A sa vwẹroso ihwo re dia egbowian. Ayen nabọ ruiruo ra kẹ ayen je fobọ ruẹ ayen nẹ otọ.

Emiọvwọn se yono emọ rayen vwọ dia egbowian tobọ vwẹ ọke rẹ emọ na da hanvwe mamọ. Ọbe na Parenting Without Borders da ta: “Emọ se ru oborẹ esẹ vẹ ini rayen vuẹ ayen nẹ ayen ru siẹrẹ ayen de te emeranvwe 15 re. Ayen de rhe te emeranvwe 18 re, kẹ ayen vwo ẹwẹn rẹ ayen vwo ru kemu kemu rẹ esẹ vẹ ini rayen ruẹ. Vwẹ asan buebun, emọ de te ẹgbukpe iyorin yẹrẹ ighwrẹn re, ini vẹ esẹ rayen ki dje oborẹ ayen sa vwọ vwẹ ukẹcha phia vwẹ uwevwin na kẹ ayen. Emọ riẹn erọnvwọn buebun ruẹ dede nẹ ayen jehẹ imitete.”

Vwẹ asan buebun, ighene buebun vrẹn nuwevwin kpo ọrobọ rayen, jẹ ọke rẹ erọnvwọn da gan kẹ ayen re, kẹ ayen rhoma rhivwin bru Esẹ vẹ Ini rayen ra. Ọkiọvo, ọnana phia kidie e yono ayen kpahen obo ra ghwọrọ igho wan, vwẹrote uwevwin, je dia egbowian vwo nẹ ọkiemọ rhe-e.

Ọtiọyena, ofori nẹ wo yono emọ wẹn oborẹ ayen sa vwọ dia egbowian enẹna rere ayen vwọ riẹn oborẹ ayen che ru vwẹ ọke rẹ ayen de te omiragua re. Ọbe na How to Raise an Adult tare nẹ, “ofori emiọvwọn yono emọ rayen vwo nẹ ọkiemọ rhe obo ra dia egbowian rere ayen se vwo mu oghwa rẹ akpeyeren rayen komobọ siẹrẹ ayen de te omiragua re.”

Kẹ ayen iruo rẹ ayen che ru vwẹ uwevwin na.

ODJEKẸ RI BAIBOL: “Vwẹ evun rẹ owian ejobi erere herọ.”​—Isẹ 14:23.

Emọ vwo ẹwẹn rẹ ayen vwo ru kemu kemu rẹ esẹ vẹ ini rayen ruẹ. Wọ sa womarẹ owenvwe nana rẹ ayen vwori na vwọ kẹ ayen iruo vwẹ uwevwin na.

Esẹ vẹ ini evo guọnọ vwẹ iruo kẹ emọ raye-en. Ayen roro nẹ kidie nẹ a vwẹ iruo rẹ isikuru buebun vwọ kẹ ayen kẹdẹ kẹdẹ, o rhe fo ayen vwo phiba-a.

Ẹkẹvuọvo, emọ ra vwẹ iruo kẹ vwẹ uwevwin yen me ruẹ yovwẹn vwẹ isikuru, kidie ọnana cha nẹrhẹ ayen yono obo ra ton iruo phiyọ, ayen mi ji ruo re. Ọbe na Parenting Without ­Borders da ta: “A rha rhọnvwe kẹ emọ nẹ ayen chọn avwanre uko vwẹ uvwre rẹ ọke rẹ owenvwe na ji vwo rhe aye-en, ọ cha nẹrhẹ ayen roro nẹ a vwọ vwẹ ukẹcha kẹ ihwo efa dia obo re ghanre-e . . . Ayen ji che rhẹro rọyen nẹ ihwo efa cha wian vwọ kẹ ayen.”

 Eta nana nẹrhẹ a riẹn nẹ a vwọ vwẹ iruo kẹ emọ vwẹ uwevwin nẹrhẹ ayen riẹn obo ra vwẹ ukẹcha kẹ ihwo efa, ukperẹ ayen vwo rhẹro rọyen nẹ ihwo efa yen cha chọn ayen uko. Iruo ra vwọ kẹ emọ vwẹ uwevwin chọn ayen uko vwọ riẹn nẹ ayen pha ghanghanre kẹ orua na​—ayen ji vwo oghwa vwọ.

Chọn emọ wẹn uko vwọ riẹn nẹ o vwo obo ri che nẹ obuko rẹ oruchọ rayen rhe.

ODJEKẸ RI BAIBOL: “Kerhọn rẹ uchebro rere wọ reyọ uyono, rere wo vwo aghwanre hẹrhẹ ọke rọ cha.”​—Isẹ 19:20.

Ọ da dianẹ ọmọ wẹn miovwo orọnvwọn rẹ ohwo ọfa, wo rhurhu obo ro ruru na-a. Emọ se rhiabọreyọ obo ri nẹ obuko rẹ oruchọ rayen cha​—vwẹ ẹdia nana, ayen se yovwunu, ọkiọvo ayen je sa vwẹ ukẹcha phia rhuẹrẹ oborẹ ayen miovwiri na.

Emọ da riẹn nẹ oruchọ rayen yen so obo re phiare, ọ cha nẹrhẹ ayen

• dia ihwo rẹ uyota je rhọnvwe oruchọ rayen

• kẹnoma kẹ uruemu rẹ ayen vwo guẹn oruchọ rayen nyẹ ihwo efa

• kẹnoma kẹ uruemu rẹ ayen vwo guomariase

• yovwunu vwẹ ọke ro de fo nẹ ayen ru ọtiọyen