1-2. Ebẹnbẹn vọ yen idibo ri Jihova re fuevun se hirharokuẹ?

 AKPEYEREN avwanre se wene kpregede siẹrẹ e de hirharoku ebẹnbẹn. Kerẹ udje, oniọvo ọshare ọvo re se Luis a rhe mrẹvughe nẹ ọyen vwo ọga rẹ ikansa. Idọktọ vuẹrẹ nẹ emeranvwe evo yen chekọ tavwẹn o ki ghwu. Monika vẹ ọshare rọyen muomaphiyọ ẹga ri Jihova. Ẹdẹ ọvo vwo te, Monika da rhe mrẹvughe nẹ ọshare rọyen rọ dia ọkpako ukoko, siomanẹ ru umwemwu vwẹ ikpe buebun re. Oniọvo aye re se Olivia rọ je rọvwọ-ọn, vrẹn nẹ uwevwin rọyen fikirẹ odju ọgangan ro che dju je so oghwọrọ vwẹ ekogho rọ dia. Ọke ro vwo rhivwin, ọ da mrẹvughe nẹ odju na guọghọ uwevwin rọyen totọ. Akpeyeren rẹ ihwo nana re djunute na, weneri kpregede. Emu tiọyena je phia kẹ wẹ jovwo re? O vwo ọke ọvo wo vwo hirharoku ebẹnbẹn ro wene akpeyeren wẹn siẹvuọvo?

² Avwanre re dia idibo ri Jihova re fuevun, je rioja rẹ ebẹnbẹn vẹ ega rẹ ihworakpọ eje hirharokuẹ. Avwanre ji se hirharoku ẹvwọsuọ yẹrẹ omukpahen ro nẹ abọ rẹ ihwo ri vwo utuoma kpahen ihwo rẹ Ọghẹnẹ cha. Dede nẹ Jihova chochọn rẹ avwanre vrabọ rẹ ebẹnbẹn tiọyena-a, jẹ o veri nẹ ọyen cha cha avwanre uko. (Aiz 41:10) Womarẹ ukẹcha rọyen, avwanre sa sẹro rẹ aghọghọ rẹ avwanre, brorhiẹn rẹ aghwanre, ji fuevun kẹ dede nẹ e hirharokuẹ ebẹnbẹn re pha gangan. Vwẹ uyono nana, a cha ta ota kpahen idjerhe ẹne ri Jihova vwọ cha avwanre uko siẹrẹ e de hirharoku ebẹnbẹn vwẹ akpeyeren. A je cha ta ota kpahen obo ro fori nẹ avwanre ru a sa vwọ mrẹ erere vwo nẹ ukẹcha rọ vwọ kẹ avwanre.

 JIHOVA CHA SẸRO WẸ

3. Die yen sa bẹn avwanre eruo, siẹrẹ e de hirharokuẹ ebẹnbẹn?

³ Ebẹnbẹn na. Ọ sa bẹn kẹ avwanre re vwo roro emu fiotọ ji brorhiẹn siẹrẹ e de hirharoku ebẹnbẹn. Diesorọ? Ọ sa dianẹ obo re phiare na miavwe avwanre te ubiudu. Ẹnwan na je sa nẹrhẹ ẹwẹn avwanre kuọrọn. Oma se ru avwanre kerẹsiẹ ra da mrẹ nẹ a yan vwẹ idjerhe rọ vọnre vẹ ivwirhi, a rha riẹn ẹbẹre ra cha wa-an. Jokaphiyọ oborẹ oma ru iniọvo eya ivẹ re djunute siẹvure ọke rẹ ayen vwo hirharoku ebẹnbẹn. Olivia da ta: “Odju ọgangan na vwọ guọghọ uwevwin mẹ nu, ẹnwan de mu vwe rọ, me rha tobọ riẹn obo ri mi che ru-u.” Monika da ta kpahen oborẹ ọshare rọyen ruru na: “Oborẹ oma ru vwe, vrẹ ohwo re kuphiyotọ. Ọ ghene da vwẹ te ubiudu. Ke me rhe mrẹ bẹnbẹn mi vwo ru erọnvwọn ri mi ruẹ jovwo. Obo re me nama rhẹro rọye-en yen phia kẹ vwẹ na.” Mavọ yen Jihova veri nẹ o cha cha avwanre uko wan siẹrẹ e de hirharoku ebẹnbẹn re vrẹ avwanre oma?

