1. Die yen djẹ ruẹ ẹwẹn wẹn siẹrẹ wo de roro kpahan Jihova?

 WỌ VWẸ ẹwẹn roro oka rẹ ohwo ri Jihova hepha jovwore? Wọ da nẹrhovwo rhe, die yen dje ruẹ ẹwẹn wẹn? Dede nẹ a mrẹ Jihova-a, jẹ Baibol na djisẹ rọyen vwẹ idjerhe sansan. E se Jihova “ọnre vẹ ekpọfia” kugbe “erhanre rọ ghwọrọ erọnvwọn fiotọ.” (Un 84:11; Hib 12:29) E djisẹ rọyen kerẹ ubioragha ro lo, kerẹ ẹrovwo ro lo wranwran kugbe uhoho rẹ aphoro vwẹ irharheghe. (Izi 1:​26-​28) Obo re djisẹ ri Jihova wan se gbe avwanre unu yẹrẹ tobọ nẹrhẹ oshọ mu avwanre.

2. Die yen sa nẹrhẹ ihwo evo siomauko ayen vwo sikẹre Jihova?

² Kidie nẹ a mrẹ Jihova-a, ọ sa nẹrhẹ ọ bẹn ra vwọ riẹn nẹ o vwo ẹguọnọ avwanre. Ihwo evo roro nẹ Jihova che se vwo ẹguọnọ raye-en, fikirẹ oborẹ ayen rhiẹromrẹ vwẹ akpeyeren re. Ọ sa dianẹ ayen vwo ọsẹ ro vwo ẹguọnọ raye-en. Jihova vwo ẹruọ rẹ oka rẹ iroro ọtiọyen vẹ oka rẹ ewene rọ ghwa cha. Rere ọ sa vwọ vwẹ ukẹcha kẹ avwanre o de dje omamọ rẹ iruemu ri rhe re vwẹ Baibol na.

3. Diesorọ a vwọ tẹnrovi ẹguọnọ ri Jihova?

³ Ota ro dje oka rẹ ohwo ri Jihova hepha gbagba yen ẹguọnọ. (1Jọ 4:8) Ọghẹnẹ yen ẹguọnọ. Ẹguọnọ yen muo vwo ruẹ kemu kemu. Ẹguọnọ rẹ Ọghẹnẹ gan te asan rọ da tobọ dje kẹ ihwo ri vwo ẹguọnọ rọye-en. (Mt 5:​44, 45) Vwẹ uyono nana, a cha tẹnrovi Jihova kugbe ẹguọnọ rọyen. Re vwo yono kpahan Ọghẹnẹ phiyọ ye, jẹ ẹguọnọ re vwo kpahọn ganphiyọ.

JIHOVAH VWO ẸGUỌNỌ AVWANRE MAMỌ

4. Mavọ yen oma ru we wọ vwọ riẹn nẹ Jihova ọyen ohwo rọ vọnre vẹ ẹguọnọ? (Ni uhoho na.)

⁴ “Jihova ọyen ohwo rọ vọnre vẹ ẹguọnọ.” (Jem 5:​11) Vwẹ Baibol na, ọ vwẹ oma rọyen vwo dje oni rọ vọnre vẹ ẹguọnọ. (Aiz 66:​12, 13) Vwẹ ẹwẹn roro oni rọ nabọ vwẹrote ọmọ rọyen.  Ọ nabọ fẹrẹ vwẹ owọ rọyen, jẹ ọ ta ota kẹ vẹ upho ri bọrọ bọrọ. Siẹrẹ ọ da viẹ yẹrẹ asan da miavwọ, oni na ko ruẹ obo rọ guọnọre kẹ. Siẹrẹ a dahẹ ẹdia rẹ ọmiaovwẹ a sa vwẹroso ẹguọnọ ri Jihova. Ọbuine na de si: “Ọke rẹ ẹnwan rẹ udu mẹ de rhi buphihọ, uchebro wẹn kọye sasa ẹnwẹ mẹ.”​​​—Un 94:19.

