1. Djudje rẹ oboresorọ o vwo fo nẹ e nene Jihova kerẹ Osun avwanre.

 VWẸ ẹwẹn roro nẹ wọ yan ghwru vwevunrẹ egbo. Imuoshọ riariẹ owẹ phiyọ kerẹ: eranvwe re djoma, emerọnvwọn re rhan re sa so ọga, odi rẹ aghwa re sa wan ohwo oma, kugbe otọ re pha chohri chohri rọ vọnre vẹ ukpotọ. O muẹro nẹ ẹwẹn wẹn che totọ ọ da dianẹ wẹ vẹ ohwo rọ nabọ riẹn egbo na yen gba yan rọ cha cha wẹ uko vwọ vrabọ rẹ imuoshọ na! Akpọ nana pha kerẹ egbo yena ro muoshọ na. Ọ vọnre vẹ imuoshọ re sa guọghọ oyerinkugbe rẹ avwanre vẹ Jihova. Ẹkẹvuọvo avwanre vwo Osun ọgbagba rọ dia Jihova. O sun avwanre nẹ imuoshọ vwo kpo asan rẹ avwanre ra, rọ dia arhọ ri bẹdẹ vwẹ akpọ ọkpokpọ na.

2. Idjerhe vọ yen Jihova wan kẹ avwanre odjekẹ?

² Idjerhe vọ yen Jihova wan kẹ avwanre odjekẹ? Idjerhe ọvo kiriguo yen, womarẹ ota rọyen rọ dia Baibol na. Ẹkẹvuọvo, ọ je reyọ ihworakpọ vwọ kẹ avwanre odjekẹ. Kerẹ udje, ọ reyọ “odibo rọ fuevun rọ je ghwanre na” vwọ kẹ avwanre uchebro re sa cha avwanre uko vwo brorhiẹn rẹ aghwanre. (Mt 24:45) Jihova je reyọ eshare efa ri tedje vwọ kẹ avwanre odjekẹ. Kerẹ udje, iniruo okinriariẹ vẹ ekpako ukoko kẹ avwanre uchebro vẹ odjekẹ re sa cha avwanre uko vwo yerin ghene ebẹnbẹn. Ọyen emu rẹ omavwerhovwẹn rẹ avwanre vwọ riẹn nẹ Jihova kẹ avwanre odjekẹ re sa nẹrhẹ e yerin ghene ebẹnbẹn vwẹ ọke rẹ oba nana rọ pha gangan na! Odjekẹ  rọyen na cha avwanre uko vwo ruẹ obo re vwerhọn oma, ọ je nẹrhẹ avwanre yan vwẹ idjerhe rẹ arhọ na.

3. Die yen a cha ta ota kpahen vwẹ uyono nana?

³ Ọke buebun na, ọ sa bẹn e vwo nene odjekẹ ri Jihova, ma rho ọ da dianẹ ihwo ri jẹgba yen vwerọ phia. Diesorọ? Ọ sa dianẹ odjekẹ rẹ ayen vwọphia na je avwanre-e. Yẹrẹ avwanre se no nẹ ọhọ hẹ odjekẹ na-a, ọtiọyena ọ dia obọ ri Jihova yen o nurhe-e. Vwẹ ọke ọtiọyena, ofori nẹ avwanre vwo imuẹro nẹ Jihova yen suẹn ihwo rọyen. E de nene odjekẹ rọyen, kẹ avwanre mrẹ ebruphiyọ. E se vwo ru imuẹro avwanre gan, uyono nana cha cha avwanre uko vwọ riẹn (1) obo ri Jihova sun ihwo rọyen wan vwẹ ọke rẹ awanre, (2) obo ro suẹn avwanre wan nonẹna, kugbe (3) erere avwanre cha mrẹ siẹrẹ e de nene odjekẹ rọyen ọkieje.

OBO RI JIHOVA SUN ẸGBORHO RẸ IZRẸL WAN

4-5. Mavọ yen Jihova vwo djephia nẹ Mosis yen o vwo suẹn ihwo rẹ Izrẹl? (Ni uhoho.)

