Irhuon vẹ Osẹnvwe Ọyen Eshegberudio Vwọ kẹ Vwẹ

EILEEN BRUMBAUGH YEN GBIKUN NA

A GHẸRẸ ovwẹ ghwanre vwẹ ẹga rẹ Old Order German Baptist Brethren, ọ họhọ ẹga ri Amish kugbe Mennonite. A vwẹ ẹga nana vwo mu vwẹ ukpe ri 1708 vwẹ Germany. Ọbe na Encyclopedia of Religion tare nẹ a vwẹ ẹga nana vwo mu kidie ihwo evo vwo imuẹro nẹ ofori ihwoeje vwo nyo iyẹnrẹn rẹ ikuegbe rẹ akpeyeren ri Kristi. Imuẹro nana nẹrhẹ ihwo rẹ ẹga na ji imishọnare buebun kpo ẹkuotọ sansan re ghwoghwo ota.

Vwẹ 1719, ẹmẹko ọvo rẹ Alexander Mack suẹn da rhe orere ọvo vwẹ United States ra rhe riẹn phiyọ Pennsylvania enẹna. Vwo nẹ ọke yena rhe, ẹko efa buebun de nẹ ẹmẹko nana rhe. Oborẹ ẹko ọvuọvo vwo ẹruọ rẹ iyono rẹ Alexander Mack phiyọ wan da fẹnẹ ohwohwo. Omarẹ ihwo 50 yehẹ evunrẹ ishọshi otete rẹ avwanre na. Avwanre niro nẹ ọyen obo re ghanre re vwo se Baibol na ji ru erọnvwọn eje ilori ẹga na tare nẹ e ru.

O krakpọ re yen orua rẹ avwanre vwọ hẹ ẹga nana. Me vwomaba ishọshi nana ji bromaphiyame ọke me vwọ hẹ ẹgbukpe 13. Me vwọ ghwanra cha, e yono uvwe nẹ ọ chọre re vwo vwo imoto, itraktọ, ifonu, tobọ te iredio yẹrẹ korọnvwọn korọnvwọn rọ vwẹ ẹgba rẹ ẹlẹtriki vwo ruiruo. Ọkieje yen avwanre re dia eya na vwo kuẹ iwun diodi re nabọ gron te otọ phiyọ, avwanre rhie ẹto rẹ uyovwin rẹ avwanre phiyọ-ọ, e ji brẹ ẹto na-a. Eshare na muẹ ẹto egban. Kidie nẹ Jesu tare nẹ a ka ẹbẹre vuọvo rẹ akpọ na-a, kẹ avwanre roro nẹ ọyen umwemwu re vwo ghworo imekọpu, kuẹ iwun rẹ ọke nana phiyọ, vẹ erọnvwọn ohọre yẹrẹ ivie.

E yono avwanre nẹ e muọghọ okokodo kẹ Baibol na kidie ọyen Ota rẹ Ọghẹnẹ. Kurhiọke kurhiọke tavwen avwanre ke riemu, avwanre mi koko vwẹ utuwevwin, ọsẹ avwanre mi se uyovwinrota ri Baibol ọvo ji djekpahen obo ro seri na. Avwanre mi shiguẹ ọke ọsẹ avwanre da cha nẹrhovwo. Ọyena da wan nu, oni avwanre me vwariẹn Ẹrhovwo rẹ Ọrovwori na. Ọkieje yen mi vwo rhẹro rẹ ẹga rẹ urhiọke na kidie orua na eje koko, je nabọ fuẹrẹn Ota rẹ Ọghẹnẹ kuẹgbe.

Ẹghwa ọvo rẹ avwanre kọn ekankọn sansan phiyọ, rọ kẹrẹ Delphi vwẹ Indiana U.S.A. yen avwanre diare. Iyesi yen avwanre vwo muẹ eghwa na ro orho, a me shẹ vwẹ irhuvwun yẹrẹ ghoro vwo nuwevwin kpuwevwin. Avwanre ji roro nẹ owian ọgangan jẹ ẹbẹre ọvo rẹ ẹga rẹ avwanre vwọ kẹ Ọghẹnẹ. Ọtiọyena, kẹ avwanre muomaphiyọ, jokpa ri Sunday, kidie avwanre niro phiyọ Ẹdẹ rẹ Urovwoma. Ọkievo, ọ bẹn avwanre vwo mu ẹwẹn phiyọ ẹga rẹ Ọghẹnẹ fikirẹ iruo rẹ aghwa na.