5. Die yen ẹguọnọ ri Jihova ro jẹ rhẹriẹ mudiaphiyọ kẹ wẹ?

⁵ Jihova ọyen ohwo rọ fuevun. (Un 103:8) O gbobọnyẹ avwanre siẹrẹ e de ru obo rẹ chọre-e. Ẹgborho rẹ Izrẹl chukoku Jihova abọ buebun; dedena, o dje ẹguọnọ rọyen ro jẹ rhẹriẹ vwọ kẹ i ri kurhẹriẹ womarẹ eta nana: “Kidie wẹ ọghaghare kẹ vwẹ, wẹ ro vwo ọghọ, ivun wẹn da vwerhe ovwẹ.” (Aiz 43:​4, 5) Ẹguọnọ rẹ Ọghẹnẹ ji rhi wene-e. Ọyen obo ra sa vwẹroso ọkieje. Ọ da tobọ dianẹ e ru umwemwu ọgangan jovwore, Jihova che gbobọnyẹ avwanre-e. E de kuobọrhẹriẹ ji rhivwin bru Jihova rhe, a cha mrẹvughe nẹ o ji vwo ẹguọnọ avwanre. Ọ tare nẹ “evwoghovwo rhere buebu.” (Aiz 55:7) Baibol na djisẹ rẹ evwoghovwo nana nẹ ọ nẹrhẹ a mrẹ “ọke rẹ ufuoma . . . ri Jihova komobọ.”​—Iru 3:​19.

6. Die yen obo rehẹ Zekaraya 2:8 yono avwanre kpahen Jihova?

⁶ Se Zekaraya 2:8. Jihova vwo ẹruọ rẹ oborẹ oma ruẹ avwanre, o ji vwo owenvwe rọ vwọ cha avwanre uko kidie o vwo ẹguọnọ avwanre. Ọ da siẹrẹ avwanre de muomaphiyọ. Ọtiọyena, a sa nẹrhovwo rhe nẹ: “Sẹro mẹ kerẹ ọmẹro” wẹn. (Un 17:8) Ẹro ọyen ẹbẹre ọvo rẹ ugboma na rọ pha ghanghanre ra je nabọ vwẹrote. Rọ vwọ dianẹ Jihova vwẹ avwanre vwo dje ọmẹro rọyen na, kẹ ọ ghwa họhọ nẹ ọ tanẹ, ‘Ihwo mẹ, kohwo kohwo rọ wan ovwan oma, jẹ ọ wan obo re ghanre kẹ vwẹ oma.’

7. Diesorọ o vwo fo nẹ e ru imuẹro re vwo kpahen ẹguọnọ ri Jihova ganphiyọ?

⁷ Jihova guọnọre nẹ e vwo imuẹro nẹ ọyen vwo ẹguọnọ avwanre. Ẹkẹvuọvo ọ riẹnre nẹ fikirẹ obo re phia wan re, avwanre se vwo ẹwẹn ivivẹ sẹ o ghini vwo ẹguọnọ avwanre. Ọ je sa dianẹ avwanre hirharokuẹ ebẹnbẹn re nẹrhẹ e roro sẹ Jihova ghini vwo ẹguọnọ avwanre. Die yen sa nẹrhẹ imuẹro avwanre ganphiyọ? Womarẹ e vwo yono kpahan oborẹ Jihova dje ẹguọnọ rọyen phia kẹ Jesu, ihwo ra jẹreyọ na kugbe avwanre eje.

 OBO RI JIHOVA WAN DJE ẸGUỌNỌ RỌYEN PHIA

8. Diesorọ o vwo mu Jesu ẹro nẹ ọsẹ rọyen vwo ẹguọnọ rọyen?

⁸ Oyerinkugbe rọhẹ uvwre ri Jihova vẹ Jesu yen me krotọ kparobọ vwẹ akpọ vẹ odjuvwu. Ikpe buebun rẹ ayen ghwọrọ kugbe vwẹ odjuvwu na nẹrhẹ ayen vwo oyerinkugbe rọ kpẹkpẹre mamọ ji vwo uvi ẹguọnọ kpahen ohwohwo. Vwo nene obo rehẹ Matiu 17:​5, Jihova djerephia phephẹn nẹ o vwo ẹguọnọ ri Jesu. Jihova rha sa tanẹ, ‘Ọnana yen ohwo ri mi rhiabọreyọ.’ Ẹkẹvuọvo, ọ guọnọre nẹ avwanre riẹn obo ro vwo ẹguọnọ ri Jesu te, ọtiọyena o de se “Ọmọ mẹ, ri mi vwo ẹguọnọ rọyen.” Oma ri Jesu vwerhen Jihova, ma rho rọ vwọ dianẹ o muegbe rọ vwọ vwẹ arhọ rọyen kpahotọ. (Ẹf 1:7) O ji vwo ọke vuọvo ri Jesu vwo vwo ẹwẹn ivivẹ kpahen ẹguọnọ rẹ Ọsẹ rọyen vwo kpahọ-ọn. Ọ nabọ mu Jesu ẹro nẹ Ọsẹ rọyen ghini vwo ẹguọnọ rọyen dẹn. Jesu tarọ vẹ imuẹro abọ buebun nẹ Ọsẹ na vwo ẹguọnọ rọyen.​​​—Jọ 3:​35; 10:17; 17:24.

