UBIOTA ra fan kpo “akpẹrẹ,” rẹ Efanfan rẹ Akpọ Kpokpọ vwo ruiruo se mudiaphiyọ oka rẹ akpẹrẹ sansan. (Iru 8:​28, 29, 38) Ẹkẹvuọvo, ọ họhọre nẹ ohwo rẹ Etiopia na gua akpẹrẹ rode rọ rho vrẹ akpẹrẹ rẹ ofovwin yẹrẹ akpẹrẹ ra vwọ djonẹ. E jẹ e roro kpahen oboresorọ a vwọ ta ọtiọyen.

Ohwo rẹ Etiopia na ọyen onotu rode rọ je yan oyan ogrongron jovwo re. Ọyen “ọshare ro vwo ogangan vwẹ otọ rẹ usuon ri Kandase, ovie aye rẹ Etiopia, ro ji vwo ogangan vwẹ enu rẹ efe rọyen ejobi.” (Iru 8:​27) Sudan rẹ ọke avwanre na vẹ ẹbẹre obọrhen ọnre rẹ Ijipt rẹ ọke avwanre na, eyen ẹbẹre ọvo rẹ Etiopia rẹ awanre. Ọ sa dianẹ ọ dia akpẹrẹ vuọvo yen ọshare na guare vwẹ oyan rọyen na-a, jẹ ọ muẹro nẹ ọkiọvo, o ji mu eghwa buebun vwẹ oyan ogrongron na. Akpẹrẹ ro vwo awọ yẹrẹ itaya ẹne, re rhurhẹ, ro ji vwo ẹchẹ ọyen ọvo usun rẹ oka rẹ akpẹrẹ re vwo mu ihwo vwẹ ẹgbukpe ujorin rẹsosuọ. Kirobo rẹ ọbe re se Acts​—An Exegetical Commentary tare, “oka rẹ akpẹrẹ tiọyena na se mu eghwa buebun, ọ nẹrhẹ oyan na shephiyọ ohwo oma, ọkiọvo, ọ je nẹrhẹ a sa yan sherẹ.”

Ohwo rẹ Etiopia na se ọbe ọke rẹ Filip vwo bro ra. Ikuegbe na tare nẹ “Filip da djẹ bro ra, o de nyo [ohwo rode na] ro vwo se ọbe rẹ ọmraro Aizaya phia gorigori.” (Iru 8:​30) Vwo nene obo ra bọn ekpẹrẹ ri mu ihwo kpo asan, ekpẹrẹ tiọyena sa djẹ ga-an. Kidie nẹ ekpẹrẹ na sa ghwa djẹ ga-an na, ọnana kọ sa nẹrhẹ ohwo rode na se ẹbe, je nẹrhẹ Filip sa vwẹ awọ djẹ mu akpẹrẹ na.

Ohwo rẹ Etiopia na “da vuẹ Filip nẹ ọ ruọ rere o chidia kẹrẹ ọyen.” (Iru 8:​31) Vwẹ akpẹrẹ rẹ ofovwin, ihwo ri djẹ akpẹrẹ na muẹdia. Ẹkẹvuọvo, vwẹ akpẹrẹ re vwo mu ihwo kpo asan, o vwo asan re chidia rẹ ohwo rode na vẹ Filip chidia phiyọ.

Vwo nene obo ra niyẹnrẹn rọyen vwẹ Iruo rẹ Iyinkọn Na uyovwin 8 vẹ oborẹ ikuegbe djephia, ẹbe avwanre ra teyenre ukuko na djere nẹ ohwo rode rẹ Etiopia na gua akpẹrẹ rọ rho vrẹ akpẹrẹ ofovwin yẹrẹ akpẹrẹ ra vwọ djonẹ.