẹkẹvuọvo erhuvwu rẹ ọrivẹ rọye.”—1 Kọrẹnt 10:24.

Wo jẹ orọnvwon vuọvo mu ẹwẹn wẹn reyọ-ọ. Ọsẹ ọvo da ta: “Ọke evo mẹ vẹ emọ mẹ da ta ota, me mrẹ oma mẹ nẹ mi roro kpahen erọnvwọn efa. Mi se sionẹ kẹ emọ mẹ-ẹ, ayen ghwa mrẹ nẹ mi roro kpahen emu efa kidie me gbe kerhọ raye-en.

Ọ da je dia ọtiọyen kẹ wẹ, gbe fun itẹlivishọni yẹrẹ erọnvwọn efa ri se mu ẹwẹn wẹn reyọ nẹ ota na. Mu ẹwẹn kpahen oborẹ ọmọ wẹn ta na, kerhọ kẹ ọdavwẹ rọyen wọ da tobọ roro nẹ obo rẹ ọ ta na ghwe fiemu kẹ wẹ-ẹ.

“Ofori nẹ a vwẹ imuẹro kẹ emọ rẹ avwanre nẹ ayen ghanre kẹ avwanre. Kidie ayen rhe vwo imuẹro yena-a, ayen gbe cha vuẹ avwanre obo rehẹ ẹwẹn raye-en ọkiọvo dede ayen sa tobọ bru ihwo efa ra vwọ kẹ ukẹcha.”—Maranda.

“Iroro rẹ ọmọ wẹn da tobọ chọ dede, wo muẹ ghwọkuo-o.”—Anthony.

UCHEBRO RI BAIBOL: “Kẹnoma rẹ obo ru wo nyo.”—Luk 8:18.

Reyọ uphẹn ro rhiephiyọ eje vwo ruiruo. Ọkievo emọ se rhievun ta ota kẹ ọsẹ yẹrẹ oni rayen siẹrẹ ayen rhe chidia hirharoku ohwohwo-o.

“Avwanre vẹ emọ rẹ avwanre ta ota avwanre vẹ ayen da hẹ imoto. Otaẹtakuẹgbe tiọnana yovwin vrẹ ọ re avwanre vẹ ayen de chidia hirharokuẹ ohwohwo ta ota.”—Nicole.

Ọke rẹ emuẹriọ jẹ omamọ uphẹn ra vẹ emọ sa vwọ ta ota kugbe.

“Ọke rẹ avwanre da ria emu vwẹ ovwọnvwọn yen avwanre vwọ ta ota kpahen obo re phiare vwẹ ẹdẹ yena. Uruemu nana ku avwanre kugbe, o ji jẹ avwanre riẹn nẹ ihwo herọ re cha chọn avwanre uko vwẹ ọke rẹ ebẹnbẹn.”—Robin.

UCHEBRO RI BAIBOL: “Kohwo kohwo fobọ nyo ẹme, ọ fobọ, kpahe ota-a.”—Jems 1:19.