1. Die yen avwanre yonori vwẹ omẹvwa ri kukpe kukpe ri 2023?

 VWẸ omẹvwa rẹ kukpe kukpe ri 2023, a avwanre mrẹ ewene evo ra vwọphia kpahen iyono avwanre vẹ aghwoghwo re vwerhoma ri shekpahen iruo rẹ aghwoghwo na. Kerẹ udje, avwanre yonori nẹ a da tobọ ghwọrọ Babilon Rode nu, ihwo evo ji se vwo uphẹn rẹ ayen vwọ vwomaba ẹga ri Jihova. Avwanre ji nyo nẹ vwo nẹ November 2023, ighwoghwota rha cha niyẹnrẹn rẹ iruo rẹ aghwoghwo rayen ejee. Kẹ, ewene tiọyena mudiaphiyọ nẹ iruo aghwoghwo na rha ghanre kirobo ri jovwo yẹrẹ rha dia emu rẹ okpakpa kirobo ri jovwoo? Ẹjo kakaka!

2. Diesorọ iruo aghwoghwo avwanre na vwọ guọnọ okpakpa vrẹ obo ri jovwo? (Mak 13:10)

² Kẹdẹ kẹdẹ yen iruo rẹ aghwoghwo avwanre na vwọ guọnọ okpakpa vrẹ obo ri jovwo. Diesorọ? Kidie ọke rha herọọ. E jẹ a fuẹrẹn oborẹ Jesu ta phiyotọ kpahen iruo aghwoghwo na vwẹ ẹdẹ re koba na. (Se Mak 13:10.) Kirobo ri Matiu niyẹnrẹn rọyen, Jesu tare ne e che ghwoghwo iyẹnrẹn esiri na vwẹ akpo na eje tavwen “oba na” ke rhe. (Mt 24:14) Ota yena shekpahen akpọ umwemwu rẹ Eshu nana ra cha ghwọrọ karekare. Jihova rhuẹrẹ “ẹdẹ vẹ unọke” na phiyọ vwọ kẹ erọnvwọn re cha phia kẹrẹkpẹ. (Mt 24:36; 25:13; Iru 1:7)  Ọke rhie jẹ ọke kpo, jẹ e siẹkẹrẹ ẹdẹ na phiyọ. (Ro 13:11) Ọtiọyena, avwanre che rhe ghwoghwo bẹsiẹ oba na ke rhe.

3. Die yen mu avwanre vwo ghwoghwo?

³ E vwo roro kpahen iruo aghwoghwo avwanre na, e jẹ a nọ oma avwanre onọ ọghanghanre nana: Diesorọ avwanre vwo ghwoghwo iyẹnrẹn esiri na? Ọ dia emu ọfaa, ẹguọnọ yen mu avwanre vwo ghwoghwo. Oborẹ avwanre ruẹ vwẹ iruo aghwoghwo na dje ẹguọnọ avwanre vwori phia, kọyen ẹguọnọ rẹ iyẹnrẹn esiri na, ẹguọnọ rẹ ihwo, ma rho ji te ẹguọnọ rẹ avwanre vwo kpahen Jihova vẹ odẹ rọyen. E jẹ a fuẹrẹn ayen ọvuọvo.

AVWANRE GHWOGHWO KIDIE E VWO ẸGUỌNỌ RẸ IYẸNRẸN ESIRI NA

4. Mavọ yen oma ruẹ avwanre siẹrẹ e de nyo ikuegbe rẹ omavwerhovwẹn?

⁴ Wọ sa karophiyọ oborẹ oma ru we ọke ru wo vwo nyo ikuegbe rẹ omavwerhovwẹn, ọ sa dia ohwo rẹ orua wẹn ro vwiẹre yẹrẹ iruo ru vwọ ghwa guọnọ ro te we obọ? Aphro herọọ nẹ, kpakpata yen wọ cha vuẹ ihwo rẹ orua vẹ igbeyan wẹn kpahọn. Emu ọtiọyen phia kẹ wẹ ọke wo vwo tu nyo kpahen ikuegbe rọ ma vwerhoma rọ dia iyẹnrẹn esiri rẹ Uvie rẹ Ọghẹnẹ?

