1, 2. (a) Die yen “ẹse [rẹ Ọghẹnẹ] rẹ unu se gbe-e” na churobọ si? (b) Enọ vọ yen a cha fuẹrẹn vwẹ uyovwinrota nana?

JIHOVA dje ẹguọnọ rọ ma rho kparobọ kẹ avwanre, ro vwo ji Ọmọ ọghanghanre rọyen, Jesu, vwọ rhe otọrakpọ na! (Jọn 3:16; 1 Jọn 4:9, 10) Ọyinkọn Pọl se okẹ nana “ẹse . . . rẹ unu se gbe-e.” (2 Kọrẹnt 9:15) Diesorọ Pọl vwọ ta eta nana?

² Pọl riẹnre nẹ izobo rẹ Jesu kẹ avwanre imuẹro nẹ ive iyoyovwin rẹ Ọghẹnẹ eje che rugba. (Se 2 Kọrẹnt 1:20.) Ọnana mudiaphiyọ nẹ “ẹse [rẹ Ọghẹnẹ] rẹ unu se gbe-e” na churobọ si izobo rẹ Jesu vẹ uruemu esiri kugbe ẹguọnọ ro jẹ rhẹriẹ rẹ Jihova dje kẹ avwanre ọkieje. Vwọrẹ uyota, ẹse nana vrẹ oborẹ unu se gbe. Mavọ yen okẹ ọghanghanre nana se djobọte avwanre? Idjerhe vọ yen ọnana se vwo mu avwanre vwo muegbe vwọ kẹ Ẹkarophiyọ rẹ Ughwu rẹ Jesu re che ru vwẹ Wednesday, March 23, 2016?

3, 4. (a) Mavọ oma ru we siẹrẹ ohwo da kẹ wẹ okẹ? (b) Mavọ yen okẹ ọghanghanre ọvo se vwo wene akpọ wẹn?

³ Oma vwerhen avwanre siẹrẹ ohwo da kẹ avwanre okẹ. Ẹkẹvuọvo, okẹ evo ghanre mamọ te ẹdia rẹ ayen de se wene akpeyeren avwanre. Kerẹ udje, vwẹ ẹro roro nẹ wo ru orọnvwọn ọvo. Ọtiọyena ke brorhiẹn rẹ ughwu hwe we. Siẹvuọvo na, ohwo ọvo rẹ wọ riẹnre-e, da vwomakpahotọ nẹ e hwe ọyen ukperẹ e vwo hwe we. Mavọ yen oma che ru we kpahen okẹ ọghanghanre nana?

⁴ Okẹ ọghanghanre yena cha nẹrhẹ wo ru ewene evo vwẹ akpeyeren wẹn. Ọkiọvo, ọ sa je nẹrhẹ wo vwo ẹguọnọ rẹ ihwo, vwo ghovwo ihwo ri gbe we ku, je dia ohwo rọ kẹ okẹ ri ghwologhwolo vrẹ obo ri jovwo. Wọ cha davwẹngba vwo djephia nẹ ẹse nana dawaro bẹsiẹ wo vwo ghwu.

5. Idjerhe vọ yen okẹ rẹ ọtanhirhe rẹ Ọghẹnẹ na vwọ rho vrẹ okẹ efa?

⁵ Okẹ rẹ ọtanhirhe rẹ Ọghẹnẹ vwọ kẹ avwanre na rho vrẹ ọ re vwo ru udje na. (1 Pita 3:18) Di roro: Avwanre eje reuku rẹ umwemwu mie Adam, ughwu yen osa rẹ umwemwu na. (Rom 5:12) Ẹguọnọ yen mu Ọghẹnẹ vwo ji Jesu rhe akpọ na nẹ o ghwu kẹ ihworakpọ eje, “ọ sa vwọ davwe ughwu kẹ ohwo kohwo.” (Hibru 2:9) Ẹkẹvuọvo erere rẹ izobo rẹ Jesu na vrẹ ọtiọyen! O che si ughwu no bẹdẹ. (Aizaya 25:7, 8; 1 Kọrẹnt 15:22, 26) Kohwo kohwo ro se Jesu gbuyota kọ dia bẹdẹ vwọrẹ ufuoma vẹ omavwerhovwẹn, ọ da tobọ dianẹ ayen che nene Jesu sun vwẹ odjuvwu kerẹ ivie yẹrẹ ayen cha vwẹ otọrakpọ na vwọ reuku. (Rom 6:23; Ẹvwọphia 5:9, 10) Ebruphiyọ efa vọ yen okẹ rẹ Jihova na je cha ghwa rhe?

