1. Die yen Jihova guọnọre nẹ avwanre ru?

 ỌVO usun rẹ erọnvwọn rọ ma nẹrhẹ oma vwerhen aye gbe ọshare re rọvwọnre yen ọke rẹ ayen de vwiẹ ọmọ. Jẹ, dede nẹ ọsẹ vẹ oni na vwo ẹguọnọ rẹ ọmọ rẹ ayen vwiẹre na mamọ, ọ dia ọyen ayen vwọ guọnọ nẹ ọ dia omotete bẹdẹẹ. Vwọrẹ uyota, ofu rẹ akpọ che dje ayen ọ da dianẹ ọmọ na rhuaa. Vwẹ idjerhe vuọvo na, oma cha vwerhen Jihova siẹrẹ a da jowọ rẹsosuọ ra vwọ dia idibo ri Jesu, ẹkẹvuọvo Ọ guọnọre nẹ avwanre dia emeboba vwẹ ukoko naa. (1Kọ 3:1) Ukperẹ ọtiọyen, ọ vuẹ Inenikristi nẹ ayen “dia imiragua.”​​—1Kọ 14:20.

2. Die yen a cha fuẹrẹn vwẹ uyono nana?

² Die yen o mudiaphiyọ ra vwọ dia Onenikristi ro tedje? Mavọ yen avwanre sa vwọ rho tedje kerẹ Inenikristi? Mavọ yen iyono ikokodo rehẹ Baibol na sa vwọ nẹrhẹ e yerin tedje? Diesorọ a vwọ kẹnoma kẹ uruemu ra vwọ vwẹrosua omobọ rẹ ohwo gan nọ? Vwẹ uyono nana, a cha fuẹrẹn ẹkpahọnphiyọ rẹ enọ nana.

DIE YEN O MUDIAPHIYỌ RA VWỌ DIA ONENIKRISTI RO TEDJE?

3. Die yen o mudiaphiyọ ra vwọ dia Onenikristi ro tedje?

³ Vwẹ Baibol na, ota ri Grik ra fan phiyọ ra vwọ “dia omiragua” ji se mudiaphiyọ re vwo yerin “tedje.” a (1Kọ 2:6) Avwanre cha dia imiragua, yẹrẹ dia Inenikristi ri yerin tedje ọ da dianẹ avwanre vẹ Jihova vwo uvi rẹ oyerinkugbe. Vwọrẹ uyota, ọ da tobọ dianẹ avwanre yerin tedje re, o ji fo nẹ  avwanre rha yanphiaro. (1Ti 4: ​15) Avwanre eje, ọtiọyen ji te imitete sa dia Inenikristi ri tedje. Ẹkẹvuọvo, die yen djephia nẹ Onenikristi yerin tedje re?

4. Die yen e vwo vughe Onenikristi ro tedje?

⁴ Onenikristi ro tedje ọyen ohwo ro yeren akpọ nene iwan rẹ Ọghẹnẹ eje, ọ dia i ri jere ọvo yen o vwo ruiruoo. Vwọrẹ uyota, fikirẹ jẹgba erọnvwọn evo sa chọ obọ. Dedena, obo ro yeren akpọ wan nẹ ẹdẹ ra ro ẹdẹ djephia nẹ o roro emu ji ruẹ erọnvwọn nene ọhọre rẹ Ọghẹnẹ. O ku ohwo ọkpokpọ na phiyọ re, ọ je davwẹngba ọkieje vwọ vwẹ ẹro rẹ Ọghẹnẹ vwo nẹ emu vwo no. (Ẹf 4:​22-​24) O yono oma rọyen phiyọ obo ra reyọ irhi vẹ odjekẹ ri Jihova vwo bru erhiẹn rẹ aghwanre, ọtiọyena ọ rha guọnọ irhi ri che suon vwẹ kemu kemu ro ruẹẹ. Eriyina o de brorhiẹn, ọ davwẹngba vwọ yanmuẹ orhiẹn ebro rọyen na.​​—1Kọ 9:​26, 27.

5. Imuoshọ vọ yen Inenikristi re rhọnvwe yerin tedjee hirharokuẹ? (Ẹfesọs 4:​14, 15)

⁵ Vwọ fẹnẹ ohwo ro tedje, ọ nama ghwọrọ ọke tavwen ihwo re hrahra evuẹ rẹ efian vẹ ihwo ri she nẹ ukoko na ke womarẹ “ọghware” kugbe “ona rẹ ophiẹnvwe sansan” rayen vwọ phiẹn Onenikristi rọ rhọnvwe yerin tedjee. b (Se Ẹfesọs 4:​14, 15.) O se vwo uruemu rẹ omaẹriọ, ra vwọ so ẹghwọ, fobọ muophu, yẹrẹ fobọ sherua ọdavwini.​​—1Kọ 3:3.

