UYONO 14
Ruiruo rẹ Aghwoghwo Wẹn Gba
“Ru iruo rẹ aghwoghwọ, gbe odibo wẹn gba.”—2 TIM. 4:5.
UNE 57 Ghwoghwo Vwọ kẹ Ihwo Ejobi
ỌDJẸKOKO *
Ọke rẹ Jesu vwo vrẹnushi nu, ọ vẹ idibo rọyen da vwoma, Ọ da vue ayen nẹ, ayen “yanran re . . . yono ihwo rẹ akpọ na ejobo.” (Ni ẹkoreta 1)
1. Die yen idibo rẹ Ọghẹnẹ eje guọnọ ru, kẹ diesorọ? (Ni uhoho rọhẹ opharo ọbe na.)
JESU KRISTI ji idibo rọyen nẹ ayen “yanran re . . . yono ihwo rẹ akpọ na ejobi.” (Mat. 28:19) Ọtiọyena, avwanre guọnọ yono oborẹ avwanre vwo muomaphiyọ iruo rẹ aghwoghwo na, rere e ruo “gba.” (2 Tim. 4:5) Kidie ọnana yen iruo rọ ma ghanre kparobọ, rọ je ma guọnọ okpakpa. Ọyen ji che me fierere kẹ avwanre. Jẹ, ọkiọvo avwanre sa nabọ ghwọrọ ọke phiyọ iruo na kirobo rẹ avwanre guọnọre-e.
2. Ebẹnbẹn vọ yen se djobọte ẹgbaẹdavwọn rẹ avwanre vwẹ iruo rẹ aghwoghwo na?
2 Erọnvwọn efa re pha ghanghanre je herọ re reyọ ọke vẹ ẹgba rẹ avwanre. Ọ sa dianẹ avwanre wian inọke buebun rere a sa vwọ vwẹrote orua rẹ avwanre. Ọkiọvo avwanre ji vwo ebẹnbẹn efa rẹ avwanre nene muabọ. Ebẹnbẹn na sa dia oghwa rẹ orua, ega, ofudjevwe, yẹrẹ emiavwe rẹ ọghwo ghwa cha. Mavọ yen e se vwo ruiruo rẹ aghwoghwo rẹ avwanre gba, dede nẹ e hirharoku ebẹnbẹn nana eje?
3. Die yen ota rẹ Jesu rọhẹ Matiu 13:23 yono avwanre?
3 E jẹ ofu dje avwanre siẹrẹ ẹdia rẹ avwanre da nẹrhẹ ọke rẹ avwanre ghwọrọ vwẹ iruo rẹ aghwoghwo na shekpotọ-ọ. Jesu riẹnre nẹ uche rẹ ubi rẹ Uvie na rẹ avwanre eje cha mọ cha sa dia abavo-o. (Se Matiu 13:23.) Jihova vwẹ ẹro ọghanghanre vwo ni kemu kemu rẹ avwanre ruru vwẹ ẹga rọyen, takpẹ nẹ avwanre davwẹngba rẹ avwanre eje. (Hib. 6:10-12) Jẹ ọkiọvo, avwanre se roro nẹ ẹdia rẹ avwanre hepha cha nẹrhẹ avwanre se ru bunphiyọ. Vwẹvunrẹ uyovwinrota nana, a cha fuẹrẹn obo re se vwo ru akpeyeren avwanre lọhọ, phi iruo rẹ aghwoghwo na phiyọ ẹdia rẹsosuọ, ji ru ona rẹ aghwoghwo vẹ eyono rẹ avwanre yovwinphiyọ. Ẹsosuọ, die yen o mudiaphiyọ re vwo ruiruo rẹ aghwoghwo rẹ avwanre gba?
