1, 2. Diesorọ e vwo yono ihwo efa ayen se vwo ruiruo rẹ ukoko na?

IRUO aghwoghwo rẹ Uvie na yen Jesu tẹnrovi. Ẹkẹvuọvo, ọ je ghwọrọ ọke vwo yono ihwo efa ayen sa vwọ dia isuigegede vẹ iyono. (Mat. 10:5-7) Dede nẹ Filip gbomavwra iruo aghwoghwo na, o ji yono emetẹ rọyen ẹne kpahen oborẹ ayen sa vwọ tẹn ona rẹ aghwoghwo na. (Iruo 21:8, 9) Mavọ yen uyono tiọyena ghanre te nonẹna?

² Vwẹ akpọneje, ihwo ri rhiabọreyọ uyota na buẹnphiyọ ọkieje. Ofori ihwo kpokpọ re ji bruphiyame-e, vwọ riẹn ọghanrovwẹ rẹ uyono rẹ Baibol romobọ. Ofori ayen je vwọ riẹn obo re ghwoghwo ota kẹ ihwo efa, ji yono ayen uyota na. Vwẹ ukoko rẹ avwanre, ofori iniọvo eshare vwọ davwẹngba rere ayen se vwo muwan vwọ kẹ odibo rowian kugbe ọkpako. Womarẹ “omamọ rẹ iji,” Inenikristi ri tedje sa chọn ihwo kpokpọ uko vwọ yanphiaro.—Isẹ 4:2.

3, 4. (a) Idjerhe vọ yen Pọl vwo churu uyono rẹ Baibol si iruo aghwoghwo rọ vọnre vẹ erere? (b) A ke sa vuẹ ihwo ra vwẹ Baibol yono kpahen uyono rẹ Baibol romobọ, die yen ofori nẹ avwanre ru ọkieje?

³ Mavọ yen uyono rẹ Baibol romobọ ghanre te? A mrẹ ẹkpahọnphiyọ rẹ onọ nana vwẹ eta rẹ ọyinkọn Pọl si rhe Inenikristi rehẹ Kọlose. Ọ de si: “Avwanre rha ka vẹ ẹrhovwo ra nẹ kẹ ovwa-an, rere evun rẹ ovwan sa vwọ vọn vẹ erianriẹn [rẹ Ọghẹnẹ], vẹ iroro rẹ [ẹwẹn, NW] na kugbe rere ovwan vwo vwo ẹruọ rẹ ota rọye, rere eyere rẹ ovwan vwo se fo kẹ Ọrovwohwo, re uruemu rẹ ovwan ejobi vwo se je rere ovwan vwo ru iruo esiri phia kugbe rere erianriẹn rẹ Ọghẹnẹ rẹ ovwan vwo bu.” (Kọl. 1:9, 10) Erianriẹn ọgbagba tiọyena cha chọn Inenikristi rehẹ Kọlose uko, “rere eyere rẹ [ayen] vwo se fo kẹ Ọrovwohwo.” Ọnana je cha nẹrhẹ ayen dje “iruo esiri phia,” ma rho vwevunrẹ iruo aghwoghwo na. Ẹga rẹ avwanre se vwo fiotọ, ofori nẹ odibo rẹ Jihova vwo uruemu ro vwo yono Baibol na. E jẹ a kọn ọnana phiyọ ẹwẹn rẹ ihwo ra vwẹ Baibol yono.

⁴ Bẹsiẹ a ke sa chọn ihwo efa uko vwọ mrẹ erere vwo nẹ uyono rẹ Baibol romobọ, ofori nẹ avwanre vwo imuẹro kpahen ọghanrovwẹ rọyen. Vwọrẹ uyota, e jẹ avwanre vwo uvi rẹ uyono romobọ. Ọtiọyena, gba nọ oma wẹn: ‘Ohwo mi ghwoghwo ota kẹ da ta ota rọ vwọso uyono rẹ Baibol na yẹrẹ nọ vwẹ onọ rọ pha gangan, me sa vwẹ Baibol na vwọ kpahen kẹ? Mi de se kpahen oborẹ Jesu, Pọl vẹ ihwo efa chirakon vwẹ iruo aghwoghwo na, mi roro kpahen oborẹ akoechiro rayen se vwo djobọte ẹga me vwọ kẹ Jihova?’ Avwanre guọnọ erianriẹn vẹ uchebro rẹ Baibol na. Avwanre da vuẹ ihwo efa kpahen erere rẹ avwanre mrẹ vwo nẹ uyono rẹ Baibol cha, o se mu ayen vwo yono Baibol na ayen me je mrẹ erere tiọyen.

