Wọ Vwẹ Ẹro Ọghanghanre Vwo nẹ Baibol Na?
“Ovwan vwọ reyọ ota rẹ Ọghẹnẹ na . . . , ovwan reyerọ . . . kirobo rọ epha dẹn, ota rẹ Ọghẹnẹ, ro ruẹ iruo vwẹ oma rẹ ovwan otu ri sere gbuyota.”—1 TẸSA. 2:13.
UNE: 114, 113
1-3. Die yen e se roro nẹ ọyen so ẹghwọ rẹ Eyudia vẹ Sintiki, kẹ mavọ a sa vwọ kẹnoma kẹ ẹdia tiọyen nonẹna? (Ni uhoho rẹsosuọ na.)
IDIBO rẹ Jihova vwẹ ẹro ọghanghanre vwo nẹ ọbe ọfuanfon rẹ Ọghẹnẹ, Baibol na. Fikirẹ jẹgba, a vwẹ Baibol na vwo bru avwanre uche ọke evo. Die yen e che ru kpahọn? Roro kpahen Inenikristi rẹ ẹgbukpe ujorin ẹsosuọ, Eyudia vẹ Sintiki. Ebẹnbẹn evo vwomaphia uvwre rẹ eya nana ra jẹreyọ na. Die yen phiare? Baibol na vuẹ avwanre-e. E jẹ a vwẹ ẹwẹn roro obo re sa phia.
2 E gbe dje nẹ Eyudia durhie iniọvo evo rhe uwevwin rọyen vwọ kẹ emuọre. O durhie Sintiki-i, ẹkẹvuọvo, Sintiki nyo kpahen oborẹ iniọvo na eje riavwerhen rẹ ọrekugbe na. Sintiki se roro nẹ, ‘Eyudia se vwe-e! Ji mi roro nẹ avwanre emamọ ugbeyan.’ Fikirẹ obo rọ darọ te, Sintiki kọ vwẹ orharhe ẹro vwo nẹ Eyudia. Ọtiọyena, Sintiki de ji durhie iniọvo yena vwọ rhe uwevwin rọyen, ẹkẹvuọvo o se Eyudia-a! Ẹghwọ rọhẹ uvwre rayen na se gbowọphiyọ Fil. 4:2, 3.
ufuoma rọhẹ ukoko na. Baibol na vuẹ avwanre obo ri nẹ obuko rẹ ẹghwọ rẹ iniọvo nana rhe-e, ẹkẹvuọvo ọ sa dianẹ ayen vwẹ uchebro rẹ Pọl vwo ruiruo.—3 Ọkiọvo, ẹdia tiọna je sa so ebẹnbẹn vwẹ uvwre rẹ idibo rẹ Jihova nonẹna. Jẹ, a sa rhuẹrẹ ẹdia tiọyena phiyọ yẹrẹ kẹnoma kẹ ayen siẹrẹ e de nene uchebro rọhẹ Baibol na. A da vwẹ ẹro ọghanghanre vwo ni Baibol na, ọ cha nẹrhẹ a vwẹ iji rọyen vwọ ba akpọ yerin.—Une 27:11.
BAIBOL NA VẸ IRORO RẸ IHWORAKPỌ
4, 5. Uchebro vọ yen Baibol na vwọ kẹ avwanre kpahen e vwo sun ophu rẹ avwanre?
4 Ọ bẹn re vwo sun ophu avwanre siẹrẹ e de gbe avwanre ku. Ọ da ohwo mamọ siẹrẹ e de mukpahen avwanre fikirẹ asan re nurhe, ohọroma, yẹrẹ oborẹ oma avwanre hepha. Ma bra kparobọ, ọ da dianẹ oniọvo yen ru avwanre ọtiọyen. Baibol na vwo uchebro rọ sa chọn avwanre uko e de hirharoku ẹdia nana?
5 Nẹ awanre rhe, ọyen Jihova vwọ fuẹrẹn oborẹ ihwo yerẹn wan. O vwo oniso rẹ iroro vẹ uruemu avwanre. Iroro avwanre, ma rho ophu de mu avwanre, sa nẹrhẹ a ta eta yẹrẹ ru orọnvwọn ra sa rhoma viẹ diekpọvwẹ kpahen obọ. Ọnana emu aghwanre, e vwo sun ophu avwanre kirobo rẹ Baibol na bru avwanre uche, a me je kẹnoma kẹ a vwọ fobọ muophu! (Se Isẹ 16:32; Aghwoghwo 7:9.) Ofori nẹ avwanre eje wian kpahen ẹdia nana kugbe e ji vwo vwo uruemu rẹ evwoghovwo. Jihova vẹ Jesu ni evwoghovwo ghanghanre mamọ. (Mat. 6:14, 15) Wo niroso nẹ ofori wọ vwọ wian kpahen uruemu rẹ evwoghovwo yẹrẹ ophu wẹn?
