1. Idjerhe vọ yen Jihova vwo sun ihwo rọyen nene ọrhuẹrẹphiyotọ vwẹ ẹgbukpe ujorin rẹsosuọ?

 KỌKE kọke ri Jihova da vwẹ owian kẹ ihwo rọyen, ọ guọnọre nẹ ayen nabọ ruo nene ọrhuẹrẹphiyotọ. (1Kọ 14:33) Kerẹ udje, ọyen ọhọre Ọghẹnẹ re vwo ghwoghwo iyẹnrẹn esiri na nene akpọneje. (Mt 24:14) Jihova vwẹ Jesu mu nẹ ọ vwẹrote iruo na. Jesu gbẹn idjerhe phiyotọ rere e vwo ruiruo na nene ọrhuẹrẹphiyotọ. A vwọ vwẹ ikoko mu vwẹ asan sansan vwẹ ẹgbukpe ujorin rẹsosuọ, a vwẹ ekpako vwo mu re vwẹ odjekẹ vwọphia re je kobaro rẹ owian na. (Iru 14:23) Vwẹ Jerusalẹm a vwẹ ihwo evo re kpakore kugbe iyinkọn na vwo mu ekpako ri bru erhiẹn rẹ ikoko na eje nene. (Iru 15:2; 16:4) Kidie nẹ ayen nene odjekẹ ra vwọ kẹ ayen na, “esegbuyota rẹ ikoko na kọ ganphiyọ, ayen ki ji buẹnphiyọ kẹdi kẹdẹ.”​​—Iru 16:5.

2. Vwo nẹ 1919 rhe, idjerhe vọ yen Jihova vwọ vwẹ odjekẹ phia je reyọ ota rọyen vwo yono idibo rọyen?

² Nonẹna, Jihova ji vwo ọrhuẹrẹphiyotọ rẹ ihwo rọyen nene. Rhanvwẹ ukpe ri 1919, yen Jesu vwọ reyọ ẹmẹko rẹ eshare ra vwẹ ẹwẹn ọfuanfon jẹreyọ vwọ vwẹrote ọrhuẹrẹphiyotọ rẹ iruo rẹ aghwoghwo na je reyọ Ota rẹ Ọghẹnẹ vwọ  ghẹrẹ idibo rọyen. a (Lu 12:42) O phẹnre dẹn nẹ Jihova ku ebruphiyọ rọyen kuẹ iruo rẹ ẹmẹko yena.​​—Aiz 60:22; 65:​13, 14.

3-4. (a) Djudje rẹ erere ro nocha e de nene ọrhuẹrẹphiyotọ. (b) Die yen a cha ta ota kpahen vwẹ uyono nana?

³ E che se ruiruo ri Jesu vwọ kẹ avwanre na fiotọọ, ọ da dianẹ avwanre nene ọrhuẹrẹphiyotọọ. (Mt 28:​19, 20) Kerẹ udje, ọ da dianẹ e ghwe vwo ekogho kiriguo re de ghwoghwoo; kọyen ihwo eje se ghwoghwo vwẹ kasan kasan ro je ayen eje. Ọnana cha nẹrhẹ ighwoghwota sansan wian ekogho evo abọ buebun, e mi rhe gbobọnyẹ ekogho efa karekare. Wọ sa vwẹ ẹwẹn roro idjerhe efa rẹ avwanre vwọ mrẹ erere siẹrẹ e de nene ọrhuẹrẹphiyotọ?

⁴ Kirobo ri Jesu vwẹ ukẹcha kẹ idibo rọyen ọke rọ vwọ hẹ otọrakpọ na, ọtiọyen ọ je vwẹ ukẹcha kẹ avwanre vwo nene ọrhuẹrẹphiyotọ nonẹna. Vwẹ uyono nana, a cha ta ota kpahen udje ri Jesu phi phiyotọ kugbe oborẹ ukoko rẹ avwanre vwo nene udje yena. A je cha ta ota kpahen obo re se vwo djephia nẹ a vwẹroso ukoko ri Jihova.