⁴ Jihova vwẹ Mosis vwo mu nẹ o sun ihwo rẹ Izrẹl nẹ Ijipt. O djerephia kẹ ayen nẹ ọyen womarẹ Mosis vwo sun ayen. Kerẹ udje, Ọ kẹ ayen osunsun egho vwẹ oghẹruvo ọ da rha kẹ ayen osunsun erhanre vwẹ ason. (Ey 13:21) Mosis nene osunsun na, ro sunro vẹ ihwo rẹ Izrẹl kpo Abadi Ọvwavware na. Oshọ rẹ isodje rẹ Ijipt mu ayen rẹ ayen vwo roro nẹ ayen rhe che se vrẹn nẹ uherevie rẹ Abadi Ọvwavware na-a. Ayen tare nẹ Mosis ru chọ ro vwo mu ayen rhe Abadi Ọvwavware na. Ẹkẹvuọvo ayen niro chọ. Jihova komobọ yen sun ihwo rọyen kpo etiyin womarẹ Mosis. (Ey 14:2) Ọghẹnẹ de sivwin ayen vwẹ idjerhe rẹ igbevwunu.​​—Ey 14:​26-​28.

⁵ Vwẹ ikpe ujuvẹ re vwọ kpahọn, Mosis je vwẹroso Ọghẹnẹ nẹ ọ cha vwẹ osunsun rẹ egho na vwo sun ihwo rọyen wan aton na. a Vwẹ uvwre rẹ ọke evo, Jihova vwẹ osunsun rẹ egho na mu vwẹ enu rẹ utughẹ ri Mosis, asan rẹ ihwo eje da sa mrẹ. (Ey 33:​7, 9, 10) Jihova de nene Mosis ta ota nu, Mosis me rha vwẹ odjekẹ na vwọphia kẹ ihwo na. (Un 99:7) O mu ihwo rẹ Izrẹl ẹro nẹ Mosis yen Jihova vwo suẹn ayen.

6. Die yen ihwo rẹ Izrẹl ru kpahen odjekẹ ri Jihova vwọ kẹ ayen? (Ukeri 14:​2, 10, 11)

⁶ Ọ da ohwo mamọ nẹ, ihwo rẹ Izrẹl buebun sen Mosis kerẹ ohwo ri Jihova vwo mu nẹ o sun ayen. (Se Ukeri 14:​2, 10, 11.) Abọ buebun yen ayen sen Mosis kerẹ ohwo ri Jihova vwo mu nẹ o sun ayen. Fikirẹ ọyena, uvwiẹ rẹ Izrẹl yena rha sa ro Otọ rẹ Ive na-a.​​—Uk 14:30

7. Djunute udje rẹ ihwo ri nene odjekẹ ri Jihova. (Ukeri 14:24) (Ni uhoho na.)

⁷ Ẹkẹvuọvo, evo usun rẹ ihwo rẹ Izrẹl nene odjekẹ ri Jihova. Kerẹ udje, Jihova tare nẹ: “Kaleb . . . nabọ nene uvwe.” (Se Ukeri 14:24.) Ọghẹnẹ hwosa kẹ Kaleb, ọ da vwẹ uphẹn kẹ nẹ ọ sane otọ ro jere vwẹ Kenan. (Jos 14:​12-​14) Uvwiẹ rẹ Izrẹl ra rhọnvwe kẹ nẹ e ro otọ rẹ ive na phi omamọ rẹ udje phiyotọ rẹ ayen vwo nene odjekẹ ri Jihova. Ọke ra vwọ vwẹ Joshua vwo mu nẹ ọ reyọ ẹdia ri Mosis kerẹ osun rẹ Izrẹl nu, ayen de “mudia phariẹ kẹ . . . vwẹ ẹdẹ rẹ akpọ rọye ejobi.” (Jos 4:14) Ukuotọ rọyen, Jihova de bruba kẹ ayen womarẹ ọ vwọ kẹ ayen Otọ rẹ Ive na.​​—Jos 21:​43, 44.