4. Vwo nene obo rehẹ Filipae 4:​6, 7, die yen Jihova veri nẹ ọ cha kẹ avwanre?

⁴ Ukẹcha ri Jihova vwọ kẹ avwanre. O veri vwẹ Baibol na nẹ ọ cha kẹ avwanre “ufuoma rẹ Ọghẹnẹ.” (Se Filipae 4:​6, 7.) Ufuoma nana yen udu ro totọ vẹ ẹwẹn ri dọe re vwo fikirẹ uvi rẹ oyerinkugbe ra vẹ Jihova vwori. Ufuoma nana “rho vrẹ ẹruọ ejobi”; o yovwin vrẹ obo ra sa vwẹ ẹwẹn roro. O vwo ọkiọvo wọ vwọ nẹrhovwo nẹ otọ rẹ ubiudu rhe Jihova nu, ẹwẹn wẹn de totọ? Ọyena yen “ufuoma rẹ Ọghẹnẹ” ra ta na.

5. Idjerhe vọ yen ufuoma rẹ Ọghẹnẹ vwọ sẹro rẹ iroro vẹ ubiudu rẹ avwanre?

⁵ Ẹkpo ri Baibol vuọvo na je tanẹ ufuoma rẹ Ọghẹnẹ kọ “sẹro” yẹrẹ chochọn rẹ “ubiudu vẹ ẹgba iroro rẹ ovwan.” Ota ra fan phiyọ “sẹro” ọyen ota re vwo ruiruo vwẹ owian rẹ isodje. O mudiaphiyọ isodje re chochọn rẹ orere je sẹro rọyen nẹ abọ rẹ ivwighrẹn. Ihwo re dia orere rẹ isodje rhẹrẹ, vwerhẹn vwọrẹ ufuoma, kidie ayen riẹnre nẹ isodje mudia anurhoro rẹ orere na. Vwẹ idjerhe vuọvo na, siẹrẹ ufuoma rẹ Ọghenẹ da sẹro rẹ ubiudu vẹ iroro avwanre, oshọ rhe che mu avwanre-e, ẹwẹn rẹ avwanre ko che totọ. (Un 4:8) Kirobo rọ phia kẹ Hanah, ọ da tobọ dianẹ ẹdia rẹ avwanre weneri ugege yena-a, ẹwẹn rẹ avwanre ji se totọ. (1Sa 1:​16-​18) Ẹwẹn rẹ avwanre da nabọ totọ, kọ cha lọhọ re vwo roro emu fiotọ ji brorhiẹn rẹ aghwanre.

6. Die yen e se ru a sa vwọ mrẹ erere vwo nẹ ufuoma rẹ Ọghẹnẹ rhe? (Ni uhoho na.)

⁶ Obo ro fori nẹ avwanre ru. Ẹwẹn wẹn de kpokpo uwe, kperi se isodje rọ sa “sẹro” wẹ re vwo ru udje na. Vwẹ idjerhe vọ? Nẹrhovwo re te ọke wọ vwọ mrẹ ufuoma rẹ Ọghẹnẹ.  (Lu 11:9; 1Tẹ 5:​17) Luis, re djunute siẹvure, ta ota kpahen obo rọ vẹ aye rọyen, Ana, se vwo yerin ghene ẹdia na ọke rẹ ayen vwọ riẹn nẹ emeranvwe evo yen chekọ tavwen o ki ghwu. Ọ da ta: “Vwẹ ẹdia nana, ọ bẹn e se vwo brorhiẹn ro shekpahen omaesivwon vẹ erọnvwọn efa. Ẹkẹvuọvo vwẹ uvwre rẹ ọke nana, ẹrhovwo ẹnẹ nẹrhẹ ẹwẹn avwanre totọ.” Luis vẹ aye rọyen tare nẹ ayen nẹrhovwo rhe Jihova abọ buebun nẹ ọ kẹ ayen iroro ro fiotọ, ẹwẹn ri dọe vẹ aghwanre rẹ ayen se vwo bru omamọ orhiẹn. Ayen ghene mrẹ ukẹcha rọyen. Wo de hirharoku ebẹnbẹn, muomaphiyọ ẹrhovwo, ku wọ cha mrẹ ufuoma ri Jihova rọ cha sẹro rẹ udu vẹ iroro wẹn.​​​—Ro 12:12.

