Dede nẹ ihwo evo ri yono ẹbe kodo tare nẹ uvweri vwomaphia vwẹ ẹdia sansan re vwọ kpahen ohwohwo, jẹ, o vwo oborẹ ohwo ọvuọvo vwere uvweri wan. Ọ vwọ dianẹ oborẹ ihwo vwere uvweri wan fẹnẹ ohwohwo na, ọnana ko mudiaphiyọ nẹ ihwo ri vwere uvweri ga-an na, ughwu rẹ ohwo rẹ ayen vwerẹ na ghwa da aye-en gbanẹ ayen “guọnọ dje” oborẹ ọma ru ayen phia-a? Ọ ghwa dia ọtiọye-en. Dede nẹ ra vwọ viẹ je ta oborẹ oma ru ohwo sa vwẹ ukẹcha phia, jẹ, ọ dia ọnana mudiaphiyọ nẹ o vwo idjerhe ọvo kpoi ro “me fo” re vwo vwere uvweri-i. Asan re nurhe, oka rẹ ohwo ra hepha, obo re hirharoku vwẹ akpeyeren kugbe oborẹ ohwo na ghwu wan se djobọte obo re vwere uvweri wan.

Ọkiọvo ihwo ri vwere uvweri ghwa riẹn oborẹ ayen se rhẹro rọyen ọke rẹ ohwo rẹ ayen vwo ẹguọnọ kpahen de ghwu-u. Ẹkẹvuọvo, o vwo oka iroro yẹrẹ ebẹnbẹn evo re dje ẹmrẹmrẹ re se rhẹro rọyen. Roro kpahen evo:

Omaemuophiyọ ọgangan. Ohwo sa viẹ, vwo urhurusivwe rọ vwọ rhoma mrẹ ohwo rọyen ro ghwuru na ji fobọ mu opharo phiyọ vwẹ ọke sansan. Omaemuophiyọ na sa ganphiyọ siẹrẹ ọ da karophiyọ ohwo ro ghwuru na kugbe ọke rọ da vwerhẹn evwerhẹn kpahọn. Siẹrẹ ohwo re vwo ẹguọnọ kpahen de ghwu, ọke rẹsosuọ ọ sa so uguegue, ọ je sa bẹn re vwo vwo imuẹro kpahen obo re phiare na. Tiina karophiyọ obo re phiare ọke ọshare rọyen Timo vwo ghwu kpregede. Ọ da ta: “Mi guegueri mamọ mi ke vwo nyo. Me sa tobọ viẹ-ẹ. Obo re phiare na da vwẹ te erhi. O mu vwe ẹro nẹ omẹvwẹ yen emu nana phia kẹ-ẹ.”

Ẹnwan, ophu ọgangan, kugbe ẹwẹn abe jẹ ẹbẹre ọvo rẹ uvweri. Ivan da ta: “Ivun miovwon uvwe vẹ aye mẹ Yolanda mamọ ọke ọmọshare avwanre Eric rọhẹ ẹgbukpe 24 vwo ghwu nu! Ọnana gbe avwanre unu kidie avwanre dia ihwo ri muophu ọgangan jovwo-o. Avwanre ji vwo ẹwẹn rẹ abe, kidie kẹ avwanre roro sẹ o vwo erọnvwọn efa avwanre rhe ru vwọ chọn ọmọ rẹ avwanre na uko.” Alejandro ji vwo ẹwẹn rẹ abe tiọyena ọke aye rọyen vwo ghwu fikirẹ ọga ro krotọ, ọ da ta: “Ẹsosuọ mi ke roro nẹ, ọ vwọ dianẹ Ọghẹnẹ vwẹ uphẹn kẹ vwẹ nẹ me rioja na kọyen mẹvwẹ orharhe ohwo. Ọnana da nẹrhẹ mi vwo ẹwẹn abe, kọ ghwa họhọ nẹ me harhan Ọghẹnẹ nẹ ọyen re so obo re phiare na.” Kostas ra ta ota kpahen vwẹ uyovwinrota rọ wanre na da je ta: “Ọkiọvo ivun ri Sophia miovwon uvwe kidie nẹ o ghwuru. Ọnana da nẹrhẹ mi vwo ẹwẹn rẹ abe, me vwọ mrẹvughe nẹ ọ dia ọyen re so ughwu na-a.”

