Vwẹ uyovwinrota yena, avwanre yonori nẹ o vwo okpota ọvo ro shekpahen ihworakpọ vẹ emekashe. Ọyehẹ orufon rẹ odẹ ri Jihova. Ọ da tobọ dianẹ usuon ri Jihova yen me yovwin dede, o ji churobọ si ota rọhẹ otọ na. Vwọba, ota ro shekpahen ọyọnregan rẹ ihworakpọ ji churobọ si ota nana.

Diesorọ a vwọ karunumuo nẹ okpota nana shekpahen odẹ ri Jihova vẹ orufon rọyen? E jẹ a fuẹrẹn iroro erha re sorọ.

Ọrẹsosuọ, Eshu miovwo odẹ ri Jihova kugbe oka rẹ ohwo rọ hepha vwẹ ogba rẹ Idẹn. Onọ rẹ Eshu nọ Ivi na djerephia nẹ Jihova dia Ọghẹnẹ rọ kokẹ ri ghwologhwolo-o, nẹ iji rọ vwọ kẹ Adam vẹ Ivi na ganọ. Eta rẹ Eshu na vwọso obo ri Jihova vuẹ ayen, kọyen o se Ọghẹnẹ ọvwọrofian. Eriyina, o de miovwo odẹ ri Jihova. Ọ da rhe dia “Idẹbono” ro mudiaphiyọ “ọvwọrofian.” (Jọ 8:44) Kidie nẹ Ivi se efian rẹ Eshu gbuyota, o rhe nyupho rẹ Ọghẹnẹ-ẹ. Ọtiọyena, o de gbevwọso Jihova kidie ọ guọnọre nẹ ọ dia osun rọye-en. (Jẹ 3:​1-6) Rhi te ọke na, Eshu ji miovwo odẹ rẹ Ọghẹnẹ womarẹ ọ vwọ hrahra efian kpahen Jihova. Ihwo ri se efian rọyen na gbuyota guọnọ nyupho rẹ Ọghẹnẹ-ẹ. Jẹ, vwọ kẹ ihwo rẹ Ọghẹnẹ, ayen ni ofian re mu bare odẹ ọfuanfon rẹ Ọghẹnẹ na phiyọ oshenyẹ. Ọnana yen emu ọvo kiriguo rọ sorọ oja vẹ umiovwo vwọ vọn akpọ na.

Ọrivẹ, Jihova muegbe ro vwo ru odẹ rọyen fon ji phoro efian re mu bare odẹ rọyen no kare kare fikirẹ erhuvwu rẹ ihwo rọyen. Ọnana yen ọdavwẹ ri Jihova rọ ma kenu. Ọyensorọ ọ vwọ ta: “Ki mi dje ase vẹ ẹfuọn rẹ odẹ me” phia. (Izi 36:23) Jesu djere phenphẹn obo ro fori nẹ idibo ri Jihova nẹrhovwo kpahen rọ vwọ ta: “E jẹ e ru odẹ wẹn fon.” (Mt 6:9) Kọke kọke yen Baibol na vwọ kanrunumuẹ ọghanrovwẹ re vwo ru odẹ ri Jihova fon. Roro kpahen idje nana: “Wa vwọ kẹ Ọrovwohwo urinrin ro fori kẹ odẹ rọye.” (1Ik 16:29; Un 96:8) “So urinrin rẹ odẹ rọye.” (Un 66:2) “Mi se jiri odẹ wẹn bẹdẹ.” (Un 86:12) Eta ri Jesu rọ tarẹ nẹ: “Ọsẹ, vwẹ urinrin kẹ odẹ wẹn” na phiare ọke rẹ Jihova komobọ vwọ ta ota nẹ odjuvwu rhe vwẹ uwevwin rẹ ẹga na rọhẹ Jerusalem. Jihova da kpahen: “Me vwẹ urinrin kẹ nure, me je cha rhoma vwẹ urinrin kẹ.”​—Jọ 12:28. a

