1, 2. (a) Idjerhe vọ yen Aizaya 60:22 vwo ruẹgba nonẹna? (b) Die yen a guọnọre vwẹ ukoko na asaọkiephana?

“UNUWEVWI ọvo ko hirhe phihọ ẹgborho.” (Aiz. 60:22) Eta nana ruẹgba vwẹ ẹdẹ rẹ oba nana. Vwọrẹ uyota, vwẹ ukpe rẹ ẹga rẹ 2015, ighwoghwota ri te 8,220,105 yen ruiruo rẹ Uvie na vwẹ akpọneje! Ofori nẹ ẹbẹre rọ koba rẹ aroẹmrẹ yena djobọte Inenikristi ejobi, kidie Ọsẹ avwanre rọhẹ odjuvwu yen tare nẹ, “Mẹvwẹ hẹ Ọrovwohwo na; vwẹ ọke rọye ki Mi ruo kpata kpata.” Kerẹ ihwo rehẹ evunrẹ imoto rọ djẹ kpata kpata, avwanre mrẹ ẹyan obaro rode vwẹ iruo aghwoghwo na. Die yen avwanre ruẹ kpahen ẹyan obaro nana? Avwanre davwẹngba avwanre eje vwo vwobọ vwẹ iruo na vẹ oruru kerẹ ighwoghwota rẹ Uvie na? Iniọvo buebun ghwobọphiyotọ kerẹ ọkobaro ọkieje yẹrẹ ọkobaro ubrọke. Oma je vwerhen avwanre ra vwọ mrẹ iniọvo buebun ri kpo asan ra da ma guọnọ ukẹcha yẹrẹ ri vwobọ vwẹ ẹdia efa rẹ iruo ẹga na?

² Dedena, a je guọnọ iruiruo buebun. Kukpe kukpe yen a mrẹ ikoko 2,000 kpokpọ. Ọ da dianẹ ekpako 5 yen cha dia ikoko nana ọvuọvo, kọyen idibo rowian 10,000  yen che muwan vwọ kẹ ẹdia rẹ ọkpako kukpe kukpe. Ọnana mudiaphiyọ nẹ ofori iniọvo eshare buebun vwọ yanmu iwan ra guọnọ mie idibo rowian. Vwọba, ofori nẹ avwanre eje te eya te eshare, “dje ebuo-ebuo phihọ vwẹ iruo rẹ Ọrovwohwo.”—1 Kọr. 15:58.

3, 4. Die yen ẹyan obaro rẹ ẹwẹn mudiaphiyọ kẹ wẹ?

³ Se 1 Timoti 3:1. Ubiota rẹ Grik ra fan kpo “pharhere” na mudiaphiyọ ohwo vwọ rionma rere obọ rọyen vwo te orọnvwọn. Pọl vwọ reyọ ota nana vwo ruiruo ọ da kanrunumuo nẹ ẹyan obaro rẹ ẹwẹn guọnọ ẹgbaẹdavwọn. Vwẹ ẹro roro oniọvo ọshare ro roro kpahen oborẹ erọnvwọn cha dia vwọ kẹ vwevunrẹ ukoko rọyen. Ọ sa dianẹ ọ ga kerẹ odibo rowian enẹna-a, dedena ọ riẹnre nẹ ofori nẹ o vwo iruemu rẹ Onenikristi. Ẹsosuọ, o da davwẹngba o vwo muwan kẹ odibo rowian. Ọke vwọ yanran na, o ji vwo ẹwẹn rọ vwọ ga kerẹ ọkpako. Vwẹ ẹdia ivẹ na, ọ davwẹngba ro vwo yerin mu iwan ra guọnọ mie ohwo re vwo mu ẹdia vwẹ ukoko na.

⁴ Vwẹ idjerhe vuọvo na, iniọvo ri vwo owenvwe rẹ ayen vwọ ga kerẹ ekobaro, ihwo re ga vwẹ Bẹtẹl, yẹrẹ ihwo re bọn Eguan Ruvie je davwẹngba rayen eje vwọ wian kpahen ojẹ rayen na. E jẹ a fuẹrẹn oborẹ Baibol na sa vwọ chọn avwanre uko vwọ yan obaro vwẹ ẹga rẹ uyota.