6. Diesorọ a vwọ kẹnoma kẹ ophu ọgangan?
6 Ọke buebun yen ihwo re rhọnvwe sun ophu raye-en, vwọ djoma. Ọnana kọ nẹrhẹ ihwo kẹnoma kẹ ayen. Ohwo tiọyena sa so ohra phiyọ ukoko na. Ọ sa davwẹngba vwo rhurhu ophu yẹrẹ utuoma rọyen na, jẹ iroro echọchọ rọhẹ udu rọyen na “cha phia vwẹ evun rẹ ọghwẹgbe” na obọ. (Isẹ 26:24-26) Ekpako na sa chọn ohwo tiọyen uko vwọ mrẹ nẹ iruemu kerẹ ophu ọgangan, utuoma, kugbe re vwo phi ota phiyọ evun cha sa dia ukoko rẹ Ọghẹnẹ-ẹ. Baibol na ta ota phephẹn kpahen ẹdia nana. (Liv. 19:17, 18; Rom 3:11-18) Wọ rhọnvwephiyọ obo rọ tare na?
KAROPHIYỌ OBO RE SUN AVWANRE WAN
7, 8. (a) Die yen Jihova vwo suẹn ukoko rọyen rọhẹ otọrakpọ nonẹna? (b) Odjekẹ sansan vọ yehẹ Baibol na, kẹ diesorọ e vwo nene ayen?
7 Jihova vwẹ “omamọ rẹ odibo esiri na” vwọ ghẹrẹ ji suẹn ukoko rọyen vwẹ otọrakpọ na rọhẹ otọ rẹ usuon rẹ Kristi, rọ dia “olori” rẹ ukoko na. (Mat. 24:45-47; Ẹfe. 5:23) Kerẹ ẹko rọvwẹrote vwẹ ẹgbukpe ujorin ẹsosuọ, odibo nana rhiabọreyọ ota rẹ Ọghẹnẹ, ayen ji no ghanghanre. (Se 1 Tẹsalonaika 2:13.) Erhọ yen odjekẹ evo rehẹ Baibol na re sa dia erere kẹ avwanre?
8 Baibol na tare nẹ e siomakoko ọkieje. (Hib. 10:24, 25) Ọ vuẹ avwanre nẹ oborẹ avwanre yono ejobi dia ọvo. (1 Kọr. 1:10) Ota rẹ Ọghẹnẹ je tanẹ e phi Uvie na phiyọ ẹdia ẹsosuọ vwẹ akpeyeren avwanre. (Mat. 6:33) Ọ je kanrunumu iruo vẹ uphẹn ro te avwanre re vwo ghwoghwo nẹ uwevwin kpo uwevwin, vwẹ azagba, ji ru aghwoghwo rẹ kpregede. (Mat. 28:19, 20; Iruo 5:42; 17:17; 20:20) Baibol na vwẹ iji kẹ ekpako nẹ ayen sẹro rẹ ofuanfon rẹ ukoko na. (1 Kọr. 5:1-5, 13; 1 Tim. 5:19-21) Jihova je tanẹ ihwo eje rehẹ ukoko rọyen dia fuanfon vwọrẹ ugboma vẹ ẹwẹn.—2 Kọr. 7:1.
9. Ọrhọ yen ugbo vuọvo rọ chọn avwanre uko vwo vwo ẹruọ rẹ Baibol na?
9 Ihwo evo se roro nẹ ayen se vwo ẹruọ rẹ Baibol na komobọ. Ẹkẹvuọvo, Jesu vwẹ “odibo esiri na” vwo mu rọ vwọ dia ugbo vuọvo rọ wan kẹ avwanre emu rẹ ẹwẹn. Vwo nẹ ukpe rẹ 1919, Jesu vwẹ odibo nana vwọ vwẹ ukẹcha kẹ idibo rọyen ayen vwo vwo ẹruọ rẹ Baibol na, ji nene odjekẹ rọyen. Avwanre toroba ofuanfon, ufuoma, vẹ oyerinkugbe rẹ ukoko na siẹrẹ e de nene iji rehẹ Baibol na. Avwanre ohwo ọvuọvo sa nọ oma avwanre, ‘Me fuevun nene ugbo rẹ Jesu vwo ruiruo nonẹna?’
AKPẸRẸ RẸ JIHOVA DJẸ GHWRAGHWRAGHWRA!