UKOKO AVWANRE NENE UDJE RI JESU

5. Idjerhe vọ yen avwanre vwo nene udje ri Jesu? (Jọn 8:28)

⁵ Jesu yono obo ro che ru kugbe obo rọ cha ta vwo mie Ọsẹ rọyen rọhẹ odjuvwu. Ukoko ri Jihova nene udje ri Jesu womarẹ ayen vwo muẹ iyono kugbe odjekẹ rayen kpahan Ota rẹ Ọghẹnẹ. (Se Jọn 8:28; 2Ti 3:​16, 17) Ọkieje yen a vwọ karophiyọ avwanre nẹ e se Ota rẹ Ọghẹnẹ je reyọ vwo ruiruo. Erere vọ yen a cha mrẹ e de nene odjekẹ nana?

6. Erere vọ yen a mrẹ siẹrẹ e de yono Baibol na?

⁶ Avwanre mrẹ erere gbidiki siẹrẹ a da vwẹ ẹbe rẹ ukoko na vwọ fuẹrẹn Baibol na. Kerẹ udje, a sa vwẹ iyono ri Baibol na vwọ vwanvwe odjekẹ rẹ ukoko na vwọ kẹ avwanre. Ọtiọyena a da mrẹvughe nẹ e mu odjekẹ na kpahen Baibol na, kọ nẹrhẹ ẹroẹvwọsuọ avwanre vwo kpahen ukoko ri Jihova ganphiyọ.​​—Ro 12:2.

7. Ovuẹ vọ yen Jesu ghwoghwori, kẹ idjerhe vọ yen ukoko ri Jihova vwo nene udje rọyen?

⁷ Jesu ghwoghwo “iyẹnrẹn esiri rẹ Uvie rẹ Ọghẹnẹ na.” (Lu 4:​43, 44) Ọ je vwẹ iji kẹ idibo rọyen nẹ ayen ghwoghwo iyẹnrẹn esiri rẹ Uvie na. (Lu 9:​1, 2; 10:​8, 9) Nonẹna ihwo eje rehẹ ukoko ri Jihova ghwoghwo ovuẹ rẹ Uvie na o toro asan rẹ ayen dia yẹrẹ owian rẹ ayen wian vwẹ ukoko naa.

8. Okpuphẹn vọ yen avwanre vwori?

⁸ Ọyen okpuphẹn re vwo ghwoghwo uyota ro shekpahen Uvie rẹ Ọghẹnẹ kẹ ihwo efa! Ọ dia ihwo eje yen vwo uphẹn yenaa. Kerẹ udje, ọke ri Jesu vwọ hẹ otọrakpọ na, ọ rhọnvwere nẹ ẹwẹn rẹ Idẹbono soseri kpahen ọyeen. (Lu 4:41) Nonẹna, ohwo ke sa vwomaba ihwo ri Jihova vwo vwobọ vwẹ iruo rẹ aghwoghwo na, o che muwan tavwen. Avwanre djephia nẹ e dje ọdavwaro phia kpahen uphẹn yena womarẹ e vwo soseri vwẹ kasan kasan kugbe kọke kọke. Kerẹ Jesu, avwanre guọnọ davwẹngba avwanre eje vwo ghwoghwo ji yono ihwo kpahen uyota na.​​—Mt 13:​3, 23; 1Kọ 3:6.

