Uchebro buebun herọ kpahen ota nana. Ẹkẹvuọvo, ọ dia eje yen sa chọn ohwo uko-o. Kerẹ udje, evo sa vuẹ wẹ nẹ wọ viẹ-ẹ yẹrẹ dion phiyọ oma. Efa sa vuẹ wẹ nẹ wọ viẹ gangan ji beroma. Baibol na vwẹ ubiẹro abavo vwo ni ẹdia nana, egbaerianriẹn buebun je vwẹ oka rẹ ubiẹro yena vwo no nonẹna.

Vwẹ ẹkuotọ evo, ihwo niro nẹ ọshare viẹ-ẹ. Jẹ, o ghini fo nẹ a vuoma rẹ oviẹ, tobọ vwẹ azagba? Egbaerianriẹn ri yono kpahen oma rẹ ohworakpọ tare nẹ oviẹ ọyen ẹbẹre ọvo rẹ uvweri. Vwọba, oviẹ sa chọn wẹ uko vwo yerin ghene uvweri na dede nẹ ughwu rẹ ohwo na da wẹ mamọ. Re vwo din uvweri phiyọ oma sa so omaẹkuọn ukperẹ erhuvwu. Ihwo tanẹ ofori ra vwọ viẹ-ẹ yẹrẹ ọshare viẹ-ẹ, ẹkẹvuọvo, Baibol na rhọnvwephiyọ ota nana-a. E jẹ e roro kpahen udje rẹ Jesu. Ọ viẹre vwẹ azagba, dede nẹ  o vwo ẹgba rọ vwọ rhọvwọn ugbeyan rọyen, Lazarọs nẹ ushi!—Jọn 11:33-35.

Ọke buebun, ophu se mu ohwo ro vwere uvweri, ma rho ohwo na de ghwu kpregede. O vwo erọnvwọn buebun re sa nẹrhẹ ophu mu ohwo na, kerẹ udje, ohwo ro muọghọ kẹ da ta erharhe eta vwọ kẹ. Ọshare ọvo vwẹ South Africa re se Mike da ta: “Ọsẹ mẹ ghwuru ọke me vwọ hẹ ẹgbukpe 14. Vwevunrẹ ughworivwin na, olori ẹga rẹ Anglican da tanẹ Ọghẹnẹ guọnọ emamọ ihwo, ọtiọyena, kọ fobọ reyọ ayen. * Ọnana da nẹrhẹ ophu mu vwe kidie avwanre guọnọ ukẹcha rọyen mamọ. Ẹgbukpe 63 wanre, jẹ ọ je da vwẹ mamọ.”

Kẹ ẹwẹn rẹ abe vwo? Ohwo rọhẹ ẹdia rẹ uvweri se roro nẹ, ‘O rhe ghwu-u, ọ da dianẹ mi ru enẹ yẹrẹ enẹ,’ ma rho ọ da dianẹ o ghwuru kpregede. Yẹrẹ ọ da dianẹ wẹ vẹ ohwo na vwo ẹghwọ o ki ghwu. Ọnana sa nẹrhẹ ẹwẹn rẹ abe na rhoma ganphiyọ.

Ọ da dianẹ ophu vẹ ẹwẹn rẹ abe kpokpo uwe, wo dion phiyọ oma-a. Ukperẹ ọtiọyen, ta ota kẹ omamọ rẹ ugbeyan rọ sa kerhọ wẹ je kẹ wẹ imuẹro nẹ ẹwẹn ro rhe we na ghwa chọ-ọ. Baibol na karophiyọ avwanre nẹ, “Igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.”—Isẹ 17:17.

Jihova Ọghẹnẹ rọ ma avwanre yen Ugbeyan rọ ma rho rẹ ohwo rọhẹ ẹdia uvweri se vwo. Ta ọdavwẹ wẹn eje vwọ kẹ womarẹ ẹrhovwo, kidie “ọye re vwẹ ẹro te we.” (1 Pita 5:7) Vwọba, o ve kẹ avwanre nẹ ihwo ri ru ọtiọyen, ẹwẹn rayen che totọ womarẹ “ufuoma rẹ Ọghẹnẹ rọ nọ ẹruọ ejobi.” (Filipae 4:6, 7) Rhiabọreyọ ukẹcha rẹ Ọghẹnẹ womarẹ Baibol na. Si ẹkpo rẹ Baibol re sa kẹ wẹ uchebro phiyotọ. (Ni  ekpeti na.) Wọ sa tobọ riẹn evo kwuyovwin. Enana sa vwẹ ukẹcha kẹ wẹ ma rho vwẹ ason wẹ ọvo da herọ, wọ da je mrẹ bẹnbẹn wọ vwọ vwerhẹn.—Aizaya 57:15.

O krinọ-ọ na, ikansa de hwe aye rẹ ọshare ọvo ro te ẹgbukpe 40 re, rẹ avwanre che se nẹ Jack. Jack da tanẹ ọkiọvo ọ mrẹ oma rọyen vwẹ ẹdia rẹ ọruvwohwo. Ẹkẹvuọvo, ẹrhovwo chọn rọ uko. Ọ da ta: “Me da nẹrhovwo rhe Jihova, me rha mrẹ oma mẹ vwẹ ẹdia rẹ ọruvwohwo-o. Ọke buebun mi de vrẹn vwẹ uherevie rẹ ason, ovwerhẹn rhe sun uvwe-e. Jẹ mi de se, ji roro kpahen ẹkpo rẹ Baibol ri se bru uvwe uche, me da je ta ọdavwẹ mẹ kẹ Jihova womarẹ ẹrhovwo, ẹwẹn mẹ ko totọ doe, ke me mrẹ ufuoma vwẹ ubiudu mẹ, ọke yena, ovwerhẹn kọ rhoma sun uvwe.”

Eghene aye ọvo herọ re se Vanessa, rẹ ọga hwe oni rọyen. O ji rhiẹromrẹ ẹgba rẹ ẹrhovwo. Ọ da ta: “Ọke rẹ ofu de dje vwe, ki mi se odẹ rẹ Ọghẹnẹ, je me viẹ. Jihova kerhọ rẹ ẹrhovwo mẹ, ọ je kẹ vwẹ ẹgba me guọnọre ọkieje.”

Ibruche evo tare nẹ ofori rẹ ihwo rehẹ ẹdia uvweri chọn ihwo efa uko yẹrẹ vwomakpahotọ vwọ kẹ owian vwẹ ekogho rayen. Ọnana cha kẹ ayen omavwerhovwẹn vẹ urovwoma vwẹ ẹdia rẹ uvweri na. (Iruo Rẹ Iyinkọn Na 20:35) Inenikristi buebun rehẹ ẹdia rẹ uvweri chọn ihwo uko. Ọnana nẹrhẹ ẹwẹn rayen gan.—2 Kọrẹnt 1:3, 4.