8. Djisẹ rẹ obo ri Jihova vwọ vwẹ odjekẹ kẹ ihwo rọyen ọke rẹ ivie na vwo suẹn. (Ni uhoho na.)

⁸ Ikpe evo re vwọ kpahọn, Jihova da vwẹ iguẹdjọ vwo mu nẹ ayen sun ihwo rọyen. Ọke vwọ yanran na rẹ ivie vwo sun ayen re,  Jihova da vwẹ emraro mu nẹ e vwẹ odjekẹ kẹ ihwo rọyen. Ivie re fuevun nene uchebro rẹ emraro na. Kerẹ udje, Ovie Devid vwomakpotọ rhiabọreyọ ọkpọvi mie ọmraro Netan. (2Sa 12:​7, 13; 1Ik 17:​3, 4) Ovie Jehoshafat nene odjekẹ rẹ ọmraro Jahaziẹl ji jiro kẹ ihwo rẹ Izrẹl nẹ ayen “se emraro rẹ [Ọghẹnẹ] gbuyota.” (2Ik 20:​14, 15, 20) Ọke rẹ erọnvwọn vwọ gan kẹ Ovie Hẹzikaya, o de bru ọmraro Aizaya ra vwọ kẹ ukẹcha. (Aiz 37:​1-6) Kọke kọke rẹ ivie na de nene odjekẹ ri Jihova, kọ chochọn rẹ ayen ji brẹba kẹ ayen. (2Ik 20:​29, 30; 32:22) Ofori nẹ ayen eje mrẹvughe nẹ Jihova yen reyọ emraro na vwọ vwẹ odjekẹ kẹ ihwo rọyen. Ẹkẹvuọvo, buebun rẹ ivie na kugbe ihwo rẹ Izrẹl sen emraro ri Jihova.​​—Jer 35:​12-​15.

OBO RI JIHOVA VWỌ VWẸ ODJEKẸ KẸ INENIKRISTI RẸ ẸGBUKPE UJORIN RẸSOSUỌ

9. Womarẹ ihwo vọ yen Jihova vwọ vwẹ odjekẹ kẹ Inenikristi rẹ ẹgbukpe ujorin rẹsosuọ? (Ni uhoho na.)

⁹ Vwẹ ẹgbukpe ujorin rẹsosuọ, Jihova da vwẹ ukoko rẹ Inenikristi vwo mu. Idjerhe vọ yen Jihova vwọ vwẹ odjekẹ kẹ Inenikristi vwẹ ọke yena? Ọ vwẹ Jesu vwo mu ọgbuyovwin rẹ ukoko na. (Ẹf 5:23) Ẹkẹvuọvo, ọ dia odibo ọvuọvo yen Jesu vwẹ odjekẹ vwọ kẹ-ẹ. Ọ vwẹ iyinkọn na kugbe ekpako rehẹ Jerusalẹm vwo sun ayen. (Iru 15:​1, 2) Vwọba, ayen je vwẹ ekpako vwo mu re vwẹ odjekẹ kẹ ukoko na.​​— 1Tẹ 5:12; Tai 1:5.

10. (a) Die yen Inenikristi buebun vwẹ ẹgbukpe ujorin rẹsosuọ ru kpahen odjekẹ ra vwọ kẹ ayen na? (Iruo rẹ Iyinkọn Na 15:​30, 31) (b) Diesorọ ihwo evo vwẹ ọke rẹ awanre vwọ sen ihwo ri Jihova vwo mu? (Ni ekpeti na “ Oboresorọ Ihwo Evo Vwọ Sen Ihwo ri Jihova Vwo Mu.”)

