Dedena, Jihova guọnọre nẹ avwanre vwẹ erhiori hẹrhẹ ọke ro che vwo ru erọnvwọn eje gba vwẹ ọke ro bruphiyọ. Diesorọ ọ vwọ guọnọ nẹ avwanre hẹrhẹ? Die yen sa nẹrhẹ oma vwerhen avwanre ra vwọ hẹrhẹ na?

DIESORỌ JIHOVA VWỌ GUỌNỌ NẸ AVWANRE HẸRHẸ?

Baibol na tare nẹ: “Ọrovwohwo vwọ hẹrhẹ ro vwo ni arodọnvwẹ wẹ kọye ọ da vwẹ oma rọye kpenu ro vwo dje aruẹdọn rọye kẹ wẹ. Kidie Ọrovwohwo ọye Ọghẹnẹ rẹ ọsoso ebruba kẹ ayen ihwo re hẹrherẹ.” (Aiz 30:18) Ẹsosuọ, e si eta rẹ ọbe rẹ Aizaya nana fikirẹ ihwo ri Ju ri ru udu gangan. (Aiz 30:1) Ẹkẹvuọvo, o vwo evo usun rẹ ihwo ri Ju na re fuevun, eta nana da nẹrhẹ ayen vwo iphiẹrophiyọ. ta nana je nẹrhẹ idibo ri Jihova vwo iphiẹrophiyọ nonẹna.

Ọtiọyena ofori nẹ avwanre vwẹ erhiori hẹrhẹ kidie Jihova vwẹ erhiori hẹrhẹ. O vwo ọke ro bruphiyọ rọ cha vwọ vwẹ eyeren rẹ umwemwu nana vwo toba, ọtiọyena ọ hẹrhẹ ẹdẹ vẹ unọke yena. (Mt 24:36) Ọke yena de rhi te, o che muẹro dẹn nẹ efian yen Idẹbono gun kpahen Jihova vẹ ihwo re vwẹ ẹga Kẹ. Kọ cha ghwọrọ Eshu vẹ ihwo re kẹbẹre rọyen, ẹkẹvuọvo Ọ cha “re ehrọre rẹ avwanre.”

Enẹna, Jihova ghwe siẹ ebẹnbẹn rẹ avwanre hirharokuẹ no-o, ẹkẹvuọvo ọ vuẹ avwanre vẹ imuẹro nẹ oma sa vwerhen avwanre ra vwọ hẹrhẹ na. Vwo nene oborẹ Aizaya siri, avwanre se phiẹrophiyọ nẹ obo ri yovwirin cha phia. (Aiz 30:18) a Mavọ yen avwanre se vwo vwo omavwerhovwẹn yena? Owọẹjẹ ẹne nana sa vwẹ ukẹcha kẹ avwanre.

OBORẸ OMA SA VWỌ VWERHEN AVWANRE RA VWỌ HẸRHẸ NA

Tẹnrovi obo ri yovwirin. Vwẹ akpeyeren rọyen eje Ovie Devid hirharoku odjadja buebun. (Un 37:35) Ẹkẹvuọvo, o de si: “Hwe oma mu kẹ Ọrovwohwo, re wọ vwẹ erhiori hẹrhẹ; wọ phariẹ fiki rẹ ohwo ọfa rẹ idjerhe rọye yovwi kẹ-ẹ; eyẹ vwẹ enu rẹ ohwo rọ jẹ iroro umwemwu.” (Un 37:7) Devid vwẹ uchebro nana vwo ruiruo ro vwo mu ẹwẹn  rọyen kpahen obo re cha nẹrhẹ o sivwin rhọ. Ọ je jokaphiyọ idjerhe sansan ri Jihova vwo bruphiyọ kẹ re. (Un 40:5) Avwanre da je tẹnrovi erọnvwọn iyoyovwin ọ da tobọ dianẹ e hirarokuẹ ebẹnbẹn re phia riariẹ avwanre phiyọ, a cha mrẹ lọlọhọ ra vwọ hẹrhẹ Jihova.