5. Idjerhe vọ yen ighene sa vwọ reyọ ẹgba rayen vwo ruiruo rẹ Uvie na?

⁵ Ighene vwo ẹgba rẹ ayen se vwo ruiruo buebun vwẹ ẹga rẹ Jihova. (Se Isẹ 20:29.) Ighene evo vwẹ Bẹtẹl wiowian vwẹ asan ra da teyẹn ẹbe. Ighene buebun vwobọ vwẹ iruo rẹ ebabọn vẹ ẹroevwote rẹ Eguan Ruvie. Oghwọrọ da phia vwẹ asan, ighene kuomakugbe iniọvo efa vwọ vwẹ ukẹcha kẹ ihwo rẹ oghwọrọ na phia kẹ. Ekobaro buebun re dia ighene ji ghwoghwo iyẹnrẹn esiri na kẹ ihwo rẹ ejajẹ rayen vẹ e rẹ ejajẹ efa.

6-8. (a) Mavọ yen eghene ọvo wene ẹro ro vwo nẹ ẹga rẹ Ọghẹnẹ, kẹ die yen nẹ obuko rọyen rhe? (b) Mavọ yen avwanre sa vwọ davwen je “mrẹ nẹ Ọrovwohwo yoma”?

⁶ Aphro herọ-ọ, avwanre riẹn ọghanrovwẹ rẹ ẹga ro nẹ otọ rẹ ẹwẹn rhe vwọ kẹ Ọghẹnẹ. Ẹkẹvuọvo, ọ da rha dianẹ wo vwo ẹwẹn rẹ oniọvo ọvo re se Aaron ke vwo vwo? Dede nẹ orua rẹ Iseri rẹ Jihova yen o nurhe, ọ tare nẹ, “Uyono ẹra vẹ iruo aghwoghwo na kẹ vwẹ omavwerhovwẹ-ẹn.” Ọ guọnọ ga Ọghẹnẹ vẹ aghọghọ, jẹ ọ rha riẹn oboresorọ oma vwo jẹ ẹvwerhọ-ọn. Die yen o ruru?

⁷ Aaron de rhi vwo uruemu ro vwo se Baibol na, ro vwo muegbe rẹ uyono, ji vwobọ vwẹ ayen. Ma rho, kọ je nẹrhovwo kọke kọke. Ẹguọnọ rọyen vwọ kẹ Jihova vwọ ganphiyọ na, ẹyan obaro rọyen kọ je rhe teyenphia. Nẹ ọke yena rhe, ọ riavwerhen rẹ iruo sansan kerẹ iruo ọkobaro, ra vwọ vwẹ ukẹcha kẹ ihwo rẹ oghwọrọ phia kẹ, vẹ re vwo ghwoghwo vwẹ ẹkuotọ ọfa. Asaọkiephana, Aaron ga kerẹ ọkpako, ọ je ga vwẹ Bẹtẹl. Ẹro vọ yen o vwo ni ojẹ rọyen na? “Me rhe ‘davwe me da mrẹ nẹ Jihova yoma.’ Fikirẹ ebruba rọyen, mi niro nẹ me riosa rọyen, ọtiọyena mi vwo ẹwẹn me vwọ vwẹ akpọ mẹ eje vwo ruiruo  rọyen vọnvọn, ọnana je hwarhiẹ ebruphiyọ efa cha.”

⁸ Ọbuine na da so: “Ayen otu re guọnọ Ọrovwohwo emu esiri sa kare aye-en.” (Se Une Rẹ Ejiro 34:8-10.) Vwọrẹ uyota, Jihova ku ihwo re ga vẹ oruru phiyotọ-ọ. Ra vwọ davwẹngba avwanre eje vwẹ iruo ẹga na, jẹ avwanre davwan, je “mrẹ nẹ Ọrovwohwo yoma.” A da vwẹ ẹga ọsoso vwọ kẹ Ọghẹnẹ, avwanre che vwo omavwerhovwẹn ra mrẹ vwo dje-e.

9, 10. Diesorọ o vwo fo nẹ wọ “hẹrhẹ”?

