1. Ovuẹ vọ yen ọmraro Aizaya vuẹ ihwo rẹ Izrẹl?

 ỌMRARO Aizaya djisẹ ri Jihova kerẹ “Ọghẹnẹ rẹ uyota na.” Ota na “uyota” mudiaphiyọ “isẹ.” (Aiz 65:16) “Isẹ” mudiaphiyọ “e jẹ ọ dia ọtiọyen,” yẹrẹ “o muẹro.” A da reyọ ota na “isẹ” vwo ruiruo vwẹ Baibol na siẹrẹ a da ta ota kpahen Jihova vẹ Jesu, ọyen imuẹro nẹ oborẹ a ta ota kpahan na uyota. Ọtiọyena, ovuẹ rẹ Aizaya vwọ kẹ ihwo rẹ Izrẹl phẹnre: A sa vwẹroso obo ri Jihova tare ọkieje. Jihova dje ọnana phia womarẹ o vwo ruẹ ive rọyen ejobi gba.

2. Diesorọ avwanre sa vwọ vwẹroso ive ri Jihova kpahen obaro na, kẹ enọ vọ yen a cha fuẹrẹn?

² Avwanre je sa vwẹroso ive ri Jihova ri shekpahen obaro na? Omarẹ ikpe 800 a vwọ mrẹ ọke rẹ Aizaya nu, ọyinkọn Pọl de dje oboresorọ ra vwọ vwẹroso ive rẹ Ọghẹnẹ ọkieje. Ọ da ta: ‘Ọghẹnẹ che se gun efia-an.’ (Hib 6:18) Kirobo rẹ omamọ ame vẹ ame rẹ ughweri che se nẹ urhie ọvo rhe ye-e, ọtiọyen yen Jihova rọ dia Esiri rẹ uyota na che se gun efia-an. Ọtiọyena, avwanre sa vwẹroso obo rọ tare eje karekare, ji te ive rọyen ri shekpahen obaro na. Vwẹ uyono nana, a cha fuẹrẹn enọ nana: Die yen Jihova veri nẹ ọ cha vwọ kẹ avwanre vwẹ obaro na? Kẹ imuẹro vọ yen ọ vwọ kẹ avwanre nẹ ive rọyen che rugba?

3. (a) Ive vọ yen idibo rẹ Ọghẹnẹ vwo omavwerhovwẹn kpahen? (Ẹvwọphia 21:​3, 4) (b) Die yen ihwo evo ta siẹrẹ avwanre da vuẹ ayen kpahen ive nana?

³ Vwẹ akpọneje, idibo rẹ Ọghẹnẹ vwo omavwerhovwẹn  kpahen ive ra cha fuẹrẹn na. (Se Ẹvwọphia 21:​3, 4.) Jihova veri nẹ ọke cha “ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a.” Buebun rẹ avwanre reyọ ẹkpo ri Baibol nana rọ vwerhoma na vwo ghwoghwota kẹ ihwo efa kpahan oborẹ akpeyeren cha dia vwẹ Iparadaisi. Die yen ihwo evo ta siẹrẹ avwanre da vuẹ ayen kpahen ive nana? Ayen sa tanẹ, “Ovuẹ na vwerhoma, ẹkẹvuọvo ọ dia uyota-a.”   

4. (a) Die yen Jihova riẹnre rọ je ta phiyotọ? (b) Vwọ vrẹ ivẹ ri Jihova veri, die ọfa yen oruru?

⁴ Vwọrẹ uyota, ọke rọ vwọ vuẹ ọyinkọn Pọl nẹ o si oborẹ akpeyeren cha dia vwẹ Iparadaisi phiyotọ, Jihova riẹnre nẹ avwanre cha vuẹ ihwo efa kpahọn siẹrẹ e de ghwoghwo ovuẹ rẹ Uvie na. Jihova je riẹn nẹ ihwo buebun cha mrẹ bẹnbẹn rẹ ayen vwo se “imu ekpokpọ” na gbuyota. (Aiz 42:9; 60:2; 2Kọ 4:​3, 4) Mavọ yen a sa vwọ vwẹ imuẹro kẹ oma avwanre vẹ ihwo efa nẹ ebruphiyọ ra ta ota kpahen vwẹ Ẹvwọphia 21:​3, 4 na che rugba? Ọ dia Jihova di ve ive nana rọ vwerhoma na ọvo-o, ẹkẹvuọvo ọ je kẹ avwanre imuẹro rọ sa nẹrhẹ a vwẹrosuọ. Imuẹro vọ yen ọ vwọ kẹ avwanre?

