1-2. Die yen phia siẹrẹ ihwo de bromaphiyame, kẹ die yen ofori nẹ wo roro kpahen?

 WỌ MRẸ ẹko rẹ ihwo re guọnọ bromaphiyame jovwo re? Wọ mrẹ imuẹro rẹ ayen vwori vẹ upho ri gorigori ayen da kpahanphiyọ enọ ivẹ na tavwen ayen ki bromaphiyame. Wọ je mrẹ oborẹ oma vwerhen igbeyan vẹ ihwo rẹ orua rayen. Ayen de wontọ nẹ ame na nu, wo nyo abọ ẹteyọn rẹ iniọvo na je mrẹ aghọghọ vwẹ opharo rẹ ihwo ri bromaphiyame na. Kudughwrẹn kudughwrẹn yen ihwo uriorin buebun vwọ jowọ rẹ ayen vwọ vwomakpahotọ ji bromaphiyame kerẹ Iseri ri Jihova.

² Kẹ owẹ vwo? Ọ da dianẹ wo roro kpahen omaebrophiyame, wẹwẹ ohwo rọ pha ghanghanre vwẹ akpọ umwemwu nana ro “nenesi rẹ Ọghẹnẹ.” (Un 14:​1, 2) Ọ da dianẹ wẹwẹ eghene yẹrẹ wọ kpakore, fiki wẹ yen e vwo ru uyono nana. Ẹkẹvuọvo avwanre ihwo ri bromaphiyame re je guọnọ ru owenvwe ra vwọ ga Jihova bẹdẹ ganphiyọ. Ọtiọyena e ja ta ota kpahen iroro erha usun rẹ iroro buebun re sorọ avwanre vwọ guọnọ ga Jihova.

3. Diesorọ idibo ri Jihova vwo vwo ẹguọnọ rẹ uyota kugbe ọvwata? (Une rẹ Ejiro 119:​128, 163)

³ Jihova vuẹ ihwo rọyen nẹ ayen vwo ẹguọnọ rẹ “uyota.” (Zek 8:19) Jesu je vuẹ idibo rọyen nẹ ayen guọnọ ọvwata. (Mt 5:6) Ọnana mudiaphiyọ nẹ ohwo che vwo owenvwe ọgangan ro vwo ru obo ri yovwirin rọ je fon vwẹ ẹro rẹ Ọghẹnẹ. Wo vwo ẹguọnọ rẹ uyota kugbe ọvwata? O mu avwanre ẹro nẹ wo ru ọtiọyen. Wo vwo utuoma kpahen efian, umwemwu kugbe obo re chọre. (Se Une rẹ Ejiro 119:​128, 163.) Ohwo ro gun efian vwẹrokere Eshu, rọ dia osun rẹ akpọ na. (Jọ 8:44; 12:31) Emuọvo rẹ Eshu  davwẹngba vwo ruẹ yen o vwo miovwin odẹ ọfuanfon ri Jihova Ọghẹnẹ. Rhanvwe ọke rẹ ayen vwo gbevwọsuọ vwẹ ogba rẹ Idẹn yen Eshu vwọ hrahra efian kpahen Ọghẹnẹ. O dje Jihova phiyọ orharhe rẹ Osun rọ guọnọ erhuvwu rẹ ihworakpọ-ọ. (Jẹ 3:​1, 4, 5) Efian rẹ Eshu gun kpahọn na nẹrhẹ ihwo vwẹ orharhe ẹwẹn vẹ ẹro ọchọchọ vwo ni Ọghẹnẹ. Ọ da dianẹ ihworakpọ rhọvwen vwo ẹguọnọ rẹ “uyota” na-a, Eshu sa nẹrhẹ ayen vwobọ vwẹ koka koka rẹ umiovwo vẹ jẹfuọn.​—Ro 1:​25-31.

4. Mavọ yen Jihova vwo djephia nẹ ọyen “Ọghẹnẹ rẹ uyota” na? (Ni uhoho na.)

⁴ Jihova ọyen “Ọghẹnẹ rẹ uyota,” o rhievun yono ihwo ri vwo ẹguọnọ rọyen uyota na. (Un 31:5) Womarẹ ọnana, kọ vwẹ ukẹcha kẹ ayen, Eshu rha sa reyọ efian rọyen vwọ phiẹn aye-en. Jihova yono idibo rọyen rere ayen vwọ dia ihwo re ta uyota kugbe ihwo re fuevun. Ọnana nẹrhẹ ayen vwo ọghọ kugbe omafuvwe. (Isẹ 13:​5, 6) O ji ru ọtiọyen kẹ wẹ re wo vwo yono Baibol na? Wo yonori nẹ idjerhe ri Jihova yen me yovwin kẹ ihworakpọ ejobi ọtiọyen ji te we. (Un 77:13) Ọtiọyena wọ guọnọ ru oborẹ Ọghẹnẹ guọnọre. (Mt 6:33) Wọ je guọnọ chochọ rẹ uyota na ji djephia nẹ oborẹ Eshu ta kpahen Jihova na dia uyota-a. Mavọ yen wo se vwo ru ọtiọyen?

