Jihova durhie avwanre nẹ a vuẹ kpahen koka koka rẹ ẹnwan ro kpokpo avwanre ẹwẹn. (Une rẹ Ejiro 55:22) Wo no nẹ ebẹnbẹn na hanvwe nọ yẹrẹ ọ rho nẹ obo ra nẹrhovwo kpahe-en. Obo ra cha nẹrhovwo kpahen na da ghanre kẹ avwanre, kọyen ọ je ghanre kẹ Jihova. Avwanre da guọnọ vwo ufuoma rẹ ẹwẹn, ko fori nẹ a nẹrhovwo rhe Jihova.​—Filipae 4:​6, 7.

E de nene ọga iroro muabọ, e se no nẹ avwanre ọvo yen herọ. Ọ dia ọkieje yen ihwo efa che vwo vwo ẹruọ rẹ oborẹ avwanre hirharokuẹ-ẹ. (Isẹ 14:10) Ẹkẹvuọvo, e de rhievun vuẹ Ọghẹnẹ vwẹ ẹrhovwo kpahen oborẹ oma ruẹ avwanre, o che vwo ẹruọ rẹ avwanre ji kerhọ kẹ avwanre ọkieje. Jihova mrẹ avwanre, ọ riẹn ọmiaovwẹ vẹ egbabọse rẹ avwanre hirharokuẹ, ọ je guọnọ nẹ avwanre vuẹ ọyen vwẹ ẹrhovwo erọnvwọn eje ri kpokpo avwanre ẹwẹn.​—2 Ikun Rivie 6:​29, 30.

A vwọ ta ota kẹ Jihova vwẹ ẹrhovwo, ruẹ imuẹro rẹ avwanre ganphiyọ nẹ o vwo ọdavwẹ rẹ avwanre. Ọnana se mu avwanre vwọ ta oborẹ ọbuine na tare vwẹ ẹrhovwo: “Wọ mrẹ oma ẹlagha mẹ, wọ nabọ vughe ọdjarhe me.” (Une rẹ Ejiro 31:7) Avwanre vwọ riẹn nẹ Jihova vwo oniso rẹ oborẹ avwanre hirharokuẹ na, ọ sa chọn avwanre uko vwo yerin ghene ebẹnbẹn sansan re hirharokuẹ. Ẹkẹvuọvo, ọ dia ebẹnbẹn rẹ avwanre ọvo yen o di vwo oniso rọye-en. O vwo ẹruọ rẹ oborẹ avwanre hirharokuẹ vrẹ kohwo kohwo, ọ chọn avwanre uko vwọ mrẹ uchebro vẹ ọbọngan, womarẹ Baibol na.