10. Mavọ yen ọbe rẹ Izikiẹl djisẹ rẹ ukoko rẹ Jihova rọhẹ odjuvwu?
10 Baibol na chọn avwanre uko vwọ riẹn erọnvwọn evo kpahen ukoko rẹ Jihova rọhẹ odjuvwu. Kerẹ udje, a vwẹ emramrẹ ọvo phia kẹ ọmraro Izikiẹl rọ da mrẹ ukoko rẹ Ọghẹnẹ rọhẹ odjuvwu re vwo dje akpẹrẹ rọ djẹ. (Izi. 1:4-28) Jihova yen djẹ akpẹrẹ na, kasan kasan rẹ ẹwẹn ọfuanfon rọyen dje kẹ akpẹrẹ na, ọyen ọ ra. Ukoko rọyen rọhẹ odjuvwu na kọyen rhe suẹn ọ rẹ otọrakpọ na. Aphro herọ-ọ, akpẹrẹ na djẹ ghwraghwraghwra! Roro kpahen ewene buebun re ruru vwẹ ukoko na ikpe evo rhire na, je karophiyọ nẹ womarẹ ukẹcha rẹ Jihova yen e vwo vwo ọmrẹvughe nana eje. Akpẹrẹ rẹ Jihova ra djẹ kpakpata kpo ọke re che vwo titi usuon rẹ Ọghẹnẹ ji ru odẹ rọyen fon siẹrẹ Kristi vẹ emekashe rọyen da ghwọrọ akpọ omiomiovwin nana nu.
Oma vwerhen avwanre fikirẹ iniọvo re vwomakpahotọ vwo ruiruo rẹ ebabọn (Ni ẹkorota 11)
11, 12. Erọnvwọn vọ yen ukoko rẹ Jihova ruẹ nonẹna?
11 Roro kpahen oborẹ ukoko rẹ Ọghẹnẹ rọhẹ otọrakpọ na ruẹ vwẹ ọke oba nana. Ebabọn. Ihwo ujorin buebun yen muomaphiyọ ebabọn rẹ asan kpokpọ vwọ kẹ esiri ukoko rẹ Iseri rẹ Jihova vwẹ Warwick obẹ New York, U.S.A. Womarẹ odjekẹ rẹ Akon Iruo rọ Vwẹrote Ebanbọn Vwẹ Akpọeje, iniọvo uriorin buebun vwomakpahotọ vwọ kẹ ebabọn rẹ Eguan Ruvie vẹ eghọn ukoko. Oma vwerhen avwanre a vwọ mrẹ iniọvo nana re wian gangan vwo ruiruo rẹ ebabọn sansan nana. Karophiyọ nẹ Jihova ji ku ebruphiyọ rọyen kuẹ iniọvo rehẹ akpọeje ri toro itetoro vwo biẹcha iruo nana eje.—Luk 21:1-4.
Aiz. 2:2, 3) Avwanre vwo Isikuru rẹ Ekobaro, Isikuru rẹ Ihwo ri Ghwoghwo Uvie Na, Isikuru rẹ Gilead, Isikuru Vwọ kẹ Iniruo Okinriariẹ vẹ Eya Rayen, Isikuru Vwọ kẹ Ekpako Ukoko, Isikuru rẹ Ihwo re dia Bẹtẹl, Isikuru rẹ Ekpako vẹ Idibo Rowian, Isikuru Vwọ kẹ Iniọvo Rehẹ Umẹ Rọvwẹrote Oghọn Ukoko vẹ Eya Rayen. Jihova ghene guọnọ yono ihwo rọyen! A je mrẹ uyono rẹ Baibol vwẹ wẹbsaiti avwanre jw.org/urh, ẹbe sansan hẹ evun rọyen vwẹ ejajẹ ujorin buebun. Wẹbsaiti na vwo ẹbẹre rẹ emọ vẹ orua, o ji vwo ẹbẹre rẹ iyẹnrẹn. Wọ vwẹ jw.org/urh na vwo ruiruo vwẹ aghwoghwo na vẹ ẹga orua wẹn?