Muomaphiyọ ujiri wọ vwọ kẹ Jihova. Ọbuine ro si Une 71 sa dia Devid, ọbuine na vuẹ Jihova nẹ: “Mi phiẹrohọ kọke kọke, ke me rhoma jiri uwe phihọ.” (Un 71:14) Idjerhe vọ yen o vwo jiri Jihova? Ọ vuẹ ihwo efa kpahen oka rẹ ohwo ri Jihova hepha je suine vwo jiro. (Un 71:​16, 23) Kerẹ Devid, avwanre se vwo aghọghọ siẹrẹ a da hẹrhẹ Jihova. Avwanre jiro womarẹ iruo rẹ aghwoghwo na, eta rẹ avwanre ta nẹ ẹdẹ ra ro ẹdẹ kugbe ine rẹ avwanre sua vwọ vwẹ ẹga kẹ. Ọke wọ da suine rẹ Ukoko na, o rhe fo nẹ wọ frẹkotọ roro kpahen evuẹ rehẹ evun rọyen re sa nẹrhẹ oma vwerhen owẹ?

Jẹ iniọvo wẹn bọn wẹ gan. Ọke ri Devid vwo hirharoku ebẹnbẹn, ọ vuẹ Jihova nẹ: “Mi ghwoghwo odẹ wẹn, . . . vwẹ irharo re ihwo esiri.” (Un 52:9) Ọ dia ọke re de kpo uyono kugbe aghwoghwo ọvo yen iniọvo na da sa bọn avwanre ga-an, ẹkẹvuọvo ji te ọke rẹ avwanre vẹ iniọvo na da ghwọrọ ọke kuẹgbe.​​—Ro 1:​11, 12.

Ru iphiẹrophiyọ wẹn ganphiyọ. Une 62:5 tare nẹ: “Ẹnwe mẹ fọre gbiei hẹrhẹ[Ọghẹnẹ], kidie iphiẹrohọ mẹ obọ rọye o nẹ cha.” Iphiẹrophiyọ ọgangan churobọ si e vwo fiudugbere hẹrhẹ​​—ọyen obo re ghanre mamọ ọ da dianẹ avwanre guọnọ chirakon hẹrhẹ oba rẹ eyeren nana ọ da tobọ dianẹ o gron vrẹ obo re rhẹro rọyen. E jẹ o mu avwanre ẹro nẹ ive ri Jihova che rugba, o toro oborẹ avwanre cha hẹrhẹ kri te-e. E se ru iphiẹrophiyọ rẹ avwanre gan womarẹ e vwo yono Ota rẹ Ọghẹnẹ​​—oborẹ aroẹmrẹ ri Baibol na ọvuọvo vwọ rhọnvwephiyọ ohwohwo kugbe erọnvwọn ikokodo ri Jihova djephia kpahen oma rọyen. (Un 1:​2, 3) O ji fo nẹ avwanre “nẹrhovwo womarẹ ukẹcha rẹ ẹwẹn ọfuanfon na” ọkieje rọ sa nẹrhẹ avwanre sẹro rẹ oyerinkugbe ra vẹ Jihova vwori ra vwọ hẹrhẹ orugba rẹ ive rẹ arhọ ri bẹdẹ ro veri na.​​—Jud 20, 21.

Kerẹ Ovie Devid, jẹ o muwẹro nẹ Jihova vwẹrote ihwo re Hẹrhẹ, nẹ o dje ẹguọnọ Rọyen ro jẹ rhẹriẹ na vwọ kẹ ayen. (Un 33:​18, 22) Rha vwẹ erhiori hẹrhẹ Jihova womarẹ wọ vwọ tẹnroviẹ obo ri yovwirin vwẹ akpeyeren wẹ, Jiri Jihova, vwẹ uphẹn kẹ iniọvo wẹn nẹ e bọn wẹ gan kugbe wo vwo ruẹ iphiẹrophiyọ ọghanghanre ru wo vwori ganphiyọ.