5. Djunute iroroẹjẹ ọvo rẹ obo ra sa vwọ chọn ihwo kpokpọ uko vwo vwo uyono rẹ Baibol romobọ.

⁵ Wọ sa nọ nẹ, ‘Mavọ mi se vwo yono ohwo me vwẹ Baibol yono obo re ruẹ uyono romobọ ọkieje?’ Ẹsosuọ, yono obo ro se vwo muegbe rẹ ọbe wo vwo yono. Wọ sa vuẹ nẹ o se ẹkpo evo vwẹ apẹndisi rẹ ọbe re se What Does the Bible Really Teach? ji ni ẹkpo rẹ Biabol rehẹ evun rọyen. Chọn uko vwo muegbe vwọ kẹ uyono re ruẹ vwẹ Ọguan Ruvie, vẹ ẹwẹn rọ vwọ kpahen phiyọ enọ. Vuẹ nẹ o se ọbe Uwevwin Orhẹrẹ vẹ Awake! eje. Watchtower Library yẹrẹ Watchtower ONLINE LIBRARY da herọ vwẹ ejajẹ rọyen, wo se yono obo ra reyọ vwọ guọnọ ẹkpahọnphiyọ rẹ enọ ri shekpahen Baibol na. Ukẹcha tiọyena sa nẹrhẹ ohwo  wọ vwẹ Baibol yono na rhi vwo uyono romobọ rọ nabọ muotọ.

6. (a) Mavọ wọ sa vwọ chọn ohwo wọ vwẹ Baibol yono uko vwo vwo ẹguọnọ rẹ Baibol na vwẹ ubiudu rọyen? (b) Die yen ẹguọnọ rẹ Baibol na se mu ohwo tiọyena ru?

⁶ Ọ diẹ avwanre cha gba ihwo vwo se yẹrẹ yono Baibol na-a. Ukperẹ ọtiọyen, e jẹ a vwẹ erọnvwọn rẹ ukoko rẹ Jihova kẹ avwanre vwọ chọn ohwo ra vwẹ Baibol yono uko rere ẹguọnọ rọyen vwọ kẹ Baibol na vwo kodophiyọ. Ọke vwọ yanran na, o se vwo ẹwẹn rẹ ọbuine na, rọ vwọ so: “Vwọ kẹ vwẹ o yoma mi vwo si kẹrẹ Ọghẹnẹ; me vwẹ Ọrovwohwo Ọghẹnẹ ru asan odjarhọ mẹ.” (Une 73:28) Ẹwẹn ọfuanfon rẹ Jihova se mu ohwo ro vwo ẹwẹn rẹ ọdavwaro tiọyena vwo ruiruo.

7. Idjerhe vọ yen Jesu vwo yono idibo rọyen vwọ dia ighwoghwota? (Ni uhoho rẹsosuọ na.)

⁷ Vwẹ ọbe rẹ Matiu uyovwin 10, avwanre mrẹ iji rẹ Jesu vwọ kẹ iyinkọn 12 rọyen. Ọ ta ota na reghe reghe-e, o di djunute ẹkpo evo kiriguo. ^[1] Idibo na nabọ kerhọ ọke rẹ Jesu vwo yono ayen oborẹ ayen ghwoghwo wan. O vwo yono ayen nu, ayen de kpo iruo aghwoghwo na. Rọ vwọ dianẹ ayen nabọ vwo oniso rẹ ena rẹ Jesu vwo ruiruo, o rhe kri ayen ke dia iyono rẹ Baibol re nabọ dia ewena-a. (Mat. 11:1) Avwanre sa chọn ihwo ra vwẹ Baibol yono uko vwọ dia ighwoghwota re tẹn ona. E jẹ e roro kpahen idjerhe ivẹ a sa vwọ chọn ayen uko.

