1. Die yen Jesu vuẹ idibo rọyen kpahen “oba rẹ akpọ na,” kẹ orhọesio vọ yen ọ vwọ kẹ ayen?

 ẸDẸ evo tavwen Jesu ki ghwu, idibo rọyen ẹne da nọ: “Kọrhọ re cha dia oka . . . oba rẹ akpọ na?” (Mt 24:3) Ọ sa dianẹ idibo na nọ rere ayen sa vwọ riẹn ọke rẹ eyeren rẹ ihwo ri Ju na che vwo vwoba. Vwẹ ẹkpahọnphiyọ rọ vwọ kẹ ayen, ọ dia oba rẹ eyeren rẹ ihwo ri Ju na ọvo yen Jesu ta ota kpahe-en, ọ je ta ota kpahen “oba rẹ akpọ na” rẹ avwanre de yerẹn na. Jesu da ta kpahen ọke rẹ oba na nẹ: “Ẹdẹ yena eye ọke yena ohwo ọvuọvo riẹnrẹ-ẹ emakashe re hẹ obo odjuvwu dede sa riẹ-ẹn eye Ọmọ-ọ, ẹkẹvuọvo Ọsẹ na ọvo.” Ọtiọyena, o de si idibo rọyen eje orhọ nẹ “ovwan rhẹrẹ.”​—Mk 13:​32-37.

2. Diesorọ ọ vwọ dia obo re ghanre Inenikristi ẹgbukpe ujorin rẹsosuọ vwọ rhẹrẹ ọkieje?

² Inenikristi ri Ju rẹ ẹgbukpe ujorin rẹsosuọ cha ra rhẹrẹ; siẹrẹ ayen da guọnọ sivwin arhọ rayen. Jesu vuẹ idibo rọyen obo ro fori nẹ ayen riẹn rere ayen se vwo vughe ọke rẹ eyeren rẹ ihwo ri Ju na che vwo vwoba. Ọ da ta: “Ọke wọ da mrẹ Jerusalẹm rẹ otuofovwi gba riariẹ phihọ, etiyin gba ghwa riẹn nẹ ọke rẹ ẹkua fiotọ rọye si kẹre re.” Ichichiyin yena, o fori nẹ ayen “djẹ kpo obo igbenu” na vwo nene orhọesio rẹ Jesu vwọ kẹ ayen na. (Lu 21:​20, 21) Ihwo ri nene orhọesio yena sivwin rhọ ọke rẹ isodje ri Rom vwọ ghwọrọ Jerusalẹm.

3. Die yen a cha ta ota kpahen vwẹ uyono nana?

³ Nonẹna, avwanre ji yerẹn vwẹ oba rẹ eyeren ọbrabra. Ọtiọyena ko ji fo a vwọ sẹro iroro avwanre je rhẹrẹ  ọkieje. Vwẹ uyono nana, a cha ta ota kpahen oborẹ avwanre sa vwọ vwẹ ẹro abavo vwo ni erọnvwọn re phia vwẹ akpọ na, nomaso, je reyọ ọke ro chekọ na vwo ruiruo vwẹ idjerhe ro me yovwin.

4. Diesorọ o vwo fo ra vwọ riẹn oborẹ erọnvwọn re phia vwẹ akpọ na vwo ru orugba rẹ aroẹmrẹ ri Baibol?

⁴ O vwo oboresorọ o vwo fo nẹ, a riẹn oborẹ erọnvwọn re phia vwẹ akpọ na vwo ru orugba rẹ aroẹmrẹ ri Baibol. Kerẹ udje, Jesu djunute erọnvwọn kiriguo re cha phia re sa chọn avwanre uko vwọ riẹn nẹ oba rẹ eyeren rẹ Eshu nana sikẹre re. (Mt 24:​3-14) Ọyinkọn Pita jiriro kẹ avwanre nẹ e vwo oniso rẹ urugba rẹ aroẹmrẹ ri Baibol rere esegbuyota rẹ avwanre sa vwọ ghwotọ phiyọ. (2 Pi 1:​19-21) Ọbe rọ koba vwẹ Baibol na, vwẹ eta nana vwọ tonphiyọ: “Ọbe rẹ ẹvwọphia ri Jesu Kristi, rẹ Ọghẹnẹ vwọ kẹ nẹ ọ vwọ phia kẹ odibo rọye vwọ kpahe obo re cha phia nanana.” (Ẹvw 1:1) Avwanre vwo owenvwe ra vwọ riẹn obo re phia vwẹ akpọ na kugbe obo ri vwo ru orugba rẹ aroẹmrẹ ri Baibol. Avwanre ji se nene ihwo efa ta ota kpahen erọnvwọn tiọyena.