5. Mavọ yen oma ru we wọ ka vwọ mrẹ uyota na vwẹ Baibol na? (Ni ihoho na.)

⁵ Roro kpahen obo oma ru we wọ ka vwọ mrẹ uyota na vwẹ Baibol na. Wọ da rhe mrẹvughe nẹ Ọsẹ wẹn rọhẹ odjuvwu vwo ẹguọnọ wẹn, nẹ ọ guọnọre nẹ wọ dia ẹbẹre ọvo rẹ orua rọyen re vwẹ ẹga kẹ, o veri nẹ o che phioba phiyọ ojaẹriọ vẹ ọmiaovwẹ, nẹ wo se rhẹro nẹ ihwo ru wo vwo ẹguọnọ kpahen ri ghwuru cha rhoma dia vwẹ akpọ ọkpokpọ na vẹ erọnvwọn efa ọtiọyen. (Mk 10:​29, 30; Jọ 5:​28, 29; Ro 8:​38, 39; Ẹvw 21:​3, 4) Oborẹ wo yonori na vwerhen owẹ oma mamọ. (Lu 24:32) Wo vwo ẹguọnọ kpahen oborẹ wo yono na, wọ je guọnọ vuẹ ihwo efa kpahọn!​—Ni Jerimaya 20:9

6. Die yen wo yono vwo nẹ obo re phia vwọ kẹ Ernest vẹ Rose rhe?

 ⁶ Roro kpahen obo re phia kẹ oniọvo ọshare re se Ernest brọhẹ omarẹ ẹgbukpe ihwe ọke ọsẹ rọyen vwo ghwu. Ernest da ta: “Ki mi roro: ‘O kpo odjuvwu re? Gbanẹ ọ rha herọ ọfaa?’ Ọnana kọ nẹrhẹ me rioma kpahen emọ efa ri vwo esẹ.” Ọkieje yen Ernest vwo kpo asan re sho ihwo phiyọ, o mi shiguẹ vwẹ obaro rẹ ushi rẹ ọsẹ rọyen je nerhovwo nẹ: “Ọghẹnẹ biko, me guọnọ riẹn asan rẹ ọsẹ mẹ hepha.” Omarẹ ẹgbukpe 17 rẹ ọsẹ rọyen vwo ghwu nu, a da vwẹ uyono ri Baibol vwo mu kẹ, o de rhiabọreyọ. Oma vwerhen rọ, rọ vwọ riẹn nẹ ihwo ri ghwuru riẹn emu vuọvoo, kerẹsiẹ ra da mrẹ nẹ ayen hẹ ovwerhẹn okokodo, nẹ Baibol na tare nẹ evrẹnushi herọ vwẹ obaro na. (Agh 9:​5, 10; Iru 24:15) Ukuotọ royen, ọ da mrẹ ẹkpahọnphiyọ rẹ enọ ri kpokpo ẹwẹn vwẹ ọke grongron re! Oma nabọ vwerhen Ernest kpahen uyota ri Baibol ro yono na. Aye rọyen re se Rose, da vwomaba vwẹ uyono na, o de ji rhi vwo omavwerhovwẹn kpahen ovuẹ rẹ Uvie na. Vwẹ 1978, ayen de bromaphiyame. Ayen vuẹ ihwo rẹ orua, igbeyan kugbe ihwo efa re guọnọ kerhọ rẹ ovuẹ rayen. Fikirẹ ọnana, Ernest vẹ Rose da vwẹ ukẹcha kẹ ihwo re vrẹ 70 vwo bromaphiyame.

7. Die yen phia siẹrẹ ẹguọnọ rẹ uyota ri Baibol na da vwẹ awọ muotọ vwẹ ubiudu rẹ avwanre? (Luk 6:45)

⁷ O phẹnre dẹn nẹ, siẹrẹ ẹguọnọ re vwo kpahen uyota ri Baibol na da vwẹ awọ muotọ vwẹ ubiudu rẹ avwanre, e che se fotovwiin. (Se Luk 6:45.) Ọtiọyena, avwanre se vwo oka rẹ ẹwẹn ro rhe idibo ri Jesu rẹ ẹgbukpe ujorin rẹsosuọ re tare nẹ: “Avwanre che jẹ oborẹ avwanre mrẹre vẹ oborẹ avwanre nyori ẹta-a.” (Iru 4:20) Avwanre vwo ẹguọnọ rẹ uyota na mamọ te ẹdia rẹ avwanre da guọnọ vuẹ kohwo kohwo kpahọn.