Iroro rọ yanghan kuẹ. O se vwo ọkiọvo iroro rẹ ohwo vwọ yanghan kuẹ. Kerẹ udje, ohwo ro vwere uvweri se roro nẹ ọyen se nyo, djobọte yẹrẹ mrẹ ohwo ro ghwuru na. Ọ je sa mrẹ bẹnbẹn ro vwo mu ẹwẹn phiyọ obo ro ruẹ yẹrẹ karophiyọ erọnvwọn. Tiina da ta: “Ọkiọvo mẹ vẹ ohwo da ta ota, ki mi roro kpahen erọnvwọn re phiare ọke rẹ Timo vwo ghwu ukperẹ ota mẹ vẹ ohwo na ta na. Kidie nẹ mi rhe se mu ẹwẹn phiyọ erọnvwọn na-a, ofu ko dje vwe.”

Ẹwẹn re vwo siomareyọ. Oma sa bajẹ ohwo ro vwere uvweri ọke rọ da hẹ ohri rẹ ihwo efa. Kostas da ta: “Me da hẹ uvwre rẹ ihwo re rọvwọnre, ki mi no nẹ ofori me vwọ dia etiyi-in. Mi ji nẹ oma mẹ ọtiọyen ọke me da hẹ ohri rẹ ihwo re je rhe rọvwọ-ọn.” Yolanda rọ dia aye rẹ Ivan da ta: “Ọ pha bẹnbẹn ra vwọ dia ohri rẹ ihwo re ta ota kpahen ebẹnbẹn rayen re gan te ọ rẹ avwanre-e! Vwẹ ọke yena, o ji vwo ihwo re vuẹ avwanre kpahen oborẹ akpọ yovwin emọ rayen te re. Dede nẹ oma vwerhen ovwẹ vwọ kẹ ayen, jẹ, me mrẹ bẹnbẹn me vwọ kerhọ rayen. Mẹ vẹ ọshare mẹ riẹnre nẹ vwẹ obaro na erọnvwọn eje che shephiyọ, ẹkẹvuọvo, avwanre vwo owenvwe yẹrẹ odirin ra vwọ hẹrhẹ te ọke yena-a.”

Jẹ omakpokpọ evwo. A mrẹ ewene vwẹ oborẹ ohwo riemu wan, ekroma kugbe ovwerhẹn rọyen. Aaron karophiyọ obo re phiare ẹgbukpe ọvo ọsẹ rọyen vwo ghwu nu: “Kọ bẹn me vwọ vwerhẹn. Uvwre ọke vuọvo vwẹ kason kason yen mi vwo vrẹn vwo roro kpahen ughwu rẹ ọsẹ mẹ na.”

Alejandro karophiyọ nẹ vwẹ ọke yena o vwo ebẹnbẹn ri jẹ omakpokpọ evwo ra ghwa riẹn otọ rọye-en: “Idọktọ fuẹrẹn oma mẹ abọ buebun, je kẹ vwẹ imuẹro nẹ emu vuọvo shechọ vwọ-ọ. Mi niro nẹ uvweri yen so jẹ omakpokpọ evwo mẹ na.” Ememerha na oma rọyen de rhi shephiyọ. Jẹ, ọyen emu aghwanre rẹ Alejandro vwọ yanran ra mrẹ idọktọ. Uvweri sa nẹrhẹ ohwo jẹ omakpokpọ evwo, ọ je sa nẹrhẹ ọga rọhẹ evunrẹ oma ganphiyọ yẹrẹ so ọga kpokpọ phiyọ oma.

Ebẹnbẹn re vwo ruiruo ro fori nẹ e ru. Ivan karophiyọ, rọ vwọ ta: “Eric vwo ghwu nu, ọ dia igbeyan vẹ ihwo orua ọvo yen avwanre vuẹre-e, avwanre je vuẹ ihwo efa kerẹ ọga rọyen vwẹ obẹ iruo kugbe ohwo ro vwo uwevwin rọ dia. O ji vwo ẹbe rẹ urhi buebun re che nenesi rayen. Ọtiọyena avwanre da hiẹ ekuakua rẹ Eric. Enana eje guọnọ ọke vẹ erhọn ẹka rẹ avwanre vwẹ ọke rẹ ofudjevwe yena.”