6. (a) Ebruphiyọ rẹ okẹ rẹ Jihova vọ yen wọ rhẹro rọyen? (b) Djunute erọnvwọn erha rẹ okẹ rẹ Ọghẹnẹ che mu avwanre vwo ru.

⁶ Okẹ rẹ Ọghẹnẹ ji che ru akpọ na phiyọ iparadaisi, o che si ega no, je rhọvwọn ihwo ri ghwuru nẹ ushi. (Aizaya 33:24; 35:5, 6; Jọn 5:28, 29) Avwanre vwo ẹguọnọ rẹ Jihova vẹ Ọmọ ọghanghanre rọyen “fiki rẹ ẹse rọye rẹ unu se gbe-e” na. Die yen ẹse nana che mu avwanre vwo ru? Ọ cha nẹrhẹ avwanre (1) nabọ vwẹrokere Jesu Kristi, (2) vwo ẹguọnọ rẹ iniọvo avwanre, kugbe (3) vwo ghovwo ihwo efa nẹ otọ rẹ ubiudu rhe.

7, 8. Die yen ẹguọnọ rẹ Kristi che mu avwanre vwo ru?

⁷ Ẹsosuọ, e jẹ a vwẹ akpeyeren avwanre vwo muọghọ kẹ Jesu. Ọyinkọn Pọl da ta: “Ẹguọnọ ri Kristi ri sun avwanre.” (Se 2 Kọrẹnt 5:14, 15.) Pọl riẹnre nẹ avwanre de rhiabọreyọ ẹguọnọ rẹ Jesu, o che sun yẹrẹ mu avwanre vwo vwo ẹguọnọ rẹ Jesu, ji muọghọ vwọ kẹ. E de ghini vwo ẹruọ rẹ obo rẹ Jihova ru kẹ avwanre, ẹguọnọ rọyen na che mu avwanre vwo yeren akpọ vwẹ idjerhe rọ djephia nẹ e muọghọ kẹ Jesu. Mavọ yen e se vwo ruo?

⁸ Ẹguọnọ re vwo kpahen Jihova che mu avwanre vwọ vwẹrokere udje rẹ Jesu kpẹkpẹkpẹ. (1 Pita 2:21; 1 Jọn 2:6) E se dje ẹguọnọ avwanre vwọ kẹ Ọghẹnẹ vẹ Kristi siẹrẹ e de nyupho rayen. Jesu da ta: “Ohwo rọ yọnrọn irhi mẹ rọ da sẹro rẹ ayen, oyẹ hẹ ohwo rọ  guọnọ ovwẹ; ohwo rọ guọnọ ovwẹ Ọsẹ mẹ kọ guọnọ, ke me guọnọ ke me vwẹ oma mẹ phia kẹ.”—Jọn 14:21; 1 Jọn 5:3.

9. Ọdjorho vọ yen avwanre hirharokuẹ?

⁹ Vwẹ ọke rẹ Ẹkarophiyọ rẹ Ughwu rẹ Jesu nana, ofori nẹ e roro kpahen oborẹ avwanre yeren akpọ wan. Ọtiọyena, nọ oma wẹn: ‘Vwẹ ẹdia vọ yen me da vwẹrokere Jesu? Ẹdia vọ mi de se ru yovwinphiyọ?’ Ofori ra vwọ nọ oma avwanre enọ nana kidie akpọ na guọnọre nẹ avwanre vwẹrokere ayen. (Rom 12:2) E rhe nomaso-o, avwanre sa vwẹrokere iyono vẹ ihwo re titẹ vwẹ akpọ na. (Kọlose 2:8; 1 Jọn 2:15-17) Mavọ yen avwanre sa vwọ sen ọdjorho nana?

