1, 2. (a) Gbikun rẹ itẹ rẹ Jesu ro shekpahen ọghwẹrẹ na. (b) Mavọ yen itẹ na vwọ kanrunumu iruemu rẹ okẹ ri ghwologhwolo vẹ ẹserọphẹ?

ẸDẸ ọvo, ọghwẹrẹ ọvo da rhiọ kpo eki re se eshare evo nẹ e rhe wiowian vwẹ udju rọyen. Eshare na vwọ rhọnvwephiyọ uche igho rọ cha hwa kẹ ayen nu, ayen da ton owian phiyọ. Ọke vwọ yanran na, ọghwẹrẹ na de no nẹ ọ je guọnọ eshare efa vwọ kẹ owian na. O de kpo eki na, re se eshare efa vwọba e rẹsosuọ na, ọ vẹ ayen da je rhọnvwephiyọ osa rẹ ayen cha reyọ. Ọtiọyen o ji ru vwọ kẹ ihwo rọ tobọ durhie vwẹ ovwọnvwọn rẹ ẹdẹ na. Ọke vwo shere, o de se ayen koko rọ vwọ hwosa kẹ ayen, ọ da vwẹ uchunu rẹ igho vuọvo vwọ kẹ ayen eje, te e re wian vwẹ inọke buebun vẹ e re wianre vwẹ unọke ọvo. Ẹkẹvuọvo, e rẹsosuọ na ki brenu. Ọghwẹrẹ na da ta: ‘Ọ diẹ igho ra rhọnvwephiyọ yen me kẹ ovwan? Mi rhe vwo ẹgba me vwọ hwosa kẹ ewiowian mẹ kirobo me guọnọre? Ovwan rioma kidie mẹvwẹ ohwo ro ruẹse?’—Mat. 20:1-15.

² Itẹ rẹ Jesu nana nẹrhẹ avwanre karophiyọ ọvo usun rẹ iruemu rẹ Jihova rẹ Baibol na djunute, ọyehẹ “ẹserọphẹ”  rọyen. (Se 2 Kọrẹnt 6:1.) Ihwo re wiowian unọke ọvo na muwan rẹ osa ra vwọ kẹ ayen na-a, ẹkẹvuọvo ọghwẹrẹ na dje uruemu esiri vwọ kẹ ayen. A je fan ubiota na “ẹserọphẹ” phiyọ “aroesiri” vwẹ Baibol evo. Ọshare ọvo ro yono ọbe kodo da ta: “Ọhọ rẹ ubiota nana yen okẹ rẹ ọphẹ, orọnvwọn ra vwọ kẹ ohwo ro muwan rọye-en.”

3, 4. Idjerhe vọ yen Jihova vwo dje ẹserọphẹ rọyen kẹ ihworakpọ eje, kẹ diesorọ?

³ Baibol na ta ota kpahen “okẹ rẹ ẹserọphẹ rẹ Ọghẹnẹ.” (Ẹfe. 3:7) Idjerhe vọ yen Jihova vwọ kẹ avwanre “okẹ” nana, kẹ diesorọ? Avwanre rhe muwan rẹ ẹse nana ọ da dianẹ e ruẹ ọhọre rẹ Jihova gbagba. Ẹkẹvuọvo, avwanre shekpotọ vwẹ ẹdia nana. Ọ da nẹrhẹ Ovie Solomọn si: “O vwo ọvwata ọvuọvo vwẹ akpọ na ro jẹ imwemwu e ruo-o.” (Aghwo. 7:20) Ọyinkọn Pọl da je ta: “Ihwo ejobi ru umwemwu o rhe jẹ urinrin rẹ Ọghẹnẹ te avwanre obọ-ọ,” ọ je tanẹ “osa rẹ umwemwu hẹ ughwu.” (Rom 3:23; 6:23a) Ughwu yen ghwe fo avwanre jovwo.

⁴ Ẹkẹvuọvo, Jihova dje ẹguọnọ rọyen vwọ kẹ ihworakpọ ri jẹgba womarẹ ẹserọphẹ rọyen rẹ unu se gbe-e. O siobọnu okẹ rọ ma rho ro vwori vwọ kẹ avwanre, ọyehẹ “Ọmọ ọvuọvo rọye” ro rhi ghwu vwọ kẹ avwanre. (Jọn 3:16) Pọl de si kpahen Jesu nẹ a “vwẹ urinrin vẹ ọghọ tughẹ fiki rẹ oja rẹ ughwu, ọtiọye na vwẹ oma rẹ ẹserọphẹ rẹ Ọghẹnẹ ọ sa vwọ davwe ughwu kẹ ohwo kohwo.” (Hib. 2:9) Vwọrẹ uyota, “ẹserọphẹ rẹ Ọghẹnẹ na ọye hẹ arhọ ri bẹdẹ vwẹ evun ri Jesu Kristi Ọrovwavwanre.”—Rom 6:23b.