9. Idjerhe vọ yen ukoko ri Jihova vwọ nẹrhẹ ihwo riẹn odẹ rẹ Ọghẹnẹ?

⁹ Jesu vuẹ ihwo kpahen odẹ rẹ Ọghẹnẹ. Rọ vwọ nẹrhovwo rhe Ọsẹ rọyen rọhẹ odjuvwu, Jesu da ta: “Mi dje odẹ wẹn kẹ ayen re.” (Jọ 17:26) Vwo nene udje ri Jesu, ukoko ri Jihova davwẹngba rayen eje vwọ cha ihwo uko vwọ riẹn odẹ rẹ Ọghẹnẹ. Idjerhe ọvo rẹ ayen se vwo ruẹ ọtiọyen yen womarẹ New World Translation of the Holy Scriptures ra da vwẹ  odẹ rẹ Ọghẹnẹ vwo ruiruo vwẹ asan sansan ro fori nẹ ọ dia vwẹ Baibol na. A fan ọsoso yẹrẹ ẹbẹre ọvo ri Baibol nana kpo ejajẹ re vrẹ 270. Vwẹ Apẹndis A4 vẹ A5 rẹ efanfan ri New World Translation of the Holy Scriptures, wọ cha mrẹ evuẹ ri shekpahen obo ra vwọ rhoma reyọ odẹ rẹ Ọghẹnẹ vwo ruiruo vwẹ Baibol na. Apẹndis C, rọhẹ Study Bible na, nabọ dje oboresorọ o vwo fo nẹ odẹ rẹ Ọghẹnẹ vwomaphia abọ 237 vwẹ Ẹbẹre Ra Vwẹ Grik Si Vwẹ Isiesi Ọfuanfon Na.

10. Die yen wo yono vwo nẹ oborẹ aye ọvo rọ dia Myanmar tare?

¹⁰ Kerẹ Jesu, avwanre guọnọ davwẹngba vwọ vwẹ ukẹcha kẹ ihwo buebun vwọ riẹn odẹ rẹ Ọghẹnẹ. Ọke rẹ aye ọvo vwẹ Myanmar ro te ẹgbukpe 67 rhe vwọ riẹn nẹ Ọghẹnẹ vwo odẹ, oviẹ da va abọ ọ da ta: “Ọnana yen obọ rẹsosuọ vwẹ akpeyeren mẹ mi vwo nyo nẹ Jihova yen odẹ rẹ Ọghẹnẹ. . . . Obo re ma ghanre ro fori ne me riẹn yen wo yono uvwe na.” Kirobo ra ghwa mrẹ vwẹ ikuegbe nana, ihwo ri vwo ẹwẹn esiri da riẹn odẹ rẹ Ọghẹnẹ o se wene akpeyeren rayen.

VWẸROSO UKOKO NA ỌKIEJE

11. Mavọ yen ekpako se vwo djephia nẹ ayen vwẹroso ukoko ri Jihova? (Ni uhoho na.)

¹¹ Ọrhọ yen idjerhe ọvo ekpako se vwo djephia nẹ ayen vwẹroso ukoko ri Jihova? A da vwẹ odjekẹ phia, ofori nẹ ekpako nabọ frẹkotọ se je davwẹngba rayen eje vwọ reyọ oborẹ ayen seri na vwo ruiruo. Kerẹ udje, ọ dia odjekẹ rẹ oborẹ ayen sa vwọ vwẹrote ẹbẹre sansan vwẹ emẹvwa yẹrẹ sun ukoko na vwẹ ẹrhovwo ọvo yen a vwọ kẹ ayeen, ẹkẹvuọvo a je kẹ ayen odjekẹ rẹ oborẹ ayen sa vwọ vwẹrote idibo ri Kristi. Ekpako ri nene odjekẹ rẹ ukoko na, vwẹ ukẹcha kẹ iniọvo na vwọ riẹn nẹ Jihova vwo ẹguọnọ rayen, ọ je vwẹrote ayen.

12. (a) Diesorọ o vwo fo nẹ e nene odjekẹ rẹ ihwo re kobaro vwẹ ohri rẹ avwanre? (Hibru 13:​7, 17) (b) Diesorọ o vwo fo ra vwọ tẹnrovi asan rẹ ihwo re kobaro vwẹ ohri rẹ avwanre de ruẹ yovwẹn?