¹⁰ Mavọ yen Inenikristi rẹ ẹgbukpe ujorin rẹsosuọ rhiabọreyọ odjekẹ na wan? Oma vwerhen buebun rayen kpahen odjekẹ na, ayen de nene. Vwọrẹ uyota, “ayen da ghọghọ fikirẹ uduephiophiyawọ na”. (Se Iruo rẹ Iyinkọn Na 15:​30, 31.) Ẹkẹvuọvo, kẹ mavọ yen Jihova wan vwẹ odjekẹ kẹ ihwo rọyen vwẹ ọke avwanre na?

OBO RI JIHOVA SUẸN AVWANRE WAN NONẸNA

11. Djudje rẹ obo ri Jihova vwẹ odjekẹ vwọ kẹ ihwo ri suẹn ihwo rọyen vwẹ ọke rẹ avwanre na.

¹¹ Jihova ji sun ihwo rọyen rhi te nonẹna. O ruẹ ọtiọyen womarẹ Baibol na kugbe ọmọ rọyen, rọ dia ọgbuyovwin rẹ ukoko na.  Avwanre mrẹ obo ri djerephia nẹ Jihova je reyọ ihworakpọ vwọ vwẹ odjekẹ kẹ ihwo rọyen nonẹna? E. Kerẹ udje, roro kpahen obo re phiare ọke rẹ ikpe ri 1870 vwọ wan nu. Charles Taze Russell kugbe igbeyan rọyen da rhe mrẹ nẹ 1914 cha dia ukpe ọghanghare ro che su kpo Uvie rẹ Ọghẹnẹ. (Da 4:​25, 26) Ayen riẹn ọnana fikirẹ ehiahiẹ rẹ ayen ruru kpahen aroẹmrẹ ri Baibol ji vwo imuẹro nẹ i che rugba. Jihova cha ayen uko vwẹ ehiahiẹ ri Baibol rẹ ayen ruru na? E. Obo re phiare vwẹ akpọ na vwẹ ukpe ri 1914 djerephia nẹ Uvie rẹ Ọghẹnẹ tuẹn usuon phiyọ re. Re vwo phi Ofovwin rẹ Akpọeje I nu, ega, etọ re bẹrẹ kugbe ọkanrovwẹ rẹ emu de ji nene. (Lu 21:​10, 11) O muẹro dẹn nẹ Jihova reyọ eshare nana re dia Inenikristi re fuevun na vwọ cha ihwo rọyen uko.

12-13. Ọrhuẹrẹphiyotọ rẹ ẹyan-obaro rẹ iruo rẹ uyono kugbe aghwoghwo vọ yen e ruru vwẹ ọke Ofovwin rẹ Akpọeje II?

¹² Ji roro kpahen obo re phiare vwẹ Ofovwin rẹ Akpọeje II. Ọke rẹ iniọvo eshare ri tedje vwẹ esiri ukoko vwo yono kpahen Ẹvwọphia 17:8 nu, ayen da rhe mrẹvughe nẹ ọ dia Amagidọn yen che ku Ofovwin rẹ Akpọeje II na phiyotọ-ọ, ẹkẹvuọvo ọyena da wan nu, ayen je cha mrẹ ọke rẹ ufuoma ro che rhie uphẹn phiyọ re se vwo ruiruo aghwoghwo na kpobarophiyọ. Dede nẹ e niro nẹ ọ cha sa phia vwẹ ọke yena-a, jẹ ukoko ri Jihova vwẹ Isikuru rẹ Giliẹd vwo mu re de yono imishọnare ri ghwoghwo ji yono ihwo vwẹ ẹkuotọ rehẹ akpọ na eje. E ji imishọnare kpo asan sansan vwẹ ọke rẹ ofovwin na je vwọ hẹ otọ dede. Vwọba, odibo rọ fuevun na ji ru ọrhuẹrẹphiyotọ ra vwọ vwẹ ọbe rẹ Isikuru rẹ Uyono Rukoko na b vwo yono iniọvo rẹ ukoko na rehẹ akpọneje, rere ayen vwọ dia uvi rẹ ighwoghwota kugbe iyono. Womarẹ uyono nana, e de muegbe rẹ ihwo rẹ Ọghẹnẹ vwọ kẹ iruo rọ hẹrhẹ ayen vwẹ obaro na.

