Ẹdẹ ọvo, ọrhorha ọvo da nọ ọmọ na: “Wọ riẹnre nẹ oro otutuno na ghanre nọ idọnọ ọfuanfon na ọhwọhwọ ivẹ?” Ọmọ na da hwẹ, ọ da tanẹ, “E, me riẹnre.” Ọshare na da nọ nẹ, “Kẹ diesorọ wọ vwọ reyọ idọnọ ọfuanfon na? Wọ da jẹ oro na, igho wo che vwo cha dia ọhwọhwọ ivẹ rẹ obo wo vwori na!” Ọmọ na da kpahen kẹ nẹ, “Me da jẹ oro na, ihwo na cha dobọ rẹ eha na ji. Wọ riẹn uchunu rẹ idọnọ efuanfon mi kokori re?” Ọmọ yena dje uruemu ọghanghanre ọvo phia rọ sa je dia erere vwọ kẹ imiragua—omamọ rẹ aghwanre.

Baibol na da ta: “Yọnrọn omamọ rẹ aghwanre vẹ ọhọ. Ko wọ sa yan idjerhe wẹn ejobi vwẹ egbemọphẹ wọ gbe sa kprọ owọ wẹ-ẹn.” (Isẹ 3:21, 23) Kọyen, ra vwọ riẹn oborẹ “omamọ rẹ aghwanre” mudiaphiyọ kugbe obo ra sa vwọ reyọ vwo ruiruo cha sẹro rẹ avwanre. Ọnana chọn avwanre uko vwọ vrabọ rẹ ekprowọ rẹ ẹwẹn, ọ je nẹrhẹ “owọ” rẹ avwanre nabọ muotọ.

Omamọ rẹ aghwanre fẹnẹ erianriẹn vẹ ẹruọ. Ohwo ro vwo erianriẹn vwo evuẹ buebun. Ohwo ro vwo ẹruọ sa mrẹ oborẹ evuẹ na churobọ si ohwohwo wan. Ohwo ro rhe vwo aghwanre se kuẹ erianriẹn vẹ ẹruọ kugbe, ọ me vwẹ ayen ruiruo vwẹ idjerhe re rhiẹromrẹ.

Kerẹ udje, ohwo ọvo sa vwẹ ọmọke krẹn vwo se ọbe re se Die Yen Baibol na Se Yono Avwanre? o mi ji vwo ẹruọ rọyen. Ọke ra da vwẹ ọbe na vwo yono, ọ sa nabọ kpahenphiyọ enọ na gbagba. Ọ sa ton uyono ẹra phiyọ, je nabọ kpahenphiyọ enọ. Enana eje se djephia nẹ ọ yanphiaro vwọrẹ ẹwẹn, ẹkẹvuọvo, ko ghini mudiaphiyọ nẹ o vwo aghwanre re? Ọ ghwa dia ọtiọye-en. Ọ sa dia ohwo rọ fobọ riẹn orọnvwọn. Ẹkẹvuọvo, siẹrẹ ohwo na da vwẹ uyota na vwo ruiruo, ọ da vwẹ erianriẹn vẹ ẹruọ rẹ uyota na vwọba akpọ yerin, ka sa tanẹ, ọ ghwanra re. O de brorhiẹn rọ ghwa erere cha, ro djerephia nẹ ọ nabọ roro emu te o ki ruo, ka cha mrẹvughe nẹ o vwo omamọ rẹ aghwanre.

Ọbe rẹ Matiu 7:24-27 niyẹnrẹn rẹ itẹ rẹ Jesu kperi kpahen eshare ivẹ re bọn uwevwin. E djisẹ rẹ ọvo kerẹ “ọvwẹghwanre.” Ọshare na vwo roro kpahen obo re sa phia vwẹ obaro, ọ da bọn uwevwin rọyen phiyọ enu rẹ oragha. O vwo ẹro rẹ oniso, o de ru obo ri fori. O niro nẹ uwevwin ra bọn phiyọ enu rẹ ubu yen che me ku yẹrẹ phẹrẹ ẹbọ-ọn. O brorhiẹn rẹ aghwanre ro vwo roro kpahen obo ri se nẹ orhiẹn-ebro rọyen na rhe. Kọyensorọ, ọke rẹ ọkẹre vwọ fa, odju vwo djuo, uwevwin na rhe she-e. Onọ na kẹ ọna: Mavọ yen e se vwo vwo uwan ọghanghanre nana, a me je sẹro rọyen?