4. Die yen o mudiaphiyọ re vwo ruiruo rẹ aghwoghwo rẹ avwanre gba?
4 Re vwo ruiruo rẹ aghwoghwo na gba, mudiaphiyọ re vwo ghwoghwo ji yono ihwo te asan rẹ ẹgba rẹ avwanre teri. Jẹ, ọ ghwa dia unọke rẹ avwanre ghwọrọ vwẹ iruo na yen ọnana churobọ si-i. Obo ri mu avwanre vwo ghwoghwo yen ma ghanre kẹ Jihova. Ẹguọnọ rẹ avwanre vwo kpahen Jihova vẹ irivẹ rẹ avwanre yen mu avwanre vwo vwobọ vwẹ iruo rẹ Uvie na. * (Mak 12:30, 31; Kọl. 3:23) Ra vwọ vwẹ ẹga ọsoso kẹ Jihova mudiaphiyọ ra vwọ reyọ ẹgba rẹ avwanre eje vwo ruiruo vwẹ ẹga rọyen. Avwanre da riẹn ọghanrovwẹ rẹ iruo rẹ aghwoghwo na, ka cha davwẹngba vwo ghwoghwo iyẹnrẹn esiri na kẹ ihwo eje rẹ avwanre mrẹre.
5-6. Djudje rẹ oborẹ ohwo rọ ghwa mrẹ uphẹ-ẹn se vwo phi iruo rẹ aghwoghwo na phiyọ ẹdia rẹsosuọ.
5 Vwẹro roro eghene ọshare ro hworo igita mamọ. Oma vwerhọn mamọ siẹrẹ uphẹn de rhiẹphiyọ kẹ ro vwo hworo. O kriri-i, a da vwẹ iruo kẹ vwẹ asan ra da shẹ idi, nẹ o rhe hworo igita kẹ ayen vwẹ oba rẹ udughwrẹn. Kidie nẹ igho ra hwa kẹ che te vwọ vwẹrote oma rọye-en, kọ je wian kerẹ ohwo rọ vwẹrote igho vwẹ asan ra da shẹ emuọre, nẹ Monday fiẹ Friday. Dede nẹ asan ra da shẹ emuọre na yen ọ ma dia, jẹ igita ro hworo na yen o me vwo ẹguọnọ kpahen. Ọ guọnọ tẹn ona rẹ igita ehworo je dia ọbuine. Ọtiọyena, kọ reyọ kuphẹn kuphẹn ro rhiephiyọ vwo hworo igita, kidie ọ riavwerhen rọyen.
6 Vwẹ idjerhe vuọvo na, ọ sa dianẹ wọ guọnọ ghwọrọ ọke buebun phiyọ iruo rẹ aghwoghwo na, jẹ wo se ruo-o. Wọ davwẹngba vwo ru ona rẹ aghwoghwo wẹn yovwẹnphiyọ rere iyẹnrẹn esiri na se vwo te ubiudu rẹ ihwo. Ẹkẹvuọvo, fikirẹ ewian re vọn wẹ obọ, wọ sa ro ẹnwan kpahen oborẹ wo se vwo phi iruo rẹ aghwoghwo na phiyọ ẹdia rẹsosuọ.
OBORẸ WO SE VWO PHI IRUO RẸ AGHWOGHWO NA PHIYỌ ẸDIA RẸSOSUỌ
7-8. Mavọ yen avwanre sa vwọ reyọ ẹro rẹ Jesu vwo ni iruo rẹ aghwoghwo na ji vwo no?
7 Jesu phi udje ọgbagba phiyotọ kpahen ẹro ro fori nẹ e vwo ni iruo rẹ aghwoghwo na. Uvie rẹ Ọghẹnẹ yen ọ ma ta ota kpahen vwẹ akpeyeren rọyen. (Jọn 4:34, 35) Ọ yan iroko buebun ro vwo ghwoghwo ota kẹ ihwo. Ọ reyọ uphẹn ro rhiephiyọ eje vwo ghwoghwo ota kẹ ihwo vwẹ azagba kugbe iwevwin rayen. Jesu mu akpeyeren rọyen eje kpahen iruo rẹ aghwoghwo na.