Orọnvwe kugbe Orua

Vwẹ 1963, me vwọ hẹ ẹgbukpe 17, me da rọvwọn James, ẹga ri Old Brethren yen ọ je ra. Ọsẹ vẹ oni rẹ ọsẹ rọyen rode ji kpo ẹga vuọvo na. Avwanre vwo urhurusivwe ọgangan rẹ avwanre vwọ ga Ọghẹnẹ, avwanre ji vwo imuẹro nẹ ishọshi rẹ avwanre na ọvo yen ọ rẹ uyota.

Vwẹ 1975 jẹ avwanre vwiẹ emọ esan re, avwanre de rhe vwiẹ ọmọ righwrẹn rọ dia ubrevwiẹ vwẹ 1983. Rebecca rọ dia ọmọ avwanre rivẹ yen ọmọtẹ vuọvo rẹ avwanre vwiẹre. Avwanre wian gangan, jẹ imigho krẹn yen avwanre ghwọrọ, kidie avwanre yeren akpọ ọlọlọhọ. Avwanre davwẹngba vwọ reyọ oborẹ avwanre yono mie ọsẹ vẹ oni rẹ avwanre kugbe ihwo efa ri kpo ẹga ri Old Brethren na vwo yono emọ rẹ avwanre.

Irhuon vẹ osẹnvwe ghanre mamọ kẹ ihwo ri kpo ẹga ri Old Brethren na. Kidie nẹ o vwo ohwo vuọvo rọ sa riẹn obo rehẹ ubiudu rẹ ohwo-o, kẹ avwanre roro nẹ oborẹ ohwo sẹn osẹnvwe wan yin che dje oka rẹ ohwo rọ hepha vwẹ obevun. Ọtiọyena, ohwo de bru ona phiyọ ẹto rọyen vrẹka, yẹrẹ ona re bru phiyọ amwa vẹ ewun diodi rọyen re si emuọvo phiyọ-ọ na da rho nọ, ke nẹ ohwo tiọyena phiyọ ohwo rọ kparoma. Ọkievo, e nẹ erọnvwọn nana ghanghanre vwọ vrẹ oborẹ Baibol na tare.

Obo re Rhiẹromrẹ Vwẹ Uwodi

Vwẹ uvwre rẹ ukpe ri 1965 fiẹ 1969, e de mu oniọvo rẹ ọshare mẹ otete re se Jesse, ra je yọnre ghwanre vwẹ ẹga ri Old Brethren na phiyọ uwodi, kidie nẹ ọ rhọnvwe ruiruo rẹ isodje-e. Rọ vwọ hẹ uwodi na, ọ da mrẹ Iseri ri Jihova ri ji roro nẹ iruo rẹ isodje vwọso iji ri Baibol na. (Aizaya 2:4; Matiu 26:52) Jesse riavwerhen rẹ otaẹtakuẹgbe buebun rọ vẹ Iseri na ta kpahen Baibol na, uruemu rayen ji je mamọ. A vwọ vwẹ Baibol na yono abọ buebun nu, o de bromaphiyame kerẹ ọvo usun rẹ Iseri ri Jihova​—ọnana miovwo avwanre ivun mamọ.

Jesse da ta ota kẹ ọshare mẹ kpahen obo ro yonori na. O ji ru ọrhuẹrẹphiyotọ rẹ oborẹ ọshare mẹ James se vwo vwo Awake! vẹ Uwevwin Orhẹrẹ na ọkieje. Imagazini na nẹrhẹ urhurusivwe rọyen kpahen Baibol na ganphiyọ. Ọkieje yen James vwo vwo ẹwẹn rọ vwọ ga Ọghẹnẹ, jẹ ọke buebun na, o no nẹ o sherabọ kẹ, ọnana de muo vwo vwobọ vwẹ kemu kemu rọ sa chọn uko vwo sikẹrẹ Ọghẹnẹ.