5. Ẹkpo ri Baibol vọ yen nẹrhẹ avwanre vwẹroso ive rẹ Ọghẹnẹ, kẹ die yen ẹkpo ri Baibol na tare?

⁵ O vwo oboresorọ avwanre vwọ vwẹroso ive ri Jihova ri shekpahen Iparadaisi na vwẹ ẹkpo ri Baibol rọhẹ obotọ na. Baibol na de se: “Ohwo ro chidia ekete na da tanẹ: “Nighere! Mi ruẹ erọnvwọn eje phiyọ ekpokpọ.” Ọ da je tanẹ: “Si, kidie eta nana uyota, a sa vwẹroso ayen.” Ọ da ta kẹ vwẹ nẹ: “E phia re! Mẹvwẹ yen Alfa kugbe Omẹga na, ọtonphiyọ kugbe oba na.’”​—Ẹvw 21:​5, 6a.

6. Diesorọ eta rehẹ Ẹvwọphia 21:​5, 6 vwo ru ẹroẹvwọsuọ rẹ avwanre vwo kpahen ive rẹ Ọghẹnẹ ganphiyọ?

⁶ Diesorọ awọreta ri Baibol nana vwọ nẹrhẹ ẹroẹvwọsuọ rẹ avwanre vwo kpahen ive rẹ Ọghẹnẹ ganphiyọ? Ọbe ri Revelation Climax ta eta nana kpahen awọreta ri Baibol na: “Kọ ghwa họhọ nẹ Jihova vwẹ imuẹro kẹ ihworakpọ yẹrẹ ghwobọphiyọ ọbe kẹ ayen kpahen ebruphiyọ re cha vwẹ obaro.” b E si ive rẹ Ọghẹnẹ kugbe obo rọ tare nẹ ọyen che ru phiyọ Ẹvwọphia 21:​3, 4. Ẹkẹvuọvo, vwẹ awọreta 5 kugbe 6, Jihova da ghwobọphiyọ kirobo ra sa ta, rọ kẹ avwanre imuẹro nẹ ive rọyen che rugba. Ọtiọyena, e jẹ a frẹkotọ roro kpahen eta ri Jihova vwo ruiruo.

7. Ono yen ta eta rehẹ Ẹvwọphia 21:​5, kẹ diesorọ ọ vwọ dia obo re ghanre?

⁷ Eta rẹ imuẹro rẹ Ọghẹnẹ kẹ avwanre vwẹ owọ rẹ iyorin tonphiyọ vẹ eta nana: “Ohwo ro chidia ekete na da tanẹ.” (Ẹvw 21:5a) Eta nana ghanre kidie ọnana ọvo usun rẹ eta erha vwẹ evunrẹ ọbe Ẹvwọphia ri nẹ unu ri Jihova rhe. Ọtiọyena, ọ dia amakashe ro vwo ẹgba yẹrẹ Jesu ra rhọnvwọn nushi rhe yen vwẹ imuẹro nana kẹ avwanre-e, ẹkẹvuọvo Jihova komobọ! Eta rẹ imuẹro nana nẹrhẹ avwanre vwẹroso eta efa rọ tare. Diesorọ ọ vwọ dia ọtiọyen? Kidie Jihova “che se gun efia-an.” (Tai 1:2) Eta yena nẹrhẹ o mu avwanre ẹro nẹ oborẹ avwanre seri vwẹ Ẹvwọphia 21:​5, 6 che rugba.