ẸGUỌNỌ AVWANRE VWO KPAHEN IHWO YEN NẸRHẸ AVWANRE GHWOGHWO

8. Die yen mu avwanre vwo ghwoghwo iyẹnrẹn esiri na kẹ ihwo efa? (Ni ekpeti na “ Vwo Ẹguọnọ rẹ Ihwo​​—⁠Yono Ayen Vwọ Dia Idibo.”) (Ni uhoho na.)

⁸ Avwanre vwo ẹguọnọ rẹ ihwo kerẹ ­Jihova vẹ Ọmọ rọyen. (Isẹ 8:31; Jọ 3:16) Avwanre ni arodọnvwẹ rẹ ihwo re ‘riẹn Ọghẹnẹẹ’ ri ji vwo “iphiẹrophiyọ-o.” (Ẹf 2:12) Ebẹnbẹn rẹ akpọ na mu ayen rọ jẹ avwanre vwo orọnvwọn rọ sa vwo ukẹcha kẹ ayen, kọyen iyẹnrẹn esiri rẹ Uvie rẹ Ọghẹnẹ. Ẹguọnọ vẹ arodọnvwẹ rẹ avwanre vwo kpahen ayen yen mu avwanre vwọ davwẹngba avwanre eje vwo ghwoghwo iyẹnrẹn esiri na kẹ ayen. Ovuẹ ọghanghanre yena sa nẹrhẹ ayen vwo  iphiẹrophiyọ, ji ­yeren omamọ akpọ enẹna, je nẹrhẹ ayen vwo uphẹn rẹ “uvi arhọ na” rọ dia arhọ ri bẹdẹ vwevunrẹ akpọ ọkpokpọ na.​—1Ti 6:⁠19.

9. Die yen avwanre si ihwo orhọ kpahan vwẹ obaro na, kẹ diesorọ? (Izikiẹl 33:7, 8)

⁹ Ẹguọnọ rẹ avwanre vwo kpahen ihwo je nẹrhẹ avwanre si ayen orhọ nẹ oba rẹ akpọ umwemwu nana sikẹre re. (Se Izikiẹl 33:​7, 8.) Aro rẹ ihwo rẹ orua kugbe irivẹ avwanre re ga Jihovaa da avwanre. Ihwo buebun mu akpọ yerẹn, ayen tobọ riẹn obo re cha vwẹ obaro naa, nẹ “ukpokpogho rode cha dia, ra je rhe mrẹ oka rọyen rhanvwẹ ọke rẹ akpọ na vwọ tonphiyọ rhi te ọke nana-a, ẹjo, ọ je cha phia ọfa-a.” (Mt 24:21) Avwanre guọnọre nẹ ayen riẹn obo re cha phia vwẹ ọke rẹ ẹdjọeguo na, e che si ẹga rẹ efian no a me rha ghwọrọ akpọ umwemwu na vwẹ ofovwin rẹ Amagidọn. (Ẹvw 16:​14, 16; 17:​16, 17; 19:​11, 19, 20) Ẹrhovwo avwanre ọyen ọ rẹ ihwo buebun vwọ kerhọ rẹ oborẹ avwanre ta, je vwomaba avwanre vwẹ ẹga rẹ uyota asaọkiephana. Kẹ ihwo rẹ orua kugbe ihwo efa re rhọnvwe kerhọ vwoo?