¹² Ekpako na da vwẹ odjekẹ kẹ avwanre, ofori nẹ a nabọ nene. E de ru ọtiọyen, ọ sa nẹrhẹ ọ lọhọ kẹ ekpako na ayen vwo ruiruo rayen. Baibol na jiriro kẹ avwanre nẹ e nyẹme je vwomakpotọ kẹ ihwo re kobaro vwẹ ohri rẹ avwanre. (Se Hibru 13:​7, 17.) Ọyena sa bẹn ọkievo. Diesorọ? Kidie eshare nana ihwo re gbaree. Ọtiọyena, a da tẹnrovi asan rẹ ayen de ruẹ chọ ukperẹ asan rẹ ayen de ruẹ yovwẹn, kọyen a vwẹ uphẹn kẹ ivwighrẹn rẹ avwanre. Vwẹ idjerhe vọ? Kidie a rha cha vwẹroso ukoko naa, rọ dia oborẹ ivwighrẹn rẹ avwanre guọnọre. Die kọyen avwanre se ru vwo vwo oniso rẹ efian rẹ ivwighrẹn rẹ avwanre guẹn je sen ayen?

WO JẸ IHWO EFA DOBỌ RẸ ẸROẸVWỌSUỌ WO VWO KPAHEN UKOKO NA JẸẸ

13. Idjerhe vọ yen ivwighrẹn rẹ Ọghẹnẹ vwọ davwẹngba rẹ ayen vwo miovwo ukoko rọyen?

¹³ Ihwo re vwọsua Ọghẹnẹ davwẹngba ayen vwo miovwo erhuvwu rẹ ukoko rọyen ruẹ. Kerẹ udje, avwanre yonori vwẹ Baibol na nẹ, Jihova guọnọre nẹ ihwo re vwẹ ẹga kẹ ọyen ru ọtiọyen vwẹ idjerhe rọ rhọnvwephiyọ, dia fuanfon vwọrẹ ugboma kugbe ọ rẹ uruemu. Ọ tare nẹ e si kohwo kohwo ro vwobọ vwẹ uruemu ri jẹfuọn rọ rhọnvwe kurhẹriẹẹ nẹ ukoko na. (1Kọ 5:​11-​13; 6:​9, 10) Avwanre ruẹ nene iji ri Baibol yena. Fikirẹ ọnana ihwo re vwọsua ke tanẹ avwanre vwo ghovwo ihwoo, a vwẹ ayen guẹdjọ, e ji vwo ẹguọnọ rayeen.

14. Ono yehẹ obuko rẹ efian re guẹn nyẹ ukoko na?

¹⁴ Riẹn asan rẹ ẹvwọsuọ na nẹcha. Eshu yehẹ obuko rẹ efian re guẹn nyẹ ukoko na. Ọyen hẹ “ọsẹ rẹ efian na.” (Jọ 8:44; Jẹ 3:​1-5) Ọtiọyena, e jẹ e rhẹro rọyen nẹ Eshu  cha reyọ ivwighrẹn avwanre vwo titi ikuegbe rẹ efian rẹ ayen guẹn nyẹ ukoko ri Jihova. Ọna yen obo re phiare vwẹ ẹgbukpe ujorin rẹsosuọ.

15. Die yen ilori rẹ ẹga na ru Jesu vẹ idibo rọyen?

¹⁵ Vwẹ ẹgbukpe ujorin rẹsosuọ, ihwo re ka ẹbẹre rẹ Eshu gun efian buebun nyẹ Ọmọ rẹ Ọghẹnẹ rọ pha gbagba ro ji ru emu rẹ igbevwunu. Kerẹ udje, ilori rẹ ẹga na vuẹ ihwo nẹ “osun rẹ ẹwẹn rẹ Idẹbono na” yen kẹ Jesu ẹgba rọ vwọ djẹ ẹwẹn rẹ Idẹbono nẹ ihwo oma. (Mk 3:22) Ọke ra vwọ vwẹ Jesu vwo guẹdjọ, ilori rẹ ẹga na tare nẹ Jesu ta eta rẹ ẹgua, ayen je riẹriẹ otu na vwọ tanẹ a teyọn hwe. (Mt 27:20) Ọke vwọ yanran na, idibo ri Kristi vwo ghwoghwo iyẹnrẹn esiri na, ihwo re vwọsua ayen “da kpare ophu rẹ ihwo” rẹ ẹgborho na rere ayen vwọso ayen. (Iru 14: 2, 19) Vwọ kpahen obo rehẹ Iruọ rẹ Iyinkọn Na 14:​2, Uwevwin Orhẹrẹ ri December 1, 1998, da ta: “Ọ dia ovuẹ na ọvo yen ihwo ri Ju re vwọsua na senree, ayen je ta eta ebrabra kpahen Inenikristi rere Igiye vwo vwo utuoma kpahen ayen.”