8. Die yen Jihova tare ro djerephia nẹ ive rọyen che rugba? (Aizaya 46:10)

⁸ Jihova je tanẹ, “Nighere!” (Ẹvw 21:5) A reyọ ota rẹ Grik ra fan phiyọ “nighere!” vwo  ruiruo abọ buebun vwẹ ọbe rẹ Ẹvwọphia. Ọbe ọvo ra rionbọ ra tare nẹ a reyọ ota nana vwo ruiruo rere “ohwo ro se ọbe na vwo vwo ẹruọ rẹ ota ọfa ra cha ta ota kpahen.” Die ọfa yen Ọghẹnẹ rhoma ta? Ọ tare nẹ: “Mi ruẹ erọnvwọn eje phiyọ ekpokpọ.” Vwọrẹ uyota, Jihova ta ota kpahan ewene re cha vwomaphia vwẹ obaro na. Kidie nẹ o mu ro ẹro dẹn nẹ o che ru obo ro veri na gba, kẹ ọ ghwa họhọ nẹ ive rọyen na rugba nure.​—Se Aizaya 46:10.

9. (a) Die yen ota na “ruẹ erọnvwọn eje phiyọ ekpokpọ” mudiaphiyọ? (b) Die yen cha phia kẹ “odjuvwu” awanre kugbe “akpọ” awanre na?

⁹ E jẹ a fuẹrẹn eta rehẹ Ẹvwọphia 21:5: “Ruẹ erọnvwọn eje phiyọ ekpokpọ.” Vwẹ uyovwinrota ri Baibol nana, ota na shekpahen erọnvwọn ivẹ ri Jihova che ru​—ewene kugbe ẹrhuẹrẹ. Ẹsosuọ die yen Jihova che wene? Ẹvwọphia 21:1 da ta: “Odjuvwu awanre na kugbe akpọ awanre na wanvrẹ re.” “Odjuvwu awanre na” mudiaphiyọ usuon rẹ ihworakpọ rọhẹ otọ rẹ Eshu vẹ emekashe rọyen. (Mt 4:​8, 9; 1Jọ 5:19) Kirobo ra reyerọ vwo ruiruo vwẹ Baibol na, “akpọ” na se mudiaphiyọ ihwo re dia evun rọyen. (Jẹ 11:1; Un 96:1) Ọtiọyena, “akpọ awanre na” mudiaphiyọ ihwo umwemwu ri yerẹn vwẹ otorakpọ na nonẹna. Ọ dianẹ Jihova che ru ewene yẹrẹ rhoma rhuẹrẹ “odjuvwu” kugbe “akpọ” awanre re herọ na-a; ukperẹ ọtiọyen, ọ cha ghwọrọ ayen no karekare. Ọ cha vwẹ “odjuvwu kpokpọ kugbe akpọ kpokpọ” vwo wene odjuvwu awanre kugbe akpọ awanre na​—rọ dia usuon kpokpọ rẹ evwata rẹ ihwo cha dia.

10. Die yen Jihova che ru phiyọ ekpokpọ?

¹⁰ Vwẹ Ẹvwọphia 21:​5, avwanre ji se kpahen erọnvwọn ri Jihova tare nẹ ọyen che ru phiyọ ekpokpọ. Jokaphiyọ nẹ, ọ dia Jihova tare nẹ, “Mi ruẹ erọnvwọn ekpokpọ-ọ.” Ukperẹ ọtiọyen ọ tare nẹ, “Mi ruẹ erọnvwọn eje phiyọ ekpokpọ.” Jihova che ru akpọ na kugbe ihworakpọ phiyọ ekpokpọ womarẹ ayen cha vwọ dia gbagba. Kirobo rẹ Aizaya mraro rọyen phiyotọ, akpọneje che hirhephiyọ ogba oyoyovwin, kọyen ọ cha dia kerẹ ogba rẹ Idẹn. O che ru avwanre phiyọ ihwo ekpokpọ womarẹ o che vwo sivwin avwanre ọvuọvo. O che sivwin ikpono, irhuẹro, idierhọ, ọ me je kpare ihwo ri ghwuru vwo nushi.​—Aiz 25:8; 35:​1-7.