10. Diesorọ ọ vwọ dia emu rẹ okpakpa e vwo si ihwo orhọ ọkieje?

¹⁰ Kirobo ra ta ota kpahen vwẹ uyovwinrota rọ wanre na, ọ sa dia ọhọre ri Jihova ro vwo sivwin ihwo ri wene ẹwẹn ọke rẹ ayen da mrẹ oghwọrọ ri Babilọn Rode na. Ọ da dia ọtiọyen, kọyen ọyen emu rẹ okpakpa e vwo si ayen orhọ ọkieje. Di roro: Ayen sa karophiyọ oborẹ avwanre vuẹ ayen enẹna vwẹ obaro na. (Ni Izikiẹl 33:33.) Ọkievo, ayen se roro kpahen oborẹ avwanre vuẹ ayen, ọnana me nẹrhẹ ayen vwomaba ẹga rẹ uyota tavwen ọke ke wan. Kerẹ ọrhẹrẹ ọto rọ vwẹrote uwodi ri Filipae ro kurhẹriẹ ọke rẹ ‘otọ vwo kpogho gangan’ nu, ọ sa dianẹ ihwo evo re rhọnvwe kerhọ enẹnaa, se wene ẹwẹn siẹrẹ ayen da mrẹ oghwọrọ ri Babilọn Rode na nu.​​—Iru 16:​25-34.

ẸGUỌNỌ AVWANRE VWO KPAHEN JIHOVA VẸ ODẸ RỌYEN YEN NẸRHẸ AVWANRE GHWOGHWO

11. Mavọ yen avwanre reyọ urinrin, ọghọ kugbe ẹgba vwọ kẹ Jihova? (Ẹvwọphia 4:11) (Ni ihoho na.)

¹¹ Emu ọvo kiriguo ro mu avwanre vwo ghwoghwo iyẹnrẹn esiri na yen ẹguọnọ rẹ avwanre vwo kpahen Jihova Ọghẹnẹ vẹ odẹ ọfuanfon rọyen. Avwanre nẹ iruo aghwoghwo na kerẹ idjerhe ọvo re vwo jiri Ọghẹnẹ rẹ avwanre vwo ẹguọnọ rọyen. (Se Ẹvwọphia 4:​11.) Avwanre rhọnvwephiyọ eta yena nẹ: Jihova Ọghẹnẹ muwan rọ vwọ reyọ urinrin, ọghọ, kugbe ẹgba. Avwanre vwo urinrin vẹ ọghọ vwọ kẹ siẹrẹ avwanre da vuẹ ihwo efa kpahan obo ri djerephia nẹ,  ọyen yen ma “erọnvwọn eje” nẹ obọ rọyen yen arhọ avwanre hepha. Siẹrẹ avwanre da reyọ ọke, ogangan kugbe oborẹ avwanre vwori vwo ruiruo aghwoghwo na jẹ avwanre vwo ẹgba rẹ avwanre vwọ kẹ. (Mt 6:33; Lu 13:24; Kọl 3:23) Vwọrẹ uyota, oma vwerhen avwanre vwọ vuẹ ihwo efa kpahan Ọghẹnẹ rẹ avwanre vwo ẹguọnọ rọyen na. Ọnana je nẹrhẹ avwanre vuẹ ihwo efa kpahen odẹ rọyen vẹ oborẹ odẹ na mudiaphiyọ. Diesorọ?

12. Idjerhe vọ yen avwanre vwo ruẹ odẹ ri Jihova fuan vwẹ iruo aghwoghwo na?

¹² Ẹguọnọ rẹ avwanre vwo kpahen Jihova nẹrhẹ avwanre ruẹ odẹ rọyen fuan. (Mt 6:9) Avwanre guọnọ phoro ekan rẹ Eshu mu banre odẹ rẹ Ọghẹnẹ womarẹ efian rọyen. (Jẹ 3:​1-5; Job 2:4; Jọ 8:44) Vwẹ iruo aghwoghwo na, avwanre guọnọ chochọn rẹ Ọghẹnẹ womarẹ a vwọ vuẹ ihwo re guọnọ kerhọ rẹ uyota na kpahen oka rẹ ohwo rọ hepha. Avwanre guọnọre nẹ kohwo kohwo riẹn nẹ, ẹguọnọ ọyen uruemu ri Jihova rọ ma ghanre, nẹ o suẹn vwẹ idjerhe ọsoso kugbe ọvwata, nẹ o rhe che krii Uvie rọyen che phioba phiyọ ojaẹriọ eje, ọ me je ghwa ufuoma vẹ omavwerhovwẹn rhe ihworakpọ. (Un 37:​10, 11, 29; 1Jọ 4:⁠8) Siẹrẹ avwanre da vuẹ ihwo efa kpahen oka rẹ ohwo ri Jihova hepha vwẹ iruo aghwoghwo na, jẹ avwanre ruẹ odẹ rọyen fuan. Ọnana ghwa omavwerhovwẹn cha kidie e ruẹ nene odẹ avwanre. Vwẹ idjerhe vọ?