Ilori rẹ ẹga avwanre jiriro kẹ avwanre nẹ avwanre se ẹbe rẹ ẹga efa re họhọ ọ rẹ avwanre, dede nẹ avwanre niro nẹ ẹga tiọyena hẹ ẹbẹre ọvo rẹ akpọ na. Ọsẹ mẹ nama kerhọ rẹ eta rẹ Isiri ri Jihova kakaka-a. Ọ guọnọre nẹ avwanre se Uwevwin Orhẹrẹ vẹ Awake! na-a. Ọtiọyena, ivun de miovwo uvwe ọke me vwọ mrẹ nẹ James se ayen. Oshọ mu vwe nẹ o che rhiabọreyọ iyono rẹ efian.

O krire ri James vwo vwo ẹwẹn ivivẹ kpahen iyono rẹ ẹga ri Old Brethren evo ro niri nẹ e vwọso Baibol na​—ma rho kẹ uyono rọ tare nẹ ọyen umwemwu ra vwọ wian owian vwẹ Sunday. Kerẹ udje, ishọshi ri Old Brethren na yonori nẹ e se vo ame kẹ ichuru da vwẹ Sunday, ẹkẹvuọvo ọ chọre a vwọ sanvwe odin ọvo nẹ otọ. Ekpako rẹ ishọshi na sa vwẹ Baibol na vwo dje oboresorọ ra vwọ vwẹ urhi nana mu-u. Ememerha na, mi de ji rhi vwo ẹwẹn ivivẹ kpahen iyono tiọyena.

Ọkieje yen e vwo yono avwanre nẹ avwanre yen vwo ẹga rẹ uyota na, avwanre je riẹn oborẹ avwanre se rhiẹromrẹ siẹrẹ avwanre da yan jovwo, ọtiọyena kọ pha bẹnbẹn rẹ avwanre vwọ yan jovwo. Ẹwẹn rẹ obrorhiẹn rẹ avwanre ji ghwe kpokpo avwanre fikirẹ ẹga rọ nabọ nene irhi ri Baibol na-a. Ọtiọyena vwẹ 1983, avwanre de si ileta vwo dje oboresorọ rẹ avwanre vwọ yanjẹ ayen vwo, avwanre da tanẹ ayen se ileta na kẹ ihwo rẹ ishọshi na. A da djẹ avwanre nẹ ishọshi na.

Avwanre Guọnọ Ẹga rẹ Uyota

Ọyena vwọ wan nu, kẹ avwanre guọnọ ẹga rẹ uyota. Avwanre guọnọ ẹga ri ruẹ nene oborẹ ayen yono ihwo efa. Ẹsosuọ, avwanre si ẹga eje ri vwobọ vwẹ ofovwin no. Ẹkẹvuọvo, ẹwẹn avwanre jehẹ ẹga rẹ avwanre nurhe na, kidie avwanre no nẹ e vwo yeren akpọ ọlọlọhọ ji ku iwun diodi phiyọ, ọyen oka ra vwọ riẹn nẹ a ka ẹbẹre vuọvo rẹ akpọ na-a. Avwanre ghwọrọ ọke vwo kin ẹkuotọ na vwo nẹ 1983 re te 1985, avwanre vwọ fuẹrẹn ẹga na ọvuọvo,​—ẹga ri Mennonites, Quakers, kugbe ẹko “diodi” efa.

Vwẹ uvwre rẹ ọke yena, Iseri ri Jihova da kọn bru avwanre rhe vwẹ aghwa rẹ avwanre rọ kẹrẹ Camden, Indiana. Avwanre kerhọ rayen, je vuẹ ayen nẹ Baibol ri King James ọvo yen e che se. Mi muọghọ kẹ orhiẹn-ebro rẹ Iseri na kpahen ofovwin. Ẹkẹvuọvo, me vwọ kerhọ rayen bẹn kẹ vwẹ, kidie mi niro nẹ ayen rha riẹn obo rọ ghanre te ra vwọ womarẹ iwun diodi re si emuọvo phiyọ-ọ, vwo jẹ ẹbẹre ọvo rẹ akpọ na ẹdia-a, kọyen ayen cha sa dia ẹga rẹ uyota na-a. Vwọ kẹ vwẹ, omaẹkparọ yen mu ihwo vwọ sẹn osẹnvwe rọ fẹnẹ oka rẹ avwanre na. Mi vwo imuẹro nẹ ekuakua rẹ akpeyeren nẹrhẹ ohwo kparoma.

