Ọga Iroro rọ Họnra Akpọeje
“Ọkieje yen me vwọ ro ẹnwan ọ da tobọ dianẹ mi chidia ọromobọ mẹ vwẹ uvun dede.”
“Me rhe mrẹvughe nẹ ọke rẹ oma de mu vwe vwerhan, omaemuophiyọ yen che nene.”
“Dede nẹ me davwẹngba vwo nenesi rẹ obo re cha phia vwẹ ẹdẹ vuọvo, jẹ ẹnwan rẹ erọnvwọn efa ri mi che ru vwẹ ẹdẹ buebun me djẹ ro ẹwẹn mẹ siẹvuọvo.”
Enana eta rẹ ihwo ri nene ọga iroro muabọ ta. Ọnana phia kẹ wẹ yẹrẹ ohwo rẹ wo vwo ẹguọnọ kpahen jovwo re?
Jẹ o muwẹro nẹ ọ dia owẹ ọvo yen herọ-ọ. Nonẹna, ihwo buebun nene ọga iroro muabọ tẹ ọ dia ọromobọ rayen yẹrẹ ihwo rẹ ayen vwo ẹguọnọ kpahen.
Aphro herọ-ọ, avwanre yerẹn vwẹ “ẹdẹ ebrabra” rọ bẹn eyeren rọ sua ebẹnbẹn buebun kẹ avwanre. (2 Timoti 3:1) Ehiahiẹ ọvo djere nẹ vwẹ akpọneje, omarẹ ọvo vwẹ usun rẹ ihwo ẹrenren ji nene ọga iroro muabọ. Vwẹ ukpe ri 2020, ọga ri COVID-19 nẹrhẹ ẹnwan rẹ ihwo vwẹ omarẹ ẹkẹn 26 vwọ gan vrẹ ọ rẹ 2019, ọ je nẹrhẹ ofudjevwe ọgangan rẹ ihwo rhiẹromrẹ vwẹ omarẹ ẹkẹn 28 vwọ gan vrẹ ọ rẹ 2019.
Ọyen obo re ghanre a vwọ riẹn uchunu rẹ ihwo ri nene ẹnwan vẹ ofudjevwe muabọ nonẹna. Ẹkẹvuọvo obo re ma ghanre kẹ, wọ vwọ riẹn oborẹ wẹ komobọ vẹ ihwo ru wo vwo ẹguọnọ kpahen se vwo vwo omakpokpọ.
Die yen ọga iroro?
Iroro rẹ ohwo de shephiyọ, oma ko fuo, ko ji se ruẹ erọnvwọn vwẹ idjerhe abavo. Wo se yerin ghene ebẹnbẹn ri kẹdẹ kẹdẹ, muomaphiyọ owian wẹn vọnvọn je mrẹ evunvọnvwẹ vwẹ akpeyeren.
Ọga rẹ iroro . . .
-
DIA ovwiẹrẹ romobọ yen suọ-ọ.
-
ỌYEN ọga rọ so omaemuophiyọ, rọ rhẹriẹ iroro vẹ uruemu rẹ ohwo ji suẹn oborẹ oma ruẹ ohwo.
-
Sa nẹrhẹ ọ bẹn re vwo mu ugbeyan yẹrẹ sẹro rẹ oyerinkugbe vẹ ihwo efa. Ọ je sa nẹrhẹ ọ bẹn re vwo yerin akpọ ri kẹdẹ kẹdẹ.
-
Sa phia kẹ ihwo rẹ edje sansan, o toro ẹkuruemu, ohọroma, ephẹrẹ, ẹga rẹ ohwo ra, asan rẹ ohwo yono ẹbe te yẹrẹ uche igho ro vwori-i.
Ukẹcha vwọ kẹ ihwo ri vwo ọga iroro
Ọ da dianẹ owẹ yẹrẹ ohwo ọvo ru wo vwo ẹguọnọ kpahen vwo oniso rẹ ewene rode vwẹ uruemu, ovwerhẹn, oborẹ owẹ yẹrẹ ohwo na riemu wan, ẹnwan yẹrẹ muomaphiyọ, kọyen ovwan guọnọ ukẹcha rẹ ohwo rọ tẹn ona rẹ omaesivwo rere ovwan sa vwọ riẹn obo re ghene so ewene na vẹ oborẹ ovwan sa vwọ rhuẹrẹ ebẹnbẹn na phiyọ. Ẹkẹvuọvo, tivọ wọ da sa mrẹ ukẹcha?
Jesu Kristi rọ dia ọshare ro me vwo aghwanre ro yerin da ta: “Ihwo rẹ oma rẹ ayen ganre guọnọ ọbo-o, jokpa rẹ otu rẹ oma da.” (Matiu 9:12) Ihwo ri nene ega muabọ re guọnọ ukẹcha rẹ ihwo re tẹn ona rẹ omaesivwo re je reyọ ihuvwun, se si ega na kpotọ. Ọnana kọ sa chọn ayen uko vwo vwo omavwerhovwẹn vwẹ akpeyeren. Ọyen emu rẹ aghwanre rẹ ihwo tiọyena vwọ guọnọ omaesivwo kpakpata siẹrẹ ọga na da braphiyọ yẹrẹ krotọ ganọ. a
Dede nẹ Baibol na dia ọbe rẹ omaesivwo-o, jẹ ovuẹ rehẹ evun rọyen se fierere kẹ avwanre. Avwanre jiriro kẹ wẹ nẹ wo se iyovwinreta re vwọ kpahen ọnana re ta ota kpahen oborẹ Baibol na sa vwọ chọn avwanre uko vwo yerin ghene ọga iroro.
a Uwevwin Orhẹrẹ na jiri oka rẹ omaesivwo vuọvo-o. E jẹ ohwo ọvuọvo nabọ frẹkotọ fuẹrẹn oka rẹ ona rẹ omaesivwo ro che rhiabọreyọ tavwen o ki brorhiẹn.
Wọ je sa Fuẹrẹn
ESSENTIAL BIBLE TEACHINGS
Diesorọ Ọghẹnẹ Vwọ Vwẹ Uphẹn kẹ Ojaẹriọ?
Ihwo buebun nọ kpahen oboresorọ rẹ akpọ na vọn vẹ utuoma kugbe ojaẹriọ. Ẹkpahọnphiyọ rẹ Baibol na sa kẹ ohwo onẹrhẹvwe vẹ omavwerhovwẹn.
OVWAN RA RHẸRẸ!
Ebẹnbẹn ri Djobọte Iroro rẹ Ighene Rhoma Buẹnphiyọ—Die Yen Baibol na ta Kpahọn?
Baibol na vwẹ ukẹcha kẹ ighene ri hirharokuẹ ebẹnbẹn ri djobọte iroro rayen.
KPAHEN AVWANRE
Nokpẹn rẹ Uyono ri Baibol
Ovwan ta ota kpahen onọ ri Baibol ọvo, yẹrẹ riẹn emu efa kpahen Iseri ri Jihova.