5, 6. Die yen che norhe siẹrẹ avwanre da hẹ otọ rẹ usuon rẹ (a) umwemwu? (b) ẹserọphẹ na?

⁵ Mavọ yen ihworakpọ vwọ tobọ riuku rẹ umwemwu vẹ ughwu nana? Baibol na da ta: “Fiki rẹ urhi ẹchọ rẹ ohwo ọvo [Adam,]” ughwu da rhe dia ovie vwẹ enu rẹ avwanre. (Rom 5:12, 14, 17) Ẹkẹvuọvo, ọ vwerhoma nẹ avwanre se brorhiẹn e vwo vrẹn nẹ otọ rẹ usuon rẹ umwemwu. E de vwo esegbuyota kpahen izobo rẹ ọtanhirhe rẹ Kristi, kẹ avwanre se phi oma phiyọ otọ rẹ usuon rẹ ẹserọphẹ rẹ Jihova. Mavọ e se vwo ruo? “Asan rẹ umwemwu de bu, etiyin ẹserọphẹ de me buẹ, ọtiọye na, kirobo rẹ umwemwu ria vwẹ evun rẹ ughwu na, ọtiọye rhe ẹserọphẹ je wan oma rẹ ọvwata re re te arho ri bẹdẹ vwẹ oma ri Jesu Kristi Ọrovwavwanre.”—Rom 5:20, 21.

⁶ Dede nẹ avwanre irumwemwu, ofori nẹ avwanre ghwe phi oma phiyotọ vwọ kẹ umwemwu-u. Jẹ, e de ru umwemwu, e jẹ a yare evwoghovwo rẹ Jihova. Pọl da vuẹ Inenikristi nẹ, “umwemwu gbi che vwẹ ogangan vwẹ enu ovwan ọfa-a, kidie ovwan gbe hẹ otọ rẹ urhi-i ẹkẹvuọvo kẹ otọ rẹ ẹserọphẹ ovwan epha.” (Rom 6:14) Eriyin na, avwanre hẹ otọ rẹ usuon rẹ ẹserọphẹ na. Die yen ọnana ghwa rhe? Pọl da je ta: “Ẹserọphẹ rẹ Ọghẹnẹ . . . yono avwanre ne siobọ nẹ egagọ rẹ ofian kugbe ẹguọnọ rẹ akpọ ofefe na, rere avwanre yere akpọ rẹ avwanre dẹndẹn yoyovwi vwẹ evun rẹ akpọ na.”—Tai. 2:11, 12.

7, 8. Diesorọ a sa vwọ tanẹ a mrẹ ẹserọphẹ rẹ Ọghẹnẹ vwẹ idjerhe sansan? (Ni ihoho rẹsosuọ na.)

⁷ Ọyinkọn Pita de si: “Kirobo ra kẹ ovwan okẹ bu te, ovwan je kẹ ohwohwo  rhe, kerẹ omuidi rẹ esiri rẹ Ọghẹnẹ rọ ghara ẹserọphẹ rọye.” (1 Pita 4:10) Die yen ọnana mudiaphiyọ? Otoro ebẹnbẹn rẹ avwanre hirharokuẹ-ẹ, Jihova sa chọn avwanre uko vwo yerin ghene ayen. (1 Pita 1:6) Ẹserọphẹ rẹ Ọghẹnẹ sa chọn avwanre uko vwo phi kebẹnbẹn kebẹnbẹn kparobọ.

⁸ Vwọrẹ uyota, a mrẹ ẹserọphẹ rẹ Jihova vwẹ idjerhe sansan. Ọyinkọn Jọn de si: “Avwanre ejobi, da mrẹ ẹserọphẹ kpahe ẹserọphẹ reyọ.” (Jọn 1:16) Ẹserọphẹ rẹ Ọghẹnẹ ro dje kẹ avwanre vwẹ idjerhe sansan kẹ avwanre ebruphiyọ buebun. Erhọ yen evo usun rayen?