James da ton emẹvwa rẹ Iseri ri Jihova phiyọ, ji muẹ emeshare rẹ avwanre evo nene oma. Ivun de miovwo uvwe mamọ. Ọshare mẹ vuẹ vwẹ nẹ mi nene ọyen, ẹkẹvuọvo me rhọnvwa-a. Ẹdẹ ọvo vwo te, ọ da ta, “Ọ da tobọ dianẹ wọ rhọnvwephiyọ iyono rayen eje-e, di nene uvwe rere wọ mrẹ oborẹ ayen djẹ ẹguọnọ kẹ ohwohwo wan.” Ọkieje yen ẹguọnọ rọhẹ uvwre rayen na vwo je James.

Ukuko na, mi de brorhiẹn nẹ mi che nene, ẹkẹvuọvo me cha nabọ ni ayen so. Me da ro Ọguan Ruvie na vẹ iwun diodi mi kuphiyọ kugbe erhu mi vwo tughẹ. Evo usun rẹ emọ rẹ avwanre vwẹ owọ fefe vwo yanran ji ku iwun diodi phiyọ. Dedena, Iseri na nabọ dede avwanre te oma sasasa. Ki mi roro, ‘Dede nẹ avwanre fẹnẹre, jẹ ayen ji rhiabọreyọ avwanre ghene.’

Dede nẹ mi ji vwo vwẹ ẹwẹn nẹ me cha nabọ ni ayen so, jẹ uruemu rẹ ẹguọnọ rayen na vwerhen ovwẹ oma. Mi vrẹn muẹdia ọke rẹ ayen da suine-e, mi ji nene ayen suọ-ọ. Uyono na vwo kuphiyọ nu, me da nọ ayen enọ buebun, me nọ ayen kpahen erọnvwọn rẹ ayen ruẹ ri mi rori nẹ i shephiyọ-ọ, kugbe oborẹ ẹkpo ri Baibol evo mudiaphiyọ. Dede nẹ me nọ enọ evo gbaigbai, jẹ ohwo vuọvo re me nọre na nabọ djephia nẹ o vwo ọdavwẹ mẹ. Oma je vwerhen ovwẹ nẹ dede nẹ ihwo sansan yen me nọre onọ ọvo, jẹ ẹkpahọnphiyọ rayen eje ọvuọvo. Ọkievo ayen mi si ẹkpahọnphiyọ rayen na phiyotọ kẹ vwẹ, rere me sa vwọ frẹkotọ rhoma fuẹrẹn komobọ ọkiọfa.

Vwẹ ọke uvo ri 1985, orua rẹ avwanre de kpo ọghwẹkoko rẹ Iseri ri Jihova vwẹ Memphis, Tennessee, re nughe oborẹ ayen che ru vwẹ oboyin. James ji mu ẹto egban rọyen na, iwun diodi re si emuọvo phiyọ-ọ na yen avwanre ji kuphiyọ. Ihwo kọn bru avwanre rhe mamọ vwẹ ọke rẹ omaerovwon na eje. Ẹguọnọ, edede ri sasasa, kugbe ọdavwẹ rẹ ayen dje kẹ avwanre te avwanre ẹwẹn mamọ. Orukugbe rọhẹ uvwre rayen je vwerhen avwanre oma, kidie o toro asan rẹ avwanre de kpo omẹvwa raye-en, iyono rayen eje ọvuọvo.

Ọdavwẹ rẹ Iseri na vwo kpahen James de muo vwo rhiabọreyọ uyono ri Baibol. Ọ nabọ fuẹrẹn erọnvwọn eje, kidie ọ guọnọ vwo imuẹro rẹ obo ro yono na. (Iruo rẹ Iyinkọn Na 17:11; 1 Tẹsalonaika 5:​21) Ọke vwọ yanran, o de rhi mu James ẹro nẹ ọ mrẹ uyota na re. Ẹkẹvuọvo, mi ji vwo ẹwẹn ivivẹ. Mi guọnọ ru obo ri yovwirin, jẹ me guọnọ sẹn osẹnvwe rẹ ọke nana-a, kidie me guọnọre nẹ e kere uvwe ba “ihwo rẹ akpọ na-a.” Vwẹ ẹdẹ rẹsosuọ me vwọ rhọnvwe nẹ e yono uvwe Baibol na, mi mu BaiboI ri King James kpahen owọ ọvo, mi de rhe mu ọ rẹ New World Translation kpahen owọ ro chekọ. Me vwẹ owọrota na ọvuọvo vwọ vwanvwen ohwohwo rere e vwo ju vwe esuon ghwrẹ.