16. Die yen ofori nẹ avwanre karophiyọ e de nyo ikuegbe rẹ efian?

¹⁶ Eshu dobọ rẹ efian eguon ji vwẹ ẹgbukpe ujorin rẹsosuọọ. Ọyen je “phiẹn akpọ na ejobi” nonẹna. (Ẹvw 12:9) Wo de nyo erharhe ikuegbe kpahen ukoko na yẹrẹ iniọvo re kobaro vwẹ ohri rẹ avwanre, gba karophiyọ oborẹ ivwighrẹn rẹ Ọghẹnẹ ru Jesu kugbe idibo rọyen vwẹ ẹgbukpe ujorin rẹsosuọ. Nonẹna, e muẹkpahan ji gun efian nyẹ ihwo ri Jihova kirobo ri Baibol na mraro rọyen. (Mt 5:​11, 12) Ikuegbe rẹ efian che se sun avwanre ghwruu siẹrẹ e de vughe asan ri nurhe je siọn kpakpata. Die yen e che ru?

17. Mavọ yen avwanre sa vwọ kẹnoma kẹ imuoshọ ro nẹ ikuegbe rẹ efian cha? (2 Timoti 1:13) (Ni ekpeti na “ Obo ro Fori nẹ Avwanre ru e de Nyo Ikuegbe rẹ Efian.”)

 ¹⁷ Sen ikuegbe rẹ efian. Ọyinkọn Pọl nabọ vwẹ odjekẹ ro phẹnre phia kpahen obo ro fori nẹ e ru e de nyo ikuegbe rẹ efian. Ọ vuẹ Timoti nẹ o “jurhi kẹ ihwo evo nẹ . . . ayen kerhọ rẹ ikuegbe rẹ” efiaan, ẹkẹvuọvo ayen “sen ikuegbe rẹ efian.” (1Ti 1:​3, 4; 4:7) Dede nẹ omotete rọ riẹn emuọvoo sa tọrọ orọnvwọn ogbegbe vwẹ otọ ji muo phiyọ unu, jẹ omiragua che ru ọtiọyeen kidie ọ riẹnre nẹ imuoshọ herọ. Avwanre sian ikuegbe rẹ efian kidie a riẹn asan ro nurhe. Eta re dia uyota “re vọnre vẹ erere” ọvo yen avwanre kerhọ kẹ.​​—Se 2 Timoti 1:13.

18. Mavọ yen e se vwo djephia nẹ a vwẹroso ukoko ri Jihova?

¹⁸ Avwanre fuẹrẹn idjerhe erha vwẹ usun rẹ idjerhe buebun rẹ ukoko ri Jihova vwọ vwẹrokere Jesu. Wo vwo yono Baibol na, jokaphiyọ idjerhe efa rẹ ukoko na vwo nene udje ri Jesu. Vwẹ ukẹcha kẹ ihwo efa vwẹ ukoko wẹn rere ẹroẹvwọsuọ rẹ ayen vwo kpahen ukoko na vwọ ganphiyọ. Rhe dje ẹroẹvwọsuọ wẹn phia womarẹ wọ vwọ fuevun ga Jihova ji tinka muẹ ukoko rọ reyọ vwo ruẹ ọhọre rọyen na. (Un 37:28) Ọtiọyena, e jẹ a vwẹ ẹro ọghanghanre vwo ni uphẹn rẹ avwanre vwori re vwo kuomagbe ihwo ri vwo ẹguọnọ ri Jihova re je fuevun ga.