9. Erere vọ yen te avwanre obọ fikirẹ ẹserọphẹ rẹ Jihova, kẹ mavọ yen avwanre se vwo dje ọdavwaro phia?

⁹ Evwoghovwo rẹ imwemwu. Fikirẹ ẹserọphẹ na, Jihova vwo ghovwo imwemwu rẹ avwanre siẹrẹ e de kurhẹriẹ, a de je davwẹngba vwọ họnre ẹwẹn rẹ umwemwu ro rhe avwanre na. (Se 1 Jọn 1:8, 9.) Arodọnvwẹ rẹ Ọghẹnẹ nẹrhẹ avwanre vwo ẹwẹn rẹ akpẹvwẹ, je vwẹ urinrin vwọ kẹ. Vwẹ ọbe rẹ Pọl si rhe Inenikristi ra jẹreyọ, ọ da ta: “[Jihova] si avwanre nẹ obọ re ogangan rẹ ebri, o de wene avwanre vwo kpo akpọ rẹ uvie rẹ ẹguọnọ rẹ Ọmọ rọye; Oma rọye a wan tan avwanre hirhe, je vwẹ oma rọye avwanre vwo evwoghovwo rẹ imwemwu.” (Kọl. 1:13, 14) Evwoghovwo rẹ imwemwu avwanre nẹrhẹ a mrẹ ebruphiyọ buebun efa.

10. Die yen avwanre riavwerhen rọyen fikirẹ ọtanhirhe na?

¹⁰ Omamọ rẹ oyerinkugbe vẹ Ọghẹnẹ. Fikirẹ umwemwu, e vwiẹ avwanre kerẹ evweghrẹn rẹ Ọghẹnẹ. Pọl mrẹ ọnana vughe ọke rọ vwọ tanẹ, “Ọke rẹ avwanre vẹ ọye vwọ hẹ ọvweghrẹ na a da vwẹ ughwu rẹ Ọmọ rọye vwọ rhuẹrẹ avwanre vẹ Ọghẹnẹ kugbe.” (Rom 5:10) Arhuẹrẹ nana nẹrhẹ avwanre vwo ufuoma vẹ Ọghẹnẹ. Pọl djerephia nẹ ẹserọphẹ rẹ Ọghẹnẹ yen nẹrhẹ e vwo uphẹn nana, rọ vwọ ta: “Avwanre [ihwo ra jẹreyọ na] vwọ rease fiki rẹ esegbuyota rẹ avwanre nure na, e gbe jẹ avwanre vẹ Ọghẹnẹ rhuẹrẹ kugbe vwẹ oma ri Jesu Kristi Ọrovwavwanre. Oma rọye avwanre wan vwo ẹserọphẹ rẹ avwanre mudia phihọ na.” (Rom 5:1, 2) Mavọ ebruphiyọ nana rho te!

11. Idjerhe vọ yen ihwo ra jẹreyọ na vwọ rhẹriẹ “igodẹ efa” na phiyọ evwata?

¹¹ E ru avwanre phiyọ evwata. Avwanre ejobi nama sikẹrẹ ẹdia rẹ ọvwata jovwo-o. Ẹkẹvuọvo, ọmraro Daniẹl da mraro nẹ vwẹ ọke rẹ oba na, “ihwo re ghwanre,” re dia e ra jẹreyọ na, ke cha “rhẹriẹ ihwo buebu hirhe phihọ ọvwata.” (Se Daniẹl 12:3.) Womarẹ iruo aghwoghwo na, ayen rhẹriẹ iduduru rẹ “igodẹ efa” phiyọ ẹdia rẹ ọvwata vwẹ obaro rẹ Jihova. (Jọn 10:16) Dedena, ẹserọphẹ rẹ Ọghẹnẹ yen nẹrhẹ ayen se ruo. Pọl da je ta: “Ase rẹ avwanre kẹ ọphẹ, vwẹ oma rẹ ẹserọphẹ rẹ ẹtanhirhe rẹ iruo ride ri Jesu Kristi ru kẹ avwanre.”—Rom 3:23, 24.