JIHOVA CHE MU WE VI

7. Mavọ yen oma se ru avwanre siẹrẹ e de hirharoku ebẹnbẹn ọgangan?

⁷ Ebẹnbẹn na. Avwanre de hirharokuẹ ebẹnbẹn ọgangan, oborẹ avwanre ru erọnvwọn wan, iroro avwanre, vẹ oborẹ oma ru avwanre se wene nẹ obo rọ hepha jovwo. Kerẹ okuna rẹ ogiribo vẹ ọgbogho rẹ urhie muẹ cha muẹ kpo, ọtiọyen oborẹ oma ruẹ avwanre wene cha wene kpo. Ana, re djunute siẹvure tare nẹ ẹdia rọyen weneri mamọ ọke ri Luis vwo ghwu nu. Ọ da ta: “Ọke mi de she ọkuọrọn, akpọ ko ghwe nu vwe ọhọ. Ivun ko ji miovwo uvwe mamọ nẹ o ghwuru.” Vwọ vrẹ ọyena, Ana da rhe mrẹ oma rọyen vwẹ ẹdia rẹ ọruvwohwo, ofu ko ji dje siẹrẹ o de che bru oghẹre rẹ orhiẹn ro shekpahen erọnvwọn ri Luis nabọ se ruẹ jovwo. Ọkievo, oma ko ruo kerẹsiẹ ra da mrẹ nẹ ogiribo ọgangan muo cha muo kpo vwẹ abadi. Idjerhe vọ yen Jihova vwọ cha avwanre uko ọ da dianẹ e hirharoku ebẹnbẹn rọ nẹrhẹ oma ru avwanre kerẹ ohwo rẹ ogiribo muẹ cha muẹ kpo?

8. Vwo nene obo rehẹ Aizaya 33:​6, imuẹro vọ yen Jihova vwọ kẹ avwanre?

⁸ Ukẹcha ri Jihova vwọ kẹ avwanre. Ọ kẹ avwanre imuẹro nẹ o che mu avwanre vi. (Se Aizaya 33:6.) Ogiribo ọgangan de mu okuna vwẹ abadi, ọ sa nẹrhẹ ọ rha nuẹ cha nuẹ kpo kerẹsiẹ ra da mrẹ nẹ ọ guọnọ shuẹ. Rere okuna na vwo jẹ nuẹ gan nọ, evo vwo erọnvwọn re họhọ awọ vwẹ okọkọ rayen re ro evunrẹ ame na. Awọ nana yọnrọn okuna na o vwo jẹ nuẹ gan nọ, ọnana kọ sa nẹrhẹ oma fu ihwo rehẹ evun rọyen. Ẹkẹvuọvo ọke rẹ okuna na de biẹ obaro, yen awọ nana da nabọ riẹn wian. Vwẹ idjerhe vuọvo na Jihova che mu avwanre vi ọ da dianẹ avwanre je fuevun ga vwẹ ọke rẹ ebẹnbẹn.