12 Eyono. Roro kpahen isikuru sansan ri titi uyono rẹ Jihova. (FUEVUN KẸ JIHOVA WO JI BICHA UKOKO RỌYEN
13. Oghwa vọ yen avwanre vwori kerẹ ihwo re fuevun ga Jihova?
13 Ọnana uphẹn rode ra vwọ dia ukoko rẹ Jihova! Avwanre vwọ riẹn iji rẹ Ọghẹnẹ nure na, avwanre vwo oghwa re vwo ru obo ri yoma ji titi usuon rọyen. Akpọ nana vwo miovwẹnphiyọ na, ofori nẹ avwanre “tuoma rẹ umwemwu” kerẹ Jihova. (Une 97:10) Avwanre kuomakugbe irumwemwu re tanẹ, “Umwemwu erhuvwu erhuvwu umwemwu” na-a. (Aiz. 5:20) Kidie nẹ a guọnọ ru obo re vwerhen Ọghẹnẹ oma, avwanre davwẹngba vwọ dia fuanfon vwọrẹ ugboma, uruemu, vẹ ẹwẹn. (1 Kọr. 6:9-11) Avwanre vwo ẹguọnọ rẹ Jihova, a je vwẹrosuọ; avwanre fuevun kẹ siẹrẹ e de nene iji rọyen rehẹ Baibol na. Avwanre je davwẹngba vwo nene iji rọyen na vwevunrẹ orua, ukoko na, asan re de ruiruo, isikuru, kugbe kasan kasan ejobi. (Isẹ 15:3) E jẹ a fuẹrẹn idjerhe efa re se vwo dje evun-ẹfuọn vwọ kẹ Ọghẹnẹ.
14. Mavọ yen emiọvwọn re dia Inenikristi sa vwọ fuevun kẹ Ọghẹnẹ?
14 Eyono rẹ emọ. Emiọvwọn re dia Inenikristi dje evun-ẹfuọn rayen vwọ kẹ Jihova siẹrẹ ayen da vwẹ Ota rẹ Ọghẹnẹ vwo yono emọ rayen. Ofori nẹ ẹkuruemu rẹ asan rẹ ayen dia djobọte oborẹ ayen yono emọ rayen wa-an. E jẹ ẹwẹn rẹ akpọ nana dia evunrẹ uwevwin rẹ Inenikristi-i. (Ẹfe. 2:2) Ọshare se roro nẹ, ‘Vwẹ orere avwanre, eya yen yono emọ.’ Ọsẹ rọ dia Onenikristi che se roro ọtiọye-en. Baibol na kẹ avwanre iji ophephẹn rọ vwọ tanẹ, “Esẹ na, . . . wa ghẹrẹ [emọ ovwan] vwẹ ẹghwọ kuo kugbe uyono rẹ Ọrovwohwo.” (Ẹfe. 6:4) Esẹ vẹ ini re dia Inenikristi guọnọre nẹ emọ rayen dia kerẹ Samuẹl, kidie Jihova vẹ ọyen herọ nẹ ọkiemọ rhe.—1 Sam. 3:19.
15. Idjerhe vọ yen e se vwo dje evun-ẹfuọn kẹ Jihova siẹrẹ e de brorhiẹn eghanghanre?
15 Orhiẹn-ebro. E de brorhiẹn eghanghanre vwẹ akpeyeren, idjerhe ọvo re vwo dje evun-ẹfuọn avwanre kẹ Ọghẹnẹ ọyen ra vwọ guọnọ ukẹcha rẹ Baibol na vẹ ukoko na. A sa vwọ mrẹ ọghanrovwẹ rẹ ọnana, roro kpahen ota ọvo ro djobọte emiọvwọn buebun. Ọyen ẹkuruemu rẹ emiọvwọn evo ayen vwo vwo ọrhuẹrẹphiyotọ rẹ emọ rayen vwo nene ihwo rẹ orua rayen dia rere ayen sa vwọ mrẹ uphẹn vwọ guọnọ igho vwẹ asan ọfa. Vwọrẹ uyota, ọnana orhiẹn romobọ, ẹkẹvuọvo e jẹ a karophiyọ nẹ Ọghẹnẹ cha nọ avwanre orhiẹn. (Se Rom 14:12.) Ọyen emu rẹ aghwanre re vwo brorhiẹn ri shekpahen orua avwanre ababọ rẹ uchebro rẹ Baibol na? Ẹjo, kakaka! A guọnọ ukẹcha rẹ Ọsẹ avwanre rọhẹ odjuvwu kidie avwanre che se sun oma rẹ avwanre-e.—Jer. 10:23.