5. Mavọ wọ sa vwọ chochọ rẹ uyota na vẹ obo ri yovwirin?

⁵ Oka rẹ akpọ ru wo yerẹn se djephia nẹ, ‘Wọ sen Eshu ji rhiabọreyọ uyota na. Wọ guọnọ nẹ Jihova dia Osun wẹn, Wọ je guọnọ ru obo rọ rhọvwenphiyọ.’ Mavọ yen wo se vwo ru ọtiọyen? Vwomakpahotọ kẹ Jihova vwẹ ẹrhovwo ji djephia vwẹ azagba womarẹ omaebrophiyame. Ẹguọnọ rẹ uyota vẹ obo ri yovwirin yen mu ohwo vwọ jẹ ojẹ ro vwo bromaphiyame.

6. Erhọ yen iroro evo rehẹ Une rẹ Ejiro 45:4 re nẹrhẹ wo vwo ẹguọnọ ri Jesu Kristi?

⁶ Diesorọ wo vwo vwo ẹguọnọ ri Jesu kristi? Jokaphiyọ iroro iyoyovwin evo rehẹ Une rẹ Ejiro 45:4. (Se.) Jesu vwo ẹguọnọ rẹ uyota, omaevwokpotọ, kugbe obo ri yovwirin. Wo de vwo ẹguọnọ rẹ uyota kugbe obo ri yovwirin, ọyena imuẹro nẹ wo vwo ẹguọnọ ri Jesu Kristi. Roro kpahen oborẹ Jesu fiudugberi chochọ rẹ uyota kugbe obo ri yovwirin.  (Jọ 18:37) Idjerhe vọ yen Jesu vwo dje uruemu rẹ omaevwokpotọ phia?

7. Die yen vwerhen owẹ oma kpahen uruemu rẹ omaevwokpotọ ri Jesu?

⁷ Jesu dje uruemu rẹ omaevwokpotọ phia womarẹ udje rọyen. Kerẹ udje, ọ vwẹ urinrin eje vwọ kẹ Ọsẹ rọyen ukperẹ omobọ rọyen. (Mk 10:​17, 18; Jọ 5:19) Mavọ yen oma ru we kpahen omaevwokpotọ ri Jesu? Ọnana rhe mu we vwo vwo ẹguọnọ rẹ Ọmọ rẹ Ọghẹnẹ je vwẹrokere? E, ọtiọyen ọ ghene epha. Diesorọ Jesu vwọ vwomakpotọ? Kidie o vwo ẹguọnọ rẹ Ọsẹ rọyen rọ dia ohwo rọ vwomakpotọ, je vwẹrokere. (Un 18:35; Hib 1:3) O rhe fo nẹ wo sikẹrẹ Jesu, rọ vwẹrokere iruemu ri Jihova gbagba?

8. Diesorọ avwanre vwo vwo ẹguọnọ ri Jesu kerẹ Ovie rẹ avwanre?

⁸ Avwanre vwo ẹguọnọ rẹ Jesu kerẹ Ovie rẹ avwanre kidie ọyehẹ Osun ro me yovwin. Jihova komobọ yen yono Ọmọ rọyen je reyọ vwo mu kerẹ Osun. (Aiz 50:​4, 5) Ji roro kpahen ẹguọnọ omaevwoze rẹ Jesu djephia. (Jọ 13:1) Ofori nẹ wo vwo ẹguọnọ ri Jesu kidie ọyehẹ Ovie wẹn. Ọ tare nẹ ihwo ri ghini vwo ẹguọnọ rọyen rọ je reyọ kerẹ igbeyan, djephia nẹ ayen vwo ẹguọnọ rọyen womarẹ ayen vwo nene iji rọyen. (Jọ 14:15; 15:​14, 15) Ọnana okpuphẹn rode ra vwọ dia ugbeyan rẹ Ọmọ ri Jihova!