9. Mavọ yen erọnvwọn re vwo ru ehiahiẹ sa vwọ cha avwanre uko vwo sun iroro avwanre? (Ni uhoho na.)

⁹ Obo ro fori nẹ avwanre ru. Wo de hirharoku ebẹnbẹn ọgangan, davwẹngba vwọ  nẹrhovwo, kpo uyono ji vwobọ vwẹ iruo aghwoghwo na ọkieje. Vwọrẹ uyota, ọ sa bẹn wo vwo ru te oborẹ wo ruẹ jovwo, ẹkẹvuọvo karophiyọ nẹ Jihova rhẹro rọyen nẹ avwanre ru vrẹ asan rẹ ẹgba rẹ avwanre teri-i. (Ni Luk 21:​1-4.) Vwọba, rhuẹrẹ ọke phiyọ vwọ kẹ uyono romobọ kugbe erorokodo. Diesorọ? Womarẹ ukoko rọyen, Jihova kẹ avwanre iyovwinreta vẹ ividio sansan re mu kpahen Baibol na re sa cha avwanre uko vwo mudia gan vwẹ ọke rẹ ebẹnbẹn. Wọ vwọ mrẹ iyovwinreta vẹ ividio tiọyena, wọ sa reyọ erọnvwọn re vwo ru ehiahiẹ re ru vwẹ ejajẹ wẹn, kerẹ aplikeshọni ri JW Library^®, Watch Tower Publications Index, kugbe Research Guide for Jehovah’s Witnesses vwo ruiruo. Monika, ra ta ota kpahen siẹvure tare nẹ ọke rẹ ọmiaovwẹ rẹ obo re phiare na da gan mamọ re, kọ ghwa reyọ erọnvwọn re vwo ruẹ ehiahiẹ tiọyena vwọ guọnọ uchebro. Kerẹ udje, ọ sa hiẹ ubiota na “ophu.” Ọkiefa, ọ me rha hiẹ eta na “ophiẹnvwe” yẹrẹ “evun-ẹfuọn.” Kẹ o se obo rọ hiẹ mrẹ bẹsiẹ ẹwẹn rọyen vwo totọ. Ọ da ta: “Me vwọ ton ehiahiẹ na phiyọ, me ro ẹnwan mamọ ẹkẹvuọvo me vwo hiẹ yanran ye, oma ko ru vwe kerẹsiẹ ra da mrẹ nẹ Jihova gbane ovwẹ boma. Mi vwo se yanran na, Ke me rhe mrẹvughe nẹ Jihova vwo ẹruọ rẹ oborẹ oma ru vwe vwẹ ẹdia sansan, ọ je vwẹ ukẹcha kẹ vwẹ.” Ukẹcha tiọyen ro nẹ obọ ri Jihova rhe sa cha wẹ uko vwo sun iroro wẹn bẹsiẹ ẹwẹn wẹn vwo totọ.​​—Un 119:​143, 144.

JIHOVA CHE BICHA WẸ

10. Mavọ yen oma se ru avwanre siẹrẹ obo re brare da phia kẹ avwanre?

¹⁰ Ebẹnbẹn na. Obo re brare da phia kẹ avwanre, o se mie avwanre ẹgba je nẹrhẹ ovwiẹrẹ ro avwanre oma ọkievo. Oma se ru avwanre kerẹ ohwo rọ djonẹ rọ sa djẹ gangan jovwo, ẹkẹvuọvo enẹna kọ sẹghrẹ awọ. A sa mrẹ bẹnbẹn re vwo ru erọnvwọn rẹ avwanre ruẹ jovwo, yẹrẹ e rhe che vwo owenvwe re vwo ru obo re kẹ avwanre omavwerhovwẹ-ẹn. Oma sa ghwọrọ avwanre kerẹ Ilaija, e mi no nẹ ọ pha bẹnbẹn re vwo vrẹn nẹ ovwerhẹn rẹ avwanre. (1Iv 19:​5-7) Die yen Jihova veri nẹ o che ru siẹrẹ avwanre de she ọkuọrọn?

11. Idjerhe ọfa vọ yen Jihova vwọ cha avwanre uko? (Une rẹ Ejiro 94:18)

¹¹ Ukẹcha ri Jihova vwọ kẹ avwanre. O veri nẹ ọ cha yọnrọn avwanre mudia. (Se Une rẹ Ejiro 94:18.) Kirobo rẹ ọdjonẹ rọ wan oma guọnọ ukẹcha rẹ ohwo rọ cha yọnrọn ọ  sa vwọ yan ye, ọtiọyen avwanre je sa guọnọ ukẹcha e se vwo muomaphiyọ ẹga ri Jihova. Vwevunrẹ ẹdia nana, Jihova da kẹ avwanre imuẹro nẹ: “Mẹvwẹ, rẹ Ọrovwohwo Ọghẹnẹ wẹn, yọnrọn obọrhe wẹn; Mẹvwẹ re ta kẹ wẹ, Wọ djẹ oshọ-ọ Me sa cha wẹ uko.” (Aiz 41:13) Ovie Devid mrẹ oka rẹ ukẹcha nana. Ọke ro vwo hirharoku ebẹnbẹn kugbe ivwighrẹn, ọ da ta kẹ Jihova: “Obọrhe wẹn da chọ vwẹ.” (Un 18:35) Kẹ mavọ yen Jihova vwo biẹcha avwanre?