16. Orhiẹn vọ yen aye ọvo bruru ọke ro vwo vwiẹ, kẹ die yen chọn rọ uko vwo bru omamọ orhiẹn?
16 Aye ọvo ro vwiẹ ọmọshare ọke rọ vwọ dia ẹkuotọ ọfa, vwo ẹwẹn ro vwo mu ọmọ na kpo re nene ọsẹ vẹ oni rẹ ọshare rọyen dia. Vwẹ ọke yena, Iseri rẹ Jihova da ton uyono phiyọ vẹ aye na. Uyono na vwọ yanphiaro ọ da rhe mrẹvughe nẹ ọyen owian rọyen ro vwo yono ọmọ rọyen idjerhe rẹ Jihova. (Une 127:3; Isẹ 22:6) Aye na da rhe ta ọdavwẹ rọyen kẹ Jihova womarẹ ẹrhovwo, kirobo rẹ Baibol jiri kẹ avwanre. (Une 62:7, 8) O de rhie evun kẹ ohwo ro yono na vẹ iniọvo efa rehẹ ukoko na. Dede nẹ ihwo rẹ orua vẹ igbeyan rọyen vuẹ nẹ o mu ọmọ na kpo, aye na de brorhiẹn nẹ ọyena dia obo ri fori-i. O gbe ọshare rọyen unu mamọ ọ vwọ mrẹ oborẹ ukoko na bicha aye na wan, ọ da nẹrhẹ ọshare na rhiabọreyọ uyono rẹ Baibol je ton uyono ẹra phiyọ. Wo rorori nẹ aye na mrẹrẹ nẹ Jihova kpahenphiyọ ẹrhovwo rọyen? Aphro herọ-ọ, ọ mrẹrẹ vughe.
17. Odjekẹ vọ yen a kẹ avwanre kpahen ihwo ra vwẹ Baibol vwo yono?
17 Nene odjekẹ. Idjerhe ọghanghanre ọvo re vwo dje evun-ẹfuọn avwanre kẹ Ọghẹnẹ ọyen e vwo nene odjekẹ rẹ ukoko rọyen. Kerẹ udje, roro kpahen iroroẹjẹ ra kẹ avwanre kpahen ihwo ra vwẹ Baibol vwo yono. E jiriro kẹ avwanre nẹ a da ghwa vwẹ ọbe re se Die Yen Baibol na Se Yono Avwanre? vwọ ton uyono phiyọ nu, e jẹ a reyọ ibrẹro evo vwọ kpọ ẹwẹn rẹ ohwo na kpo ukoko avwanre siẹrẹ e de kuphiyọ nu. E se ru ọnana womarẹ ividio re se Die Yen E Ruẹ Vwevunrẹ Ọguan Ruvie? kugbe ibroshọ na Amono Yin Ruẹ Ọhọre Ri Jihova Nonẹna? E jiriro nẹ a da vwẹ ọbe rẹ Yono Avwanre na vwo yono ohwo rọ yan obaro nu, a je vwẹ ọbe re se “Keep Yourselves in God’s Love” vwo yono, ọ da tobọ dianẹ o bromaphiyame nure. Ukoko na vwẹ odjekẹ nana phia rere esegbuyota rẹ ihwo kpokpọ na sa vwọ “ghwotọ kokoroko.” (Kọl. 2:7) Wo nene odjekẹ tiọyena ri nẹ ukoko rẹ Jihova cha na?
18, 19. Erọnvwọn vọ yen mu avwanre vwọ kpẹvwẹ Jihova?
18 Avwanre vwo erọnvwọn buebun ro fori nẹ a kpẹvwẹ Jihova kẹ! Ọyen vwo arhọ avwanre, ọ rha dia ọye-en avwanre che se yeri-in. (Iruo 17:27, 28) Ọ kẹ avwanre okẹ ọghanghanre ọvo, ọbe rọyen rọ dia Baibol na. Avwanre rhiabọreyọ kerẹ ota rẹ Ọghẹnẹ, kirobo rẹ Inenikristi rehẹ Tẹsalonaika ruru.—1 Tẹsa. 2:13.
19 Baibol na yen chọn avwanre uko vwo sikẹrẹ Jihova, ko ji sikẹrẹ avwanre. (Jems 4:8) Ọsẹ avwanre rọhẹ odjuvwu kẹ avwanre uphẹn rode a vwọ dia ukoko rọyen. Avwanre nabọ vwo ọdavwaro kpahen ebruphiyọ nana eje. Ọbuine na nabọ djisẹ rọyen ọke rọ vwọ so: “Vwẹ ẹkpẹvwẹ kẹ Ọrovwohwo, kidie o yoma, kidie ẹguọnọ rọye ro jẹ rhẹriẹ na dia rhiri bẹdẹ.” (Une 136:1) Abọ 26 vwẹ ọbe rẹ Une Rẹ Ejiro 136, ọyen a mrẹ eta na “ẹguọnọ rọye ro jẹ rhẹriẹ na dia rhiri bẹdẹ.” A da fuevun kẹ Jihova vẹ ukoko rọyen, a cha mrẹ orugba rẹ eta yena kidie avwanre cha dia bẹdẹ bẹdẹ!