8 Kerẹ Jesu avwanre davwẹngba vwọ reyọ uphẹn ro rhiephiyọ eje vwo ghwoghwo iyẹnrẹn esiri na kẹ ihwo, o toro ọke yẹrẹ asan rẹ avwanre da mrẹ aye-en. Avwanre choma ra vwọ reyọ erọnvwọn evo vwo ze fikirẹ iruo rẹ aghwoghwo na. (Mak 6:31-34; 1 Pita 2:21) Iniọvo evo ga kerẹ ekobaro oghẹresan, ekobaro ọkieje, yẹrẹ ekobaro ubrọke. Iniọvo efa yono ejajẹ ọfa, evo tobọ kua kpo asan ra da ma guọnọ ukẹcha. Dedena, ẹkẹn rẹ ighwoghwota ọkieje vwẹ iruo rẹ aghwoghwo na yen me bun. Obo rọ wanre eje, oborẹ ẹgba rẹ avwanre muru yen Jihova nokpẹn rọyen mie avwanre. Ọ guọnọre nẹ oma vwerhen avwanre ọke re de ghwoghwo “iyẹnrẹ esiri rẹ urinrin rẹ Ọghẹnẹ re bruba kẹ na.”—1 Tim. 1:11; Urhi 30:11.
9. (a) Idjerhe vọ yen Pọl vwo phi iruo rẹ aghwoghwo na phiyọ ẹdia rẹsosuọ dede nẹ o vwo iruo romobọ ro ruẹ? (b) Mavọ yen Iruo Rẹ Iyinkọn Na 28:16, 30, 31 vwo djisẹ rẹ ẹro rẹ Pọl vwo ni iruo rẹ aghwoghwo rọyen?
9 Ọyinkọn Pọl phi omamọ rẹ udje phiyotọ rọ vwọ vwẹ iruo rẹ aghwoghwo na vwo ru obo re ma ghanre vwẹ akpeyeren rọyen. Igho kanre Pọl ọke rọ vwọ hẹ Kọrẹnt vwẹ oyan rẹ aghwoghwo rivẹ rọyen, ọtiọyena, ko rhuon ibọkpọ. Ẹkẹvuọvo, ọ dia iruo yena yen ma ghanre kẹ-ẹ. O ruro vwọ vwẹrote oma rọyen rere o se vwo ghwoghwo iyẹnrẹn esiri na kẹ ihwo rẹ Kọrẹnt “ọphọphẹ.” (2 Kọr. 11:7) Dede nẹ Pọl ruiruo vwọ vwẹrote oma rọyen, ọ vwẹ ẹro ọghanghanre vwo ni iruo rẹ aghwoghwo na, kọ tobọ ghwoghwo ota vwẹ ẹdẹ Urovwoma. Ọke rẹ ẹdia rọyen vwo yovwin nọ obo ri jovwo, Pọl da nabọ “gboma phihọ eghwoghwo na, ro se oseri muẹ ihwo ri Ju na nẹ Kristi na hẹ Jesu.” (Iruo 18:3-5; 2 Kọr. 11:9) Ọke vwọ yanran, o de si ẹbe sansan ji ghwoghwo ota kẹ ihwo ri bruro rhe uwodi rọ hepha vwẹ uwevwin obọ rọyen vwẹ omarẹ ẹgbukpe ivẹ vwẹ Rom. (Se Iruo Rẹ Iyinkọn Na 28:16, 30, 31.) Pọl vwẹ uphẹn kẹ emu vuọvo nẹ o gbowọphiyọ iruo rẹ aghwoghwo rọye-en. Ọ da ta: “Rẹ avwanre vwo vwo odiboegbe nana . . . , avwanre gbe ro ẹnwa-an.” (2 Kọr. 4:1) Kerẹ Pọl, e ji se phi iruo rẹ Uvie na phiyọ ẹdia rẹsosuọ ọ da tobọ dianẹ avwanre ruiruo rọ reyọ ọke rẹ avwanre.
Idjerhe buebun herọ re se vwo ruiruo rẹ aghwoghwo rẹ avwanre gba (Ni ẹkoreta 10-11)
10-11. Mavọ yen e se vwo ruiruo rẹ aghwoghwo rẹ avwanre gba, vwẹ ẹdia rẹ jẹ omakpokpọ evwo?