12. Amono yen Jihova sa vwọ cha avwanre uko siẹrẹ avwanre de she ọkuọrọn?

¹² Ọke buebun, Jihova biẹcha avwanre womarẹ ọ vwọ reyọ ihwo efa vwọ cha avwanre uko. Kerẹ udje, ọke ọvo rẹ oshọ vwo mu Devid, ugbeyan rọyen Jonatan de bro ra ra vwẹ ọbọngan kẹ je ta eta ri se phiuduphiyọ awọ. (1Sa 23:​16, 17) Vwẹ idjerhe vuọvo na, Jihova je reyọ Ilaesha vwọ vwẹ ukẹcha rẹ Ilaija guọnọre vwọ kẹ. (1Iv 19:​16, 21; 2Iv 2:2) Nonẹna, Jihova je sa reyọ ihwo rẹ orua, igbeyan, yẹrẹ ekpako rẹ ukoko na vwọ cha avwanre uko. Ẹkẹvuọvo, siẹrẹ emu de te avwanre oma, avwanre se vwo ẹwẹn re vwo sioma nẹ ohri rẹ ihwo je dia komobọ. Ẹwẹn yena se rhe ohwo. Kẹ die yen avwanre se ru a sa vwọ mrẹ ukẹcha ri Jihova?

13. Die yen ofori nẹ e ru a sa vwọ mrẹ erere vwo nẹ ukẹcha ri Jihova vwọ kẹ avwanre? (Ni uhoho na.)

¹³ Obo ro fori nẹ avwanre ru. Davwẹngba wẹn eje vwọ kẹnoma kẹ uruemu re vwo sioma nẹ ohri rẹ ihwo. Avwanre de sioma nẹ ohri rẹ ihwo, ọ cha nẹrhẹ avwanre tẹnrovi oma avwanre ọvo kugbe ebẹnbẹn rẹ avwanre hirharokuẹ. Ọnana sa nẹrhẹ avwanre brorhiẹn ri shephiyọ-ọ. (Isẹ 18:1) Vwọrẹ uyota, avwanre eje guọnọ ọke evo ra vwọ dia komobọ, ma rho ọ da dianẹ obo rẹ brare phia kẹ avwanre vwẹ akpeyeren. Ẹkẹvuọvo, ọke rẹ avwanre vwo sioma nẹ ohri rẹ ihwo de gron gan nọ, ọ sa nẹrhẹ avwanre sen ukẹcha ri Jihova womarẹ ihwo vwọ kẹ avwanre. Ọtiọyena, wo de hirharokuẹ ebẹnbẹn, o vwo obo rọ gan te-e, rhiabọreyọ ukẹcha rẹ ihwo rẹ orua, igbeyan, kugbe ekpako rẹ ukoko na. Ni ayen kerẹ ihwo ri Jihova wan oma rayen vwọ cha wẹ uko.​​​—Isẹ 17:17; Aiz 32:​1, 2.

JIHOVA CHE BRU WE UCHE

14. Ẹdia re imuoshọ vọ yen avwanre se hirharoku?

¹⁴ Ebẹnbẹn na. Avwanre se hirharoku ebẹnbẹn re nẹrhẹ oshọ mu avwanre. Vwẹ Baibol na, idibo rẹ Ọghẹnẹ re fuevun ta ota kpahen ọke rẹ ayen vwo hirharoku okeke yẹrẹ oshọ vẹ uguegue vwẹ obọ rẹ ivwighrẹn rayen.  (Un 18:4; 55:​1, 5) Vwẹ idjerhe vuọvo na, avwanre se hirharoku ẹvwọsuọ vwẹ obo isikuru, iruo, vwevunrẹ orua, yẹrẹ ọ ro nẹ obọ rẹ igọmẹti rhe. Ọ sa tobọ dianẹ oshọ mu avwanre nẹ e che ghwu fikirẹ oka rẹ ọga rẹ avwanre họnvwa. Vwẹ ẹdia tiọyena, avwanre sa họhọ omotete ro vwo ọchuko-o. Idjerhe vọ yen Jihova vwọ cha avwanre uko vwevunrẹ ẹdia tiọyena?