5. Die yen o fori nẹ e ru, kẹ die yen a cha kẹnoma kẹ? (Ni ihoho na.)

⁵ A da ta ota kpahen aroẹmrẹ ri Baibol, e jẹ a kẹnoma kẹ uruemu rẹ mi rorori. Diesorọ? Kidie avwanre guọnọ ta ota vuọvo rọ cha so ohra vwevunrẹ ukoko na-a. Kerẹ udje, avwanre se nyo isun rẹ akpọ na re ta ota kpahen oborẹ ayen se vwo si obẹnbẹn ọvo rọ vwomaphia no rọ cha ghwa ufuoma kugbe ofuvwegbe rhe. Ukperẹ a vwọ reyọ ẹwẹn rẹ mi rorori vwọ tanẹ ọnana orugba aroẹmrẹ rẹ 1 Tẹsalonaika 5:​3, o fori nẹ e nene odjekẹ kpokpọ rẹ ukoko vwọphia. Siẹrẹ avwanre de muẹ eta rẹ avwanre ta kpahen ẹbe rẹ ukoko na teyenre, ọnana cha vwẹ ukẹcha vwọ kẹ ukoko na vwọ dia vwọrẹ okugbe ji “bru orhiẹ ọvo.”​—1 Kọ 1:10; 4:6.

6. Die yen e se yono nẹ 2 Pita 3:​11-13 rhe?

⁶ Se 2 Pita 3:​11-13. Ọyinkọn Pita chọn avwanre uko vwọ vwẹ ẹro abavo vwo ni aroẹmrẹ ri Baibol. O jiriro kẹ avwanre nẹ a “kpakpa ẹcha rẹ ẹdẹ rẹ Ọghẹnẹ na.” Diesorọ? Ọ dia kidie avwanre guọnọ riẹn “ọke vẹ ẹdẹ” rẹ Jihova cha vwọ reyọ Amagidọn vwọ ghwọrọ akpọ na-a, ẹkẹvuọvo avwanre guọnọ reyọ ọke ro chekọ na vwo yeren akpọ rẹ “ẹfuọn kugbe uyoyovwi.” (Mt 24:36; Lu 12:40) Ọtiọyena, avwanre guọnọ vwo uvi rẹ uruemu je reyọ obo rẹ avwanre ruẹ vwẹ ẹga rọyen eje vwo djephia nẹ avwanre vwo ẹguọnọ rọyen. E se vwo ru ọtiọyen, ko fori nẹ avwanre nomaso.

7. Mavọ yen avwanre se vwo djephia nẹ avwanre ihwo ri nẹ oma sua? (Luk 21:34)

⁷ Ọ dia erọnvwọn re phia vwẹ akpọ na ọvo yen Jesu vuẹ idibo rọyen nẹ ayen niso-o ẹkẹvuọvo ayen ji ni oma rayen so. Ẹkpo yena nabọ vwomaphia vwẹ orhọesio rọhẹ Luk 21:34. (Se.) Jokaphiyọ oborẹ Jesu tare: “Ovwan ni oma rẹ ovwan so.” Ohwo ro ni oma sua, nabọ gbẹrophiyotọ kẹ kemu kemu ro se gbowọphiyọ oyerinkugbe rọyen vẹ Jihova, ọ me je davwẹngba vwọ kẹnoma kẹ ayen. O de ru ọtiọyen, jẹ ọ sẹro oma rọyen vwẹ ẹguọnọ rẹ Ọghẹnẹ.​—Isẹ 22:3; Jud 20, 21.

8. Uchebro vọ yen ọyinkọn Pọl vwọ kẹ Inenikristi?

 ⁸ Ọyinkọn Pọl vuẹ Inenikristi nẹ ayen nomaso. Kerẹ udje, ọ da vuẹ iniọvo rehẹ Ẹfesọs nẹ: “Wa nabọ nite obo rẹ ovwan yan, we muẹ yan djidji-i ẹkẹvuọvo kerẹ evwaghwanre.” (Ẹf 5:​15, 16) Ọkieje yen Eshu vwọ davwẹngba ọ vwọ guọghọ oyerinkugbe rẹ avwanre vẹ Jihova, eriyin na, Baibol na de bru avwanre uche nẹ “we gbe vwo ẹruọ rẹ obo rẹ ọhọre rẹ Ọrovwohwo epha” rere a sa vwọ sẹro rẹ oma avwanre vwọ vrabọ rẹ koka koka ẹvwọsuọ rẹ Eshu.​—Ẹf 5:17.