8, 9. (a) Mavọ yen Jesu nene ihwo ta ota vwẹ iruo aghwoghwo na? (b) Idjerhe vọ yen a sa vwọ chọn ighwoghwota kpokpọ uko vwọ vwẹrokere Jesu?

⁸ Nene ihwo ta ota. Ọke buebun, Jesu vuẹ ihwo kpahen Uvie na. Kerẹ udje, o vwo omamọ otaẹtakuẹgbe vẹ aye ọvo vwẹ orhare rẹ Jekọp rọ kẹrẹ orere rẹ Saka. (Jọn 4:5-30) O ji nene Matiu Livae rọ dia omiarhọghọ, ta ota. Baibol na ghwa niyẹnrẹn obuebun kpahen otaẹtakuẹgbe nana-a, ẹkẹvuọvo o rhiabọreyọ edurhie rẹ Jesu rọ vwọ dia odibo rọyen. Matiu vẹ ihwo efa nyo eta rẹ Jesu tare vwẹ orẹ re ruru vwẹ uwevwin rẹ Matiu.—Mat. 9:9; Luk 5:27-39.

⁹ Vwẹ ọke ọfa, Jesu ta ota kẹ Nataniẹl kerẹ ugbeyan, ohwo rọ vwẹ ẹro ọchọchọ vwo nẹ ihwo rẹ Nazarẹt. Ọ da nẹrhẹ Nataniẹl wene iroro rọyen. O de rhi mu ẹwẹn kpahen iyono rẹ Jesu, rọ dia ohwo rẹ Nazarẹt. (Jọn 1:46-51) Ọtiọyena, ofori nẹ e yono ighwoghwota kpokpọ oborẹ ayen sa vwọ vwẹ aghẹnghẹn vwọ ta ota kẹ ihwo kerẹ igbeyan. ^[2] Ighwoghwota tiọyena cha mrẹ aghọghọ siẹrẹ ihwo ri vwo ẹwẹn esiri de dje omavwerhovwẹn kpahen omamọ uruemu rayen.

10-12. (a) Idjerhe vọ yen Jesu vwọ yanmu ihwo ri dje omavwerhovwẹn phia kpahen iyẹnrẹn esiri na? (b) Mavọ a sa vwọ chọn ighwoghwota kpokpọ uko vwo ru ona rẹ aghwoghwo rayen yovwinphiyọ?

¹⁰ Yanmu ihwo. Ọke rẹ Jesu vwori vwọ kẹ iruo aghwoghwo na ghwe gro-on. Dedena, ọ davwẹngba vwọ yanmu ihwo ri dje omavwerhovwẹn phia kpahen iyẹnrẹn esiri na. Kerẹ udje, o vwo ọke ọvo rẹ Jesu vwo mudia evunrẹ okọ de yono ihwo. O ji ru igbevwunu vwẹ ẹdẹ yena rọ vwọ nẹrhẹ Pita hwe iyerin buebun, ọ da vuẹ nẹ, “Kẹ etinẹ yanran ku wo hwe iyeri rẹ ihwo.” Die yen nẹ obuko rẹ eta vẹ uruemu rẹ Jesu nana rhe? Pita vẹ igbeyan rọyen “da yan jẹ emu na ejobi vwo, ayen de nene [Jesu].”—Luk 5:1-11.

11 Nikodimọs, rọ dia ọvo usun rẹ ihwo ri chidia aguare rode na, de vwo ẹwẹn ro vwo nyo iyono rẹ Jesu. Ọ guọnọ yono kpobarophiyọ, jẹ oshọ muo fikirẹ oborẹ  ihwo cha ta siẹrẹ ayen da mrẹ rọ ta ota kẹ Jesu vwẹ azagba. Jesu, ọyen ohwo rọ nuẹ ro ji nene ihwo ghwọrọ ọke kuẹgbe; ọ vẹ Nikodimọs da vwoma vwẹ ason. (Jọn 3:1, 2) Die yen ikuegbe nana yono avwanre? Ọmọ rẹ Ọghẹnẹ rhuẹrẹ ọke phiyọ rọ vwọ bọn esegbuyota rẹ ihwo efa gan. O rhe fo nẹ avwanre nabọ ghwọrọ ọke vwo rhivwin bru ihwo ra ji ru uyono rẹ Baibol?

