O vwo ọbe rẹ ẹga vuọvo rọ họhọ Baibol na-a. A je mrẹ ọbe vuọvo kerẹ Baibol na-a, rọ nẹrhẹ ihwo buebun vwo imuẹro kpahen oborẹ ayen segbuyota. O ji vwo ọbe ro rhiẹromrẹ ẹfuẹrẹn ọgangan vẹ ẹvwọsuọ kerẹ Baibol na-a.

Kerẹ udje, ihwo evo ri yono ẹbe kodo ke phraphro nẹ Baibol re vwori asaọkiephana vẹ e rẹsosuọ, diẹ ọvo-o. Ọshare ọvo ro yono kpahen ẹga kodo, da ta: “O che se mu avwanre ẹro nẹ eta rehẹ Baibol ẹsosuọ na yehẹ evunrẹ e re vwori nonẹna-a. Enana vọnre vẹ echobọ, ikpe ujorin buebun je wan tavwen e ki si ayen. Vwẹ idjerhe buebun, ọyen e vwọ fẹnẹ Baibol rẹsosuọ na.”

Ihwo buebun ji no nẹ Baibol na gbare-e, fikirẹ ẹga rẹ ayen ra nẹ ọkiemọ rhe. Kerẹ udje, ọsẹ vẹ oni rẹ Faizal dia Inenikristi-i, ọtiọyena kẹ ayen yoniro nẹ Baibol na ọbe ọfuanfon, ẹkẹvuọvo e wene eta rọyen re. Ọ da ta: “Ọnana da nẹrhẹ mi vwo ẹwẹn ivivẹ siẹrẹ ihwo da guọnọ ta ota kẹ vwẹ kpahen Baibol na. Mi no nẹ, ayen vwo Baibol rẹsosuọ na-a. I re weneri na yen ayen vwori!”

Ọ da tobọ dianẹ e wene Baibol na re, kẹ die yen o firi? Roro kpahen enọ nana: Ive iyoyovwin rehẹ Baibol na kpahen obaro na che muwẹro, ọ da tobọ dianẹ wọ riẹnre sẹ ive na hẹ Baibol ẹsosuọ na-a? (Rom 15:4) Wọ cha vwẹ oborẹ Baibol na tare vwo brorhiẹn eghanghanre ri shekpahen iruo, orua, yẹrẹ ẹga ọ da dianẹ Baibol re herọ nonẹna vọnre vẹ echobọ rẹ ihworakpọ?

Dede nẹ ẹbe sansan rẹ Baibol na re siri ẹsosuọ rha herọ-ọ, e ra rhoma si ọke grongron re wanre je herọ vẹ imanuskripti buebun. Mavọ yen imanuskripti nana sa vwọ vrabọ rẹ ẹghwọrọ, ẹvwọsuọ, vẹ ẹgbaẹdavwọn re vwo sio chọ? Rọ vwọ dianẹ Baibol na vrabọ rẹ erọnvwọn nana, idjerhe vọ yen ọnana sa vwọ bọn imuẹro wẹn gan kpahen Baibol re herọ nonẹna? Wọ cha mrẹ ẹkpahọnphiyọ rẹ enọ nana vwẹ iyovwinreta re vwọ kpahen ọnana.