Vuẹ avwanre kpahen akpeyeren wẹn.

E vwiẹ vwẹ vwẹ 1979 vwẹ United States. Me vwọ hẹ ẹgbukpe erha, ọsẹ vẹ oni mẹ da fan orọnvwe. Oni mẹ yọnrọn ovwẹ ghwanre vwo nene ẹkuruemu rẹ ihwo ri Ju ji vwẹ ovwẹ kpo yeshivas rọ dia isikuru rẹ ihwo ri Ju. Mi vwo te ẹgbukpe ighwrẹn, avwanre da kua kpo Israel je dia oboyin ẹgbukpe ọvo, isikuru rọhẹ ọko na re se kibbutz yen me rare. Mẹ vẹ Oni mẹ da rha kua nẹ etiyin kpo Mexico.

Dede nẹ uwevwin ẹga rẹ ihwo ri Ju hẹ ekogho na-a, jẹ mi ji muomaphiyọ ẹkuruemu rẹ ẹga ri Ju na. Me vwẹ ikandoro vwo muẹ vwẹ ẹdẹ urovwonma, se Torah avwanre, je nẹrhovwo womarẹ siddur rọ dia ọbe ẹrhovwo. Vwẹ isikuru, ọkieje yen me vwọ vuẹ emọ rẹ iklasi mẹ nẹ ẹga mẹ yen uvi rẹ ẹga na. Mi ji rhi se ọbe rẹ ihwo buebun se Ọphọ Ọkpokpọ na rọ tẹnrovi iruo rẹ aghwoghwo vẹ iyono ri Jesu kristi na-a. Vwọrẹ uyota, Oni mẹ tobọ si vwe erhọ kpahọn, kidie oshọ muo nẹ iyono rọyen se miovwo uvwe.

Diesorọ wo vwo brorhiẹn wo vwo se ọbe Ọphọ Ọkpokpọ na?

Mi vwo te ẹgbukpe 17, me da kua rhivwin kpo United States re ku ọbe eyono mẹ phiyọ. Vwẹ oboyin, ohwo ọvo ri mi vugheri da vuẹ vwẹ nẹ akpeyeren mẹ che vwotọ-ọ jokpa nẹ mi riẹn Jesu.

Me da kpahen kẹ nẹ, “Ihwo ri vughe Jesu ghwru kufia.”

Ọ da nọ vwẹ “Wọ tobọ se ọbe Ọphọ Ọkpokpọ na jovwo re?”

Me da kpahen kẹ nẹ, “Ẹjo.”

Kọ tare nẹ “Ọtiọyena, ọ rha dia ughẹnghẹn, rẹ wọ vwọ ta ota kpahen oborẹ wọ rien kpahe-en?”

Eta rọyen na te vwe ẹwẹn mamọ, kidie mi ji no jovwo nẹ ọyen ughẹnghẹn rẹ ohwo vwọ ta ota kpahen oborẹ ọ riẹn kpahe-en. Vẹ oruru na, me da reyọ Baibol rọyen kpo je tuẹn ese rẹ ọbe Ọphọ Ọkpokpọ na phiyọ.

Mavọ yen obo ru wo seri na vwo djobọte we?

O gbevwunu re me vwọ riẹn nẹ ihwo ri Ju yen si ọbe Ọphọ Ọkpokpọ na. Vwọba, mi vwo se Baibol na kpobarophiyọ na, ke me rhe mrẹ Jesu kerẹ ohwo ri Ju ro vwo erorokẹ, vwomakpotọ, rọ je guọnọ chọn ihwo efa uko ọ dia ọ vwọ ghwa ayen re-e. Mi tobọ kpo ilaibri re momo ẹbe re ta ota kpahọn. O vwo ọvuọvo vwẹ usun rẹ ẹbe nana re kẹ vwẹ imuẹro nẹ ọyen Mesaya na-a. Evo tobọ se nẹ Ọghẹnẹ, ji mi mrẹ ọhọ vwevunrẹ uyono yena-a. Ọ da ghene dia ọtiọyen, kẹ ono yen Jesu nẹrhovwo rhe—omobọ rọyen? Emu ọfa kẹ ọna, Jesu ghwuru. Dedena, Baibol na ta kpahen Ọghẹnẹ nẹ, O ghwẹ-ẹ. *

Mavọ wọ sa vwọ mrẹ ẹkpahọnphiyọ rẹ onọ nana?