Obo rọ Wan Muvwẹro

Avwanre vwo nene Iseri na yono Baibol na kuẹgbe, avwanre da rhe riẹn nẹ dakẹ Ọsẹ rẹ avwanre rọhẹ odjuvwu na Ọghẹnẹ ọvuọvo, ọ dia eghẹnẹ erha ri kuomagbe dia ọvo-o, nẹ avwanre komobọ yen erhi, avwanre vwo erhi ro jeghwo-o. (Jẹnẹsis 2:7; Urhi Rivẹ 6:4; Izikiẹl 18:4; 1 Kọrẹnt 8:​5, 6) Avwanre ji yono nẹ hell ọyen ushi ghevweghe re shẹ ihwo phiyọ, ọ dia asan ra da vwẹ erhanre torhẹ ihwo-o. (Job 14:13; Une rẹ Ejiro 16:10; Aghwoghwo 9:​5, 10; Iruo rẹ Iyinkọn Na 2:​31) Emuọvo rọ kẹ avwanre imuẹro nẹ avwanre mrẹ uyota na vughe re yen oborẹ Baibol na ta kpahen hell ri mi yonori, kidie o vwo ohwo vuọvo vwẹ ishọshi ri Old Brethren na rọ rhọnvwephiyọ obo ro mudiaphiyọ-ọ.

Dedena, mi ji roro kpahan oborẹ Iseri na sa vwọ dia ẹga rẹ uyota, jẹ vwẹ ẹwẹn mẹ, ayen jehẹ ẹbẹre ọvo rẹ akpọ na. Ọ dia ẹro mi vwo nẹ iwun “diodi” na yen ayen ji vwo no-o. Vwẹ ọke vuọvo na, me je mrẹvughe nẹ ayen nene iji ri Jesu re vwo ghwoghwo iyẹnrẹn esiri rẹ Uvie na vwọ kẹ ihwo ejobi. Ẹwẹn mẹ da rhe yanghan ku!​—Matiu 24:14; 28:​19, 20.

Vwẹ uvwre rẹ ọke ọgangan nana, ẹguọnọ rẹ Iseri na dje kẹ vwẹ de mu vwe vwọ hiẹ kpobarophiyọ. Ukoko na eje vwo ọdavwẹ rẹ orua avwanre. Iniọvo rẹ ukoko na kọn bru avwanre cha​—ọkiọvo kẹ ayen ma tanẹ ayen rhe dẹ imiki yẹrẹ ikọhọ,​—avwanre da rhe mrẹ ayen phiyọ omamọ rẹ ihwo. Dede nẹ Iseri na riẹnre nẹ ohwo rayen ọvo nene avwanre yono kuẹgbe, ayen je kọn bru avwanre cha. Ayen vwẹriẹ kọke kọke ayen de sikẹrẹ uwevwin rẹ avwanre. Avwanre ghene guọnọ reyọ uphẹn nana vwo vughe Iseri na, ẹguọnọ vẹ ọdavwẹ rẹ ayen vwo kpahen avwanre da avwanre aro.

Ọ dia Iseri rehẹ ukoko rọ kẹrẹ avwanre ọvo yen vwo ọdavwẹ rẹ avwanre-e. Mi ji vwo nene iroro rẹ oborẹ irhuon vẹ osẹnvwe abavo mudiaphiyọ muabọ na, Oseri ri Jihova ọvo rẹ ukoko rọyen kẹrẹ asan rẹ avwanre dia, re se Kay Briggs, rọ sẹn osẹnvwe ri kekpe ji ghworo imekọpu-u, kidie ọyen obo ri ghwe je, da kọn bru vwe rhe. Me mrẹrẹ phiyọ ohwo mi se sikẹrẹ, mi de rhievun ta ota kẹ. Ẹdẹ ọvo, Lewis Flora, ro ji kpo ẹga rọ họhọ ọka re me ra jovwo, da kọn bru vwe rhe. Ọ mrẹvughe nẹ ẹwẹn mẹ yanghanre, ọtiọyena, o de si ileta ro vwo aruọbe ihwe rhe vwẹ rere ẹwẹn mẹ vwo te otọ. Uruemuesiri rọyen nẹrhẹ me viẹ, mi de se ileta na abọ buebun.

