4 | Baibol na Vwẹ Uchebro rẹ Aghwanre Phia
BAIBOL NA DA TA: “Ọbe ọfuanfon na ejobi . . . vọnre vẹ erere.”—2 TIMOTI 3:16.
Oborẹ Ọyena Mudiaphiyọ
Baibol na dia ọbe rọ vwẹ odjekẹ phia kpahan omaesivwo-o. Ẹkẹvuọvo, o vwo uchebro rọ sa vwẹ ukẹcha kẹ ohwo ro nene ọga rẹ iroro muabọ. Roro kpahen idje evo.
Ukẹcha rẹ Ọnana sa Vwọphia
“Ihwo rẹ oma rẹ ayen ganre guọnọ ọbo-o, jokpa rẹ otu rẹ oma da.”—MATIU 9:12.
Baibol na rhọnvwere nẹ avwanre sa guọnọ ukẹcha rẹ omaesivwo. Ihwo buebun ri vwo ọga rẹ iroro mrẹ erere womarẹ ayen vwọ nabọ riẹn kpahan ọga na ji bru idọktọ ra vwọ kẹ omaesivwo.
“Omaẹsasọ yovwin kẹ oma wẹn.”—1 TIMOTI 4:8, Contemporary English Version.
A vwọ ghwọrọ ọke vwo ruẹ erọnvwọn re cha nẹrhẹ oma rẹ ohwo sasa, sa nẹrhẹ iroro rẹ ohwo shephiyọ. Iruemu tiọyena churobọ si re vwo vwobọ vwẹ omaẹsasọ ọkieje, a vwọ re omamọ emu re sa kẹ ohwo omakpokpọ, je nabọ vwerhẹn.
“Udu sasasa yẹ omamọ rẹ uhuvwu, ẹkẹvuọvo erhi ro muomaphihọ nẹrhẹ ibeku rẹ oma ya muẹ.”—ISẸ 17:22.
E vwo se ẹkpo ri Baibol re kẹ ohwo uduephiophiyawọ je vwọtua obo ra sa yanmu, sa chọn ohwo uko vwo vwo omavwerhovwẹn. Wọ da tẹnrovi
omamọ erọnvwọn re phia vwẹ akpeyeren, ji vwo imuẹro nẹ erọnvwọn che yovwin vwẹ obaro na, ọnana sa chọn wẹ uko vwo yerin ghene ebẹnbẹn rẹ ọga iroro ghwa cha.“Omaevwokpotọ ọ vẹ aghwanre gba yan.”—ISẸ 11:2.
Wọ sa mrẹvughe nẹ ọ dia erọnvwọn eje ru wo vwo vwẹ ẹwẹn nẹ wọ guọnọ ruẹ, yen owẹ komobọ se ru-u, ọtiọyena gba vwomakpotọ rhiabọreyọ ukẹcha rẹ ihwo efa. Ọ sa dianẹ igbeyan vẹ ihwo rẹ orua wẹn guọnọ vwẹ ukẹcha kẹ wẹ, ẹkẹvuọvo, ayen riẹn obo rẹ ayen che ruo wa-an. Vuẹ ayen oborẹ ayen se ru ayen sa vwọ vwẹ ukẹcha kẹ wẹ. Wo rhẹro rẹ obo re vrẹ ẹgba rayen mie aye-en, wọ me je kpẹvwẹ ayen ọkieje vwọ kẹ ukẹcha rẹ ayen vwọphia kẹ wẹ.
Oborẹ Uchebro Aghwanre rẹ Baibol na Vwọphia Vwọ Vwẹ Ukẹcha kẹ Ihwo re Muọga rẹ Iroro
“Mi niro nẹ emuọvo shechọ vwẹ oma mẹ, ọtiọyena ki mi bru idọktọ ra vwọ kẹ ukẹcha. Ọ da vuẹ vwẹ oka rẹ ọga ro ru vwe. Ọnana chọn vwẹ uko vwo vwo ẹruọ rẹ oborẹ ebẹnbẹn mẹ ghini hepha, je chọn vwẹ uko vwọ riẹn oka rẹ omaesivwo re herọ re sa nẹrhẹ oma mẹ shephiyọ.”—Nicole, a rọ họnvwọn ọga ri bipolar disorder.
“Me rhe mrẹvughe re nẹ, mi vwo se Baibol na vẹ aye mẹ, chọn vwẹ uko vwọ tuẹn ẹdẹ vuọvo phiyọ vẹ omamọ rẹ iroro. Vwẹ ẹdẹ buebun mi de nene ọga rẹ iroro mẹ muabọ, ẹkpo ri Baibol ọvo kiriguo mi phiuduphiyọ ovwẹ awọ.”—Peter, rẹ ofudjevwe ọgangan kpokpo.
“Fikirẹ omavovwẹ, ke me mrẹ bẹnbẹn re me vwọ vuẹ ihwo efa kpahen ebẹnbẹn ri mi hirharokuẹ. Ẹkẹvuọvo, ugbeyan mẹ rọ kẹrẹ ovwẹ mamọ nabọ vwo ẹruọ mẹ ji dje erorokẹ phia kẹ vwẹ. Ọ ghene chọn vwẹ uko vwọ mrẹvughe nẹ ọ dia omẹ ọvo yen herọ-ọ.”—Ji-yoo, rọ họnvwọn ọga rẹ iroro rọ djẹ emu ẹriọ.
“Baibol na chọn vwẹ uko vwọ vwẹ ẹro abavo vwo ni iruo kugbe omaerovwon. Uchebro rọyen chọn vwẹ uko vwọ riẹn obo ri mi se ru vwo nene ebẹnbẹn rẹ ọga iroro ro kpokpo uvwe ọkieje na muabọ.”—Timothy, ro nene ọga ri obsessive-compulsive disorder muabọ.
a E wene edẹ evo.