Ẹsosuọ, noso nẹ Maika 6:9 tare nẹ, “Ọye omamọ rẹ aghwanre ra vwọ djẹ oshọ kẹ odẹ [rẹ  Ọghẹnẹ].” Ra vwọ djoshọ rẹ odẹ rẹ Jihova mudiaphiyọ re vwo muọghọ kẹ Ọghẹnẹ. E vwo muọghọ okokodo kẹ oborẹ odẹ rọyen na mudiaphiyọ kugbe irhi rọyen. Wo ki se muọghọ kẹ ohwo, ku wọ riẹn obo ro roro emu wan. Ọtiọyena, ku wọ sa vwerosuọ, yono mie, je mrẹ oka rẹ erere ro rhiẹromrẹ. A sa tanẹ avwanre vwo omamo rẹ aghwanre siẹrẹ e de roro kpahen oborẹ uruemu avwanre che djobọte oyerinkugbe avwanre vẹ Jihova wan, kugbe avwanre de ji brorhiẹn nene iji rọyen.

Ọrivẹ, Isẹ 18:1 tare nẹ, “Ohwo ra phiẹn ghwru [“yẹrẹ ro sioma reyọ,” NW] ri ruẹ omeru rere ọ vwọ guọghọ omamọ rẹ orhiẹn kufia.” E rhe nomaso-o, avwanre se siomauko kẹ Jihova vẹ ihwo rọyen. Ọnana vwo jẹ phia, ofori nẹ avwanre ghwọrọ ọke vẹ ihwo re djoshọ rẹ odẹ rẹ Ọghẹnẹ re je yọnrọn irhi rọyen. Ofori nẹ avwanre kpo uyono vwẹ Ọguan Ruvie ọkieje. A da hẹ uyono na, e jẹ e rhie ẹwẹn avwanre eje phiyọ, rere eta na vwo te ubiudu avwanre.

Vwọba, a da ta ọdavwẹ avwanre eje kẹ Jihova vwọrẹ ẹrhovwo, ke che sikẹrẹ phiyọ. (Isẹ 3:5, 6) Avwanre de rhie ẹwẹn avwanre phiyọ vwo se Baibol na vẹ ẹbe rẹ ukoko na, ke se vwo ẹruọ rẹ erere ro che te avwanre siẹrẹ e de ru nene, ọnana ko che mu avwanre vwo ru obo ri yovwirin. O ji fo nẹ avwanre rhiabọreyọ uchebro rẹ iniọvo ri tedje.  (Isẹ 19:20) Ọtiọyena, ukperẹ a vwọ ‘sen omamọ rẹ aghwanre eje,’ avwanre ke cha sẹro rọyen.

Omamọ rẹ aghwanre sa sẹro rẹ orua. Kerẹ udje, Baibol na vuẹ aye nẹ ọ “vwẹ oma kpotọ” kẹ ọshare rọyen. (Ẹfe. 5:33) Mavọ yen ọshare se vwo vwo ọghọ rẹ aye rọyen? Siẹrẹ ọ da vwẹ ovan vẹ ẹgba vwo ruo, ọghọ na che kri-i. Ukperẹ o vwo fi ohọnre, aye rẹ ọshare tiọyena ko che muọghọ kẹ ọke rọ da hẹ etiyin ọvo. Ẹkẹvuọvo, ọshare na rha herọ-ọ, aye na ji che vwo ẹwẹn ro vwo muọghọ kẹ? Ọ cha bẹn. Ọtiọyena, ofori ọshare vwo roro kpahen obo re cha ghwa erere ogrongron rhe. O de dje omamọ rẹ ẹwẹn ọfuanfon na phia ro vwo vwo ẹguọnọ vẹ uruemu esiri, ko che vwo ọghọ rẹ aye rọyen. Dedena, ofori nẹ aye rọ dia Onenikristi muọghọ kẹ ọshare rọyen ọkieje ọ da tobọ dianẹ ọshare na pha brabra.—Gal. 5:22, 23.

Baibol na je tanẹ ọshare vwo ẹguọnọ rẹ aye rọyen. (Ẹfe. 5:28, 33) Rere ọshare na vwo vwo ẹguọnọ kpahọn ọkieje, aye na se roro nẹ ofori ro vwo si echobọ rọyen evo nu ro fori nẹ ọshare na riẹn kpahen. A sa ghene tanẹ, ọyena omamọ rẹ aghwanre? Die yen cha phia siẹrẹ ọshare na da rhe riẹn nẹ aye na djahẹn evun kẹ ọyen? Ẹguọnọ ro vwo kpahọn che kodophiyọ? Ọyena cha bẹn. Ukperẹ ọtiọyen, siẹrẹ aye na da guọnọ ọke ro fori vwọ vuẹ kpahen oruchọ rọyen na vwẹ idjerhe rẹ ọghọ, oma cha vwerhen ọshare na nẹ aye rọyen, ohwo rẹ uyota. Ọke yena, ẹguọnọ ro che vwo kpahọn, kọ cha ganphiyọ.