6. Die yen e se vwo djudje rẹ oborẹ ohwo yerẹn tedje wan? (Ni uhoho na.)

⁶ Kirobo re djunute siẹvure, Baibol na reyọ owọẹjẹ re nene a ke sa dia Onenikristi ro tedje vwọ vwanvwe oborẹ ohwo wan rhua te omiragua. Omotete guọnọ ọkpọvi kugbe ochọnvwe rẹ omiragua kidie o ji rhi vwo ọhọọ. Re vwo ru udje rọyen, oni sa vuẹ ọmọ rọyen ọmọtẹ rọ dia omotete nẹ ọ yọnrọn obọ rọyen siẹrẹ ayen da shariẹ idjerhe wanvrẹ. Ọmọ na vwọ ghwanra na, oni na sa vwẹ uphẹn kẹ nẹ ọyen ọvo shariẹ idjerhe na vrẹ, ẹkẹvuọvo ọ cha vuẹ nẹ o ni obohwẹre vẹ obọrhen tavwen ọ ke wanvrẹ. Ọke rẹ ọmọ na de te omiragua re, kẹ ọyen ọvo sa kẹnoma kẹ imuoshọ rọhẹ idjerhe ọtiọyena. Kirobo rẹ emọ guọnọ ukẹcha rẹ imiragua ayen sa vwọ kẹnoma kẹ imuoshọ ye, ọtiọyen Inenikristi  re je rhe ghwanre tedjee guọnọ ukẹcha rẹ Inenikristi re ghwanre tedje re ọkieje ayen se vwo vwo uvi rẹ oyerinkugbe vẹ Jihova ji bru erhiẹn rẹ aghwanre. Vwọ fẹnẹ ọyena, Inenikristi ri tedje da guọnọ brorhiẹn, ayen roro kpahan odjekẹ ri Baibol na ayen sa vwọ vwẹ ẹro ri Jihova vwo ni emu vwo no, ọnana kọ nẹrhẹ ayen vwẹ oborẹ ayen yonori vwo ruiruo.

7. Inenikristi ri tedje je guọnọ ukẹcha rẹ ihwo efa?

⁷ Kẹ ọnana mudiaphiyọ nẹ Onenikristi ro tedje rha guọnọ ukẹcha rẹ ohwo vuọvoo? Ẹjo. O ji vwo ọkievo ro vwo fo nẹ ayen nokpẹn rẹ ukẹcha. Ẹkẹvuọvo, ohwo ro ji rhi yerin tedjee sa vuẹ ihwo nẹ a vuẹ ọyen obo ro fori nẹ ọyen ru yẹrẹ vuẹ ihwo efa nẹ i brorhiẹn kẹ ọyen. Jẹ, Onenikristi ro yerin tedje yono vwo nẹ aghwanre kugbe oborẹ ihwo efa rhiẹromrẹ, ọ je riẹn nẹ Jihova rhẹro rọyen nẹ ọyen ọvo yen che mu ‘oghwa rọyen.’​​—Ga 6:5.   

8. Idjerhe vọ yen ihwo ri tedje vwọ fẹnẹ ohwohwo?

⁸ Kirobo rẹ ekroma rẹ imiragua fẹnẹ ohwohwo ye, ọtiọyen Inenikristi ri tedje vwẹ ukoko na ji vwo iruemu re fẹnẹ ohwohwo kerẹ aghwanre, uduefiogbere, ẹse-eruo kugbe re vwo gbe arodọnvwẹ. Vwọba, Inenikristi ivẹ ri tedje de hirharoku ẹdia re họhọ ohwohwo, ayen se bru erhiẹn re fẹnẹre, re vwọso Baibol naa. Ọ sa dia ọtiọyen vwẹ eta ri shekpahen ẹwẹn obrorhiẹn rẹ ohwo. Ayen da riẹn ọnana, kẹ ayen kẹnoma kẹ uruemu ra vwọ vwẹ ohwohwo guẹdjọ. Ukperẹ ọtiọyen, kẹ ayen tẹnroviẹ oborẹ ayen se vwo yerinkugbe.​​—Ro 14:10; 1Kọ 1:10.

MAVỌ YEN AVWANRE SA VWỌ RHO TEDJE KERẸ INENIKRISTI?