9. Ota vọ yen djerephia nẹ Jihova vwo ẹguọnọ rẹ ihwo ra jẹreyọ na? Djekpahọn. (Rom 5:5)

⁹ Jihova ji djephia nẹ o vwo ẹguọnọ rẹ ihwo ra jẹreyọ na. (Se Rom 5:5.) Jokaphiyọ ota na “vwọ kẹ avwanre.” Ọbe ọvo rọ fan otọ rẹ eta rehẹ Baibol reyọ ẹguọnọ rẹ Ọghẹnẹ vwo dje “ogbugbu rẹ ame rọ vwọ kẹ avwanre.” Ọnana ghini uvi rẹ udje ro dje obo ri Jihova vwo ẹguọnọ rẹ ihwo ra jẹreyọ na te! Ihwo ra jẹreyọ na riẹnre nẹ Ọghẹnẹ “vwo ẹguọnọ kpahen” ayen. (Jud 1) Ọyinkọn Jọn dje oborẹ oma ru ayen rọ vwọ ta: “Gbe ni oborẹ Ọsẹ na vwo ẹguọnọ rẹ avwanre te, re vwo se avwanre emọ rẹ Ọghẹnẹ!” (1Jọ 3:1) Ihwo ra jẹreyọ na ọvo yen Jihova vwo ẹguọnọ kpahen? Ẹjo, Jihova vwo ẹguọnọ rẹ avwanre eje.

10. Ọrhọ yen odjephia rẹ ẹguọnọ ri Jihova vwo kpahen owẹ rọ ma rho kparobọ?

¹⁰ Ọrhọ yen odjephia rẹ ẹguọnọ ri Jihova rọ ma rho kparobọ? Ọtanhirhe na​—ọyen hẹ odjephia rẹ ẹguọnọ rẹ Ọghẹnẹ rọ ma rho kparobọ! (Jọ 3:​16; Ro 5:8) Jihova kẹ avwanre Ọmọ rọyen ọghanghanre, ọ da vwẹ uphẹn kẹ nẹ o ghwu kẹ ihworakpọ eje rere ọ sa vwọ vwẹ imwemwu avwanre vwo ghovwo avwanre je nẹrhẹ avwanre sa dia igbeyan Rọyen. (1Jọ 4:​10) E de roro kokodo kpahen osa ri Jihova vẹ Jesu hware, ọnana cha nẹrhẹ avwanre vwo ẹruọ rẹ oborẹ ẹguọnọ rẹ ayen vwo kpahen avwanre ohwo ọvuọvo kodo te. (Ga 2:​20) Ọ dia kidie nẹ Jihova ohwo ọsoso ọvo yen nẹrhẹ ọ hwosa ọtanhirhe na-a. Ọyen okẹ rẹ ẹguọnọ. Jihova dje ẹguọnọ ro vwo kpahen avwanre womarẹ ọ vwọ reyọ obo re ma ghanre kẹ vwo ze izobo kẹ avwanre​​​—ọyen hẹ Jesu. Jihova vwẹ uphẹn kẹ Ọmọ rọyen nẹ ọ rioja ji ghwu kẹ avwanre.