9. Idjerhe vọ yen omaebrophiyame rẹ Inenikristi vwọ họhọ ọ rẹ Jesu?

⁹ Ọvo usun rẹ iji ri Jesu vwọ kẹ idibo rọyen yen ayen vwo bromaphiyame. (Mt 28:​19, 20) O phi udje na phiyotọ. O vwo idjerhe evo rẹ omaebrophiyame rọyen vwọ fẹnẹ ọ rẹ idibo rọyen. (Ni ekpeti na “ Oborẹ Omaebrophiyame ri Jesu Vwọ Fẹnẹ ọ rẹ Idibo Rọyen.”) Ẹkẹvuọvo e họhọ ohwohwo vwẹ idjerhe efa. Re vwo brophiyame nu, Jesu de djephia nẹ ọyen che ru ọhọre rẹ Ọsẹ rọyen. (Hib 10:7) Vwẹ idjerhe vuọvo na, idibo ri Jesu bromaphiyame vwo djephia vwọrẹ azagba nẹ ayen vwomakpahotọ kẹ Jihova Ọghẹnẹ. Enẹna kẹ ayen tẹnroviẹ eruo rẹ ọhọre rẹ Ọghẹnẹ ọ dia ọ raye-en. Vwẹ idjerhe tiọyena ayen vwẹrokere udje rẹ Onini rayen.

10. Diesorọ o vwo fo nẹ ẹguọnọ ru wo vwo kpahen Jesu mu we vwo bromaphiyame?

¹⁰ Wo rhiabọreyọ Jesu kerẹ Ọmọ rẹ Ọghẹnẹ vuọvo kugbe Ovie rẹ Ọghẹnẹ vwo mu nẹ o sun avwanre. Wọ riẹnre nẹ Jesu vwomakpotọ je vwẹrokere iruemu rẹ Ọsẹ rọyen gbagbga. Wo yonori nẹ Jesu vwẹ emu ghẹre ihwo rẹ owẹnvwe hwe, vwẹ uchebro kẹ ihwo rẹ udu rayen kuọnre, ji sivwin ihwo re muọga. (Mt 14:​14-21) Wọ mrẹ oborẹ o suẹn ukoko rọyen wan nonẹna. (Mt 23:10) Wọ je riẹn nẹ o che ru obo re vrẹ ọtiọyen vwẹ ọke rọ cha vwẹ obaro na ọ da rhe dia Ovie rẹ Uvie rẹ Ọghẹnẹ. Mavọ wo se vwo djephia nẹ wo vwo ẹguọnọ rọyen? Ọyen wo vwo nene udje rọyen. (Jọ 14:21) Wọ sa ton ọnana phiyọ womarẹ wọ vwọ vwomakpahotọ kẹ Jihova ji bromaphiyame.

11. Ọrhọ yen iroro ọvo rọ ma ghanre rọ nẹrhẹ e bromaphiyame, kẹ diesorọ ọ vwọ dia ọtiọyen?

¹¹ Ọrhọ yen iroro ọvo rọ ma ghanre rọ nẹrhẹ e bromaphiyame? Jesu vuẹ avwanre iji rẹ Ọghẹnẹ rọ marho kparobọ rọ vwọ tanẹ: “Wọ me vwẹ udu wẹn ejobi guọnọ Ọrovwohwo Ọghẹnẹ vwẹ ẹnwẹn wẹn ejobi, kugbe iroro wẹn ejobi ji kugbe ogangan wẹn ejobi.” (Mk 12:30) Eta nana dje oborẹ wo vwo ẹguọnọ rẹ Ọghẹne te?

12. Diesorọ wo vwo vwo ẹguọnọ ri Jihova? (Ni uhoho na.)

¹² O vwo iroro buebun re sorọ e vwo  vwo ẹguọnọ ri Jihova. Kerẹ udje, wọ rhe mrẹvughe nẹ obọ rọyen “ọye ogbugbu rẹ arhọ epha” ọyen je kẹ avwanre “Kemu kemu esiri na ejobi.” (Un 36:9; Jem 1:17) Erọnvwọn iyoyovwin ru wọ riavwerhen rọyen na ejobi, obọ rẹ Ọghẹnẹ avwanre ro vwo ẹguọnọ rọ je kẹ okẹ ghwologhwolo na yen i nurhe.