12. Idjerhe vọ yen ẹrhovwo vwo churobọ si ẹserọphẹ rẹ Ọghẹnẹ?

¹² E se sikẹrẹ Ọghẹnẹ womarẹ ẹrhovwo ẹnẹ. Fikirẹ ẹserọphẹ rẹ Jihova, ke se bro ra vwẹ ekete rọyen womarẹ ẹrhovwo ẹnẹ. Ọ da nẹrhẹ Pọl se ekete rẹ Jihova, “ekete rẹ ẹserọphẹ na,” ọ da je vuẹ avwanre nẹ a nẹrhovwo kẹ vẹ “ẹroẹvwọsuọ.” (Hib. 4:16a) Jihova kẹ avwanre  uphẹn nana womarẹ Ọmọ rọyen, rọ nẹrhẹ avwanre vwo “aroeyivwo kugbe udu vwo sikẹrẹ fiki rẹ esegbuyota rẹ avwanre vwo kpahọ.” (Ẹfe. 3:12) Uphẹn nana ghine odjephia rẹ ẹserọphẹ rọyen.

13. Idjerhe vọ yen ẹserọphẹ vwọ chọn avwanre uko vwẹ “ọke rẹ ọbẹnvwẹ”?

¹³ Ukẹcha vwẹ ọke ra ghwa vwọ guọnọ. Pọl durhie avwanre nẹ a nẹrhovwo rhe Jihova ọkieje, “rere avwanre mrẹ arodọvwẹ reyọ kugbe ẹserọphẹ rọ cha avwanre uko vwẹ ọke rẹ ọbẹnvwẹ.” (Hib. 4:16b) Kọke kọke avwanre de hirharoku ebẹnbẹn vẹ ofudjevwe rẹ akpọ, avwanre se kperi se Jihova vwọ kẹ ukẹcha rọyen. Dede nẹ avwanre fo ihwo rọ kerhọ kẹ-ẹ, o ji nyo use rẹ avwanre, ọkiọvo ọ kẹ avwanre ẹkpahọnphiyọ womarẹ iniọvo ukoko na rere “avwanre sa vwẹ obọ saudu nẹ, Ọrovwohwo hẹ ọchuko mẹ, oshọ gbi mu uvwe-e; kidie ohwo se ru kẹ vwẹ?”—Hib. 13:6.

14. Idjerhe vọ yen ẹserọphẹ rẹ Jihova vwọ kẹ avwanre erere?

¹⁴ Uchebro vwọ kẹ ubiudu avwanre. Ebruba rode ọvo rẹ avwanre mrẹ fikirẹ ẹserọphẹ rẹ Jihova yen uchebro vwẹ ọke rẹ ẹwẹn na da hra totọ. (Une 51:17) Pọl de ji si rhe Inenikristi rehẹ ẹdia rẹ omukpahen vwẹ Tẹsalonaika: “Gbe jẹ ekpuyovwi rẹ Ọrovwavwanre Jesu Kristi, kugbe Ọghẹnẹ Ọsẹ rẹ avwanre, rọ guọnọ avwanre rọ da kẹ avwanre ufuoma ri bẹdẹ kugbe omamọ rẹ iphiẹrohọ rẹ ẹserọphẹ, o bru udu rẹ ovwan uche ọ vwẹ owọ rẹ [ovwan] muotọ.” (2 Tẹsa. 2:16, 17) Mavọ ọ vwerhen oma te a vwọ riẹn ẹguọnọ rẹ Jihova vwo kpahen avwanre fikirẹ ẹserọphẹ rọyen!

15. Iphiẹrophiyọ vọ yen avwanre vwori fikirẹ ẹserọphẹ rẹ Ọghẹnẹ?

 ¹⁵ Iphiẹrophiyọ rẹ arhọ ri bẹdẹ. Kerẹ irumwemwu, avwanre vwo iphiẹrophiyọ jovwo-o. (Se Une Rẹ Ejiro 49:7, 8.) Ẹkẹvuọvo, Jihova da rhe kẹ avwanre obọdẹn rẹ iphiẹrophiyọ. Jesu ve kẹ idibo rọyen nẹ, “Ọnana hẹ ọhọre rẹ Ọsẹ mẹ na, nẹ ohwo kohwo rọ mrẹ Ọmọ na nu ro de segbuyota ko vwo arhọ ri bẹdẹ.” (Jọn 6:40) Vwọrẹ uyota, iphiẹrophiyọ rẹ arhọ ri bẹdẹ na, okẹ, uvi rẹ odjephia rẹ ẹserọphẹ rẹ Ọghẹnẹ. Pọl ro vwo ọdavwaro kpahen okẹ nana, da ta: “Ẹserọphẹ rẹ Ọghẹnẹ rhe vwẹ oma phiare, ọ da vwẹ esivwo vwọ kẹ ihwo ejobi.”—Tai. 2:11.