⁹ Wọ vwọ davwẹngba wọ vwọ yanmu iwan wo bru kẹ oma, vwo uruemu ra vwọ “hẹrhẹ.” (Maika 7:7) Jihova biẹcha idibo rọyen ọkieje, ọ da tobọ dianẹ ọ sa rhọnvwe nẹ ayen cha hẹrhẹ uphẹn rẹ ẹga evo yẹrẹ ewene vwẹ ẹdia rẹ akpeyeren evo. O vuve rẹ ọmọ vwọ kẹ Ebraham, ẹkẹvuọvo Ebraham che vwo esegbuyota, je hẹrhẹ. (Hib. 6:12-15) Dede nẹ ikpe evo wanre tavwen e ki vwiẹ Aizik, ẹwẹn rẹ Ebraham kuọrọnre-e, Jihova ji kuophiyotọ-ọ.—Jẹn. 15:3, 4; 21:5.

¹⁰ Ra vwọ hẹrhẹ ghwa lọhọ-ọ. (Isẹ 13:12) E de roro kpahen obo re ku avwanre phiyotọ wan re, ọ cha nẹrhẹ ẹwẹn avwanre kuọrọn. Ukperẹ ọtiọyen, o che yovwin a da vwẹ ọke na vwọ wian kpahen iruemu avwanre. Jokaphiyọ idjerhe erha re se vwo ruo.

11. Iruemu vọ yen ofori nẹ avwanre vwo, kẹ diesorọ e vwọ ghanre?

¹¹ Vwo emamọ iruemu. Womarẹ ese rẹ Baibol na vẹ re vwo roro kpahọn, e se  vwo aghwanre, ẹruọ, ọhọ, erianriẹn, vẹ ẹgba rẹ iroro ro fiotọ. A guọnọ iruemu tiọyen vwo mie ihwo re vwo mu ẹdia vwẹ ukoko na. (Isẹ 1:1-4; Tai. 1:7-9) Vwẹ ẹbe ukoko na, avwanre mrẹ iroro rẹ Ọghẹnẹ kpahen ẹdia sansan. Kẹdẹ kẹdẹ, e hirharokuẹ orhiẹn ro shekpahen erọnvwọn ra vwọ diotọ, irhuon vẹ osẹnvwe, igho, kugbe oyerinkugbe avwanre vẹ ihwo efa. A da vwẹ obo re yono nẹ Baibol na vwo ruiruo, ke che brorhiẹn ri je Jihova.

12. Idjerhe vọ yen iniọvo ukoko na sa vwọ dia ihwo ra vwẹrosua?

¹² Dia ohwo ra vwẹrosua. Owenẹ avwanre iniọvo eshare yẹrẹ eya, ofori nẹ a vwẹ ikabọ vwo mu iruo rẹ ukoko na vwọ kẹ avwanre-e. Kerẹ osun, Nehemaya vwẹ ihwo vwo mu ẹdia sansan uvwre rẹ ihwo rẹ Ọghẹnẹ. Amono yen o vwo mu ẹdia? Ihwo re djoshọ rẹ Ọghẹnẹ, ra je sa vwẹrosua. (Neh. 7:2; 13:12, 13) Ọtiọyen ọ je hepha nonẹna, a “guọnọre nẹ imuidi na dia ihwo ra vwẹ ẹro so.” (1 Kọr. 4:2) Omamọ uruemu se siomanẹ-ẹ.—Se 1 Timoti 5:25.

13. Mavọ wọ sa vwọ vwẹrokere Josẹf siẹrẹ ihwo de gbeweku?

¹³ Jẹ Jihova ru we fon. Die wo se ru siẹrẹ ohwo de gbeweku? Ọkiọvo wọ sa rhuẹrẹ ẹghwọ na phiyọ kpakpata. Jẹ ọke ọfa, ẹghwọ na se krotọ kidie avwanre guomariase. Iniọvo rẹ Josẹf gbereku, ẹkẹvuọvo o phi ophu phiyọ evu-un. E gun efian nyẹ, ji muo phiyọ uwodi ekueku. Dedena, ọ vwẹ uphẹn kẹ Jihova nẹ o suon vwẹ ọke ebẹnbẹn nana. Die yen nẹ obuko rọyen rhe? “Ota rẹ Ọrovwohwo kọ davwọ ni” yẹrẹ o de rhi ruo fon. (Une 105:19) Edavwini yena vwọ wan nu, Josẹf de rhi muwan vwọ kẹ owian oghẹresan ọvo. (Jẹn. 41:37-44; 45:4-8) Wọ vẹ ebẹnbẹn de muabọ, nẹrhovwo vwọ kẹ aghwanre, dje uruemu rẹ dẹndẹn phia womarẹ ota vẹ uruemu, yare ẹgba mie Ọghẹnẹ. Jihova cha chọn wẹ uko.—Se 1 Pita 5:10.