10. Enọ vọ yen a sa nọ oma avwanre vwẹ ọke rẹ Ẹkarophiyọ nana? Die yen ẹkpahọnphiyọ rẹ enọ nana che mu avwanre vwo ru? (Ni uhoho rẹsosuọ na.)

¹⁰ Vwẹ ọke rẹ Ẹkarophiyọ nana, ofori nẹ a fuẹrẹn irhuon, ifimu, uhworo kugbe erọnvwọn rehẹ ikọmputa, ifonu, yẹrẹ itablẹti rẹ avwanre. Nọ oma wẹn: ‘Oma cha vo ovwẹ ọ da dianẹ Jesu hẹ etinẹ, ọ da mrẹ osẹnvwe mẹ?’ (Se 1 Timoti 2:9, 10.) ‘Irhuon mẹ che djephia nẹ mẹvwẹ ghini odibo rẹ Kristi? Jesu se ni ifimu mi nẹ? Ọ sa kerhọ rẹ uhworo me kerhọ kẹ? Ọ da reyọ ifonu yẹrẹ itablẹti mẹ, obo rọ cha mrẹ che je? Me sa vuẹ kpahen obo ri je vwe vwevunrẹ ividio gemu me fa?’ Ofori nẹ ẹguọnọ rẹ avwanre vwọ kẹ Jihova mu avwanre vwo do erọnvwọn eje ri je fo kẹ Inenikristi kufia, o toro obo rọ ghanre te-e. (Iruo Rẹ Iyinkọn Na 19:19, 20) Ọke rẹ avwanre vwọ vwomakpahotọ kẹ Jihova, avwanre veri nẹ a cha vwẹ akpeyeren avwanre vwo muọghọ kẹ Kristi. Ọtiọyena, kẹ ofori nẹ a kẹnoma kẹ kemu kemu rọ sa nẹrhẹ ọ bẹn ra vwọ vwẹrokere Jesu.—Matiu 5:29, 30; Filipae 4:8.

11. (a) Mavọ yen ẹguọnọ re vwo kpahen Jihova vẹ Jesu mu avwanre vwo ruiruo rẹ aghwoghwo na? (b) Idjerhe vọ yen ẹguọnọ se vwo mu avwanre vwọ chọn ihwo efa uko vwẹ ukoko na?

¹¹ Ẹguọnọ re vwo kpahen Jesu mu avwanre vwo ruiruo aghwoghwo na vẹ oruru, ji yono ihwo. (Matiu 28:19, 20; Luk 4:43) Wọ sa ghwọrọ inọke 30 yẹrẹ 50 vwẹ iruo aghwoghwo na kerẹ ọkobaro ubrọke vwẹ ọke rẹ Ẹkarophiyọ nana? Ọshare ọvo rọhẹ ẹgbukpe 84, rẹ aye rọyen ghwuru, rorori nẹ ọ cha sa dia ọkobaro-o kidie ọ ghwore, oma rọyen je ga-an. Ẹkẹvuọvo, ekobaro rehẹ ekogho rọyen vwẹ ukẹcha vwọ kẹ. Ayen muo kpo asan ro de se ruiruo aghwoghwo na. Ukuotọ rọyen, oniọvo na de ru inọke 30 na gba. Wọ sa vwẹ ukẹcha kẹ ohwo ọvo vwẹ ukoko wẹn vwọ dia ọkobaro ubrọke vwẹ emeranvwe rẹ March yẹrẹ April? Vwọrẹ uyota, ọ dia ihwo eje yen cha sa dia ekobaro-o, jẹ e se phiba ọke vẹ ẹgba rẹ avwanre vwo ruiruo rẹ ẹga rẹ Jihova. E de ru ọtiọyen, ke se djephia nẹ ẹguọnọ rẹ Jesu yen mu avwanre vwo ruiruo kerẹ Pọl. Die ọfa yen ẹguọnọ rẹ Ọghẹnẹ che mu avwanre vwo ru?

