E se vwo ru ọhọre ri Jihova, a guọnọ esegbuyota. Ẹkẹvuọvo, Baibol na tare nẹ, “ọ dia ihwo ejobi yen vwo esegbuyota-a.” (2Tẹ 3:2) Ọyinkọn Pọl ta ota kpahen ihwo re vwọsuọ, nẹ ayen “ihwo umwemwu re sua omaẹwan,” ọ je guọnọ nẹ e sivwin ọyen vwo nẹ abọ rẹ ihwo nana. Ẹkẹvuọvo ota rọ ta kpahen esegbuyota shekpahen ihwo efa. Dede nẹ o vwo erọnvwọn buebun ri djerephia nẹ Ọmemama herọ, jẹ ihwo senre. (Ro 1:20) Ihwo evo sa tanẹ ayen vwo imuẹro kpahen orọnvwọn yẹrẹ ohwo ro me vwo ẹgba. Ẹkẹvuọvo, ọnana dia ọyen esegbuyota ra guọnọre e se vwo ru obo re vwerhen Jihova omaa.

Ofori nẹ e vwo imuẹro nẹ Jihova herọ, nẹ “ọyen hwosa” kẹ ihwo ri vwo uvi rẹ esegbuyota. (Hib 11:6) Esegbuyota ọyen ẹbẹre ọvo rẹ omamọ rẹ ẹwẹn ọfuanfọn na. A da rẹ Jihova nẹ ọ kẹ avwanre ẹwẹn ọfuanfon na, ọ cha kpahenphiyọ. (Lu 11:​9, 10, 13) Idjerhe ọvo kiriguo e se vwo vwo ẹwẹn ọfuanfon na yen e vwo se Ota rẹ Ọghẹnẹ. Vwọba, ke se roro kokodo kpahen obo re se ri na je reyọ vwo ruiruo. E de ru ọtiọyen, jẹ a vwẹ uphẹn kẹ ẹwẹn ọfuanfon na rọ cha nẹrhẹ e yerẹn akpọ rọ cha ghwa omavwerhovwẹn rhe Jihova ji djephia nẹ e vwo esegbuyota.