O VWO ọke evo rẹ ihwo ri si Baibol na vwọ vwanriẹn eta evo si. Roro kpahen erọnvwọn erha ri mu ayen vwo ru ọtiọyen:

Ọke re vwo sio. Vwẹ ọke awanre vwẹ Izrẹl, ihwo buebun vwo ọbe rẹ urhi romobọ raye-en. Ọke rẹ ihwo rẹ Izrẹl de siomakoko vwẹ itabanako yen ayen de nyo ọbe rẹ urhi na re se. (Urh 31:​10-​12) Rẹ ayen vwọ kerhọ na, o muẹro nẹ erọnvwọn evo se mu ẹwẹn rayen reyọ kidie otu na vrẹn mudia ọke grongron. (Ne 8:​2, 3, 7) Vwẹ ẹdia tiọyena, ra vwọ vwanriẹn eta cha nẹrhẹ ọ lọhọ kẹ ihwo na ayen vwọ karophiyọ obo ri Baibol na tare je reyọ ayen vwo ruiruo. A vwanriẹn eta evo kiriguo rere ayen sa vwọ karophiyọ evuẹ rẹ urhi ri Jihova vwọ kẹ ayen.​​—Li 18:​4-​22; Urh 5:1.

Obo re siro wan. Ẹkẹn ihwe ri Baibol na ine​​—kerẹ udje ọbe rẹ Une rẹ Ejiro, Une ri Solomọn, kugbe ọbe rẹ Uvwerhe. Ọkievo e dje eta evo ẹvwẹvwanriẹn vwẹ ine rere a sa vwọ kanrunumu uyovwinrota rẹ une na je vwẹ ukẹcha kẹ ihwo na vwo yono une na kuyovwin. Kerẹ udje, jokaphiyọ eta rehẹ Une rẹ Ejiro 115:​9-​11: “E Izrẹl, vwẹ ẹro so Ọrovwohwo na​​—Ọye ọchuko rayen kugbe ekpọfia rayen. E uwevwi rẹ Erọn, vwẹ ẹro wẹn so Ọrovwohwo na​​—Ọye ọchuko rayen kugbe ekpọfia rayen. Ovwan re djẹ oshọ rẹ Ọrovwohwo na, vwẹ ẹro so Ọrovwohwo na​​—Ọye ọchuko rayen kugbe ekpọfia rayen.” Ọ sa dianẹ ẹvwanriẹn ra vwanriẹn eta na vwẹ ukẹcha kẹ ibuine na vwọ sẹro rẹ eta eghanghanre na vwẹ udu rayen.

Oboresorọ ra vwọ kanrunumu ẹkpo eghanghanre. Ọkievo ihwo ri si Baibol na vwanriẹn eta re pha ghanghanre. Kerẹ udje, ọke ri Jihova vwọ vwẹ odjekẹ kẹ ihwo rẹ Izrẹl nẹ ayen ria ọbara-a, ọ womarẹ Mosis vwọ vwanriẹn oboresorọ vwọ kẹ ayen abọ buebun. Ọghẹnẹ guọnọ kanrunumu ota na nẹ arhọ rẹ ugboma na evun rẹ ọbara na yen ọ hepha, kọyen ọbara mudiaphiyọ arhọ. (Li 17:​11, 14) Ọke rẹ iyinkọn na vẹ ekpako ri Jerusalẹm vwo kere erọnvwọn ro fori nẹ a kẹnoma kẹ e vwo jẹ Ọghẹnẹ e gbekuẹ, ayen da rhoma kanrunumu oboresorọ a vwọ kẹnoma kẹ ọbara.​​—Iru 15:​20, 29.

Dede nẹ a vwanriẹn eta evo vwẹ Baibol na, ọ dia ọyen Jihova vwọ guọnọ nẹ a vwẹ ẹvwanriẹn rẹ eta evo vwẹ Baibol na vwo ru ẹkuruemu-u. Kerẹ udje, Jesu tare nẹ: “Ọke wọ da nẹrhovwo, wo dje orọnvwọn ọvuọvo ẹvwẹvwanriẹ-ẹn.” (Mt 6:7) Ọ vuẹ avwanre obo ri shephiyọ ọhọre rẹ Ọghẹnẹ ra sa nẹrhovwo kpahen. (Mt 6:​9-​13) Dede nẹ avwanre dje ota ọvo ẹvwẹvwanrien vwẹ ẹrhovwo rẹ avwanre-e, je a sa nẹrhovwo kpahen uyovwinrota vuọvo abo buebun.​​—Mt 7:​7-​11.

O vwo oboresorọ Ọghẹnẹ vwọ vwanriẹn eta evo kiriguo vwẹ Baibol na. Ọnana ọvo usun rẹ idjerhe buebun rẹ Oyono avwanre Rode na vwo yono avwanre vwọ mrẹ erere.​​—Aiz 48:​17, 18.