11. Die yen e yono vwo nẹ obo rehẹ Jerimaya 31:3 rhe?

¹¹ Jihova djahe ẹguọnọ ro vwo kpahen avwanre-e, ẹkẹvuọvo ọ nabọ dje obo ro vwo ẹguọnọ avwanre te. (Se Jerimaya 31:3.) Jihova si avwanre te oma kidie o vwo ẹguọnọ avwanre. (Ni Urhi Rivẹ 7:​7, 8.) O vwo emu vuọvo yẹrẹ ohwo vuọvo rọ sa hẹriẹ avwanre nẹ ẹguọnọ yena-a. (Ro 8:​38, 39) Mavọ yen oma ru we kpahan ẹguọnọ nana? Se Une rẹ Ejiro 23, rere wọ mrẹ oborẹ oma ru Devid fikirẹ ẹguọnọ kugbe ẹroevwote ri Jihova vẹ oborẹ oma ji se ru avwanre eje.

MAVỌ YEN OMA RU WE KPAHAN ẸGUỌNỌ RI JIHOVA?

12. Die yen wọ sa ta vwo ru ọdjẹkoko rẹ ọbe rẹ Une rẹ Ejiro 23?

¹² Se Une rẹ Ejiro 23:​1-6. Une 23 na ta ota kpahen imuẹro re vwo kpahen ẹguọnọ ri Jihova kugbe ẹroevwote rọyen. Devid, ro si  Une nana, djisẹ rẹ oyerinkugbe ọkpẹkpẹkpẹ rọ vẹ Jihova rọ dia Osuigodẹ rọyen vwori. Ẹwẹn ri Devid totọ ro vwo nene odjekẹ ri Jihova, ọ je vwẹrosuọ kare kare. Devid riẹnre nẹ kẹdi kẹdẹ rẹ akpeyeren rọyen yen Jihova che vwo vwo ẹguọnọ rọyen. Die yen nẹrhẹ o vwo imuẹro yena?

13. Die yen nẹrhẹ Devid vwo imuẹro nẹ Jihova cha vwẹrote ọyen?

¹³ “Me gbe guọnọ ọfa-a.” Devid riẹnre nẹ Jihova nabọ vwẹrote ọyen kidie ọkieje yen ọ vwọ kẹ obo rọ guọnọre. Devid vẹ Jihova vwo oyerinkugbe ọkpẹkpẹkpẹ, ọ je mrẹ aroesiri rọyen. Ọyen sorọ o vwo muo ẹro nẹ o toro obo re phiare vwẹ obaro na-a, Jihova cha vwẹrote ọdavwẹ rọyen ọkieje. Ẹroẹvwọsuọ ri Devid vwo kpahen ẹguọnọ ri Jihova kugbe ẹroevwote rọyen nẹrhẹ ọ kpairoro vrẹ ẹnwan, ọ de rhi vwo omavwerhovwẹn vẹ ẹwẹn rẹ otekẹvwẹ vwẹ akpeyeren.​​​—Un 16:11.

14. Idjerhe vọ yen Jihova vwọ vwẹrote avwanre vwọrẹ ẹguọnọ?

¹⁴ Jihova nabọ vwẹrote avwanre vwọrẹ ẹguọnọ, ma rho vwẹ ọke rẹ erọnvwọn ebrabra da phia kẹ avwanre vwẹ akpeyeren. Claire a rọ gare vwẹ Bẹtẹl vwẹ ikpe re vrẹ 20 riẹn obo ro che ru-u, ọke rẹ orua rọyen vwo hirharokuẹ ebẹnbẹn okpokpahọn. Ọsẹ rọyen muọga rẹ obọ gbe owọ, a djẹ oniọvo rọyen ọvo rọ dia ọmọtẹ nẹ ukoko, vwọba emeki rẹ orua na chua vẹ uwevwin rayen va ayen abọ. Idjerhe vọ yen Jihova vwo djephia nẹ o vwo ẹguọnọ rayen je vwẹrote ayen? Claire da ta: “Jihova kẹ orua mẹ oborẹ ayen guọnọre ayen se vwo yerin kẹdi kẹdẹ. Ọke buebun na Jihova kẹ avwanre oborẹ avwanre guọnọre tobọ vrẹ obo ri mi rhẹro rọyen! Kọke kọke yen mi vwo roro kpahan obo ri Jihova vwẹ ukẹcha  kẹ avwanre wan, ẹguọnọ rọyen cha sa chọrọ ovwẹ ẹro-o. Obo mi rhiẹromrẹ eje cha vwẹ uko vwo yerin ghene ebẹnbẹn re vwomaphia vwẹ akpeyeren.”