10 Ọ da dianẹ ọghwo yẹrẹ jẹ omakpokpọ evwo rhe jẹ avwanre se vwobọ vwẹ aghwoghwo rẹ nuwevwin kpuwevwin na vọnvọ-ọn, a je sa riavwerhen rẹ ona rẹ aghwoghwo efa. Inenikristi rẹ ẹgbukpe ujorin ẹsosuọ ghwoghwo ota kẹ ihwo vwẹ kasan kasan rẹ ayen rare. Ayen reyọ kuphẹn kukpẹn ro rhiephiyọ vwo ghwoghwo ota kẹ kohwo kohwo rẹ ayen “yan” vwa, vwẹ aghwoghwo rẹ nuwevwin kpuwevwin, aghwoghwo rẹ azagba, kugbe ọ rẹ kpregede. (Iruo 17:17; 20:20) Ọ da tobọ dianẹ wọ rha sa ya-an, wo ji se chidia ruiruo rẹ aghwoghwo na vwẹ asan rẹ ihwo wan mamọ. Wo se ru aghwoghwo rẹ kpregede, si ileta, yẹrẹ vwẹ ifonu vwo soseri kẹ ihwo. Ighwoghwota buebun ri se vwobọ vwẹ aghwoghwo rẹ nuwevwin kpuwevwin na-a, riavwerhen rẹ ona rẹ aghwoghwo sansan re djunute na.
11 Wo se ruiruo rẹ Uvie wẹn gba, ọ da tobọ dianẹ wo vwo omakpokpọ-ọ. E ja rhoma fuẹrẹn udje rẹ ọyinkọn Pọl. Ọ da ta: “Mi se ru emu ejobi vwi Kristi rọ kẹ vwẹ ogangan.” (Fil. 4:13) Pọl guọnọ ogangan yena ọke rọ vwọ muọga vwẹ oyan rẹ aghwoghwo ọvo rọ rare. Ọ da vuẹ iniọvo rehẹ Galesha: “Ovwan riẹnre nẹ oma rẹ ọga mi vwo ghwoghwo iyẹnrẹ esiri na kẹ ovwan vwẹ ẹsuosuọ.” (Gal. 4:13) Vwẹ idjerhe vuọvo na, jẹ omakpokpọ evwo sa nẹrhẹ wọ mrẹ uphẹn vwo soseri kẹ idọktọ, inọsu, kugbe ihwo efa re vwẹrote we. Buebun rayen dia uwevwin ọke re de ghwoghwo ota te egodo raye-en.
OBORẸ WO SE VWO RU AKPEYEREN WẸN LỌHỌ
12. Die yen ọ mudiaphiyọ rẹ ẹro avwanre vwọ dia “ọvuọvo”?
12 Jesu da ta: “Urhukpẹ rẹ oma na ọye ẹro: ẹro wẹn da dia ọvuọvo, oma wẹn ejobi kọ vọn vẹ orẹmrẹ.” (Mat. 6:22) Die yen ota rẹ Jesu na mudiaphiyọ? O mudiaphiyọ nẹ siẹrẹ e de ru akpeyeren avwanre lọhọ yẹrẹ vwo emuọvo kiriguo ra tẹnrovi, erọnvwọn efa rhe che se mu ẹwẹn rẹ avwanre reyọ-ọ. Jesu phi udje na phiyotọ rọ vwọ tẹnrovi iruo rẹ Uvie na, ji yono idibo rọyen oborẹ ayen sa vwọ tẹnrovi ẹga rẹ Jihova kugbe Uvie rọyen. Avwanre da “ka guọnọ Uvie rẹ Ọghẹnẹ tavwe, kugbe ọvwata rọye,” kọyen avwanre vwẹrokere Jesu.—Mat. 6:33.
13. Die yen sa chọn avwanre uko vwọ tẹnrovi iruo rẹ aghwoghwo na?
13 Idjerhe ọvo ra sa vwọ tẹnrovi iruo rẹ aghwoghwo na, ọyen re vwo ru akpeyeren avwanre lọhọ rere a sa mrẹ ọke vwọ chọn ihwo uko vwọ riẹn Jihova ji vwo ẹguọnọ rọyen. * Kerẹ udje, wo se siobọ rẹ iruo wẹn kpotọ rere wọ ghwọrọ inọke buebun vwẹ iruo rẹ aghwoghwo na kudughwrẹn kudughwrẹn? Wo se si nẹ ọke wọ ghwọrọ phiyọ akpọẹriọ vẹ ehẹha?