14, 15. (a) Diesorọ a vwọ “sẹro” rẹ ena rẹ aghwoghwo avwanre? (b) Idjerhe vọ wo se vwo wene vwo nene ẹdia sansan? (Ni uhoho rẹsosuọ na vẹ ekpeti re se “ Wo Muegbe Wọ Vwọ Davwen Ona Ọfa?”)

¹⁴ Pọl da vuẹ Timoti: “Wo mie se ọbe ọfuanfon na. Sẹro rẹ oma wẹn kugbe uyono wẹn.” (1 Tim. 4:13, 16) Vwẹ ọke nana, Timoti ọwena rẹ aghwoghwo Uvie na. Dedena, iruo aghwoghwo rọyen che muotọ siẹrẹ ọ da “sẹro” rẹ uyono rọyen. O che se roro nẹ ihwo che nyo ovuẹ na siẹrẹ ọ da reyọ ona vuọvo vwo ruiruo-o. Ọ sa vwọ ta ota ro che te ubiudu rẹ ihwo na, ko fori nẹ o wene ena rọyen vwo nene ọdavwẹ rẹ ihwo na. Ofori nẹ e ji ru ọtiọyen.

¹⁵ Ọke buebun, avwanre mrẹ ihwo vwẹ uwevwi-in. Vwẹ asan evo, a sa ro egodo vẹ ekogho re mu ogba riariẹ-ẹ. Ọ da dia oka rẹ asan tiọyen wo de ghwoghwo, wọ sa davwen ena efa rẹ aghwoghwo na?

16. Mavọ yen aghwoghwo rẹ azagba sa vwọ vọn vẹ erere?

¹⁶ Aghwoghwo rẹ azagba, ọyen idjerhe oyoyovwin ọvo re se vwo ghwoghwo iyẹnrẹn esiri na. Iniọvo buebun vwobọ vwẹ iruo nana, ayen je mrẹ erere no cha. Ayen rhuẹrẹ ọke phiyọ rere ayen se vwo ghwoghwo ota vwẹ eki, asan rẹ ihwo da ro itreni vẹ imoto, asan ra da heha kugbe asan efa. A sa vwẹ obo re phia, re vwo  jiri ọmọ, yẹrẹ enọ ri shekpahen iruo rẹ ohwo na, vwọ ton otaẹtakuẹgbe phiyọ. Ota na vwọ yanran na, oghwoghwota na se djunute ẹkpo rẹ Baibol ọvo rọ cha kpare urhurusivwe rẹ ohwo na. Ẹkpahọnphiyọ rẹ ohwo na kọyen cha gbẹn idjerhe vwọ kẹ uyono rẹ Baibol.

17, 18. (a) Mavọ wo se vwo vwo uduefiogbere vwẹ aghwoghwo rẹ azagba? (b) Diesorọ ẹwẹn rẹ Devid vwo jiri Jihova na vwọ dia obo re ghanre vwẹ iruo aghwoghwo na?

¹⁷ Wọ da mrẹ bẹnbẹn wo vwo ru aghwoghwo rẹ azagba, wo jẹ oma rhọ wẹ-ẹ. Eddie rọ dia ọkobaro vwẹ New York City, hirharoku ebẹnbẹn nana. Ememerha na, o de rhi vwo uduefiogbere. Die yen chọn rọ uko? Ọ da ta: “Vwẹ ẹga orua avwanre, me vẹ aye mẹ ruẹ ehiahiẹ kpahen ẹkpahọnphiyọ rẹ enọ rẹ ihwo sa nọ. Avwanre ji rhiabọreyọ iroroẹjẹ rẹ iniọvo efa.” Asaọkiephana, Eddie rhẹro rẹ aghwoghwo rẹ azagba ọkieje.