Ọrerha, ọkieje yen ọhọre ri Jihova vwo churobọ si odẹ rọyen kugbe oka rẹ ohwo rọ hepha. Di roro: Die ọfa yen cha phia siẹrẹ ọdavwini rọ koba vwẹ oba rẹ Ẹgbukpe Urionrin rẹ Usuon ri Kristi na de nẹ otọ nu? Ẹro vọ yen emekashe vẹ ihworakpọ  eje che vwo ni odẹ ri Jihova ọke yena? A vwọ kpahenphiyọ onọ yena, e jẹ a karophiyọ eta ivẹ rehẹ otọ na re dia ọyọnregan rẹ ihworakpọ kugbe uturhi ri Jihova vwori ro vwo sun akpọ vẹ odjuvwu. Ọkieje yen ihworakpọ re fuevun che vwo hirharoku egbabọse rayen vwọ sẹro rẹ ọyọnregan rayen? Ẹjo. Kidie ọke yena jẹ a nabọ davwẹn ayen ni je dia ihwo re gbare re. Ayen che vwo arhọ ri bẹdẹ. Ọkieje yen usuon ri Jihova cha vwọ ghwa ota vẹ ohra rhe vwẹ uvwrẹ rẹ ihworakpọ kugbe emakashe? Ẹjo. Vwẹ ọke yena, ihworakpọ eje ke cha rhe riẹn nẹ Jihova ọvo yen muwan ji vwo uturhi ro vwo sun akpọ vẹ odjuvwu. Kẹ odẹ ri Jihova vwo?

Vwẹ ọke yena, jẹ ihworakpọ eje riẹn Jihova re, ke ji che ru odẹ rọyen fon kare kare. Dedena, odẹ ri Jihova je cha dia obo re ma ghanre kparobọ kẹ ihwo rọyen ọkieje. Diesorọ? Kidie, ayen mrẹ emu rẹ igbevwunu ri Jihova ruẹ. Di roro: Kidie nẹ Jesu cha vwẹ usuon na eje vwọ kẹ Jihova, Ọghẹnẹ kọ cha “dia erọnvwọn eje vwọ kẹ ihwo ejobi.” (1Kọ 15:28) Ọyena da wan nu, ihworakpọ eje rehẹ otọrakpọ na ke cha riavwerhen rẹ “urinrin rẹ ugbomọphẹ rẹ emọ rẹ Ọghẹnẹ.” (Ro 8:21) Ukuotọ rọyen, Jihova ko che ru ọhọre rọyen gba rere emekashe rehẹ odjuvwu vẹ ihworakpọ vwọ dia vwọrẹ atamu kerẹ orua ọvo.​—Ẹf 1:10.

Enana eje da phia nu, mavọ yen oma che ru orua ri Jihova rọhẹ odjuvwu vẹ otọrakpọ? Vwọrẹ uyota, avwanre che vwo owenvwe ọgangan re vwo jiri Jihova. Ọbuine Devid de si: “Ebruphihọ kẹ Ọrovwohwo . . . Ebruphiho kẹ odẹ rẹ urinrin rọye bẹdẹ.” (Un 72:​18, 19) Ọnana dẹn yen oborẹ avwanre che ru bẹdẹ.

Odẹ ri Jihova dje oka rẹ ohwo rọ hepha phia. E de roro kpahen odẹ ri Jihova, kọ nẹrhẹ a karophiyọ ẹguọnọ rọyen. (1Jọ 4:8) Ọkieje yen avwanre cha vwọ karophiyọ nẹ ẹguọnọ yen mu Jihova vwọ ma avwanre, tan avwanre hirhe ji djephia nẹ usuon rọyen yen me yovwin. Jẹ, ọkieje yen avwanre cha vwọ mrẹ ẹguọnọ ri Jihova vwẹ obo rọ mare. Ọnana mi rhi mu avwanre vwo sikẹrẹ ọsẹ avwanre rọhẹ odjuvwu je vwẹ ujiri kẹ odẹ rọyen bẹdẹ.​—Un 73:28.