11. Die yen Jihova vuẹ Jọn nẹ o ru, kẹ diesorọ?

¹¹ Die ọfa yen Ọghẹnẹ tare rọ nẹrhẹ o mu avwanre ẹro nẹ a sa vwẹrosuọ? Jihova vuẹ Jọn nẹ: “Si, kidie eta nana uyota, a sa vwẹroso ayen.” (Ẹvw 21:5) Ọ dia Jihova de vuẹ Jọn nẹ o “si” ọvo-o. Ọ vuẹrẹ oboresorọ. Ọ tare nẹ: “Kidie eta nana uyota, a sa vwẹroso ayen”​—o mudiaphiyọ nẹ eta rẹ Ọghẹnẹ uyota, e je pha gbagba. Oma vwerhen avwanre nẹ Jọn nyupho ri Jihova ro vwo “si” obo ra vuẹrẹ phiyotọ. Womarẹ ọnana, kẹ avwanre se se kpahen ive rẹ akpọ ọkpokpọ rẹ Ọghẹnẹ veri ji roro kokodo kpahen ebruphiyọ re hẹrhẹ avwanre vwẹ obaro na.

12. Diesorọ Jihova vwọ tane: “E phia re!”

¹² Ota ọfa vọ yen Ọghẹnẹ je ta? “E phia re!” (Ẹvw 21:6) Jihova ta kerẹsiẹ ra da mrẹ nẹ erọnvwọn eje ro djunute kpahen Iparadaisi ro ve phiyọ na phia nure. Ọ ta ota rọyen na vẹ imuẹro kidie o vwo orọnvwọn vuọvo rọ cha dobọ rọyen ji ro vwo jẹ ive rọyen na eruo gba-a. Jihova ta ota ọfa rọ nẹrhẹ o mu avwanre ẹro nẹ ive rọyen na che rugba. Die yen ọ tare?

13. Diesorọ Jihova vwọ tanẹ: Ọ yehẹ “Alfa kugbe Omẹga na”?

¹³ Kirobo ra ta ota kpahen siẹvure, abọ erha yen Jihova ta ota kẹ Jọn vwẹ emramrẹ rọyen na. (Ẹvw 1:8; 21:​5, 6; 22:13) Vwẹ ẹdia nana ọvuọvo, Jihova tare nẹ: “Mẹvwẹ yen Alfa kugbe Omẹga na.” Ota na alfa yen ton ibiẹbe ri Grik na phiyọ, ota na omẹga de rhe kuophiyọ. Rọ vwọ tanẹ ọyen yen “Alfa kugbe Omẹga na,” Jihova jẹ avwanre riẹn nẹ ọyen da ton orọnvwọn phiyọ, o che ruo re.

14. (a) Djudje rẹ obo ro mudiaphiyọ ri Jihova vwọ tanẹ ọ yehẹ “Alfa” kugbe “Omẹga” na. (b) Imuẹro vọ yehẹ Jẹnẹsis 2:​1-3?

¹⁴ Jihova vwọ ma Adam vẹ Ivi nu, Ọ da vuẹ ayen ọhọre rọyen vwọ kẹ ihworakpọ kugbe otọrakpọ na. Baibol na da ta: “Ọghẹnẹ da ta kẹ ayen, We vwiẹ ri we bun phihọ, re wa vọn akpọ na, ru we phio kparobọ.’” (Jẹ 1:28) Rọ ghwa vwọ ta oborẹ ọhọre rọyen mudiaphiyọ ẹsosuọ, ọ ghwa họhọ nẹ ọ tanẹ ọ yehẹ “Alfa” na. Ọke cha rẹ emọ rẹ Adam vẹ Ivi ri nyẹme re je dia ihwo re gbare cha vwọ vọn otọrakpọ na ji ruo hirhephiyọ iparadaisi. Ọke yena de rhi te re, ko che ghwe mudiaphiyọ nẹ Jihova tanẹ ọ yehẹ “Omẹga” na. Rọ vwọ ma erọnvwọn rehẹ “odjuvwu vẹ akpọ kugbe obo re vọnrọ ejobi” nu, ọ da ta ota ro djerephia nẹ o che ru ọhọre rọyen gba. A mrẹ ota nana vwẹ Jẹnẹsis 2:​1-3. (Se.) Jihova tare nẹ ẹdẹ rẹ ighwrẹn na ọyen ẹdẹ ọfuanfon vwọ kẹ ọyen. Die yen ọnana mudiaphiyọ? Jihova kẹ avwanre imuẹro nẹ o vwo emu vuọvo rọ cha dobọ rọyen ji ro vwo jẹ ọhọre rọyen eruo gba kẹ emọ rẹ ihworakpọ kugbe otọrakpọ vwẹ oba rẹ ẹdẹ rẹ ighwrẹn na-a.