9. Siẹvuọvo yen avwanre ghwanra tedje? Djekpahọn.

⁹ Ememerha yen ohwo ghwanra te omiragua, ẹkẹvuọvo ọ guọnọ ẹgbaẹdavwọn e se vwo yerin tedje vwẹ ukoko na. Kerẹ udje, iniọvo ri Kọrẹnt rhiabọreyọ iyẹnrẹn esiri na, bromaphiyame, Jihova kẹ ayen ẹwẹn ọfuanfon, ayen je mrẹ erere vwo nẹ uyono rẹ ọyinkọn Pọl rhe. (Iru 18:​8-​11) Dedena, ikpe evo vwọ wan rẹ ayen vwo bromaphiyame nu, jẹ buebun rayen ji rhi tedjee. (1Kọ 3:2) Mavọ yen a sa vwọ kẹnoma kẹ uruemu re vwo gbe phiyọ uko re vwo je yerẹn tedje?

10. Die yen ofori nẹ avwanre ru e se vwo yerin tedje? (Jud 20)

¹⁰ E se vwo yerin tedje, ẹsosuọ e che vwo owenvwe re vwo ru ọtiọyen. Ivwughẹnghẹn re guọnọ yerin tedjee cha sa yanphiaroo. (Isẹ 1:22) Avwanre guọnọ dia kerẹ ihwo ri te imiragua re, jẹ e je vwẹrosua esẹ vẹ ini rayen nẹ i brorhiẹn kẹ ayeen. Ukperẹ ọtiọyen, avwanre ọvo guọnọ wian kpahen oborẹ avwanre se vwo yerin tedje. (Se Jud 20.) Ọ da dianẹ wọ wian kpahan obo ru wo se vwo yerin tedje, rẹ Jihova nẹ ọ kẹ wẹ “owenvwe vẹ ẹgba” wo se vwo ruiruo.​​—Fil 2:13.   

11. Ukẹcha vọ yen Jihova vwọ kẹ avwanre e se vwo yerin tedje? (Ẹfesọs 4:​11-​13)

¹¹ Jihova rhẹro rọyen nẹ avwanre ọvo yen che ru obo re se vwo yerin tedjee. Iniọvo re ga kerẹ isuigodẹ kugbe iyono muegbe rẹ ayen vwọ vwẹ ukẹcha kẹ avwanre vwọ “dia imiragua” vwẹ ukoko na “bẹsiẹ iruemu rẹ avwanre sa vwọ dia kerẹ ọ rẹ ohwo ro tedje, kerẹ Kristi.” (Se Ẹfesọs 4:​11-​13.) Jihova je vwẹ ukẹcha vwọ kẹ avwanre womarẹ ẹwẹn ọfuanfon rọyen rere avwanre se vwo vwo “iroro ri Kristi.” (1Kọ 2:​14-​16) Vwọba, Ọghẹnẹ je vwẹ ẹwẹn ọfuanfon rọyen vwo mu ihwo ri si ẹbe ẹne rẹ Ikuegbe rẹ Akpeyeren ri Jesu, vwo dje obo ri Jesu rorori, obo rọ tare kugbe obo ro yeren akpọ wan ro vwo ruiruo rẹ aghwoghwo rọyen vwẹ otọrakpọ na kẹ avwanre. Wọ da vwẹrokere obo ri Jesu roro  emu ji ruẹ erọnvwọn wan, ku wọ sa yanmu ẹkẹn wo bru kẹ oma ru wo vwo yerin tedje kerẹ Onenikristi.

MAVỌ YEN IYONO IKOKODO REHẸ BAIBOL NA SA VWỌ NẸRHẸ E YERIN TEDJE

12. Die yen “uyono rẹsosuọ ro shekpahen Kristi” na?

¹² E se vwo yerin tedje, ofori nẹ e “yerin vrẹ uyono rẹsosuọ ro shekpahen Kristi” na. Evo usun rẹ udje rẹ uyono rẹsosuọ na yen okurhẹriẹ, esegbuyota, omaebrophiyame, kugbe evrẹnushi na. (Hib 6:​1, 2) Enana evo usun rẹ iyono rẹ Inenikristi eje segbuyota. Ọnana yen sorọ ọyinkọn Pita vwo djunute ayen ọke ro vwo ghwoghwota vwọ kẹ otu na vwẹ Pẹntikọst. (Iru 2:​32-​35, 38) Ofori nẹ e rhiabọreyọ iyono rẹsosuọ nana tavwen a ke sa dia idibo ri Kristi. Kerẹ udje, Pọl vwẹ orhọesio phia nẹ kohwo kohwo rọ sen uyono rẹ evrẹnushi na jẹ ọ vwọso esegbuyota rẹ Inenikristi vwori eje. (1Kọ 15:​12-​14) Ẹkẹvuọvo, e jẹ erianriẹn rẹ iyono rẹsosuọ na ọvo te kẹ avwanree.