Ofori nẹ emọ kerhọ rẹ esẹ vẹ ini rayen, je vwomakpotọ kẹ ọghwọku vẹ uyono rẹ Jihova. (Ẹfe. 6:1, 4) Ọnana ko mudiaphiyọ nẹ emiọvwọn gbe si irhi buebun vwọ kẹ emọ na? Ọ diẹ irhi rehẹ uwevwin na vẹ obo re che ru ayen siẹrẹ ayen da churhi na ọvo yen emọ na riẹ-ẹn. Ọsẹ vẹ oni ri vwo omamọ rẹ aghwanre cha chọn ọmọ rayen uko vwọ riẹn oboresorọ o vwo fo nẹ o nene irhi na.

Kerẹ udje, ọ da dianẹ ọmọ na yinvwaro ku ọsẹ yẹrẹ oni na vwo? Ovan vẹ ehwe sa dia ophọphọvwe kẹ ọmọ na yẹrẹ nẹrhẹ ẹwẹn rọyen kuọrọn, yẹrẹ o mi jẹ ota ẹta. Ophu sa dia ẹwẹn rọyen, ọ da nẹrhẹ o siomareyọ nẹ ọsẹ vẹ oni rọyen.

Emiọvwọn ri vwo aghwanre che roro kpahen oborẹ ayen ghwọku ọmọ na wan vẹ oborẹ ọghwọku na che djobọte ọmọ na ọke rọ cha obaro na. Ofori nẹ emiọvwọn fobọ muophu siẹrẹ ọmọ de gbe ayen ku-u. Ọkiọvo ayen se se ọmọ na ọke ọfa, ayen vuẹ nẹ Jihova guọnọre nẹ o muọghọ kẹ ọsẹ vẹ oni rọyen rere o se vwo vwo ebruphiyọ rẹ bẹdẹ. Eriyin na, ọmọ na de muọghọ kẹ ọsẹ vẹ oni rọyen, kọ cha riẹn nẹ Jihova yen o nyupho rọyen na. (Ẹfe. 6:2, 3) Ọnana se te ubiudu rẹ ọmọ na. Ọ cha nabọ riẹn nẹ ọsẹ vẹ oni rọyen ghini vwo ọdavwẹ rọyen, ọghọ ro vwo kpahen ayen ko ji che kodophiyọ. Ọke yena, ọmọ na kọ sa yare ukẹcha siẹrẹ o de hirharoku orhiẹn-ebro eghanghanre vwẹ akpeyeren rọyen.

Emiọvwọn evo rhọnvwa ghwọkuẹ ọmọ raye-en kidie oshọ mu ayen nẹ ọnana cha nẹrhẹ ivun miovwo ọmọ na. Ẹkẹvuọvo, die yen cha phia siẹrẹ ọmọ na da ghwanre nu? Ọ cha djoshọ rẹ Jihova je mrẹ aghwanre rọ herọ e vwo nene iji rẹ Ọghẹnẹ? O che rhie ẹwẹn rọyen kẹ Jihova, gbanẹ o che siomauko kẹ vwọrẹ ẹwẹn?—Isẹ 13:1; 29:21.

Ọwena rọ kare ema muegbe rẹ ẹwẹn rọyen vwọ kẹ obo rọ cha kare na. Ọ diẹ o muo ruẹ vẹ ẹwẹn nẹ o che shephiyọ-ọ. Emiọvwọn ri vwo aghwanre ghwọrọ ọke buebun vwo yono kpahen irhi rẹ Jihova, je vwẹ ayen vwo ruiruo, kọ nẹrhẹ ayen djoshọ rẹ odẹ rọyen. Ayen rhe siomauko kẹ Jihova vẹ ukoko rọye-en, ayen se vwo aghwanre ra guọnọre je reyọ vwọ bọn orua rayen gan.

Kẹdẹ kẹdẹ, avwanre hirharokuẹ orhiẹn sansan ri se djobọte akpeyeren avwanre vwẹ ikpe buebun. Ukperẹ wo vwo brorhiẹn rẹ okpakpa, fọ wo roro kpahọn tavwen. Roro kpahen obo ri che nẹ obuko rọyen rhe. Yare ukẹcha rẹ Jihova, je vwẹ aghwanre ro nẹ obọ rọyen rhe vwo ruiruo. E de ru ọtiọyen, ka sa tanẹ avwanre yọnrọn omamọ rẹ aghwanre, rọ cha kẹ avwanre arhọ.—Isẹ 3:21, 22.