Emọ guọnọ uchebro vẹ odjekẹ rẹ imiragua vwẹ akpeyeren rayen. Emiọvwọn yen vwo oghwa rẹ ayen vwọ vwẹ uchebro vẹ odjekẹ vwọ kẹ emọ rayen. Ẹkẹvuọvo, ihwo efa re dia imiragua je sa kẹ emọ wẹn uchebro.

Vwẹ asan buebun, uchọke rẹ emọ nene imiragua ghwọrọ kuẹgbe tumuku-u. Roro kpahen iroro evo re sorọ:

• Emọ joma ghwọrọ ọsoso rẹ ẹdẹ rayen eje vwẹ isikuru, rọ dia asan rẹ emọ isikuru de bun nọ iyono vẹ imiragua efa.

• Isikuru de kuphiyọ nu, emọ evo vwa esẹ vẹ ivi rayen vwẹ uwevwi-in kidie ayen kpo iruo.

• Ehiahiẹ ọvo re ruru djerephia nẹ vwẹ United States, emọ rehẹ ẹgbukpe 8 vẹ 12 ghwọrọ ọke buebun vwo nẹ TV, kerhọ rẹ ine ji te igemu. a

Ọbe na Hold On to Your Kids da ta: “Ọ dia ini, esẹ, iyono vẹ imiragua efa yen emọ brẹ ra siẹrẹ ayen da guọnọ uyono, odjekẹ vẹ omamọ rẹ udje-e, ẹkẹvuọvo . . . edje rayen yen ayen brẹ ra.”

Nene emọ wẹn ghwọrọ ọke kugbe.

ODJEKẸ RI BAIBOL: “Yono ọmọ phihọ idjerhe ro che nene, ọ da ghwanre nure ọ rha cha yan jovwo-o.”​—Isẹ 22:6.

Emọ guọnọre nẹ esẹ vẹ ini rayen vwẹ odjekẹ vẹ ukẹcha vwọ kẹ ayen. Vwọrẹ uyota, ewena tare nẹ imighene guọnọre nẹ esẹ vẹ ini rayen bru ayen uche ukperẹ edjedje rayen. Dr. Laurence Steinberg de si vwẹ ọbe na You and Your Adolescent: “Emiọvwọn yen ihwo rẹsosuọ ri toroba uruemu rẹ emọ rayen vwo nẹ ọkiemọ re te omiragua.” Ọ da je ta: “Emọ guọnọ riẹn obo wo roro, ayen je guọnọ kerhọ oborẹ wọ ta, ọ da tobọ dianẹ ayen rhọnvwephiyọ obo ru wọ tare na-a.”

Ọ vwọ dianẹ ọmọ wẹn guọnọ odjekẹ wẹn na, gba davwẹngba wẹn eje vwo ru ọtiọyen. Nene emọ wẹn ghwọrọ ọke kugbe, wọ vuẹ ayen obo rehẹ ẹwẹn wẹn, ẹro wo vwo nẹ emu, obo re ghanre kẹ wẹ, vẹ obo wo rhiẹromrẹ vwẹ akpeyeren re.

 Guọnọ ohwo rọ sa kẹ emọ wẹn uchebro.

ODJEKẸ RI BAIBOL: “Ohwo rọ yan nene ẹvwaghwanre ko vwo aghwanre.”​—Isẹ 13:20.

Wọ sa vwẹ ẹwẹn roro omiragua rọ sa dia uvi rẹ udje vwọ kẹ ọmọ wẹn? Gbe ru ọrhuẹrẹphiyotọ rọ vẹ ọmọ wẹn vwọ ghwọrọ ọke kugbe. Ọ dia ọnana mudiaphiyọ nẹ ohwo ọfa yen che muoghwa rẹ ọmọ wẹn kẹ wẹ-ẹ. Ohwo tiọyen ru wọ vwẹroso nẹ ọ cha so omaẹwan kẹ ọmọ wẹ-ẹn na, ji se toroba uyono ru wọ vwọ kẹ ọmọ wẹn na. Baibol na vuẹ avwanre nẹ, dede nẹ Timoti te omirigua re, ọ je mrẹ erere gbidiki kidie nẹ ọ vwẹ ugbeyan vwo mu Pọl ro viere shesheri, Pọl komobọ ji mrẹ erere norhe.​—Filipae 2:​20, 22.

Nonẹna, erua buebun rha dia kuẹgbe vwẹ uwevwin yẹrẹ ekogho ọvo-o. Kirobo ra je mrẹ ọke buebun, ini vẹ esẹ ride, iniọvo rẹ esẹ vẹ ini rayen, vẹ ihwo rẹ orua rayen efa sa dia asan ri sherabọ kẹ ayen. Ọ da dia ọtiọyen yen ọ hepha kẹ wẹ, gba davwẹngba vwọ guọnọ imiragua ri vwo iruemu iyoyovwin ru wọ guọnọre nẹ emọ wẹn vwo.