13. Die yen ofori nẹ e ru a sa vwọ mrẹ erere nẹ iyono ikokodo re djunute vwẹ Hibru 5:14? (Ni uhoho na.)

¹³ Vwọ fẹnẹ iyono rẹsosuọ ri Baibol na, ọ dia irhi ri Jihova ọvo yen iyono ikokodo nana churobọ sii, i ji churobọ si odjekẹ rọyen re cha avwanre uko vwo vwo ẹruọ rẹ oborẹ o roro. A sa vwọ mrẹ erere nẹ iyono nana, ofori nẹ e yono, roro kokodo kpahen ota rẹ Ọghẹnẹ je davwẹngba vwọ reyọ ayen vwo ruiruo. E de ru ọtiọyen, ke che yono oma rẹ avwanre phiyọ obo re bru erhiẹn re vwerhen Jihova oma. c​​—Se Hibru 5:14.

14. Idjerhe vọ yen Pọl vwọ vwẹ ukẹcha kẹ Inenikristi ri Kọrẹnt vwọ rho tedje?

¹⁴ Ọke buebun yen Inenikristi ri tedjee vwo beghe siẹrẹ ayen de hirharoku ẹdia ro de fo nẹ ayen roro kpahen odjekẹ ri Baibol je reyọ ayen vwo ruiruo. Siẹrẹ urhi ri Baibol rha herọọ, evo se roro nẹ ayen se ru obo ri je ayen eje. Evo sa guọnọ nẹ e jurhi vwẹ ẹdia ro fo urhii. Kerẹ udje, ọ sa dianẹ Inenikristi evo vwẹ Kọrẹnt guọnọre nẹ Pọl jurhi kẹ ayen sẹ ofori nẹ ayen riemu re vwo ze izobo kẹ ẹdjọ. Ukperẹ ọ vwọ vuẹ ayen oborẹ ayen che ru, Pọl de jẹ ayen riẹn kpahen oborẹ ayen sa vwọ vwẹ ẹwẹn obrorhiẹn rayen vwo ruiruo, nẹ  ayen ọvuọvo vwo ‘uturhi rẹ ayen vwọ jẹ ojẹ.’ Ọ vẹ ayen ta ota kpahen odjekẹ ri Baibol re cha vwẹ ukẹcha kẹ ayen ohwo ọvuọvo vwọ reyọ ẹwẹn obrorhiẹn rọyen vwo ruiruo vwẹ idjerhe ro fori rọ je cha nẹrhẹ ayen jẹ ekprowọ ẹdia vwọ kẹ ihwo efa. (1Kọ 8:​4, 7-9) Ọtiọyena, Pọl vwẹ ukẹcha kẹ Inenikristi ri Kọrẹnt ayen vwọ rho tedje, rere ayen sa vwọ reyọ ẹgba rẹ iroro rayen vwo ruiruo ukperẹ ayen vwọ vwẹroso ohwo ọfa yẹrẹ guọnọ irhi rẹ ayen che vwo ruiruo.

15. Idjerhe vọ yen Pọl vwọ vwẹ ukẹcha kẹ Inenikristi ri Hibru vwo yerin tedje?

¹⁵ O ji vwo uyono ọghanghanre ọfa rẹ avwanre yono vwo nẹ obo ri Pọl si rhe Inenikristi ri Hibru. Evo rha yanphiaroo; ayen da “rhe họhọ ihwo re guọnọ ameivie ukperẹ emu ọgangan.” (Hib 5:12) Ayen rhe rhiabọreyọ uyota ri Jihova memerha vwọphia womarẹ ukoko naa. (Isẹ 4:18) Kerẹ udje, dede nẹ o te omarẹ ẹgbukpe 30 re yen izobo ri Kristi phioba phiyọ Urhi ri Mosis na, jẹ ihwo ri Ju evo ji titi urhi na. (Ro 10:4; Taitọs 1:10) Vwọrẹ uyota, ẹgbukpe 30 re wanre na te kẹ ihwo ri Ju re dia Inenikristi ayen vwo wene iroro rayen kpahen urhi ri Mosis na! Kohwo kohwo ro se ileta rẹ ẹwẹn ọfuanfon na mu Pọl vwo si rhe Inenikristi ri Hibru na sa rhọnvwephiyọ nẹ ẹbe na vọnre vẹ iyono ikokodo. Ọyen oborẹ ayen ghwa guọnọ ayen vwọ bọn esegbuyota rayen gan kpahen ọrhuẹrẹphiyotọ kpokpọ rẹ ayen vwọ vwẹ ẹga kẹ Jihova je nẹrhẹ ayen fiudugberi vwo ghwoghwo dede nẹ ihwo ri Ju na muẹkpahan ayen.​​—Hib 10:​19-​23.

