O mudiaphiyọ uruemu ra vwọ fobọ yerẹn ghene obo re brare rọ phiare. E vwo uruemu nana womarẹ obo re rhiẹromrẹ re. Kirobo rẹ ọmọboba cha sa yan vrabọ rẹ eshe-e ye, ọtiọyen yen o ji che hirharoku ebẹnbẹn evo tavwen o ki se phikparobọ vwẹ akpeyeren.

Ofu dje emọ evo siẹrẹ ayen rhe se phikparobọ-ọ, ọtiọyen ji te ọke rẹ ayen de hirharoku ẹdia egangan evo yẹrẹ vwẹ ọke rẹ ihwo efa da kpọ ayen vi. Efa mi rhe chukoku ẹgbaẹdavwọn rẹ ayen vwọ rhoma vrẹn. Ẹkẹvuọvo, ofori nẹ ayen riẹn nẹ,

• Avwanre che se phikparobọ vwẹ erọnvwọn eje re ruẹ-ẹ.​—Jems 3:2.

• Kohwo kohwo yen hirharokuẹ ebẹnbẹn vwẹ akpeyeren.​—Aghwoghwo 9:​11.

• Ọkpọvi nẹrhẹ e ruẹ yovwẹn phiyọ.​—Isẹ 9:9.

Ọmọ wẹn che fiudugberi hirharoku ebẹnbẹn rẹ akpeyeren enẹna kugbe obaro obọ siẹrẹ ọ da riẹn obo re yerẹn ghene ayen asaọkiephana.

Ọke rẹ ọmọ wẹn rha riẹn orọnvwọn ru-u.

ODJEKẸ RI BAIBOL: “Ọvwata she asiẹ eghwrẹ ọ me rhoma vrẹn.”​—Isẹ 24:16.

Chọn ọmọ wẹn uko vwọ vwẹ ẹro abavo vwo ni ebẹnbẹn rọyen. Kerẹ udje, die yen ọmọ wẹn che ru o de she ọdavwini vwẹ isikuru? Ọ cha tanẹ, “O vwo obo me riẹn ruẹ?”

Ọmọ wẹn se vwo yerin ghene ebẹnbẹn na, vwẹ ukẹcha kẹ vwọ riẹn obo ro se vwo ru yovwinphiyọ vwẹ ọke ọfa. Vwẹ idjerhe ọtiọna, kọ sa rhuẹrẹ ebẹnbẹn na phiyọ ukpe rọ vwọ nẹrhẹ o muomaphiyọ.

Vwẹ ọke vuọvo na, kẹnoma kẹ uruemu wọ vwọ rhuẹrẹ ebẹnbẹn rẹ ọmọ wẹn phiyọ. Ukperẹ ọtiọyen, chọn uko vwọ riẹn obo rọ sa vwọ rhuẹrẹ ebẹnbẹn na phiyọ komobọ. Wọ sa nọ, “Die yen wo rori nẹ wo se ru rere wo vwo ru yovwinphiyọ vwẹ isikuru?”

Ọke rẹ obo re brare da phia.

ODJEKẸ RI BAIBOL: “Ovwan riẹn obo re cha phia kẹ arhọ rẹ ovwan odẹ rọ cha na-a.”​—Jems 4:​14.

O vwo ohwo vuọvo rọ riẹn odẹ-ẹ. Ọdafe ri nonẹ sa dia ogbere odẹ rọ cha na; ohwo ro vwo omakpokpọ nonẹna se she ro ọga odẹ rọ cha  na. “Onẹdjẹ na dia ọ rẹ otu ro bro okpakpa-a, eyẹrẹ ofovwi na dia ọ rọ goma-a,” eriyin Baibol na tare, “ẹkẹvuọvo ọke vẹ uphẹ ro di bru ayen ejobi cha.”​—Aghwoghwo 9:​11.

Kerẹ emiọvwọn, ru obo wo se ru eje vwọ sẹro ọmọ wẹn nẹ imuoshọ. Vwọrẹ uyota, a cha sa sẹro emọ avwanre nẹ erọnvwọn ebrabra eje-e.

Ọ sa dianẹ ọmọ wẹn je rhe ghwanre te ohwo rẹ iruo vabọ yẹrẹ ohwo ro se hirharoku ebẹnbẹn rẹ igho-o. Dedena, wọ sa vwẹ ukẹcha kẹ vwo yerin ghene ebẹnbẹn efa vwẹ akpeyeren​—kerẹ udje, ọke rọ vẹ ugbeyan rọyen da fan yẹrẹ rẹ ohwo rẹ orua ro vwo ẹguọnọ kpahen de ghwu. a

Vwẹ ọke ra da ghwọku ọmọ wẹn.

ODJEKẸ RI BAIBOL: “Kerhọn rẹ uchebro . . . rere wo vwo aghwanre hẹrhẹ ọke rọ cha.”​—Isẹ 19:20.

Siẹrẹ ohwo da vuẹ ọmọ wẹn nẹ ọ wian kpahen ẹdia evo; ọ dia ọyena mudiaphiyọ nẹ ọ guọnọ djuguegue muo yẹrẹ so omaẹwan vwọ kẹ-ẹ, ukperẹ ọtiọyen ọ guọnọ chọn uko vwo ru ewene evo ro fori nẹ o ru.

Wẹ vẹ ọmọ wẹn yen cha mrẹ erere siẹrẹ wo de yono obo re rhiabọreyọ ọghwọku. Ọsẹ ọvo re se John da ta: “Siẹrẹ emọ rha riẹn obo ra rhuẹrẹ ebẹnbẹn rayen phiyọ komobọ-ọ, ayen che se yono-o. Ayen cha so eta koko kẹ wẹ, ku wọ cha ghwọrọ ọke wẹn eje vwọ rhuẹrẹ ebẹnbẹn rẹ ayen soro. Ọnana cha so ofudjevwe kẹ emiọvwọn vẹ ọmọ na.”

Idjerhe vọ yen wọ sa vwọ vwẹ ukẹcha kẹ ọmọ wẹn vwọ mrẹ erere vwo nẹ ọghwọku? A da ghwọku ọmọ wẹn vwẹ isikuru yẹrẹ asan efa​—kẹnoma kẹ ota kerẹ, ofori nẹ a ghwọkuo-o. Ukperẹ ọtiọyen, wọ sa nọ:

• “Die yen wo rori nẹ ọyen sorọ a vwọ ghwọku uwe?”

• “Wo se ru yovwinphiyọ?”

• “Wọ da mrẹ oma wẹn vwẹ ẹdia tiọna ọke ọfa, die wo che ru?”

Karophiyọ nẹ ọkpọvi che fierere kẹ ọmọ wẹn enẹna vẹ ọke ro de te omiragua re.