15. Imuẹro vọ yen Une rẹ Ejiro 94:19 vwọ kẹ avwanre?

¹⁵ Ukẹcha ri Jihova vwọ kẹ avwanre. Ọ kẹ avwanre uchebro ji ruẹ ẹwẹn rẹ avwanre gan. (Se Une rẹ Ejiro 94:19.) Ẹkpo ri Baibol nana sa nẹrhẹ ẹwẹn avwanre djẹ kpo omotete rọ sa vwerhẹ-ẹn, rẹ oshọ muẹ fikirẹ agbraran rọ van. Vwẹ ẹwẹn roro nẹ ọsẹ rọyen bru ro ra, o de muo phiyọ obọ bẹsiẹ ovwerhẹn vwo suon. Dede nẹ agbraran na je van, ẹwẹn rọyen che totọ kidie ọsẹ rọyen muro phiyọ obọ. Avwanre de hirharoku ebẹnbẹn re nẹrhẹ oshọ mu avwanre, e se dje nẹ a je guọnọ nẹ Jihova mu avwanre phiyọ obọ re te ọke rẹ ẹwẹn avwanre vwo totọ. Kẹ mavọ yen e se vwo rhiabọreyọ oka rẹ ukẹcha tiọyena mie Jihova?

16. Die yen avwanre se ru a sa vwọ mrẹ uchebro ro nẹ obọ ri Jihova rhe? (Ni uhoho na.)

¹⁶ Obo ro fori nẹ avwanre ru. Nene Jihova ghwọrọ ọke kugbe ọkieje womarẹ wọ vwọ nẹrhovwo rhe ji se Ota rọyen. (Un 77:​1, 12-​14) Wo de ru ọtiọyen, emu rẹsosuọ rọ cha djẹ ro wẹ ẹwẹn siẹrẹ wo de hirharoku ebẹnbẹn yen wọ vwọ yare ukẹcha mie Jihova. Ta ọdavwẹ wẹn kẹ Jihova wọ je vuẹ obo re nẹrhẹ oshọ mu we. Wọ me je vwẹ uphẹn kẹ rọ vwọ ta ota kẹ wẹ ji bru we uche womarẹ wo vwo se Baibol na. (Un 119:28) Wọ cha rhe mrẹvughe nẹ o vwo ẹkpo ri Baibol evo re sa vwẹ uchebro kẹ wẹ siẹrẹ oshọ de mu we. Kerẹ udje, wọ sa mrẹ eta rẹ ọbọngan vwẹ ọbe ri Job, Une rẹ Ejiro, Isẹ, ọtiọyen ji te eta ri Jesu rehẹ Matiu uyovwin 6. Wọ vwọ nẹrhovwo rhe ji se ota rọyen ye, Jihova kọ cha bọn wẹ gan.

17. Imuẹro vọ yen avwanre se vwo?

¹⁷ Avwanre se vwo imuẹro nẹ Jihova cha cha avwanre uko siẹrẹ e de hirharoku ebẹnbẹn vwẹ akpeyeren. O vwo ọke vuọvo rọ cha vwọ yanje avwanre vwo-o. (Un 23:4; 94:14) Jihova veri nẹ ọyen cha sẹro rẹ avwanre, o che mu avwanre vi, bicha avwanre, ji bru avwanre uche. Aizaya 26:3 da ta kpahen Jihova: “Wọ sa sẹro rọye vwẹ omamọ rẹ ufuoma, ohwo rọ vwẹ udu rọye kpahe owẹ. fikiridie ọ vwẹ ẹro so owe.” Ọtiọyena vwẹroso Jihova, wo ru obo wo se ru eje wọ sa vwọ mrẹ erere vwo nẹ ukẹcha rọ vwọ kẹ wẹ. Wo de ru ọtiọyen, kẹ wo se mudia gan ọ da tobọ dianẹ wo hirharoku ebẹnbẹn egangan.