¹² Ighwoghwota kpokpọ se ru ona rẹ aghwoghwo rayen yovwinphiyọ siẹrẹ e de nene ayen wian vwẹ iruo aghwoghwo na. A sa chọn ayen uko vwọ jokaphiyọ ihwo ri dje omavwerhovwẹn phia, ọ da tobọ dianẹ ayen ghwe djephia ganga-an. E se durhie ighwoghwota kpokpọ na nẹ i nene avwanre kpo orhivwinbrura vẹ uyono rẹ Baibol. Uyono vẹ uduephiophiyawọ tiọna, cha nẹrhẹ ighwoghwota kpokpọ vwo ẹwẹn ayen vwọ yanmu ihwo rẹ ayen ghwoghwo kẹ, ji vwo iyono rẹ Baibol romobọ rayen. Ayen ji che yono edirin vẹ erhiorin vwẹ iruo aghwoghwo na.—Gal. 5:22; ni ekpeti ro vwo uyovwinrota na, “ A Guọnọ Erhiorin.”

13, 14. (a) Die wo rorori kpahen ihwo rehẹ Baibol na re vwoma rayen vwoze kẹ ihwo efa? (b) Idjerhe vọ wo se vwo yono ighwoghwota kpokpọ vẹ ighene oborẹ ayen se vwo dje ẹguọnọ kẹ iniọvo na?

¹³ Baibol na kanrunumu uphẹn avwanre vwori re vwo “vwo ẹguọnọ kpahe imoni na” ji gbe odibo kẹ ayen. (Se 1 Pita 1:22; Luk 22:24-27.) Ọmọ rẹ Ọghẹnẹ siobọnu erọnvwọn eje, tobọ ji te arhọ rọyen, ro vwo gbe odibo kẹ ihwo efa. (Mat. 20:28) Dọkas, ọyen “oruẹse o ki rhe vwo uruemu esiri.” (Iruo 9:36, 39) Meri, ọyen oniọvo aye vwẹ Rom, ro “ru iruo gangan” vwevunrẹ ukoko na. (Rom 16:6) Mavọ yen a sa vwọ chọn ihwo kpokpọ uko vwọ riẹn ọghanrovwẹ ra vwọ chọn iniọvo uko?

¹⁴ Iniọvo ri tedje se se iniọvo kpokpọ nene oma ọke ayen da ra mrẹ iniọvo re muọga yẹrẹ e re kpakore. Ọ da dia obo ri shephiyọ, emiọvwọn se mu emọ rayen nene oma, ayen de kpo oka rẹ oyan tiọyena. Ekpako na se vwo ọrhuẹrẹphiyotọ rẹ asan iniọvo re kpakore cha dia vẹ omamọ emu rẹ ayen cha re; ekpako na sa guọnọ ukẹcha rẹ iniọvo na vwẹ ẹdia nana. Enana idjerhe sansan rẹ ighene vẹ ihwo kpokpọ se vwo dje uruemu esiri phia kẹ ihwo efa. Ọkpako ọvo vwo uruemu rọ vwọ kọn bru iniọvo re kpakore ra rehẹ ekogho ro de ghwoghwo ọke rọ da hẹ iruo aghwoghwo na. Ọ da nẹrhẹ eghene ọshare ọvo ro nene wian mamọ mrẹvughe nẹ ofori e vwo dje ẹguọnọ kẹ kohwo kohwo rọhẹ ukoko na.—Rom 12:10.

15. Diesorọ ọ vwọ ghanre nẹ ekpako vwo oniso kpahen ẹyan obaro rẹ eshare rehẹ ukoko na?

¹⁵ Ọ vwọ dianẹ eshare yen Jihova vwo yono ukoko na, ofori iniọvo eshare yono oborẹ ayen sa vwọ dia ewena rẹ ota. Wọ da dia ọkpako, wọ sa kerhọ kẹ odibo rowian ọke ro de muegbe rẹ ota rọyen? Womarẹ ukẹcha wẹn, o se ru ona rẹ eyono rọyen yovwinphiyọ.—Neh. 8:8. ^[3]

16, 17. (a) Die yen Pọl ru kpahen ẹyan obaro rẹ Timoti? (b) Mavọ yen ekpako na sa vwọ nabọ yono eshare re sa dia ekpako vwẹ ukoko na?