¹³ Nonẹna, o phẹnre dẹn nẹ Jihova yen suẹn ihwo rọyen vwẹ uvwre rẹ ọke nana rọ pha gangan na. Rhanvwẹ ọke re vwo phi Ofovwin rẹ Akpọeje II nu, ihwo ri Jihova vwẹ ẹkuotọ buebun riavwerhen rẹ ufuoma kugbe ọmuvwiẹ rẹ ayen vwo ruiruo aghwoghwo na. Vwọrẹ uyota, owian na yan phiaro.

14. Die yen sa nẹrhẹ avwanre vwẹroso odjekẹ rẹ ukoko ri Jihova kugbe ekpako re vwo mu vwọphia? (Ẹvwọphia 2:1) (Ni uhoho na.)

¹⁴ Nonẹna, Ẹko Rọvwẹrote na je vwẹrosua Kristi vwọ kẹ odjekẹ. Ayen guọnọre nẹ odjekẹ rẹ ayen vwọ kẹ iniọvo na dje ẹro ri Jihova vwo nẹ emu phia. Ayen je wan oma rẹ iniruo okinriarẹ kugbe ekpako na vwọ vwẹ odjekẹ phia kẹ iniọvo rẹ ukoko na. c Ekpako ra jẹreyọ na hẹ “obọrhen” ri Kristi. (Se Ẹvwọphia 2:1) Vwọrẹ uyota, ekpako nana gbare-e erọnvwọn je chọ ayen obọ. Mosis vẹ Joshua ji ru chọ vwẹ ọke evo, ọtiọyen ji te iyinkọn na. (Uk 20:12; Jos 9:​14, 15; Ro 3:23) Dedena, Kristi nabọ suẹn odibo rọ fuevun kugbe ekpako ra jẹreyọ na, o ji che rhe ruẹ ọtiọyen vwẹ “ẹdẹ na eje rhirin re te okuphiyọ rẹ eyeren na.” (Mt 28:20) Ọtiọyena, ofori nẹ avwanre rha vwẹrosua odjekẹ rọ vwọphia womarẹ ihwo ro vwo mu nẹ i mu usiokọ rẹ ukoko na.

AVWANRE MRẸ ERERE SIẸRẸ E DE NENE ODJEKẸ RI JIHOVA ỌKIEJE

15-16. Die yen wo yono vwo nẹ udje rẹ ihwo ri nene odjekẹ ri Jihova?

¹⁵ E de nene odjekẹ ri Jihova, a cha mrẹ ebruphiyọ enẹna. Kerẹ udje, Andy kugbe Robyn reyọ uchebro rọ tare nẹ e yeren akpọ ri kekpe vwo ruiruo. (Matiu 6:22.) Ọtiọyena, ayen da vwomakpahotọ vwo vwobọ vwẹ iruo rẹ ebanbọn rẹ ukoko na. Robyn da ta: “Ọke buebun avwanre dia asan sansan re ghwa rho-o, re tobọ vwo ukoni-i. Me shẹ erọnvwọn buebun re me vwọ ghwẹ ihwo phiyọ ifoto, rọ dia iruo ro jevwe mamọ. Me viẹre me vwọ shẹ ayen. Ẹkẹvuọvo, kerẹ Sera rọ dia aye rẹ Ebraham, mi brorhiẹn me vwọ tẹnrovi obaro na.” (Hib 11:15) Erere vọ yen aye gbe ọshare nana mrẹre fikirẹ orhiẹn rẹ ayen bruru na? Robyn da ta: “Oma vwerhen avwanre gangan rẹ avwanre vwọ vwẹ oborẹ avwanre vwori ejobi vwọ kẹ Jihova. Avwanre de vwobọ vwẹ iruo rẹ ebanbọn rẹ ukoko na, kẹ avwanre vwẹ ẹwẹn roro oborẹ akpeyeren cha dia vwẹ akpọ ọkpokpọ na.” Andy rhọnvwephiyọ rọ vwọ ta: “Oma vwerhen avwanre rẹ avwanre vwọ vwẹ ọke vẹ ẹgba avwanre eje vwo bicha iruo aghwoghwo na.”

