IKPE evo re wanre, iniọvo eya erha wian kugbe vwẹ ọrhoma urhie rẹ omokere ọvo re se Sangir Besar vwẹ Indonesia. A nabọ riẹn ayen phiyọ ihwo re cha ihwo efa uko vwo vwo ẹruọ ri Baibol na vwẹ omokere na. Vwọ vrẹ iruo rẹ aghwoghwo na, ayen je wian owian ọfa vwẹ etiyin.

Ẹsosuọ, ayen yan ro ame na ra guọnọ ikuta ji mu ayen cha orhoma rẹ abadi na. Ikuta na evo rho te ibọrọ. Ayen de ru ọyena nu, kẹ ayen chidia emekpeti ra vwẹ urhe ru je vwẹ ihama vwo kporo ikuta na ibribro. Ọyena da wan nu, kẹ ayen tọrọ ibiukuta na phiyọ ikoroba, mu ayen kpo egenege rẹ ayen dia ji kru ibiukuta na phiyọ ikpu ride re se mu phiyọ itrọku je reyọ ibiukuta na vwọba ru idjerhe.

Ọvo usun re iniọvo eya nana yen Hulda. Ẹdia rọyen nẹrhẹ ọ sa ghwọrọ ọke buebun vwẹ owian na vrẹ ihwo efa re wian owian nana. Ọke buebun na ọ reyọ igho rọ mrẹ na vwọ vwẹrote ọdavwẹ ri kẹdi kẹdẹ rẹ orua rọyen. Vwọ vrẹ ẹroevwote rẹ orua rọyen, ọ je guọnọ ru orọnvwọn ọfa. Ọ guọnọ dẹ ifonu rere ọ sa vwọ reyọ aplikeshọni ri JW Library^® vwo ruiruo. Hulda riẹnre nẹ ividio vẹ erọnvwọn efa rehẹ aplikeshọni na sa cha ọyen uko vwo ru yovwinphiyọ vwẹ iruo rẹ aghwoghwo rọyen je nẹrhẹ o vwo ẹruọ ri Baibol na phiyọ.

Hulda wian inọke ivẹ kurhiọke kurhiọke vwẹ emeranvwe ọvo gbe ubro, rọ vwọ teyen ikuta ra sa ghwẹ vọn imitrọku ọvo. Ukuotọ rọyen, o de rhi koko igho rọ sa vwọ dẹ ifonu na.

Hulda da ta: “Dede nẹ oma ghwọrọ ovwẹ, me je wonma fikirẹ ikuta ẹteyọn na, jẹ oma vwerhen ovwẹ re me sa vwọ reyọ ifonu na vwọ cha oma mẹ uko, vwo ruẹ yovwẹnphiyọ vwẹ iruo rẹ aghwoghwo na, je reyọ vwo muegbe rẹ uyono. Ọtiọyena, me gbe karophiyọ ọmiaovwẹ na ọfa-a.” Ọ je tanẹ, ifonu na cha ọyen uko vwọ vwomaba iniọvo na vwẹ uyono vẹ iruo rẹ aghwoghwo na womarẹ intanẹti ọke rẹ ọga rẹ akpọeje na vwọ tonphiyọ obọ. Oma vwerhen avwanre kẹ Hulda nẹ ọ sa yanmu ẹkẹn ro bru kẹ oma na.