¹⁶ A guọnọ ekpako vwẹ ukoko na mamọ, ihwo ri ji che ruiruo nana je guọnọ uyono rẹ ọkieje. Pọl vwọ vuẹ Timoti obo re yono eshare nana wan, ọ da ta: “Wẹ, ọmọ mẹ, gba gan oma vwẹ ẹserọphẹ rọ herọ vwẹ evun ri Kristi Jesu, obo ru wo nyo mie vwe vwẹ irharo rẹ iseri buebu gba vwẹ ayen yono ihwo ri  vwo esegbuyota re je sa vwẹ ayen yono ihwo efa rhe.” (2 Tim. 2:1, 2) Timoti yono mie ọkpako rọ je dia ọyinkọn. Ọ da reyọ ena ro yono mie Pọl na vwo ruiruo aghwoghwo na vẹ iruo rẹ ega na efa.—2 Tim. 3:10-12.

¹⁷ Pọl tare nẹ ọyen che yono Timoti siẹrẹ ọyen de vwo ọke-e. Ọ reyerọ nene oma vwẹ owian na. (Iruo 16:1-5) Ekpako sa vwẹrokere Pọl siẹrẹ ayen da reyọ idibo rowian ri tedje nene oma ọke rẹ ayen da kọn brẹ iniọvo na ra. Ọnana cha nẹrhẹ iniọvo eshare na nabọ mrẹ esegbuyota, odirin, ẹguọnọ vẹ ona rẹ uyono ra guọnọ mie ekpako. O ji che toroba eyono rẹ eshare re cha dia isuigodẹ rẹ “uchuru rẹ Ọghẹnẹ” vwẹ ọke rọ cha obaro na.—1 Pita 5:2.

18. Diesorọ ọ vwọ ghanre nẹ e yono ihwo efa vwẹ ẹga rẹ Jihova?

¹⁸ Re vwo yono ihwo, dia obo re ghanre mamọ kidie uphẹn sansan rhiephiyọ vwẹ ẹga rẹ Jihova. A sa je vwẹ udje rẹ Jesu vẹ Pọl phiyotọ kpahen eyono rẹ ihwo vwo ruiruo nonẹna. Jihova guọnọre nẹ idibo rọyen nonẹna, dia ihwo ra nabọ yono vwọ kẹ iruo ro te ayen vwẹ ukoko na. Ọghẹnẹ kẹ avwanre uphẹn ra vwọ chọn ihwo uko vwo vwo ena rẹ ayen vwo ruiruo rẹ ukoko na. A guọnọ uyono tiọyena mamọ, ọ je dia ọ rẹ okpakpa, ma rho vwẹ ọke nana rẹ akpọ na vwo miovwẹnphiyọ na, ra je vwọ mrẹ uphẹn sansan re de se ruiruo aghwoghwo na.

19. Diesoro e vwo vwo imuẹro nẹ ẹgbaẹdavwọn avwanre vwo yono ihwo efa vwẹ ẹga rẹ Jihova cha ghwa erere rhe?

¹⁹ Vwọrẹ uyota, eyono rẹ ihwo guọnọ ọke vẹ ẹgbaẹdavwọn. Ẹkẹvuọvo, Jihova vẹ Ọmọ ọghanghanre rọyen na che bicha avwanre, je kẹ avwanre aghwanre ra guọnọre vwọ kẹ uyono tiọyena. Oma cha vwerhen avwanre ra vwọ mrẹ ihwo rẹ avwanre vwẹ ukẹcha kẹ nẹ ayen ‘wian je pharha’ vwẹ iruo ẹga na. (1 Tim. 4:10) E jẹ avwanre dia ihwo re yanphiaro ọkieje vwevunrẹ ẹga rẹ Jihova.