Wọ muọga vwẹ ọmọke krẹn dẹvure? Ọ sa dianẹ wọ fobọ vrẹ nẹ enu rẹ ọga na, ọkiọvo ọ je chọrowẹro re. Jẹ, ọ dia ọtiọyen uvweri hepha-a. Alan Wolfelt rọ dia ohwo ro yono ọbe kodo, de si vwẹ ọbe re se Healing a Spouse’s Grieving Heart: “A sa ‘kpairoro’ vrẹ uvweri-i,” ẹkẹvuọvo ọ da je ta: “Ọke vwọ yanran na, ẹwẹn wẹn se kpotọ womarẹ ukẹcha rẹ ihwo efa.”

Kerẹ udje, roro kpahen oborẹ Ebraham ruru ọke rẹ aye rọyen vwo ghwu. Baibol na tare nẹ, “Ebraham de vweri Sera ọ da viẹ kẹ.” Ota yena, “Ebraham de vweri” na, mudiaphiyọ nẹ ọke wanvrẹ o ki se yerin ghene uvweri na. * Ohwo ọfa yen Jekọp, ra phiẹnre nẹ eranvwe rọ djoma hwe ọmọ rọyen Josẹf. Jekọp vwere ọmọ rọyen na “ẹdẹ buebu,” te asan rẹ orua rọyen se bruche-e. Jekọp ji vwere ughwu rẹ ọmọ rọyen na vwẹ ikpe buebun.—Jẹnẹsis 23:2; 37:34, 35; 42:36; 45:28.

Nonẹna, ọtiọyen ọ je hepha kẹ ihwo ri vwere uvweri siẹrẹ ohwo rọ kẹrẹ ayen de ghwu. E jẹ a ta ota kpahen ihwo ivẹ.

• “Ọshare mẹ, Robert, ghwuru vwẹ July 9, 2008. Urhiọke rẹ ẹdẹ rẹ asidẹnti na phiare na fẹnẹ ẹdẹ efa-a. Kirobo ro ruẹ jovwo, avwanre da riemu nu, ọ gbane ovwẹ, avwanre me fiọnfiọn unu, je vuẹ ohwohwo nẹ ‘mi vwo ẹguọnọ wẹ.’ Ẹgbukpe esan wanre, jẹ ọ je da vwẹ mamọ. Ọshare mẹ na cha sa chọrovwẹro bẹdẹ-ẹ.”—Gail, rọhẹ ẹgbukpe 60.

• “Dede nẹ aye mẹ vwo ghwu na, ọ vrẹ ẹgbukpe 18 re, jẹ ọ je da vwẹ, mi ji vwere. Siẹrẹ me da mrẹ orọnvwọn oyoyovwin rẹ Ọghẹnẹ mare, ke me karophiyọ aye mẹ, oborẹ oma rha vwerhọn te ọ da dianẹ ọ hẹ etinẹ.”—Etienne, rọhẹ ẹgbukpe 84.

Vwọrẹ uyota, uvweri so ọmiaovwẹ ogrongron vwọ kẹ ohworakpọ. Dohwo dobo ro vwerẹ wan, ọtiọyena, o rhe fo ra vwọ vwẹ ihwo vwo guẹdjọ fikirẹ oborẹ ayen vwere uvweri wa-an. Uvweri avwanre da tobọ gan dede, ofori nẹ e brorhiẹn hwe oma-a. Mavọ yen e se vwo yerin ghene uvweri?