9. Mavọ yen avwanre se vwo vughe ọhọre ri Jihova?

⁹ Baibol na djunute koka koka rẹ imuoshọ re sa guọghọ oyerinkugbe rẹ avwanre vẹ Jihova. Kọyen avwanre ọvo yen che brorhiẹn kpahen eta ri Baibol na ghwe djunute phiọgu-un. Rere e se vwo brorhiẹn rẹ aghwanre, ko fori nẹ e vwo ẹruọ yẹrẹ vughe “ọhọre rẹ Ọrovwohwo.” E se ru ọtiọyen siẹrẹ a da vwẹ ọkieje yono Ota rẹ Ọghẹnẹ ji roro kpahọn. Avwanre vwo vwo ẹruọ rẹ ọhọre ri Jihova phiyọ je davwẹngba vwo vwo “iroro ri Kristi” ye, avwanre ke cha yan “kerẹ evwaghwanre,” ọ da tobọ dianẹ irhi kiriguo ghwa herọ re vuẹ avwanre obo re ru-u. (1 Kọ 2:​14-16) Imuoshọ evo herọ re bẹn evughe-e, ẹkẹvuọvo efa herọ ra fobọ nẹ sua-a.

10. Imuoshọ vọ yen o fori nẹ a kẹnoma kẹ?

¹⁰ Imuoshọ evo ro fori nẹ a kẹnoma kẹ yen ra vwọ frẹfrẹ, udi obuebun, okpọre, erharhe eta, re vwo ni ughe ri titi ozighi, ọfanrhiẹn, kugbe erọnvwọn efa ọtiọyen. (Un 101:3) Ọkieje yen ọvweghrẹn avwanre, Idẹbono na vwọ gbẹn idjerhe sansan rọ vwọ guọghọ oyerinkugbe avwanre vẹ Jihova. (1 Pi 5:8) E rhe nomaso-o, Idẹbono sa kọn uruemu rẹ omaẹriọ, jẹ evuẹfuọn, urhuru, utuoma, omaẹkparọ kugbe ophu phiyọ ẹwẹn vẹ ubiudu rẹ avwanre. (Ga 5:​19-21) Ẹsosuọ, e se no nẹ iruemu nana ghwa bra-a. Ẹkẹvuọvo a rha jowọ kpakpata re vwo si ayen nẹ ubiudu rẹ avwanre-e, ke cha tan awọ muotọ kerẹ ego, e me rhe so okpetu.​—Jem 1:​14, 15.

11. Imuoshọ ra fobọ nẹ sua-a vọ yen o fori nẹ a kẹnoma kẹ, kẹ diesorọ?

¹¹ Imuoshọ ọvo ra fobọ nẹ sua-a yen erharhe rẹ igbeyan. Roro kpahen udje nana. Wọ vẹ ohwo ọvo rọ dia Oseri ri Jihova-a yen wian owian vwẹ asan ọvo. Jẹ wọ guọnọre nẹ ohwo na vwẹ omamọ ẹro vwo ni Iseri ri Jihova, ọtiọyena ku wo dje uruemuesiri kẹ je vwẹ ukẹcha kẹ. Ọkievo, wọ vẹ ohwo na je re emu kuẹgbe siẹrẹ ovwan de rovwonma. O rhe kri-i, ọnana de rhi hirhephiyọ ẹkuruemu. Ememerha na, eta rẹ ọfanrhiẹn ke shọrọ ruẹ ota eta rẹ ovwan na re ka ghẹnghẹn owẹ erhọn ẹsosuọ. O rhi vwo te ọkiọvo, eta tiọyena ke rhe riẹnriẹn owẹ oma tẹdia rẹ ivun rẹ ayen gbi miovwo uwe-e. Ẹdẹ ọvo vwo te, ohwo rẹ wọ vẹ ọyen gba wian na de durhie uwe nẹ siẹrẹ owian de kuphiyọ nu, wo rhi nene ọyen da udi kugbe wọ da je rhọnvwe. Ọke vwọ yanran na, kemu kemu rọ ta kọyen wọ rhọvwanphiyọ. Wo rorori nẹ o che kri wọ ke vwẹrokere uruemu rẹ ugbeyan wẹn na? Vwọrẹ uyota, avwanre muọghọ kẹ ihwo eje ji dje uruemuesiri kẹ ayen, ẹkẹvuọvo karophiyọ nẹ uruemu rẹ ihwo avwanre vẹ ayen gba ghwọrọ ọke kuẹgbe se ghworo avwanre. (1 Kọ 15:33) Avwanre de nomaso kerẹ oborẹ Jesu vuẹ avwanre nẹ e ru, kẹ a sa kẹnoma kẹ  igbeyan re kpẹkpẹre ri yerẹn akpọ nene iwan ri Jihova-a. (2 Kọ 6:15) Ọtiọyena kẹ a sa mrẹ imuoshọ ra fobọ nẹ sua na-a je kẹnoma kẹ.