13. Die yen nẹrhẹ ọtanhirhe na dia okẹ rọ marho kparobọ?

¹³ Ọtanhirhe na ọyen okẹ ọghanghanre rẹ Jihova vwọ kẹ avwanre. Diesorọ a vwọ ta ọtiọyen? Roro kpahen oyerinkugbe ọkpẹkpẹkpẹ rọhẹ uvwre rẹ Jihova vẹ Ọmọ rọyen. Jesu da ta: Ọsẹ na “guọnọ ovwẹ” me da rha “guọnọ Ọsẹ na.” (Jọ 10:17; 14:31) Kidie nẹ ayen herọ ikpe oduima buebun rhire na oyerinkugbe rọhẹ uvwre rayen da rhe ganphiyọ. (Isẹ 8:​22, 23, 30) Vwẹ ẹwẹn roro oborẹ ọ da Ọghẹnẹ te rọ vwọ vwẹ uphẹn kẹ Ọmọ rọyen nẹ ọ rioja ji ghwu. Jihova vwo ẹguọnọ wẹ vẹ ihworakpọ eje tẹdia ro vwo siobọnu Ọmọ rọyen ro vwo ẹguọnọ kpahen rere wẹ vẹ ihwo efa sa vwọ dia bẹdẹ. (Jọ 3:16; Ga 2:20) Ọnana yen iroro rọ ma ghanre rọ nẹrhẹ e vwo ẹguọnọ rẹ Ọghẹnẹ.

14. Die yen me yovwin wọ sa tẹnrovi vwẹ akpeyeren?

¹⁴ Rọ vwọ dianẹ wo yono erọnvwọn buebun kpahọn re na ẹguọnọ ru wo vwo  kpahen Jihova kọ rhe ganphiyọ. O muẹro nẹ wọ guọnọ sikẹrẹ enẹna rhi te rhirin rhirin. Wo se ru ọtiọyen. O jiriro kẹ wẹ nẹ wo ru udu rọyen ghọghọ. (Isẹ 23:​15, 16) Wọ sa reyọ iruemu wẹn vwo djephia ọ dia ọ rẹ eta ọvo-o. Oborẹ wo yeren akpọ wan yen che djephia sẹ wo ghini vwo ẹguọnọ ri Jihova. (1 Jọ 5:3) Ọyen obo ri me yovwin ru wọ sa tẹnrovi vwẹ akpeyeren.

15. Mavọ yen wo se vwo dje ẹguọnọ ru wo vwo kpahen Jihova phia?

¹⁵ Mavọ yen wo se vwo dje ẹguọnọ ru wo vwo kpahen Jihova phia? Ẹsosuọ, nẹrhovwo roghẹresan vwẹ odjahọn vwọ vuẹ Ọghẹnẹ rẹ uyota na nẹ wọ vwomakpahotọ kẹ. (Un 40:8) Wo de ru ọyena nu, gbe dje omaẹvwọkpahotọ wẹn na phia vwọrẹ azagba womarẹ omaebrophiyame. Kirobo re djunute siẹvure vwẹ uyono nana, omaebrophiyame wẹn ọyen ọke rẹ omavwerhovwẹn, rọ je ma ghanre vwẹ akpeyeren wẹn eje. Ghwe vwo nẹ ọke nana yanran, wọ ton akpeyeren kpokpọ phiyọ vwọ kẹ Jihova, ọ dia oma wẹ-ẹn. (Ro 14:8; 1 Pi 4:​1, 2) Ọnana ghini owọẹjẹ rode. O che rhie uphẹn phiyọ wo vwo yeren uvi rẹ akpọ. Vwẹ idjerhe vọ?

16. Kirobo rẹ Une rẹ Ejiro 41:12 djere, idjerhe vọ yen Jihova cha vwọ hwosa vwọ kẹ ihwo re reyọ akpeyeren rayen ejobi vwọ ga?

¹⁶ Jihova yen ohwo rọ ma kẹ okẹ kparobọ. O toro oborẹ wọ vwọ kẹ-ẹ, obo rọ cha vwọ hwosa kẹ wẹ cha rho vrẹ ọtiọyen. (Mk 10:​29, 30) Ọ cha nẹrhẹ wo yeren uvi rẹ akpọ rọ vọnre vẹ erere kugbe omavwerhovwẹn vwevunrẹ akpọ umwemwu nana. Akpeyeren wẹn ru wo ghwe vwo bromaphiyame nu obọ na ghwa tonphiyọ, o che vwoba vwẹ etinẹ-ẹ. Wọ cha ra vwẹ ẹga kẹ Ọsẹ wẹn ru wo vwo ẹguọnọ rọyen na bẹdẹ bẹdẹ. Ọkieje yen ẹguọnọ rọhẹ uvwre wẹ vẹ Ọsẹ wẹn cha vwọ ganphiyọ, ku wọ cha dia bẹdẹ bẹdẹ kirobo rọ herọ na.​—Se Une rẹ Ejiro 41:12.