14. Ewene vọ yen aye gbe ọshare ọvo ruru rere ayen sa vwọ ghwọrọ ọke buebun vwẹ iruo rẹ Uvie na?
14 Ọnana yen oborẹ ọkpako ọvo re se Elias vẹ aye rọyen ruru. Ọ da ta: “Avwanre sa ton iruo rẹ okobaro phiyọ ugege na-a, jẹ o vwo erọnvwọn evo rẹ avwanre ruru rere avwanre sa vwọ ghwọrọ ọke buebun vwẹ aghwoghwo na. Kerẹ udje, avwanre siobọ rẹ eghwaghwọrọ rẹ avwanre kpotọ, eriyin ji te akpọẹriọ vẹ ehẹha rẹ avwanre. Avwanre da je vuẹ ihwo rẹ avwanre wian kẹ nẹ ayen ru ewene phiyọ ọke rẹ avwanre ghwọrọ phiyọ iruo. Ọtiọyena, avwanre da rhe mrẹ uphẹn rẹ avwanre vwo ruẹ aghwoghwo rẹ ovwọnvwọn, ru uyono rẹ Baibol buebun, ji vwobọ vwẹ aghwoghwo rẹ uvwre rẹ udughwrẹn abọ ivẹ kemeranvwe kemeranvwe. Ọyena da nẹrhẹ oma vwerhen avwanre!”
OBORẸ ONA RẸ AGHWOGHWO VẸ EYONO WẸN SE VWO YOVWINPHIYỌ
Ọna rẹ aghwoghwo vẹ eyono rẹ avwanre che yovwinphiyọ siẹrẹ a da reyọ obo re yonori vwẹ omẹvwa rẹ uvwre rẹ udughwrẹn vwo ruiruo (Ni ẹkoreta 15-16) *
15-16. Vwo nene ota rọhẹ 1 Timoti 4:13, 15, mavọ yen avwanre se vwo ru ona rẹ aghwoghwo rẹ avwanre yovwinphiyọ? (Ni ekpeti na “Obo re sa Chọn Vwẹ Uko Vwo Ruiruo rẹ aghwoghwo Mẹ Gba.”)
15 Idjerhe ọfa re se vwo ruiruo rẹ aghwoghwo na gba, ọyen re vwo ru ona rẹ aghwoghwo rẹ avwanre yovwẹnphiyọ. Nẹ ọke ra ruọke yen ihwo re dia ewena rẹ iruo evo vwo yono kpobarophiyọ rere ona rayen se vwo yovwinphiyọ. Ọtiọyen ọ je hepha kẹ ighwoghwota rẹ Uvie na. Ofori nẹ avwanre yono kpobarophiyọ ọkieje rere ona rẹ aghwoghwo rẹ avwanre se vwo yovwinphiyọ.—Isẹ 1:5; se 1 Timoti 4:13, 15.
16 Mavọ yen avwanre se vwo ru ona rẹ aghwoghwo rẹ avwanre yovwinphiyọ? Ọyen ra vwọ nabọ kerhọ rẹ odjekẹ ra vwọphia vwẹ Uyono rẹ Akpeyeren vẹ Iruo Ruvie Na. Uyono ọghanghanre ra vwọphia vwẹ omẹvwa yena chọn avwanre uko vwo ru ona rẹ aghwoghwo rẹ avwanre yovwẹnphiyọ. Kerẹ udje, avwanre sa jokaphiyọ ẹkpo re cha chọn avwanre uko vwo ru ona rẹ aghwoghwo rẹ avwanre yovwinphiyọ ọke rẹ ochidiagbara rẹ uyono na da vwẹ uchebro kẹ iniọvo ri vwẹ eta phia. Avwanre sa vwẹ ẹkpo rẹ avwanre jokaphiyọ na vwo ruiruo vwẹ aghwoghwo. Avwanre sa nokpẹn rẹ ukẹcha mie oniruo rẹ ẹko rẹ aghwoghwo rẹ avwanre hepha, yẹrẹ nene wian kugbe vwẹ aghwoghwo. Avwanre ji se nene ọkobaro, oniruo okinriariẹ, yẹrẹ oniọvo ọfa ro tedje wian kugbe. Rẹ avwanre vwọ tẹn ona rẹ obo ra reyọ Ekpeti rẹ Uyono rẹ avwanre vwo ruiruo ye, kẹ avwanre je cha riavwerhen rẹ iruo rẹ aghwoghwo vẹ eyono na.