Me vuẹ Oniọvo O’Dell, rọ dia oniruo rẹ okinriariẹ nẹ o dje oborẹ Aizaya 3:​18-​23 vẹ 1 Pita 3:​3, 4 mudiaphiyọ kẹ vwẹ. Me da nọ: “Awọreta nana rhe djephia nẹ ofori e vwo ku iwun diodi phiyọ e se vwo ru obo re vwerhen Ọghẹnẹ oma?” Oniọvo na de nene uvwe fuẹrẹn kugbe rọ vwọ ta: “Wo rori nẹ ọ chọre re vwo ku erhu phiyọ? Re vwo me ẹto chọre?” E me etọ rẹ imitete vwẹ ẹga ri Old Brethren, eya mi rhe ku erhu phiyọ. Me ghwa mrẹ ofẹnẹ rọhẹ uvwre obo ri mi segbuyota vẹ ọnana, oma je vwerhen ovwẹ fikirẹ uruemuesiri vẹ odirin rẹ oniruo rẹ okinriariẹ na djephia.

Ememerha na, o de rhi muvwẹro nẹ me mrẹ uyota na vughe re, ẹkẹvuọvo, emuọvo ji kpokpo uvwe ẹwẹn mamọ​—ọyen eya vwo bru ẹto rayen. Ekpako rẹ ukoko na da chọn vwẹ uko vwọ mrẹvughe nẹ ẹto rẹ eya evo vwo asan rẹ ayen gron te, efa mi rhe gron mamọ. Kẹ ọnana mudiaphiyọ nẹ ẹto rẹ eya evo yovwin nọ ọ rẹ eya efa? Ayen je chọn vwẹ uko vwọ riẹn ẹdia rẹ ẹwẹn rẹ obrorhiẹn na kare siẹrẹ a da ta ota kpahen irhuon vẹ osẹnvwe, je kẹ vwẹ ẹbe evo mi se se vwẹ obuwevwin.

Avwanre ru Nene Oborẹ Avwanre Yonori

Avwanre guọnọ omamọ esiri, avwanre da mrẹ. Jesu da ta: “Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.” (Jọn 13:35) O mu avwanre ẹro dẹn nẹ Iseri ri Jihova yen ihwo ri dje ẹguọnọ rẹ uyota phia. Ẹkẹvuọvo, ọ lọhọ kẹ Nathan vẹ Rebecca, re dia emọ avwanre ivẹ re kobaro kẹ i ri chekọ na-a, kidie ayen rhiabọreyọ ẹga ri Old Brethren na ji bromaphiyame vwọ re. Ememerha na, uyota ri Baibol rẹ avwanre dje kẹ ayen vẹ ẹguọnọ rẹ Iseri na djephia de te ayen ẹwẹn.

Kerẹ udje, ọkieje yen Rebecca vwọ guọnọ vwo uvi rẹ oyerinkugbe vẹ Ọghẹnẹ. Ọke rọ rhe vwọ riẹn nẹ Ọghẹnẹ rhuẹrẹ oborẹ ohwo che ru vẹ obo ro chẹ yeren akpọ wan vwẹ obaro phiyotọ-ọ, ọ da lọhọ rọ vwọ nẹrhovwo rhe. Ọke rọ je vwọ mrẹvughe nẹ uyono rẹ Eghene Erha ri Kuomagbe dia ọvo na dia uyota-a, ẹkẹvuọvo, Ọghẹnẹ ọyen ohwo rọ herọ ḍen ra sa vwẹrokere, ọ da nẹrhẹ o sikẹrẹ phiyọ. (Ẹfesọs 5:1) Oma da je vwerhọn nẹ ọ gbe cha reyọ eta ri “thee” kugbe “thou” vwo ruiruo ọke rọ da ta ota kẹ Ọghẹnẹ-ẹ. Ro vwo yono kpahan obo ro fori nẹ a nẹrhovwo rhe Ọghẹnẹ wan, vẹ ọhọre rọyen rẹ ihworakpọ vwọ dia bẹdẹ vwẹ iparadaisi vwẹ otọrakpọ na, ọ da nẹrhẹ oyerinkugbe rọyen vẹ Ọmemama na kpẹkpẹ phiyọ.​—Une rẹ Ejiro 37:29; Ẹvwọphia 21:​3, 4.