12. Die yen idibo ri Jesu che ru ayen vwọ hẹrhẹ oba rẹ eyeren na?

¹² Jesu guọnọre nẹ idibo rọyen muomaphiyọ owian ọkieje rẹ ayen vwọ hẹrhẹ oba rẹ eyeren na. Ọ kẹ ayen owian nẹ ayen ru. Ọ vwẹ iji kayen nẹ ayen ghwoghwo iyẹnrẹn esiri na “vwi Jerusalẹm, vwi Judia, vẹ Sameria, rhiri re te oba rẹ akpọ na.” (Iru 1:​6-8) Ọyen okpo owian yen a vwọ kẹ ayen na! Ayen sa reyọ ọke rayen vwo ruiruo vọnvọn siẹrẹ ayen de muomaphiyọ iruo yena.

13. Diesorọ o vwo fo nẹ a reyọ ọke rẹ avwanre vwo ruiruo vwẹ idjerhe ro me yovwin? (Kọlose 4:5)

¹³ Se Kọlose 4:5. Rere e se vwo nomaso, ko fori nẹ a jomaotọ roro kpahen oborẹ avwanre reyọ ọke rẹ avwanre vwo ruiruo wan. “Uphẹ” yẹrẹ obo re rhẹro rọye-en se te avwanre eje oma. (Agh 9:11) Urhuarhọ rẹ avwanre sa va avwanre abọ kpregede.

14-15. Mavọ yen a sa vwọ reyọ ọke rẹ avwanre vwo ruiruo vọnvọn? (Hibru 6:​11, 12) (Ni uhoho na.)

¹⁴ E de ru ọhọre ri Jihova, je bọn oyerinkugbe avwanre vẹ ọyen gbe vwo  gan, ja reyọ ọke rẹ avwanre vwo ruiruo vọnvọn. (Jọ 14:21) O fori nẹ e “mudia gan . . . yeghe oma-a, dje ebuo-ebuo phihọ vwẹ iruo rẹ Ọrovwohwo.” (1 Kọ 15:58) E de ru ọtiọyen, a rha cha viẹ diekpọvwẹ ọ da dianẹ e ghwuru yẹrẹ eyeren umwemwu nana te oba-a.​—Mt 24:13; Ro 14:8.

¹⁵ Jesu ji suẹn idibo rọyen rẹ ayen vwo ghwoghwo kpahen Uvie rẹ Ọghẹnẹ vwẹ akpọ na eje nonẹna. O ru nene obo ro veri. Jesu yono avwanre womarẹ ukoko ri Jihova obo re se vwo ghwoghwo iyẹnrẹn esiri na, je kẹ avwanre obo ra guọnọre eje ra sa vwọ wian owian na. (Mt 28:​18-20) Ọtiọyena, e ru ẹkẹn ro te avwanre e de muomaphiyọ iruo rẹ aghwoghwo vẹ eyono na, je rhẹrẹ ra vwọ hẹrhẹ ọke rẹ Jihova che vwo phi oba phiyọ eyeren nana. A da reyọ uchebro rọhẹ Hibru 6:​11, 12, vwo ruiruo ka cha sẹro rẹ iphiẹrophiyọ rẹ avwanre “rhiri rhi te oba.”​—Se.

16. Die yen e brorhiẹn nẹ e che ru?

¹⁶ Jihova rhuẹrẹ ẹdẹ vẹ unọke ro che vwo phi oba phiyọ eyeren rẹ Eshu nana. Ẹdẹ na de te, Jihova che ru orugba rẹ aroẹmrẹ rọyen eje ra niyẹnrẹn rọyen phiyọ Baibol na. Ọkiọvo e se no nẹ oba rẹ eyeren nana krinọ. Ẹkẹvuọvo ẹdẹ ri Jihova “che krinọ-ọ!” (Hab 2:3) E je brorhiẹn nẹ “Ọrovwohwo” e che ni, e ja “hẹrhẹ Ọghẹnẹ rẹ esivwo” rẹ avwanre.​—Mai 7:7.