12. Die yen ẹguọnọ rẹ Ọghẹnẹ che mu avwanre vwo ru?

¹² Ọrivẹ, ofori nẹ ẹguọnọ rẹ Ọghẹnẹ mu avwanre vwo vwo ẹguọnọ rẹ iniọvo rẹ avwanre. Ọyinkọn Jọn de si: “Imoni re ghare; ọ da dianẹ Ọghẹnẹ guọnọ avwanre te ọtiọye, avwanre ke je guọnọ  ohwohwo rhe.” (1 Jọn 4:7-11) Ọtiọyena, ọ da dianẹ Ọghẹnẹ vwo ẹguọnọ rẹ avwanre ko ji fo nẹ avwanre vwo ẹguọnọ rẹ iniọvo avwanre. (1 Jọn 3:16) Idjerhe vọ yen e se vwo dje ẹguọnọ vwọ kẹ ayen?

13. Udje vọ yen Jesu phi phiyotọ, ro djerephia nẹ o vwo ẹguọnọ kpahen ihwo?

¹³ Udje rẹ Jesu dje oborẹ avwanre se vwo vwo ẹguọnọ rẹ ihwo efa. Ọke rọ vwọ hẹ akpọ na, ọ chọn ihwo uko, ma rho kẹ ihwo re vwomakpotọ. Ọ sivwin ihwo re muọga, ikpono, irhuẹro, idierhọ vẹ idiunu. (Matiu 11:4, 5) Vwọ fẹnẹ ilori rẹ ẹga na, oma vwerhen Jesu siẹrẹ o de yono ihwo re guọnọ riẹn kpahen Ọghẹnẹ. (Jọn 7:49) O vwo ẹguọnọ rẹ ihwo re vwomakpotọ, ọ je davwẹngba rọ vwọ chọn ayen uko.—Matiu 20:28.

14. Die yen wo se ru vwo dje ẹguọnọ vwọ kẹ iniọvo wẹn?

¹⁴ Ọke rẹ Ẹkarophiyọ na, ọyena je omamọ ọke re vwo roro kpahen obo ra sa vwọ chọn iniọvo na uko, ma rho e re kpakore. Wọ kọn bru ayen ra? Wo se chere emu rhe ayen, wiowian vwẹ uwevwin rayen, mu ayen kpo uyono, yẹrẹ nene ayen wian vwẹ iruo aghwoghwo na? (Se Luk 14:12-14.) E jẹ ẹguọnọ rẹ Ọghẹnẹ mu avwanre vwo dje ẹguọnọ vwọ kẹ iniọvo avwanre!

15. Die yen ofori nẹ avwanre mrẹvughe?

¹⁵ Ọrerha, ẹguọnọ rẹ Jihova mu avwanre vwo ghovwo iniọvo avwanre. Avwanre eje reuku rẹ umwemwu vẹ ughwu mie Adam, ohwo vuọvo cha sa tanẹ, “Me guọnọ ọtanhirhe na-a.” Odibo rẹ Ọghẹnẹ rọ ma fuevun dede, je guọnọ ọtanhirhe na. E mu osa rode nu avwanre uyovwin nure! Diesorọ o vwo fo ra vwọ mrẹ ọnana vughe? A mrẹ ẹkpahọnphiyọ rẹ onọ yena vwẹ ọvo usun rẹ idje rẹ Jesu.

16, 17. (a) Die yen udje rẹ Jesu rẹ ovie vẹ idibo na yono avwanre? (b) Ra vwo fuẹrẹn udje rẹ Jesu nana nure na, die yen orhiẹn-ebro wẹn?

¹⁶ Jesu ru udje rẹ ovie ọvo rọ vwẹ osa rode rẹ odibo rọyen vwo ghovwo, igho ro bun te ikpahọ uriorin ihwe. Ẹkẹvuọvo, odibo na sa vwẹ ikpahọ iyorin vwo ghovwo odibo ọfa-a. Evwoghovwo rẹ ovie na rhe mu odibo na vwo ghovwo ọrivẹ rọyen na. Ivun de miovwo ovie na mamọ ro vwo nyo obo re phiare. Ọ da ta: “Wẹ odibo ọbrabra na, me da vwẹ eghughu rẹ igho na vwo ghovwo uwe, fikiridie wọ rẹ vwẹ: Kidie wo gbi vwo ghovwo ọrivẹ wẹn kirobo mi ni aruẹdọn wẹ-ẹ?” (Matiu 18:23-35) Kerẹ ovie na, Jihova vwẹ osa rode vwo ghovwo avwanre nure. Die yen ẹguọnọ vẹ arodọnvwẹ rẹ Jihova mu avwanre vwo ru?