15. Die yen sa nẹrhẹ ọ họhọ nẹ Eshu gbowọphiyọ ọhọre rẹ Ọghẹnẹ vwọ kẹ ihworakpọ?

¹⁵ Adam vẹ Ivi vwo gbevwọso Ọghẹnẹ nu,  ayen da rhe dia irumwemwu je nẹrhẹ emọ rayen riuku rẹ umwemwu vẹ ughwu mie ayen. (Ro 5:12) Ọtiọyena, kọ ghwa họhọ nẹ Eshu gbowọphiyọ ọhọre ri Jihova rẹ ihworakpọ re gbare ri nyẹme vwọ dia otọrakpọ na. Eshu se gbowọphiyọ ọhọre ri Jihova ro vwo jẹ eruo gba? Eshu se roro nẹ Jihova rhe che se ru ive rọyen gba-a. Ọ sa dianẹ o rorori nẹ Ọghẹnẹ che hwe Adam vẹ Ivi ọ me ma aye gbe ọshare ọfa re gbare rere o vwo ru ọhọre Rọyen kẹ ihworakpọ gba. Ọ da dianẹ Ọghẹnẹ ru ọtiọyen jovwo, Idẹbono rha tanẹ Ọghẹnẹ ọvwọrefian. Diesorọ? Kidie kirobo ra niyẹrẹn rọyen vwẹ Jẹnẹsis 1:​28, Jihova vuẹ Adam vẹ Ivi jovwo nẹ emọ rayen cha dia otọrakpọ na.

16. Die yen sa nẹrhẹ Eshu tanẹ Jihova che se ru obo ro veri-i?

¹⁶ Die ọfa yen Eshu rhe roro nẹ Ọghẹnẹ che ru? Ọ sa dianẹ Eshu rorori nẹ Jihova cha vwẹ uphẹn kẹ Adam vẹ Ivi nẹ ayen vwiẹ emọ, jẹ emọ na cha dia ihwo re gbare-e. (Agh 7:20; Ro 3:23) Aphro herọ-ọ nẹ, ọ da dia ọtiọyen ọ phia wan, Idẹbono kọ rha sa tanẹ Ọghẹnẹ ọvwọrefian. Diesorọ? Kidie ọnana che ru orugba rẹ ọhọre rẹ Ọghẹnẹ-ẹ, rẹ emo rẹ Adam vẹ Ivi re gbare ri ji nyẹme vwọ dia Iparadaisi vwẹ otọrakpọ na.

17. Idjerhe vọ yen Jihova wan rhuẹrẹ ẹvwọsuọ rẹ Eshu vẹ ọ rẹ ihworakpọ rẹsosuọ na phiyọ, kẹ die yen nẹ obuko rọyen rhe? (Ni uhoho na.)