15. Idjerhe vọ yen Devid vwọ mrẹ omaerovwon? (Ni uhoho na.)

¹⁵ “Ọ dẹ erhi mẹ hirhe.”  Ofu dje Devid ọkievo fikirẹ ebẹnbẹn ro hirharoku. (Un 18:​4-6) Dedena, ẹguọnọ vẹ ẹroevwote ri Jihova nẹrhẹ ọ mrẹ omaerovwon vwo nẹ ebẹnbẹn rọyen. Jihova sun ugbeyan rọyen rẹ oma ghwọre na kpo “omamọ rẹ odi” kugbe “asan rẹ ame djidji” hepha. Ọtiọyena, Devid da rhoma rhi vwo ẹgba, ọnana da nẹrhẹ ọ ga Jihova vẹ aghọghọ.​—Un 18:​28-​32.

16. Idjerhe vọ yen ẹguọnọ ri Jihova vwọ nẹrhẹ wọ mrẹ omaerovwon?

¹⁶ Nonẹna, avwanre ji se yerin ghene edavwini vẹ ebẹnbẹn rẹ avwanre hirharokuẹ kidie “ẹguọnọ ro jẹrhẹriẹ rẹ Ọrovwohwo na o re-e.” (Uvw 3:​22; Kọl 1:​11) Roro kpahen udje ri Rachel. Ẹwẹn rọyen hra totọ ọke rẹ ọshare rọyen vwọ yan jovwo ji chukoku Jihova vwẹ ọke rẹ ọga rẹ akpọeje ri COVID-19. Ukẹcha vọ yen Jihova vwọ kẹ? Ọ da ta: “Jihova dje ẹguọnọ rọyen phia kẹ vwẹ. Ọ kẹ vwẹ emamọ rẹ igbeyan ri nene uvwe ghwọrọ ọke kugbe, chere emu rhe vwe, si ovuẹ vẹ ẹkpo ri Baibọl re bọn vwẹ gan, nene uvwe hwẹ kugbe je karophiyọ ovwẹ nẹ Jihova vwẹrote vwe. Ọkieje me vwọ kpẹvwẹ Jihova rọ vwọ kẹ vwẹ orua nana rọ vọnre vẹ ẹguọnọ.”

17. Diesorọ Devid vwo jẹ oshọ rẹ “emu umwemwu” ẹdjẹ?

¹⁷ “Me djẹ oshọ rẹ emu umwemwu-u; kidie wọ vẹ ovwẹ herọ.” Devid hirharoku ẹdia rẹ imuoshọ ọke buebun, o ji vwo ivwighrẹn buebun ri vwo ẹgba nọ. Ẹkẹvuọvo ẹwẹn rọyen totọ, oshọ muro-o kidie ọ riẹnre nẹ Jihova vwo ẹguọnọ rọyen. Devid riẹnre nẹ Jihova vẹ ọyen herọ vwẹ kẹdia kẹdia ro hirharoku, ọnana da nẹrhẹ udu rọyen gan. Kọyensorọ ọ vwọ so nẹ: “[Jihova] sivwi uvwe nẹ oshọ mẹ ejobi.” (Un 34:4) Oshọ ghini mu Devid, ẹkẹvuọvo ẹguọnọ ri Jihova vwo kpahọn nẹrhẹ o se phi oshọ na kparobọ.