Uyota vwọsua oma rọye-en, ọtiọyena mi de vwo owenvwe me vwọ guọnọ uyota na mrẹ. Me da nẹrhovwo rhe Ọghẹnẹ vwo nẹ otọ ubiudu vwọ rhe vẹ ame oviẹ vwẹ ẹro mẹ, ọnana yen obọ rẹsosuọ re me vwọ nẹrhovwo ababọ rẹ ọbe ẹrhovwo mẹ. Mi ghwe vwo ku ẹrhovwo na phiyọ nu, mi de nyo ohwo rọ vwẹ obọ hworo ẹchẹ mẹ. Iseri ri Jihova ivẹ yen rhere. Ayen da vwẹ ọbe ọvo rẹ ayen vwo yono Baibol na vwọ kẹ vwẹ. Ọbe nana vẹ ọtakugbe rẹ me vẹ ayen vwori ọke efa buebun kẹ vwẹ imuẹro nẹ ayen mu esegbuyota rayen kpahen Baibol na. Kerẹ udje, Iseri na vughe Jesu kerẹ ẹbẹre ọvo rẹ eghẹnẹ erha ri kuomagbe dia ọvo-o, ukperẹ ọtiọyen, ayen vughire kerẹ “Ọmọ rẹ Ọghẹnẹ” * kugbe “ẹtuọhọ rẹ emama rẹ Ọghẹnẹ.” *

O kriri-i, mi de rhivwin kpo Mexico, vwẹ oboyin me da tuẹn uyono rẹ aroẹmrẹ ri shekpahen Mesaya na phiyọ vẹ Iseri ri Jihova. O gbevwunu me vwọ mrẹ aroẹmrẹ buebun ri shekpahen Mesaya na! Dedena, mi ji rhi vwo imuẹro kpahen aye-en. Ki mi roro: ‘Jesu ọvo yen ohwo rẹ akpeyeren rọyen shephiyọ vẹ aroẹmrẹ na eje?’ Kẹ, ‘ọ da rha dianẹ ọ vwẹ ona vwo ruo akpeyeren rọyen vwo shephiyọ vẹ aroẹmrẹ na vwo?’

Die yen ghini kẹ wẹ imuẹro?

Iseri na dje aroẹmrẹ evo kẹ vwẹ rẹ ohwo ro me ruẹ vuọvo che se rugba-a. Kerẹ udje, ọ vrẹ ẹgbukpe 700 tavwen e ki vwiẹ rẹ ọmraro Maika vwọ tanẹ Betlẹhẹm ri Judia * yen e de che vwiẹ Mesaya na. Ono yen se brorhiẹn rẹ asan re de vwiẹ? Aizaya siri nẹ, Mesaya na che ghwu ughwu rẹ ophọphọvwe kerẹ oji, ẹkẹvuọvo e che sho kẹrẹ edafe. * Aroẹmrẹ nana eje rugba vwẹ oma ri Jesu.

Imuẹro rọ koba rẹ ayen dje kẹ vwẹ shekpahen esẹ ride ri Jesu. Baibol na tare nẹ uvwiẹ rẹ ovie Devid * yen Mesaya na che nurhe. Kidie nẹ ihwo ri Ju rẹ avwanre sẹro rẹ iyẹnrẹn rẹ uvwiẹ rẹ ihwo, manẹ kẹ Jesu nẹ orua ri David rhe jovwo-o ivwighrẹn rọyen re ghwoghwo nene asan eje! Ẹkẹvuọvo ayen ru ọtiọye-en kidie, o muẹro dẹn nẹ orua ri David yen o nurhe. Otu buebun tobọ se “Ọmọ ri Devid.” *

Vwẹ 70 C.E.—ẹgbukpe 37 rẹ Jesu vwo ghwu nu—isodje ri Rome da guọghọ Jerusalẹm totọ, ọtiọyen na iyẹnrẹn rẹ uvwiẹ rẹ ayen sẹro rọyen jovwo de ghwru yẹrẹ a guọghọ ayen. Fikirẹ eriyina, e vwo vughe uvwiẹ rẹ Mesaya na nurhe kẹ ofori nẹ ọ vwomaphia tavwen ukpe ri 70 C.E ki te.

Mavọ yen ọmrẹvughe nana djobọte we wan?

Vwẹ Urhi Rivẹ 18:18, 19, Baibol na tarọphiyotọ nẹ Ọghẹnẹ cha vwẹ ọmraro ọvo mu vwẹ izrẹl rọ họhọ Mosis. Ọghẹnẹ tare nẹ “Ohwo kohwo rọ gbe kerhọn rẹ eta mẹ rọ cha ta vwẹ odẹ mẹ na-a, mẹvwẹ ọvo kọye nọ ekpẹn rọye vwẹ obọ rọye.” Me vwọ nabọ frẹkotọ yono ọsoso ri Baibol na, o de ri mu vwe ẹro nẹ Jesu rẹ ohwo ri Nazarẹt na yen ọmraro yena.