¹⁷ Obo ri Jihova kpahenphiyọ ẹvwọsuọ rẹ Eshu kugbe ihworakpọ rẹsosuọ na gbe Eshu unu mamọ. (Un 92:5) Jihova vwo djephia nẹ ọyen ohwo rẹ uyota, ọ da vwẹ uphẹn kẹ Adam vẹ Ivi nẹ ayen vwiẹ emọ. Womarẹ ọnana, Jihova ru ive rọyen gba, o rhe shefia-a. O siobọnu ‘ọmọ’ rọyen ro che sivwin emọ rẹ Adam vẹ Ivi ri nyupho rọyen. (Jẹ 3:15; 22:18) Ọrhuẹrẹphiyotọ rẹ ọtanhirhe ri Jihova ruru na gbe Eshu unu mamọ! Diesorọ? Kidie ọrhuẹrẹphiyotọ nana djerephia nẹ Jihova vwo ẹguọnọ rẹ avwanre mamọ. (Mt 20:28; Jọ 3:16) Eshu vwo ẹguọnọ-ọ, ọ romobọ rọyen ọvo yen ọ guọnọ. Ọtiọyena, die yen cha phia fikirẹ ọrhuẹrẹphiyotọ rẹ ọtanhirhe ri kristi na? Vwẹ oba rẹ ẹgbukpe uriorin ọvo ri Kristi na, emọ rẹ Adam vẹ Ivi re gbare ri ji nyupho rẹ Ọghẹnẹ cha dia iparadaisi vwẹ otọrakpọ na​—kirobo rẹ ọhọre ri Jihova hepha notọrhe. Ọke yena, Jihova kọ cha ta kirobo rọ hepha dẹn nẹ ọyehẹ “Omẹga” na.

18. Imuẹro erha vọ yen Ọghẹnẹ vwọ kẹ avwanre? (Ni ekpeti na “ Erọnvwọn Erha re Sorọ ra Vwọ Vwẹroso Ive ri Jihova.”)

¹⁸ Vwo nene obo ra ta ota kpahan cha re na, imuẹro vọ yen avwanre sa vwọ kẹ ihwo ri vwo ewẹn ivivẹ nẹ ive rẹ Ọghẹnẹ kpahen Iparadaisi na che rugba? Ẹsosuọ, Jihova komobọ yen ve ive na. Ọbe rẹ Evwọphia da ta: “Ohwo ro chidia ekete na da tanẹ: “Nighere! Mi ruẹ erọnvwọn eje phiyọ ekpokpọ.’” O vwo aghwanre, ẹgba kugbe owenvwe ro vwo ru orugba rẹ ive rọyen. Ọrivẹ, vwọ kẹ Jihova, orugba rẹ ive rọyen eje muẹro kerẹsiẹ ra da mrẹ nẹ i rugba nure. Ọnana yen sorọ rọ vwọ tanẹ: “Eta nana uyota, a sa vwẹroso ayen. . . . E phia re!” Ọrerha, Jihova da ton orọnvwọn phiyọ o ruo re, kọyensorọ rọ vwọ ta: “Mẹvwẹ yen Alfa kugbe Omẹga na.” Jihova che djephia nẹ Eshu ọyen ọvwọrofian, ọ cha sa dobọ rẹ ọhọre ri Jihova ji-i.

19. Ihwo da mrẹ bẹnbẹn rẹ ayen vwo se ive rẹ Iparadaisi rẹ Ọghẹnẹ na gbuyota, die yen wo se ru?

¹⁹ Karophiyọ nẹ kọke kọke wọ da vuẹ ihwo kpahan imuẹro rẹ Ọghẹnẹ vwọ kẹ avwanre vwẹ iruo rẹ aghwoghwo na, ẹroẹvwọsuọ ru wo vwo kpahen ive ri Jihova kọ cha rha ganphiyọ. Ọtiọyena, ọke ọfa wo de se ive rẹ Ọghẹnẹ rọhẹ Ẹvwọphia 21:4 vwọ kẹ ohwo, ohwo da tanẹ, “Ọnana cha sa phia-a,” die yen wo se ru? Wo se se owọ 5 vẹ ọ rẹ 6 ji djefiotọ kẹ. Dje kẹ ohwo na nẹ Jihova yen vwẹ imuẹro nana vwọ kẹ avwanre, imuẹro re se vwo dje ọbe rọ ghwobọphiyọ.​—Aiz 65:16.