17. Erere vọ yen wọ cha mrẹ siẹrẹ wo de ruiruo rẹ aghwoghwo wẹn gba?
17 Ọyen uphẹn oghẹresan rẹ avwanre vẹ Jihova vwọ dia “iruiruo”! (1 Kọr. 3:9) Wo de “vughe obo ri yovwiri” je tẹnrovi iruo rẹ Uvie na, ku wọ sa “ga Ọrovwohwo vẹ evuavwerhe!” (Fil. 1:10; Une 100:2) Kerẹ odibo rẹ Ọghẹnẹ, jo muwẹro nẹ ọ cha kẹ wẹ ogangan wo se vwo ruiruo rẹ aghwoghwo wẹn gba, o toro egbabọse ru wo hirharoku-u. (2 Kọr. 4:1, 7; 6:4) Ọtiọyena, o toro ẹdia ru wọ hepha-a, wọ sa “mrẹ obo [wọ] vwọ yeyan” siẹrẹ wo de muomaphiyọ iruo rẹ aghwoghwo na vọnvọn. (Gal. 6:4) Wọ da nabọ ruiruo rẹ aghwoghwo na gba, ku wo se djephia nẹ wo vwo ẹguọnọ rẹ Jihova kugbe irivẹ wẹn. “Wo de ru ọtiọye ku wo sivwi oma wẹn kugbe ayen otu ri nyo we.”—1 Tim. 4:16.
UNE 58 Guọnọ Igbeyan rẹ Ufuoma
^ e?ko. 5 Jesu vuẹ avwanre nẹ e ghwoghwo iyẹnrẹn esiri rẹ Uvie na, ji gbe odibo. Vwevunrẹ uyono nana, a cha ta ota kpahen obo re se vwo ruiruo rẹ aghwoghwo rẹ avwanre gba, o toro oborẹ ebẹnbẹn rẹ avwanre bun te-e. A je cha ta ota kpahen obo re cha nẹrhẹ iruo rẹ aghwoghwo rẹ avwanre yovwinphiyọ, ji fierere kẹ avwanre.
^ e?ko. 4 OBORẸ OTA NANA MUDIAPHIYỌ: Iruo rẹ Uvie na churobọ si aghwoghwo vẹ eyono, ebanbọn vẹ ẹroevwote rẹ Eguan Ruvie, Eguan rẹ Omẹvwa, Ọfisi re de Ruiruo rẹ Efanfan, Oghọn rẹ Ukoko, kugbe ẹroevwote rẹ ihwo rẹ oghwọrọ te oma.—2 Kọr. 5:18, 19; 8:4.
^ e?ko. 13 Ni owọẹjẹ ighwrẹn re djunute vwẹ ekpeti na “Obo Wo Se Vwo ru Akpeyeren Wẹn Lọhọ” rọhẹ Uwevwin Orhẹrẹ rẹ July 2016, aruọbe 12.
^ e?ko. 62 IDJEDJE RẸ IHOHO: Oniọvo aye ro ruẹ udje rẹ orhivwinbrura vwẹ uyono rẹ uvwre rẹ udughwrẹn. Ọke rẹ ochidiagbara rẹ uyono na vwọ vwẹ uchebro kẹ ye, jọ nabọ jokaphiyọ asan ro dje kẹ vwẹ ibroshọ rẹ Isese vẹ Eyono na. Oniọvo aye na vwẹ obo ro yonori vwo ruiruo vwẹ aghwoghwo vwẹ oba rẹ udughwrẹn na.
