Biko vuẹ avwanre kpahen ọkiemọ wẹn.

Ukpe rẹ 1943 yen e vwiẹ vwẹ vwẹ Italy. Mẹ vẹ iniọvo mẹ esan ghwanre kugbe vwẹ ọmọko ọvo rẹ ọsẹ mẹ da dia ọghwẹrẹ kugbe ọkanrirhe. Ọsẹ vẹ oni mẹ nabọ yono avwanre kpahen irueru rẹ Ẹga ri Fada eje.

Ọrhọ yen oboresorọ wọ vwọ guọnọ dia orherẹn?

Me vwọ hẹ omotete, oma vwerhen ovwẹ me da kerhọ rẹ irherẹn na vwẹ Ishọshi. Upho rẹ ayen vwọ ta ota je vwe, ọtiọyen ji te izobo rẹ ayen ze. Ọtiọyena, ke me guọnọ dia orherẹn. Me vwọ hẹ ẹgbukpe 13, oni mẹ de mu vwe kpo ibọdisku re de yono emọ ji muegbe rayen vwọ kẹ iruo rẹ orherẹn.

Obo re yono uwe na shekpahen uyono ri Baibol?

Ọ ghwa dia ọtiọye-en. Me vwọ hẹ ẹgbukpe 15, ọvo usun rẹ iyono mẹ da kẹ vwẹ ẹbẹre ri Baibol na re si ikuegbe rẹ akpeyeren vẹ iruo rẹ aghwoghwo ri Jesu phiyọ, mi ji se abọ buebun. Mi vwo te ẹgbukpe 18, mi de kpo yunivasiti re de yono irherẹn vwẹ Rome, rọhẹ otọ rẹ usuon ri popu na. Mi yono Latin, Greek, ikuegbe, iruemu rẹ ihworakpọ, uyono ro shekpahen akpeyeren vẹ irueru rẹ ihworakpọ kugbe uyono rẹ ẹga. Dede nẹ avwanre se ẹkoreta ri Baibol na nẹ afọnrhe, ji nyo isese ri Baibol na vwẹ ẹdidjana, ọ dia Baibol na yen avwanre ghini yono-o.

A vwẹ owẹ mu osun. Kẹ, ọyena churobọ si eyono?

Owian mẹ churobọ si ẹroevwote. Ẹkẹvuọvo, mi ji yono ihwo irhi rẹ Second Vatican Council.

Diesorọ wo vwo vwo ẹwẹn ivivẹ kpahen ishọshi na?

Erọnvwọn erha kpokpo uvwe ẹwẹn. Ishọshi na vwobọ vwẹ oseghe rẹ usuon. A vwẹ ẹro ri phovwin vwo nẹ iruemu ri jẹfuọn rẹ ihwo kugbe ilori rẹ ẹga na. Evo usun rẹ iyono rẹ Ẹga ri Fada na gbare-e. Kerẹ udje, Ọghẹnẹ ro vwo ẹguọnọ se gboja kẹ ihwo ri ghwure bẹdẹ bẹdẹ? Kẹ, Ọghẹnẹ guọnọre nẹ a reyọ evwarha ra vwọ nẹrhovwo vwọ ta ota kẹ, jẹ e dje ẹrhovwo ọvo ẹvwẹvwariẹn? *

Die yen wo ruru?

Vẹ ameoviẹ vwẹ ẹro mẹ, me da nẹrhovwo vwọ kẹ odjekẹ. Me da je dẹ Catholic Jerusalem Bible ra ghwa fan kpo ejajẹ rẹ Italy o krinọ-ọ, ji tuẹn ese rọyen phiyọ. Urhiọke rẹ Ẹdijana ọvo ri mi vwo ru ẹga rẹ urhiọke nu, me je vwọ vwẹ iwun mẹ vwọ tan, eshare ivẹ da rhe asan rẹ avwanre dia na. Ayen da vuẹ vwẹ nẹ ayen Iseri ri Jihova. Avwanre ghwọrọ inọke evo vwọ ta ota kpahen Baibol na kugbe obo re se vwo vughe ẹga rẹ uyota.

Die yen vwerhen owẹ oma kpahen erhorha na?

Oma vwerhen ovwẹ kpahen imuẹro rẹ ayen vwori kugbe oborẹ ayen sa vwọ fobọ rionbọ kpo efanfan ri Baibol ri Catholic na. Ukuko na, Oseri ọfa re se Mario kọyen kọn brẹ uvwe cha. Ọyen ohwo esiri, ro ji vwo odirin. Kurhiọke kurhiọke ri Saturday yen o vwo hworo agogo rẹ asan rẹ avwanre dia na vwẹ ughọjọ irhirin, o toro obo rẹ aruọke na hepha-a.

Ẹro vọ yen irherẹn ichekọ na vwo ni ẹcha rayen na?

Mi durhie ayen nẹ ayen vwomaba uyono na, ẹkẹvuọvo ayen sere gbemu-u. Vwọrẹ uyota, me riavwerhen rọyen. Mi yono erọnvwọn eghanghanre, kerẹ oboresorọ Ọghẹnẹ vwọ vwẹ uphẹn kẹ umwemwu vẹ ojaẹriọ rọ dia obo ri kpokpo uvwe ẹwẹn krẹre.

Ihwo re kobaro kẹ wẹ davwẹngba vwọ dobọ rẹ uyono ri Baibol wẹn ji?

Vwẹ 1975, mi kpo Rome abọ buebun rere me sa vwọ vuẹ ayen ẹro mi vwo ni iyono na. Ihwo re kobaro kẹ vwẹ davwẹngba vwo wene iroro mẹ, ẹkẹvuọvo ayen vwẹ Baibol na vwo ruiruo-o. Ukuotọ rọyen, vwẹ January 9, 1976, mi de si ọbe kpo Rome nẹ me rha dia ohwo rẹ Ẹga ri Fada ọfa-a. Ẹdẹ ivẹ vwọ wan nu, mi de vrẹn nẹ asan re de yono irherẹn na ji ro itreni kpo omẹvwa rẹsosuọ mẹ vẹ Iseri ri Jihova ro rhi hirhephiyọ osikoko kidie ikoko efa rhoma vwomaba avwanre. Erọnvwọn eje fẹnẹ obo me riẹnre jovwo! Iseri na eje vwẹ Baibol romobọ rayen, ayen ji rhie nene ọtota na rọ vwọ fuẹrẹn ẹkpo vuọvo.

Ẹro vọ yen orua wẹn vwo ni enana eje?

Buebun rayen vwọso ovwẹ mamọ. Me da rhe mrẹvughe nẹ oniọvo mẹ rẹ otete ọvo nene Iseri ri Jihova yono vwẹ Lombardy, ẹkuotọ rọhẹ obohwẹre ọnre rẹ Italy. Me vwọ yanran ra mrẹ, Iseri rehẹ oboyin da guọnọ iruo kẹ vwẹ kugbe asan me sa dia. Vwẹ okuphiyọ rẹ ukpe yena, mi de bromaphiyame kerẹ Oseri ri Jihova.

Wọ viẹ idiekpọvwẹ?

Ẹjo kakaka! Ukperẹ ọtiọyen, mi de rhi sikẹrẹ Jihova kidie obo me riẹn kpahọn eje nẹ evunrẹ Baibol na rhe, ọ dia iroro yẹrẹ ẹkuruemu rẹ ishọshi-i. Me je sa nabọ yono ihwo uyota na vẹ imuẹro.