18. Mavọ yen imuẹro nẹ Jihova vwo ẹguọnọ wẹn sa vwọ kẹ wẹ ẹgba ọke rẹ oshọ de mu we?

¹⁸ Mavọ yen imuẹro rẹ avwanre vwori nẹ Jihova vwo ẹguọnọ avwanre se vwo phi ẹgba phiyọ avwanre oma ọke re de hirharoku ẹdia rẹ imuoshọ? Oniọvo Susi rọ dia ọkobaro djisẹ rẹ oborẹ oma ruro vẹ ọshare rọyen ọke rẹ ọmọ rayen vwo hwe oma rọyen: “Ughwu ri kpregede tiọna phi oshọ phiyọ ohwo oma ọ nẹrhẹ ẹwẹn rẹ ohwo hra totọ je tobọ nẹrhẹ ohwo roro nẹ emu rọ bra vrẹ ọtiọyen je cha  phia. Ẹkẹvuọvo, ẹguọnọ ri Jihova sẹro rẹ avwanre je nẹrhẹ ẹwẹn avwanre totọ.” Rachel, ra ta ota kpahen siẹvure da ta: “Ason rẹ ẹdẹ ọvo ẹwẹn mẹ vwọ hra totọ, rẹ ẹnwan vwo mu vwe rọ jẹ oshọ ji mu vwe, mi de kperi se Jihova vwẹ ẹrhovwo. Ugege yena ẹwẹn mẹ de ghwe totọ, Jihova da nẹrhẹ ovwẹ kirobọ rẹ oni ruẹ kẹ ọmọ rọyen, ovwerhẹn de mu vwe yanran. Obo rẹ phiare ẹdẹ yena cha sa chọrọ ovwẹ ẹro-o.” Ọkpako ọvo re se Tasos dia uwodi ẹgbukpe ẹne kidie ọ rhọnvwe vwomaba iruo rẹ isodje-e. Mavọ yen ọ vwọ mrẹ ẹguọnọ vẹ ẹroevwote ri Jihova? Ọ da ta: “Jihova kẹ vwẹ erọnvwọn eje me guọnọre tobọ vrẹ ọtiọyen. Ọnana da nẹrhẹ o muvwẹro nẹ me sa vwẹrosuọ. Vwọba, dede nẹ me hẹ uwodi, Jihova da nẹrhẹ mi vwo aghọghọ womarẹ ẹwẹn ọfuanfon rọyen. Ọnana cha vwẹ uko vwọ mrẹvughe nẹ me da vwẹroso Jihova me cha rha mrẹ erere gbidiki. Ọtiọyena, me da ton iruo ọkobaro phiyọ vwevunrẹ uwodi.”

SIKẸRẸ ỌGHẸNẸ RO VWO ẸGUỌNỌ

19. (a) Mavọ yen a cha nẹrhovwo wan siẹrẹ a da riẹn nẹ Ọghẹnẹ vwo ẹguọnọ rẹ avwanre? (b) Idjerhe vọ yen Jihova vwo dje ẹguọnọ rọyen kẹ wẹ vwẹ akpeyeren wẹn re? (Ni ekpeti na “ Ẹkpo ri Baibol re Nẹrhẹ Avwanre Mrẹ Ẹguọnọ ri Jihova Vughe.”)

¹⁹ Obo re rhiẹromrẹ eje ra ta ota kpahen re na djerephia nẹ Jihova “Ọghẹnẹ rẹ ẹguọnọ” na, vẹ avwanre herọ! (2Kọ 13:11) O vwo ọdavwẹ rẹ avwanre ohwo ọvuọvo. O mu avwanre ẹro nẹ ‘ẹguọnọ rọye rọ rhẹriẹ-ẹ gba avwanre riariẹ.’ (Un 32:10) Re vwo roro kokodo kpahan obo ri Jihova dje ẹguọnọ rọyen phia vwọ kẹ avwanre ye, ọ cha nẹrhẹ avwanre mrẹ nẹ Jihova ghene vwẹrote avwanre mamọ, ọ je cha nẹrhẹ e sikẹrẹ phiyọ. E se rhie evun ta ota kẹ vwẹ ẹrhovwo je vuẹ oborẹ ẹguọnọ rọyen ghanre kẹ avwanre te. A sa vuẹ obo ri kpokpo avwanre ẹwẹn, kidie o mu avwanre ẹro nẹ o vwo ẹruọ rẹ avwanre nẹ o ji vwo owenvwe rọ vwọ cha avwanre uko.​​​—Un 145:​18, 19.

20. Idjerhe vọ yen ẹguọnọ ri Jihova vwo si avwanre kẹrẹ?

²⁰ Kirobo ra dia erhanre vwẹ ọke rẹ ekpahen ye, ọtiọyen avwanre je guọnọ sikẹrẹ Jihova fikirẹ ẹguọnọ rọyen. Dede nẹ ẹguọnọ ri Jihova vọnre ve ẹgba, jẹ ọ je vọn vẹ arodọnvwẹ. Ọtiọyena gbe jẹ oma vwerhen owẹ kidie Jihova vwo ẹguọnọ wẹ. E jẹ avwanre eje djephia nẹ e vwo ẹguọnọ rẹ Ọghẹnẹ womarẹ a vwọ tanẹ: “Me guọnọ Ọrovwohwo na”!​—Un 116:1.