VWẸ idjerhe vuọvo na, ihwo ri yono Biabol na pha kerẹ ihwo re guọnọ oro. Ofori nẹ ayen wian gangan, nabọ hiẹ Baibol na rere ayen sa vwọ mrẹ aghwanre rọ pha ghanghanre. Kerẹ ihwo ri yono Baibol na, die yen e se yono vwo nẹ idjerhe erha ra sa vwọ mrẹ oro?

Vwẹ ẹro roro nẹ wọ yan vwẹ orhoma rẹ urhie, wọ da mrẹ orọnvwọn ọvo rọ pha kerẹ ubiukuta tutuno rọ nyavwaro fikirẹ ọnre na. Wo vwo rhuẹn totọ no, wọ da mrẹ nẹ oro yen wọ mrẹre na, oma nabọ vwerhen owẹ dẹn. Ọ hanvwe nẹ uyovwin rẹ agbuna, a je fobọ mrẹ-ẹ. Vwọrẹ imuẹro, wọ cha nabọ ni asan na eje sẹ wọ cha mrẹ efa.

Vwẹ idjerhe vuọvo na, ọ sa dianẹ o vwo ẹdẹ ọvo rẹ Iseri rẹ Jihova vwo ghwoghwo ovuẹ rẹ iphiẹrophiyọ rọhẹ Baibol na kẹ wẹ. Ọkiọvo wọ karophiyọ ọke ẹsosuọ wọ vwọ mrẹ uyono rẹ Baibol rọ nabọ te we ẹwẹn, kerẹ ọke ẹsosuọ wọ vwọ mrẹ odẹ rẹ Ọghẹnẹ, Jihova, vwẹ Baibol na. (Une 83:18) Yẹrẹ, ọ sa dia ọke wo vwo yono nẹ wọ sa dia ugbeyan rẹ Jihova. (Jems 2:23) Wọ da rhe mrẹvughe nẹ wọ mrẹ orọnvwọn ro yovwin nọ oro! Wo de ji vwo owenvwe wo vwo yono erọnvwọn iyoyovwin efa.

Ọkiọvo, a sa mrẹ ukori rẹ imiro itete vwẹ orhoma rẹ urhie. Vwẹ uvwre rẹ emeranvwe evo, ihwo re nabọ gbomavwra ẹguọnọ rẹ iro na se koko iro ra sa shẹ te idọla uriorin buebun.

Wọ vẹ Iseri rẹ Jihova vwọ ton uyono rẹ Baibol na phiyọ, wọ ghwa hepha kerẹ ohwo rọ hiẹ asan rẹ iro vọnre. Wo vwo roro kpahen ẹkpo rẹ Baibol ọvuọvo, ọ nẹrhẹ erianriẹn wẹn kpahen Baibol na kodophiyọ. Ọkieje wo vwo yono kpahen uyota rọhẹ Baibol na, ọ nẹrhẹ wọ riẹn oborẹ wo se vwo sikẹrẹ Jihova je sẹro rẹ oma wẹn vwevunrẹ ẹguọnọ rọyen vẹ iphiẹrophiyọ rẹ arhọ rẹ bẹdẹ.—Jems 4:8; Jud 20, 21.

 Kirobo rẹ ohwo gbẹrophiyotọ guọnọ iro vwẹ orhoma rẹ urhie, ọ sa dianẹ ọtiọyen wọ je nabọ guọnọ iyono eghanghanre rehẹ Baibol na. Wọ rhe vwọ riẹn iyono rẹ Baibol evo nu, o de mu we vwọ vwomakpahotọ ji bromaphiyame.—Mat. 28:19, 20.

Ohwo rọ guọnọ iro sa je mrẹ vwẹ eragha evo. Ẹbẹre rẹ eragha evo tiọyena se vwo iro buebun rọ sa nẹrhẹ a va oragha na rere obọ se vwo te iro na. Ẹsosuọ, e se rhiẹromrẹ oro na vwevunrẹ oragha na-a. Diesorọ? Kidie oragha evo se vwo umukori rẹ oro ro tumuku-u! Dedena, ohwo rọ guọnọ na niro ghanghanre mamọ.

A je guọnọ ẹyan obaro siẹrẹ ohwo de vwo erianriẹn rẹ “ebaghẹrẹ rẹ uyono ri Kristi” nu. (Hib. 6:1, 2) Ọ guọnọ ẹgbaẹdavwọn e ki se yono erọnvwọn kpokpọ vwo nẹ uyono rẹ Baibol. Kẹ, die wo se ru rere uyono romobọ wẹn sa vwọ vọn vẹ erere ọkieje, ọ da tobọ dianẹ o kriri wo yono Baibol na re?

Vwo oruru wo vwo yono erọnvwọn kpokpọ. Nabọ fuẹrẹn ẹkpo sansan. Davwẹngba ọkieje, wọ cha mrẹ aghwanre vẹ odjekẹ re pha kerẹ iro rẹ ẹwẹn. (Rom 11:33) Reyọ ẹbe ukoko na re herọ vwẹ ejajẹ wẹn vwo ru ehiahiẹ rere erianriẹn wẹn rẹ Baibol na se vwo kodophiyọ. Nabọ hiẹ guọnọ odjekẹ vẹ ẹkpahọnphiyọ kẹ enọ wẹn ri shekpahen Baibol na. Nọ iniọvo efa kpahen ẹkpo rẹ Baibol vẹ ẹbe ukoko na re chọn ayen uko jovwo re. Vuẹ ihwo efa kpahen ẹkpo wọ je mrẹ vwẹ uyono romobọ wẹn.

Ọ diẹ e di vwo vwo erianriẹn yen dia ọdavwẹ wẹ-ẹn. Ọyinkọn Pọl si avwanre orhọ nẹ, “erianriẹn phuoma.” (1 Kọr. 8:1) Ọtiọyena, jẹ ọ dia ọdavwẹ wẹn wọ vwọ vwomakpotọ je bọn esegbuyota wẹn ganphiyọ. Ẹga orua rẹ ọkieje vẹ uyono romobọ cha chọn wẹ uko vwo yerin nene irhi rẹ Jihova je vwẹ ukẹcha kẹ ihwo efa. Ọ rọ ma rho, oma cha vwerhen owẹ kidie wọ rhe mrẹ orọnvwọn rọ ghanre nẹ oro shesheri.—Isẹ 3:13, 14.