13. Diesorọ Iseri ri Jihova re se avwanre na vwọ dia ọghọ rode re bruphiyọ avwanre oma? (Aizaya 43:10-12)

¹³ Jihova reyọ avwanre vwo ru “iseri” rọyen. (Se Aizaya 43:​10-12.) Vwẹ ikpe evo re wanre, ileta ro nẹ obọ rẹ Ẹko Rọvwẹrote na rhe da ta: “Ra vwọ dia Iseri ri Jihova ọyen uphẹn rọ ma rho kparobọ rẹ avwanre  vwori.” c Diesorọ a vwọ ta ọtiọyen? Roro kpahen udje nana. Wọ da guọnọ nẹ ohwo rhi soseri kẹ wẹ vwevunrẹ aguare, wọ cha sane ohwo ru wọ nabọ vughe ru wọ je vwẹroso rẹ ihwo se se ota rọyen gbuyota fikirẹ uruemu ro vwori. Jihova vwọ jẹ avwanre reyọ nẹ a dia Iseri rọyen na, ọyena djephia nẹ ọ nabọ riẹn je vwẹroso avwanre nẹ a cha vuẹ ihwo efa nẹ ọyen ọvo yen Ọghẹnẹ rẹ uyota na. Okpọghọ yen Jihova bru phiyọ avwanre oma rọ vwọ tanẹ avwanre dia Iseri rọyen. Ọtiọyena, kẹ avwanre reyọ kuphẹn kuphẹn ro rhiephiyọ vwọ vuẹ ihwo efa kpahen odẹ rọyen ji djephia nẹ efian na eje re mu banre odẹ rọyen na dia uyotaa. E de ru ọtiọyen, jẹ avwanre ruẹ nene odẹ na Iseri ri Jihova!​​—⁠Un 83:18; Ro 10:​13-15.

AVWANRE CHE GHWOGHWO OKIEJE BẸSIẸ OBA NA KI TE

14. Die yen avwanre rhẹro rọyen vwẹ obaro na?

¹⁴ Oma vwerhen avwanre e vwo rhẹro rẹ obo re cha phia vwẹ obaro na! Womarẹ ukẹcha ri Jihova avwanre rhẹro nẹ ihwo buebun cha vwomaba avwanre tavwen ukpokpogho rode na ke tonphiyọ. Vwọba, oma je vwerhen avwanre nẹ a je sa mrẹ ihwo evo ri che nẹ akpọ Eshu nana rhe, rhe ­vwomaba avwanre vwo jiri Jihova vwẹ ọke rọ ma bẹn kparobọ vwẹ akpeyeren rẹ ihworakpọ​—rọ dia ukpokpogho rode na!​—Iru 13:48.

15-16. Die yen avwanre che rhe ruẹ, kẹ rhi te ọke vọ?

¹⁵ Ẹkẹvuọvo, avwanre vwo owian rẹ avwanre cha wian. Avwanre vwo uphẹn re vwo vwobọ vwẹ iruo nana ra cha vwanriẹn ọfaa na​—rọ dia iruo aghwoghwo rẹ Uvie rẹ Ọghẹnẹ vwẹ akpọ na eje. Vwẹ ọke vuọvo na, ofori nẹ e si ihwo erhọ ọkieje kpahen obo re cha phia kẹrẹkpẹ. Ofori nẹ ihwo riẹn nẹ oba rẹ akpọ umwemwu nana siẹkẹrẹ re. Ọtiọyena, ọke ẹdjọeguo na de te, kẹ ayen cha riẹn nẹ ovuẹ rẹ avwanre ghwoghwo na obọ ri Jihova yen o nurhe.​—Izi 38:23.

¹⁶ Ọtiọyena, die yen avwanre brorhiẹn re vwo ru? E jẹ ẹguọnọ rẹ iyẹnrẹn esiri na, ẹguọno rẹ ihwo, ma rho ẹguọnọ rẹ avwanre vwo kpahen Jihova vẹ odẹ rọyen mu avwanre vwo ghwogwho ọkieje vẹ oruru kugbe okpakpa bẹsiẹ Jihova vwọ tanẹ, “O te re!”