Ọke vwọ yanran na yen ihwo evo che vwo hirharoku egbabọse na, ọke rẹ ayen da cha vwẹrote owian rẹ ohwo ro ghwuru na vwẹrote jovwo. Ọyena yen obo re phia vwọ kẹ Tiina. Ọ da ta: “Timo yen vwẹrote eta rẹ iruo vẹ irueru rẹ ibanki rẹ avwanre ruẹ. Mẹvwẹ kọyen mu eghwa na enẹna, ọnana rhoma ri toroba ofudjevwe mẹ. Mi se ghini ru enana eje i mi shephiyọ abavo?”

Ebẹnbẹn nana eje ra ta ota kpahen re na ghwe djephia nẹ ọ bẹnre mamọ re vwo yerin ghene uvweri. Vwọrẹ uyota, odjadja re rhiẹromrẹ siẹrẹ ohwo re vwo ẹguọnọ kpahen de ghwu sa gan mamọ, ẹkẹvuọvo, ẹriẹn rẹ ọnana sa vwẹ ukẹcha kẹ ihwo rẹ ohwo rayen ghwe ghwu obọ vwo yerin ghene ẹdia na. Karophiyọ nẹ ọ dia ihwo eje yen rhiẹromrẹ ebẹnbẹn nana eje rẹ uvweri ghwa cha na-a. Vwọ vrẹ ọyena, ẹwẹn rẹ ihwo ri vwere uvweri ji se te otọ siẹrẹ ayen da riẹn nẹ ọmiaovwẹ rẹ uvweri ọyen obo re sa phia vwọ kẹ kohwo kohwo ro vwere uvweri, ọ dia emu ọrhorha-a.

Obo wo se rhẹro rọyen: Uvweri ọgangan che kpotọ ememerha, ọ cha dia bẹdẹ-ẹ. Ọ dia ọnana mudiaphiyọ nẹ a “kpairoro” vrẹ ohwo ro ghwuru na-a. Ememerha yen ebẹnbẹn eje uvweri ghwa cha che vwo kpotọ. Ayen sa rhoma kọn rhe siẹvuọvo yẹrẹ uvwre rẹ ọke evo siẹrẹ a da karophiyọ erọnvwọn evo re phia wanre kerẹ ẹkarophiyọ rẹ ẹdẹ rẹ orọnvwe. Ẹkẹvuọvo, ọke vwọ yanran na, erọnvwọn eje mi rhi shephiyọ. Ọnana phia, marho ọ da dianẹ ohwo ro vwere uvweri na jowọ ro vwo yerin ghene ebẹnbẹn na je mrẹ ukẹcha rẹ ihwo rẹ orua yẹrẹ igbeyan rọyen.

Mavọ yen o che kri te? Vwọ kẹ ihwo evo, ọmiaovwẹ rẹ uvweri na se kpotọ vwẹ emeranvwe evo. Vwọ kẹ ihwo efa, ọ sa dianẹ ẹgbukpe ọvo yẹrẹ ivẹ cha wanvrẹ tavwen erọnvwọn ki shephiyọ. Evo tobọ guọnọ ọke ogrongron. a Alejandro da ta: “Vwọ kẹ vwẹ, mi vwere uvweri te omarẹ ẹgbukpe erha.”

Roro kẹ oma wẹn. Wọ ro ẹnwan ọkamuka kpahen obaro na-a, owọ ọvuọvo yen a jẹ vwẹ okọ rẹ edi, wọ me je riẹn nẹ ọmiaovwẹ rẹ uvweri ghwa cha, cha dia bẹdẹ-ẹ. Vwọ vrẹ enana, o vwo erọnvwọn efa wo se ru asaọkiephana vwo siobọ rẹ uvweri wẹn kpotọ, rere o vwo jẹ siotọ?