¹⁶ Idjerhe ọfa vọ yen avwanre vwọ mrẹ erere siẹrẹ e de nene odjekẹ ri Jihova? Marcia vwo wontọ nẹ secondary school nu, ko roro kpahan uchebro ra vwọ kẹ nẹ ọ dia ọkobaro. (Mt 6:33; Ro 12:11) Ọ da ta: “A kẹ vwẹ iskọlashipi  re vwo yono uvwe kpo yunivasiti ẹgbukpe ẹnẹ soso. Ẹkẹvuọvo me guọnọ ga Jihova vẹ ẹgba mẹ eje. Ọtiọyena, mi de kpo isikuru re de yono iruo rẹ obọ me sa vwọ vwẹrote oma mẹ vwo ruiruo rẹ aghwoghwo na. Ọnana ọvo usun rẹ erhiẹn ri me yovwin ri mi bruru. Me riavwerhen rẹ ẹga mẹ kerẹ ọkobaro ọkieje enẹna, iruo mẹ je kẹ vwẹ uphẹn me vwọ vwẹ ukẹcha phia vwẹ Bẹtẹl je riavwerhen rẹ uphẹn rẹ ẹga oghẹresan efa.”

17. Ebruphiyọ efa vọ yen no cha siẹrẹ e de nene odjekẹ ri Jihova? (Aizaya 48:​17, 18)

¹⁷ Ọkievo, a kẹ avwanre odjekẹ re sẹro avwanre vwo nẹ imuoshọ kerẹ e vwo vwo ẹguọnọ rẹ igho kugbe erọnvwọn re sa nẹrhẹ avwanre churhi rẹ Ọghẹnẹ. E de nene odjekẹ ri Jihova, avwanre mrẹ ebruphiyọ. Ọ nẹrhẹ e vwo ẹwẹn obrorhiẹn rọ fonro je vrabọ rẹ okpetu. (1Ti 6:​9, 10) Ukuotọ rọyen, kẹ avwanre vwẹ ẹga ro nẹ otọ rẹ udu rhe vwọ kẹ Jihova rọ nẹrhẹ e vwo ufuoma kugbe omavwerhovwẹn.​​—Se Aizaya 48:​17, 18.

18. Diesorọ wo vwo brorhiẹn wo vwo nene odjekẹ ri Jihova ọkieje?

¹⁸ Aphro herọ-ọ nẹ Jihova cha rha reyọ ihworakpọ vwọ vwẹ odjekẹ phia vwẹ uvwre ọke rẹ ukpokpogho rode na kugbe uvwre ọke rẹ usuon rẹ ẹgbukpe uriorin ọvo na. (Un 45:16) Avwanre che rhe nene odjekẹ yena ọ da tobọ dianẹ ọ fẹnẹ oborẹ avwanre guọnọ ru jovwo? E se ru ọtiọyen ọ da dianẹ avwanre nene odjekẹ ri Jihova vwọphia asaọkiephana. Ọtiọyena, e jẹ a vwẹ ọkieje vwo nene odjekẹ ri Jihova kugbe odjekẹ rẹ eshare ro vwo mu nẹ e vwẹrote avwanre. (Aiz 32:​1, 2; Hib 13:17) Re vwo ru ọtiọyena, kẹ avwanre cha vwẹroso Osun avwanre Jihova, ro sun avwanre vwo nẹ imuoshọ ri se miovwo oyerinkugbe rẹ avwanre vẹ ọyen vwori, ji sun avwanre kpo akpọ ọkpokpọ re de che vwo arhọ ri bẹdẹ na.