Ọkiọvo vwevunrẹ Baibol na, ubiota rẹ Grik ra fan kpo “emu rẹ ọghọ” yẹrẹ ra vwọ dia ohwo rẹ uyota na, mudiaphiyọ “orọnvwọn ro yovwirin mamọ.” O ji se churobọ si omamọ rẹ uruemu.

Pọl tare nẹ, “ruẹ emu rẹ ọghọ vwi kemu kemu ejobi.” Inenikristi reyọ ota nana ghanghanre. Die yen ọnana churobọ si?

Ihwo buebun nẹ oma rayen vwẹ ughegbe tavwen ayen ki nẹ uwevwin vwẹ urhiọke. Diesorọ? Kidie ayen guọnọ riẹn sẹ osẹnvwe rayen shephiyọ. Ẹkẹvuọvo, o vwo orọnvwọn ọvo rọ ma ghanre vrẹ irhuon vẹ osẹnvwe. Vwọrẹ uyota, ohwo rẹ avwanre hepha vwẹ obevun se toroba yẹrẹ miovwo irhuon rẹ avwanre.

Baibol na tarọ nẹ umiovwo hẹ evunrẹ ẹwẹn rẹ avwanre. Jẹnẹsis 8:21 da tanẹ, “Kidie iroro rẹ evun rọye nẹ ọke-emọ rhe pha brabra.” Ọtiọyena, ofori nẹ a họnre vwọso jẹgba romobọ a ke sa dia ohwo rẹ uyota. Ọyinkọn Pọl djisẹ rẹ obo ro nene jẹgba romobọ rọyen muabọ, ọ da ta: “Kidie oma rẹ urhi rẹ Ọghẹnẹ vwerha ovwẹ, vwẹ obo otọ rẹ evun mẹ, ẹkẹvuọvo me rhe mrẹ urhi ọfa vwẹ ekuakua rẹ oma mẹ ro nene urhi rẹ udu mẹ họnra rọ vwẹ ovwẹ ru ọviẹn kẹ urhi rẹ umwemwu rọ hẹ evun rẹ ekuakua rẹ oma mẹ.”—Rom 7:22, 23.

Kerẹ udje, siẹrẹ avwanre de vwo ẹwẹn re vwo ru obo re brare, vẹ urhurusivwe re vwo jẹ ohwo rẹ uyota ẹdia, ofori nẹ a vwẹ uphẹn kẹ ẹwẹn yena nẹ o sun avwanre-e. Avwanre yen vwo ojẹ na. Avwanre da sen ẹwẹn ọbrabra nana, ka sa dia ihwo rẹ uyota dede nẹ uruemu nana kanre akpọ na.

Ra vwọ dia ohwo rẹ uyota guọnọ omamọ rẹ uruemu. Ọ da ohwo mamọ nẹ ihwo ghwọrọ ọke buebun phiyọ osẹnvwe rayen vwọ vrẹ omamọ uruemu. Fikirẹ ọtiọyena, ayen guomariase nẹ ẹdia rẹ ayen hepha yen nẹrhẹ ayen jẹ ohwo rẹ uyota ẹdia. Ọbe re se The (Honest) Truth About Dishonesty djisẹ rọyen ọtiọna: “Avwanre gun efian te ẹdia rẹ avwanre de roro nẹ avwanre jẹ ihwo rẹ uyota.” Ọ vwọ dia ọtiọyena, o vwo orọnvwọn rọ sa chọn avwanre uko vwọ riẹn sẹ e se guomariase kpahen re vwo jẹ ohwo rẹ uyota ẹdia? E, ọ herọ.

Ihwo buebun vwẹ akpọ na rhe riẹnre nẹ Baibol na sa chọn avwanre uko vwẹ ẹdia nana. Baibol na djunute omamọ uruemu ra mrẹ vwo dje-e. (Une Rẹ Ejiro 19:7) Ọ kẹ avwanre uchebro ro shekpahen akpeyeren rẹ orua, iruo, uruemu, kugbe oyerinkugbe rẹ avwanre vẹ Ọghẹnẹ. Uchebro rọhẹ Baibol na kpo awanre-e. Kohwo kohwo sa reyọ  ayen vwo ruiruo. Siẹrẹ e de se Baibol na, roro kpahen obo rọ tare, je reyọ vwo ruiruo, kọ sa chọn avwanre uko vwọ dia ihwo rẹ uyota kugbe ihwo rẹ ọsoso.

Dedena, e ki se phi ohọnre nana kparobọ, a je guọnọ orọnvwọn ọfa vwọ vrẹ erianriẹn rẹ Baibol. Kidie akpọ nana vọnre vẹ uruemu ọbrabra, ọtiọyena kọ riẹriẹ avwanre vwọ vwẹrokere uruemu ọtiọyena. Kọyensorọ o vwo fo nẹ a nẹrhovwo kẹ ukẹcha rẹ Ọghẹnẹ. (Filipae 4:6, 7, 13) Ọnana cha nẹrhẹ e fiudugberi vwo ru obo ri yoma, je dia ihwo rẹ uyota ọkieje.