16. Mavọ yen Inenikristi evo vwẹ ẹgbukpe ujorin ẹsosuọ vwọ reyọ ẹserọphẹ rẹ Ọghẹnẹ vwọ heha?

¹⁶ Dede nẹ ẹserọphẹ rẹ Jihova kẹ avwanre ebruphiyọ buebun, e jẹ e roro nẹ o che rhiabọreyọ iruemu rẹ avwanre eje-e. Inenikristi evo vwẹ ẹgbukpe ujorin ẹsosuọ, davwẹngba ayen vwọ “rhẹriẹ ẹserọphẹ rẹ Ọghẹnẹ phihọ umwemwu.” (Jud 4) Ihwo nana roro nẹ ayen se ru umwemwu odedede, Jihova che vwo ghovwo ayen. Vwọ vrẹ ọyena, ayen je davwẹngba vwọ riẹriẹ iniọvo efa phiyọ umwemwu eruo. Nonẹna, kohwo kohwo ro ji vwo uruemu nana, jẹ ọ “kpare ophu rẹ [ẹwẹn, NW] rẹ ẹserọphẹ na.”—Hib. 10:29.

17. Ọghwọku ọgangan vọ yen Pita vwọ phia?

¹⁷ Nonẹna, Eshu je riẹriẹ Inenikristi evo vwo roro nẹ ayen se ru umwemwu odedede, Ọghẹnẹ che gbe arodọnvwẹ vwọ kẹ ayen. Ẹkẹvuọvo, dede nẹ Jihova vwo owenvwe ro vwo ghovwo irumwemwu ri kurhẹriẹ, ọ guọnọre nẹ avwanre họnre vwọso jẹgba rọhẹ oma avwanre na. O de mu Pita vwo si: “Imoni, rẹ ovwan vwọ riẹn ọnana nure na, gba kẹnoma rere oruchọ rẹ ihwo ri jẹ urhi ẹriẹn na vwo jẹ ovwan esio ghwro rẹ obo rẹ ovwan mudia phihọ na vwo je ghwro kuẹfia. Ẹkẹvuọvo gba rho vwẹ evun rẹ ẹserọphẹ kugbe erianriẹn rẹ Ọrovwavwanre kugbe Osivwi rẹ avwanre Jesu Kristi.”—2 Pita 3:17, 18.

18. Ewian vọ yen te avwanre fikirẹ ẹserọphẹ rẹ Jihova?

¹⁸ Kerẹ ihwo re mrẹ ẹserọphẹ rẹ Ọghẹnẹ, o ji fo nẹ avwanre reyọ erọnvwọn rẹ avwanre vwori vwo muọghọ kẹ Ọghẹnẹ, ji vwo ru erhuvwu kẹ ihwo efa. Vwẹ idjerhe vọ? Pọl da kpahenphiyọ: “Kirobo rẹ ẹse ro ru avwanre fẹnẹre, ẹserọphẹ rọ ghare kẹ avwanre na, . . . ọ da dia ọ rẹ ẹga, o ghwe nene ẹga; ọ ro yono, o ghwe nene uyono rọye; ọ ro bruche, o ghwe nene uchebro rọye; . . . ọ ro nẹ aruẹdọn, ọ vwẹ omavwerhe ruo.” (Rom 12:6-8) Ẹserọphẹ rẹ Jihova na kẹ avwanre oghwa re vwo ruiruo rẹ aghwoghwo na vẹ oruru, yono ihwo Baibol na, phiuduphiyawọ rẹ iniọvo na, ji vwo ghovwo kohwo kohwo ro gbe avwanre ku.

19. Owian vọ yen a cha fuẹrẹn vwẹ uyono rọ vwọ kpahen ọnana?

¹⁹ Kerẹ ihwo ri rhiẹromrẹ ẹserọphẹ rẹ Ọghẹnẹ vẹ ẹwẹn rẹ akpẹvwẹ, e jẹ ọnana mu avwanre vwọ davwẹngba avwanre eje vwo “se oseri kẹ iyẹnrẹ esiri rẹ ẹserọphẹ rẹ Ọghẹnẹ.” (Iruo 20:24) A cha nabọ fuẹrẹn owian nana vwẹ uyono rọ vwọ kpahen ọnana.