17. Die yen emuọvo rẹ Jihova guọnọ mie we ru wọ sa vwọ kẹ?

¹⁷ Siẹrẹ wọ da vwomakpahotọ ji bromaphiyame, jẹ wo vwo uphẹn wọ vwọ reyọ emuọvo rọ ghanre vwọ kẹ Ọsẹ wẹn. Ọyen  vwẹ kemu kemu ro yovwirin ru wọ riavwerhen rọyen vwọ kẹ wẹ. Ọtiọyena, kẹ wọ sa vwẹ emuọvọ rẹ ohwo ro vwo akpọ vẹ odjuvwu guọnọ mie we vwọ kẹ, ọyen ẹga ro nẹ otọ rẹ ubiudu rhe. (Job 1:8; 41:11; Isẹ 27:11) O vwo orọnvwọn ọfa vwẹ akpeyeren ro yovwin vrẹ ọnana-a. Aphro herọ-ọ, ẹguọnọ ru wo vwo kpahen Jihova yen iroro ọvo ro me yovwin rọ nẹrhẹ wo bromaphiyame.

18. Erhọ yen enọ evo wọ sa nọ oma wẹn?

¹⁸ A da nọ wẹ nẹ, wo che bromaphiyame? Wẹwẹ ọvo yen sa kpahenphiyọ onọ yena. Ẹkẹvuọvo o che yovwin wọ da nọ oma wẹn, ‘Die yen djẹ vwẹ omaebrophiyame?’ (Iru 8:36) Karophiyọ iroro erha ra ta ota kpahen re na. Ẹsosuọ, wo vwo ẹguọnọ rẹ uyota vẹ obo ri yovwirin. Nọ oma wẹn, ‘Me guọnọ mrẹ ọke rẹ kohwo kohwo cha vwọ ta uyota ji ru obo ri yovwirin?’ Ọrivẹ, wo vwo ẹguọnọ ri Jesu. Nọ oma wẹn, ‘Me guọnọ nẹ Ọmọ rẹ Ọghenẹ dia Ovie mẹ je vwẹrokere udje rọyen?’ Ọrerha, ọ rọ ma ghanre, wo vwo ẹguọnọ ri Jihova Ọghẹnẹ. Gba je nọ oma wẹn, ‘Me guọnọ ru ubiudu ri Jihova ghọghọ womarẹ ẹga re me vwọ kẹ kerẹ Ọghẹnẹ mẹ?’ Ọ da dianẹ e yen ẹkpahọnphiyọ wẹn vwọ kẹ enọ nana, diesorọ wo vwo jẹ omaebrophiyame? Die yen wọ hẹrhẹ?​—Iru 16:33.

19. Diesorọ wo vwo jẹ oma esio uko wo vwo bromaphiyame? Djudje rọyen. (Jọn 4:34)

¹⁹ Ọ da dianẹ wo siomauko wo vwo bromaphiyame, roro kpahen udje ọvo rẹ Jesu vwo ruiruo. (Se Jọn 4:34.) Noso nẹ Jesu reyọ eruo rẹ ọhọre rẹ Ọsẹ rọyen vwo dje emu. Diesorọ? Emu yovwin kẹ ugboma rẹ avwanre. Jesu riẹnre nẹ kemu kemu rẹ Jihova vuẹ avwanre nẹ e ru cha ghwa erhuvwu rhe avwanre. Jihova guọnọre nẹ e ru orọnvwọn vuọvo rọ cha so okpetu kẹ avwanre-e. Ọyen ọhọre ri Jihova nẹ wo bromaphiyame? E. (Iru 2:38) Ọtiọyena jẹ o muwẹro nẹ wo de nene urhi rọ tare nẹ e bromaphiyame na, o che fi erere kẹ wẹ. Ọ da dianẹ wọ ghwọrọ ọke wọ ke re emu rọ vwerhen owẹ-ẹ, kẹ diesorọ wo vwo siomauko wo vwo bromaphiyame?

20. Die yen a cha ta ota kpahen vwẹ uyono rọ vwọ kpahen ọnana?

²⁰ Diesorọ ihwo evo vwo gbeghẹrẹ ayen vwo bromaphiyame? Ihwo evo sa tanẹ, “Mi ji muegbe-e.” Orhiẹn ru wọ vwọ vwomakpahotọ ji bromaphiyame ọyen orhiẹn rọ ma ghanre ru wo che bru vwẹ akpeyeren. Ọtiọyena ọ cha reyọ ọke vẹ ẹgbaẹdavwọn wọ vwọ frẹkotọ roro kpahen orhiẹn na. Jẹ ọ da ghene dia ọdavwẹ wẹn ru wo vwo bromaphiyame, die wo se ru enẹna vwo muegbe rẹ oma wẹn? A cha fuẹrẹn ẹkpahọnphiyọ rẹ onọ na vwẹ uyono rọ vwọ kpahen ọnana.