Diesorọ ọshare re se “ugbeyan” na vwọ tanẹ ọyen che “miovwo” uku rọyen siẹrẹ ọyen da rọnvwọn Rutu? (Ru 4:​1, 6)

Vwẹ ọke rẹ awanre, ọ da dianẹ ọshare rọ rọnvwọnre vwiẹre tavwen o ki ghwu-u, o vwo enọ evo re guọnọ ẹkpahọnphiyọ: Die yen cha phia kẹ otọ ro vwori? Odẹ rẹ orua rọyen che ghwru bẹdẹ bẹdẹ? Urhi ri Mosis kpahenphiyọ enọ yena.

Die yen cha phia kẹ otọ rẹ ọshare ro ghwuru na yẹrẹ ovwiogbere rọ shẹ otọ rọyen? Oniọvo yẹrẹ ohwo rẹ orua rọyen rọ ma kẹrẹ sa tan otọ tiọyena rhivwin. Ọtiọyena otọ na kọ je cha dia ọ rẹ ihwo rẹ orua na.​—Li 25:​23-28; Uk 27:​8-11.

Mavọ yen a sa vwọ sẹro rẹ odẹ rẹ orua rẹ ohwo ro ghwuru na? Womarẹ a vwọ reyọ aye re ghwu jovwo na vwọ riuku kirobo re phia kẹ Rutu. Oniọvo rẹ ohwo ro ghwuru na cha rọnvwọn aye ro ghwu jovwo na, o se vwo vwiẹ ọmọ rọ cha vwẹrote oborẹ ọshare na ghwu jovwo rere odẹ rọyen vwo jẹ eghwro. Ọrhuẹrẹphiyotọ rẹ ẹguọnọ nana sa nẹrhẹ a vwẹrote ayeuku na.​—Urh 25:​5-7; Mt 22:​23-28.

Roro kpahen udje ri Naomi. Ọshare ọvo re se Elimẹlẹk yen ọ rọvwọnre. Ọke rẹ ọshare rọyen vẹ emeshare rọyen ivẹ vwo ghwu, ohwo vuọvo rha herọ rọ cha vwẹrote-e. (Ru 1:​1-5) Ọke ro vwo rhivwin kpo Juda re, Naomi da vuẹ aye rẹ ọmọ rọyen re se Rutu nẹ ọ vuẹ Boaz nẹ ọ dẹ otọ rayen na rhivwin. Ọnana omoni ọkpẹkpẹkpẹ rẹ Elimẹlẹk. (Ru 2:​1, 19, 20; 3:​1-4) Ẹkẹvuọvo Boaz da rhe mrẹvughe nẹ o vwo omoni ọfa rẹ Baibol na seri nẹ “ugbeyan,” rọ ma kẹrẹ Elimẹlẹk vrẹ ọyen. Ọyen ohwo rẹsosuọ ro vwo uphẹn rọ vwọ dẹ otọ na rhivwin.​—Ru 3:​9, 12, 13.

Ẹsosuọ, “ugbeyan” na vwo owenvwe rọ vwọ vwẹ ukẹcha phia. (Ru 4:​1-4) O muegbe rọ vwọ ghwọrọ igho vwọ dẹ otọ na rhivwin, kidie ọ riẹnre nẹ Naomi rhe che se vwiẹ ọmọ rọ cha reyọ otọ rẹ Elimẹlẹk na vwọ riuku-u. Ọtiọyena, kọ cha vwẹ otọ na ba e ro vwori, vwọ kẹ, ọnana erere rode.

Ọtiọyena ugbeyan na de wene ẹwẹn rọ vwọ riẹn nẹ ọyen cha rọnvwọn Rutu. Ọ da ta: “Me sa dẹ kẹ oma mẹ-ẹ, mi de re miovwo urhi rẹ ukuẹriọ mẹ.” (Ru 4:​5, 6) Die yen nẹrhẹ o wene ẹwẹn?

Ọ da dianẹ ugbeyan na yẹrẹ ohwo ọfa kọyen rọnvwọn Rutu, o de vwiẹ ọmọshare, ọmọ na kọyen cha reyọ otọ rẹ Elimẹlẹk na vwọ riuku. Idjerhe vọ kọyen ọnana che vwo “miovwo” uku rẹ ugbeyan na? Baibol na vuẹ avwanre-e, ẹkẹvuọvo ena yen iroro evo re sa suọ.

• Ẹsosuọ, igho rọ ghwọre vwọ dẹ otọ na rhivwin che ghwru, kidie otọ rẹ Elimẹlẹk na cha sa dia ọ rọye-en. Ọ rẹ ọmọ rẹ Rutu che vwiẹ.

• Ọrivẹ, ọyen vwo oghwa rọ cha vwọ ghẹre je vwẹrote Naomi vẹ Rutu.

• Ọrerha, ọ da dianẹ Rutu vwiẹ emọ vwọ kẹ ugbeyan na, emọ ri Rutu vẹ e rẹ ugbeyan na vwiẹre yen cha ghare ughwẹ rọyen.

• Ọrẹne, ọ da dianẹ ugbeyan na vwo emọ efa jovwo-o, emọ ri Rutu che vwiẹ na yen cha riuku rẹ otọ rẹ Elimẹlẹk vẹ ọ rẹ ugbeyan na. Ọtiọyena obo ro vwori eje kọ cha dia ọ rẹ ọmọ ra cha vwẹ odẹ rẹ Elimẹlẹk se ọ dia odẹ rọye-en. Ugbeyan na rhe vwo owenvwe rọ vwọ vwẹ ukẹcha kẹ Naomi-i rere ughwẹ rọyen vwo jẹ vabọ. Ọtiọyena ọ da vwẹ uphẹn kẹ omoni rọyen ọfa, Boaz, nẹ ọ gba dẹ otọ na rhivwin. Boaz de ru ọtiọyen “rere odẹ rẹ ọ ro ghwuru na vwo jefue.”​—Ru 4:10.

Oborẹ ugbeyan na me vwo omavwerhovwen kpahen yen ọ vwọ sẹro rẹ odẹ rọyen kugbe obo ro vwori. Urhuru yen muro vwo ru obo ro ruru na. Dede nẹ ugbeyan na davwẹngba rọ vwọ sẹro rẹ odẹ rọyen, odẹ na ghwruru kare kare ohwo vuọvo ro vughe re rha herọ-ọ. Uphẹn roghẹresan re vwo kere Boaz ba uvwiẹ rẹ Mesaya na rọ dia Jesu Kristi wan rhe akpọ je va ugbeyan na obọ. Ọ da ohwo mamọ nẹ uphẹn rẹ ugbeyan nana vwori eje varọ obọ kidie ọ rhọnvwe vwẹ ukecha phia-a!​—Mt 1:5; Lu 3:​23, 32.