Avwanre Riavwerhen rẹ Uphẹn rẹ Ẹga Sansan

Mẹvwẹ vẹ James kugbe emọ iyorin avwanre​—Nathan, Rebecca, George, Daniel, vẹ John​—de bromaphiyame kerẹ ọvo usun rẹ Iseri ri Jihova vwẹ ọke uvo ri 1987. Harley de rhe bromaphiyame vwẹ 1989, Simon ke rahẹ 1994. Orua rẹ avwanre eje muomaphiyọ iruo ri Jesu vuẹ idibo rọyen nẹ ayen ru na, rọ dia e vwo ghwoghwo iyẹnrẹn esiri rẹ Uvie rẹ Ọghẹnẹ na.

Emeshare iyorin rẹsosuọ rẹ avwanre​—Nathan, George, Daniel, John, vẹ Harley​—kugbe ọmọtẹ avwanre Rebecca​—ga vwẹ oghọn ukoko rẹ Iseri ri Jihova rọhẹ U.S. re. Ẹgbukpe 14 yen George vwọ hẹ oghọn rẹ ukoko na re, ọ je ga vwẹ etiyin. Vwọ kẹ Simon, o wontọ nẹ isikuru vwẹ 2001, e sere nẹ ọ rhe ga vwẹ oghọn rẹ ukoko na o krinọ-ọ na. Emeshare avwanre eje ga kerẹ ekpako yẹrẹ idibo rowian vwẹ ukoko rẹ Iseri ri Jihova. Ọshare mẹ ga kerẹ ọkpako vwẹ ukoko ri Thayer vwẹ Missouri, mẹvwẹ komobọ de rhe muomaphiyọ iruo rẹ aghwoghwo na.

Avwanre vwo ivwrọmọ erha enẹna​—Jessica, Latisha, vẹ Caleb​—oma vwerhan avwanre nẹ esẹ vẹ ini rayen yono ayen kpahen oborẹ ayen se vwo vwo ẹguọnọ ri Jihova. Kerẹ orua, oma vwerhen avwanre nẹ Jihova si avwanre te oma, je chọn avwanre uko vwo vughe ihwo rọyen womarẹ ẹguọnọ rẹ ayen djephia.

Avwanre roro kẹ ihwo re guọnọ ru obo re vwerhen Ọghẹnẹ oma, re vwẹ iyono rẹ asan ra da yọnrọn ayen ghwanre vwọ riẹnriẹn oma, ukperẹ iyono ri Baibol na. Avwanre rhẹro rọyen nẹ vwẹ ẹdọvo ayen ji che vwo aghọghọ ro rhe avwanre enẹna. Vwẹ ọke ri jovwo, ifọ vẹ emamọ yen avwanre shẹ nuwevwin kpuwevwin, jẹ asaọkiephana, avwanre nuwevwin kpuwevwin ghwoghwo iyẹnrẹn esiri na. Mi de roro kpahen ẹguọnọ vẹ odirin rẹ Iseri na dje kẹ avwanre, ame oviẹ ko suẹn nẹ ẹro mẹ cha!

[.Ihoho]

Ọke me vwọ hẹ omarẹ ẹgbukpe ighwrẹn kugbe ọke mi vwo te omiragua re

[Uhoho]

James, George, Harley, vẹ Simon, ku iwun diodi phiyọ

[Uhoho]

Ọbe rọ ghwa iyẹnrẹn de mu ifoto rẹ ọke mi vwo muẹ erọnvwọn kpo eki

[Credit Line]

Journal vẹ Courier, Lafayette, Indiana

[Uhoho]

Mẹvwẹ vẹ orua mẹ enẹna