Hitoshi ra ta ota kpahen vwẹ uyovwinrota rẹsosuọ rẹ ọbe nana, mrẹ erere kidie a rhe riẹn phiyọ ohwo rẹ uyota. Enẹna, ọ wiowian kẹ ohwo ro vwo ọdavwaro kpahen uruemu rọyen na. Hitoshi da ta: “Oma vwerhen ovwẹ me vwọ mrẹ iruo rọ nẹrhẹ me sa sẹro rẹ omamọ rẹ ẹwẹn obrorhiẹn mẹ.”

Ọtiọyen ọ je hepha vwọ kẹ ihwo efa. Roro kpahen udje rẹ ihwo evo re mrẹ erere kidie ayen yan nene iji rẹ Baibol na rọ tare nẹ, e ru “emu rẹ ọghọ vwi kemu kemu ejobi.”

• Ẹwẹn Obrorhiẹn rọ Fonro

  “Ọke me vwọ hẹ ẹgbukpe 13, me da djẹ nẹ isikuru ra vwomaba iji. Ọtiọyena, iwayo mi vwo vwo erọnvwọn buebun ri mi vwori. Ọke vwọ yanran na, me da rhe rọvwọn, mẹvwẹ vẹ ọshare mẹ da ton uyono rẹ Baibol phiyọ vẹ Iseri ri Jihova. Avwanre de rhi yono nẹ Jihova * vwo utuoma kpahen uruemu rẹ iwayo, ọtiọyena avwanre de wene akpeyeren rẹ avwanre. Vwẹ ukpe rẹ 1990, avwanre da rhe vwomakpahotọ kẹ Jihova, ji bromaphiyame kerẹ Iseri ri Jihova.”—Isẹ 6:16-19.

  “Vwẹ ọke ọvo rọ wanre, erọnvwọn re chori yen vọn uwevwin mẹ, enẹna, mi siobọnu erọnvwọn tiọyena re, mi de rhi vwo ẹwẹn obrorhiẹn rọ fonro. Mi de roro kpahen ikpe buebun rẹ me vwọ dia ohwo rẹ iwayo, ke me kpẹvwẹ Jihova fikirẹ arodọnvwẹ rọyen. Asaọkiephana, me vwerhẹn omamọ ovwerhẹn kidie me riẹnre nẹ oma mẹ vwerhen Jihova.” —Cheryl vwẹ Ireland.

  “Ọga mẹ vwọ riẹn nẹ me sen igho rẹ ọneki ọvo vwọ jẹ udi kẹ vwẹ, ọ da ta: ‘Ọghẹnẹ wẹn ru uwe phiyọ ohwo ra sa vwẹroso! Ọghẹnẹ vwẹ owẹ ghare ikọpini na.’ Ra vwọ dia ohwo rẹ uyota nẹrhẹ ovwẹ vwo omamọ rẹ ẹwẹn obrorhiẹn vwẹ obaro rẹ Jihova Ọghẹnẹ. Ọ je nẹrhẹ me sa chọn orua mẹ vẹ ihwo efa uko vwọ dia ihwo rẹ uyota.”—Sonny vwẹ Hong Kong.

• Ẹwẹn re Dọe

  “Mẹvwẹ ohwo rode vwẹ ibanki rode ọvo. Vwẹ iruo nana, ra vwọ dia ohwo rẹ uyota bẹn kidie a guọnọ efe. Ẹwẹn ro rhe ihwo buebun yen, ‘Die yen chọre siẹrẹ ohwo de ru imiwayo vwo fe?’ Ẹkẹvuọvo, kidie nẹ mẹvwẹ ohwo rẹ uyota, mi vwo ẹwẹn re dọe. Mi brorhiẹn rẹ me vwọ dia ohwo rẹ uyota, otorobo ri che norhe-e. Ihwo ri mi ruiruo kẹ, riẹnre nẹ mi che se gun efian kẹ aye-en.”—Tom vwẹ United States.

• Ọghọ

  “Ọga mẹ vuẹ vwẹ nẹ mi gun efian kpahen erọnvwọn evo ri ghwruru vwẹ iruo rẹ avwanre, ẹkẹvuọvo me senre. Re vwo mu iji na nu, ọga mẹ da kpẹvwẹ ovwẹ mamọ me vwọ dia ohwo rẹ uyota. A guọnọ uduefiogbere a ke sa dia ohwo rẹ uyota vwevunrẹ akpọ nana. Ukuotọ rọyen, ihwo ke sa vwẹroso, ji muọghọ kẹ avwanre.”—Kaori vwẹ Japan.

Omamọ rẹ ẹwẹn obrorhiẹn, ẹwẹn re dọe, kugbe ọghọ, djerephia nẹ ra vwọ dia ohwo rẹ uyota vọnre vẹ erere. Ọ dia ọtiọyen?