¹⁸ Ona vẹ uduefiogbere wẹn vwo yovwẹnphiyọ na, ihwo ke cha mrẹ ẹyan obaro wẹn. (Se 1 Timoti 4:15.) Vwọba, wọ cha ghwa ujiri vwo rhe Ọsẹ avwanre rọhẹ odjuvwu kirobo rẹ Devid ruru, rọ vwọ so: “Mi bruphihọ kẹ Ọrovwohwo vwẹ ọke ejobi; ejiro rọye dia unu mẹ kọke kọke. Erhi mẹ vwẹ Ọrovwohwo yan eyan; jẹn ọ re kpokpo nyo re ọ ghọghọ.” (Une 34:1, 2) Womarẹ iruo aghwoghwo wẹn, ihwo re hepha dẹndẹn na sa rhe mrẹ uyota na vughe.

19. Diesorọ oma vwọ vwerhen odibo rẹ Jihova dede nẹ o rhiẹromrẹ ebẹnbẹn sansan?

¹⁹ Devid je so nẹ, “Iruo wẹn ejobi cha vwẹ ẹkpẹvwẹ kẹ wẹ, E Ọrovwohwo, ihwo efuanfon wẹn ejobi ki bruba kẹ wẹ! Ayen che gbe ikun rẹ urinrin rẹ uvie wẹn, kugbe ikun rẹ ogangan wẹn, re jẹ emọ rẹ ihwo riẹn uruemu rẹ ẹgba wẹn, kugbe erhuvwu rẹ urinrin rẹ uvie wẹn.” (Une 145:10-12) Iseri rẹ Jihova eje re fuevun kẹ, rhọnvwephiyọ eta yena. Kẹ ọ da rha dianẹ ọga yẹrẹ ọghwo nẹrhẹ iruo wẹn shekpotọ vwo? Karophiyọ nẹ aghwoghwo wo ruẹ kẹ ihwo re vwẹrote we vẹ ihwo efa, vwẹ ujiri kẹ Ọghẹnẹ. Wọ da hẹ uwodi fikirẹ esegbuyota wẹn, ọkiọvo wo ji se ghwoghwo ota siẹrẹ uphẹn de rhiephiyọ, ọnana je kẹ Jihova omavwerhovwẹn. (Isẹ 27:11) Ọtiọyen ọ je hepha kẹ ohwo ro tinka mu ẹga na jẹ orua rọyen dia Iseri rẹ Jihova-a. (1 Pita 3:1-4) Tobọ vwẹ ọke ebẹnbẹn, wo se jiri Jihova, je yanphiaro.

20, 21. Wo de vwo iruo efa vwẹ ukoko na, idjerhe vọ wọ sa vwọ dia ebruphiyọ vwọ kẹ ihwo?

²⁰ O muẹro nẹ Jihova che bruba kẹ wẹ siẹrẹ wọ da yanphiaro ọkieje. Wo de ru ewene evo vwẹ akpeyeren wẹn, wo se vwobọ vwẹ iruo nana vọnvọn, iruo re vwo ghwoghwo ota na kẹ ihwo re guọnọ iphiẹrophiyọ. Ẹyan obaro vẹ omaevwoze wẹn sa je hwarhiẹ erere gbidiki vwo rhe iniọvo na. Fikirẹ omaevwokpotọ wẹn vwẹ ukoko na, wọ sa mrẹ ẹguọnọ, ọdavwaro, vẹ obicha rẹ idibo rẹ Jihova.

²¹ Avwanre eje sa yanphiaro vwẹ ẹga rẹ Jihova, owenẹ avwanre ga krẹre yẹrẹ e bromaphiyame obọ. Ẹkẹvuọvo, mavọ yen Inenikristi re ga krẹre sa vwọ vwẹ ukẹcha kẹ ihwo kpokpọ vwọ yan obaro vwọrẹ ẹwẹn? E che yono uyovwinrota nana vwẹ uyono rọ vwọ kpahen ọnana.