¹⁷ Re vwo muegbe vwọ kẹ Ẹkarophiyọ  na, gba nọ oma wẹn: ‘Oniọvo ọvo gbe vwe ku? Ọ pha bẹnbẹn me vwọ reyọ vwo ghovwo?’ Ọ da dia ọtiọyen, ọnana omamọ ọke re vwo roro kpahen Jihova, ohwo “rọ choma ro vwo ghovwo.” (Nehemaya 9:17; Une Rẹ Ejiro 86:5) E de vwo ọdavwaro kpahen arodọnvwẹ rẹ Jihova na, ọ cha nẹrhẹ avwanre dje arodọnvwẹ na kẹ ihwo efa, ji vwo ghovwo ayen nẹ otọ rẹ ubiudu rhe. E rhe vwo ẹguọnọ rẹ iniọvo avwanre ji vwo ghovwo aye-en, Jihova che se vwo ẹguọnọ avwanre ji vwo ghovwo avwanre-e. (Matiu 6:14, 15) Oborẹ ayen ruru na sa miavwen avwanre, jẹ e de vwo ghovwo ayen, ọ cha kẹ avwanre omavwerhovwẹn.

18. Idjerhe vọ yen ẹguọnọ rẹ Ọghẹnẹ mu oniọvo aye ọvo vwo yerin ghene jẹgba rẹ oniọvo aye ọfa?

¹⁸ Ọ sa dia bẹnbẹn re vwo yerin ghene jẹgba rẹ iniọvo avwanre. (Se Ẹfesọs 4:32; Kọlose 3:13, 14.) Lily, ọyen oniọvo ọvo ro ru ọyena. ^[1] (Ni eta rẹ odjefiotọ.) Ọ vwẹ ukẹcha kẹ ayeuku re se Carol. Kerẹ udje, o mu Carol kpo kasan kasan rọ guọnọ ra eje, o nene kpo eki, o ji ruẹ erọnvwọn efa vwọ kẹ. Dede nẹ Lily ruẹ enana eje, jẹ Carol ji brenu hwe ọkieje, ọke evo ọ pha bẹnbẹn vwọ kẹ Lily. Dedena, Lily tẹnrovi omamọ uruemu ro rhe Carol, ọ da vwẹ ukẹcha vwọ kẹ omarẹ ikpe evo ri te ọke rẹ Carol vwọ muọga, o de ghwu. Dede nẹ ọ bẹn kẹ Lily ọke rọ vwọ vwẹ ukẹcha kẹ Carol, ọ da ta: “Me rhẹro rẹ ọke me cha vwọ mrẹ Carol vwẹ evrẹnushi na. Me guọnọ mrẹ omamọ rẹ uruemu ro che rhe, ọke rọ da dia ohwo rọ gbagba nu.” Ẹguọnọ rẹ Ọghẹnẹ se ghini mu avwanre vwo yerin ghene jẹgba rẹ iniọvo na, je rhẹro rẹ ọke rẹ ihwo ejobi cha vwọ dia gbagba bẹdẹ.

19. Die yen “ẹse . . . rẹ unu se gbe-e” rẹ Ọghẹnẹ na mu avwanre vwo ru?

¹⁹ Jihova ghene kẹ avwanre “ẹse . . . rẹ unu se gbe-e.” E jẹ ọ da avwanre ẹro ọkieje! Ọke rẹ Ẹkarophiyọ na ghini omamọ ọke re vwo roro kokodo kpahen erọnvwọn eje rẹ Jihova vẹ Jesu ru kẹ avwanre. E jẹ ẹguọnọ rayen na mu avwanre vwọ nabọ vwẹrokere Jesu, dje ẹguọnọ kẹ iniọvo na, ji vwo ghovwo iniọvo na nẹ otọ rẹ ubiudu rhe.