DIESORỌ A VWỌ KẸNOMA KẸ URUEMU RA VWỌ VWẸROSO OMOBỌ RẸ OHWO GAN NỌ

16. Vwọ vrẹ e vwo yerin tedje, die yen o ji fo nẹ avwanre ru?

¹⁶ Ofori nẹ avwanre davwẹngba vwo yerin tedje je yanphiaro. Ọnana mudiaphiyọ nẹ a cha kẹnoma kẹ uruemu ra vwọ vwẹroso omobọ rẹ ohwo gan nọ. (1Kọ 10:12) Ofori nẹ a “rha davwan oma” rẹ avwanre nẹ e vwo vwo imuẹro nẹ a yanphiaro.​​—2Kọ 13:5.

17. Mavọ yen ileta ri Pọl si vwo rhe Inenikristi ri Kọlose vwo djephia nẹ ofori nẹ ayen yerin tedje ọkieje?

¹⁷ Vwẹ ileta ro si vwo rhe ihwo ri Kọlose, Pọl rhoma djunute oboresorọ ọ vwọ ghanre e vwo yerin tedje. Dede nẹ ayen Inenikristi ri tedje re jẹ Pọl si ayen orhọ nẹ ayen nomaso  rere iroro rẹ akpọ na vwo jẹ ayen emuo rọ. (Kọl 2:​6-​10) Vwọba, Ẹpafras rọ nabọ vughe iniọvo rehẹ evunrẹ ukoko na, je nẹrhovwo ‘rere ayen se vwo mudia gan kerẹ ihwo ri tedje.’ (Kọl 4:12) Ọna yen ẹkpo rẹ ota na. Pọl kugbe Ẹpafras riẹnre nẹ a vwọ yanphiaro ọkieje guọnọ ẹgbaẹdavwọn romobọ vẹ ukẹcha rẹ Ọghẹnẹ. Ayen guọnọre nẹ Inenikristi ri Kọlose yerin tedje ọkieje yẹrẹ dia imiragua, o toro ebẹnbẹn rẹ ayen hirharokuẹẹ.

18. Die yen sa phia kẹ Onenikristi ro tedje? (Ni uhoho na.)

¹⁸ Pọl si Inenikristi ri Hibru orhọ nẹ Onenikristi ro yerin tedje re rhe nomasoo, aroesiri rẹ Ọghẹnẹ sa va abọ karekare. Udu rẹ Onenikristi je sa gan te ẹdia rẹ o rhe che se kurhẹriẹ je mrẹ evwoghovwo rẹ Ọghẹnẹẹ. A kpẹvwẹ Ọghẹnẹ nẹ Inenikristi ri Hibru ji rhi bo ghwru te ẹdia ọtiọyenaa. (Hib 6:​4-9) Kẹ ihwo re dobọ rẹ uyono ẹra ji yẹrẹ e ra djẹ nẹ ukoko enẹna re rhoma kurhẹriẹ vwo? Oborẹ ayen vwomakpotọ kurhẹriẹ wan djerephia nẹ ayen fẹnẹ ihwo ri Pọl si kpahen na. Vwọrẹ uyota, ayen guọnọ ukẹcha ri Jihova siẹrẹ ayen de rhivwin bro rhe. (Izi 34:​15, 16) Ekpako na se ru ọrhuẹrẹphiyotọ rẹ oniọvo ro tedje vwọ vwẹ ukẹcha kẹ ayen, ayen vwọ rhoma bọn oyerinkugbe rẹ ayen vẹ Jihova vwori gan.

19. Ẹkẹn vọ yen ofori nẹ e bru kẹ oma?

¹⁹ Wọ da davwẹngba ru wo vwo yerin tedje kerẹ Onenikristi, jẹ o muwẹro nẹ wọ sa yanmu ẹkẹn yena ru wo bru kẹ oma na! Davwẹngba vwo yono kpahen iyono ikokodo rehẹ Baibol na wọ je vwẹ ẹro ri Jihova vwo nẹ emu vwo no. Ọ da dianẹ wo yerin tedje re, wo jẹ oma rhọ wẹẹ rhe ruẹ ọtiọyen.