Jọn ro Brẹ Ihwo Phiyame—Udje rọ sa Nẹrhẹ a Sẹro rẹ Aghọghọ Avwanre
O VWO orọnvwọn ọvo wọ guọnọ ru vwevunrẹ ukoko na, ẹkẹvuọvo wo che se ruo enẹna-a? Ọkiọvo, ọ sa dia uphẹn ẹga rẹ ohwo ọfa riavwerhen rọyen. Ọ je sa dia uphẹn ẹga oghẹresan ro te we obọ jovwo. Ẹkẹvuọvo, wo rhe se ruo fikirẹ ọghwo, je omakpokpọ evwo, uweren ọgangan, yẹrẹ oghwa rẹ orua-a. Ọ je sa dianẹ fikirẹ ewene evo rẹ ukoko na ruru, wọ da dobọ rẹ iruo ru wo ruẹ cha ọke grongron rhire na ji. Otoro obo rọ wanre-e, wo se roro nẹ ọ dia oborẹ wọ guọnọ ru eje vwẹ ẹga ri Jihova yen wo ruẹ na-a. Vwẹ ẹdia tiọyena, ọkiọvo ofu se dje we. Ọtiọyena, mavọ yen wọ sa vwọ kẹnoma kẹ ofudjevwe, ivun-emiovwo, yẹrẹ ẹghwọ? Mavọ wọ sa vwọ sẹro rẹ aghọghọ wẹn?
Avwanre se yono orọnvwọn ọvo rọ sa nẹrhẹ a sẹro rẹ aghọghọ rẹ avwanre vwo nẹ udje ri Jọn ro brẹ ihwo phiyame. Jọn riavwerhen rẹ uphẹn ẹga oghẹresan evo, ẹkẹvuọvo ọ nama rhẹro rẹ obo ri phiare vwẹ akpeyeren rọye-en. Jọn nama roro nẹ ọke rẹ ọyen cha ghwọrọ vwẹ uwodi che bun vrẹ ọke rọ ghwọrọre vwẹ iruo rẹ aghwoghwo rọye-en. Dedena, ọ sẹro rẹ aghọghọ rọyen vwẹ akpeyeren rọyen ejobi. Die yen vwẹ ukẹcha vwọ kẹ? Kẹ, mavọ yen avwanre sa vwọ sẹro rẹ aghọghọ avwanre siẹrẹ ofu de dje avwanre?
IRUO RỌ VỌNRE VẸ AGHỌGHỌ
Vwẹ omarẹ April rẹ 29 C.E., Jọn da tuẹn iruo ri Jihova vwọ kẹ phiyọ, rọ dia iruo ro vwo muegbe rẹ ihwo hẹrhẹ ẹcha ri Mesaya na. O de ghwoghwo: “Kurhẹriẹ, kidie uvie rẹ odjuvwu si kẹre re.” (Mat. 3:2; Luk 1:12-17) Ihwo buebun nabọ kerhọ rọyen. Vwọrẹ uyota, otu buebun nẹ awusheri rhe ri kerhọ rọyen, buebun rayen de kurhẹriẹ ji bromaphiyame. Jọn fiudugberi vwẹ orhọesio vwọ kẹ ilori ẹga ri se oma rayen evwata nẹ, ẹdjọeguo hẹrhẹ ayen jokpanẹ kẹ ayen kurhẹriẹ. (Mat. 3:5-12) Aghwoghwo rọyen de rhi vwoba vwẹ omarẹ October ri 29 C.E., ro vwo brẹ Jesu phiyame. Vwo nẹ ọke yena, Jọn da vuẹ ihwo nẹ ayen nene Jesu, rọ dia Mesaya re veri na.—Jọn 1:32-37.
Fikirẹ ẹdia rọ pha ghanghanre ri Jọn kare, Jesu da ta: “Ihwo rẹ eya vwiẹri na, o ji vwo ọ rọ rho te Jọn ri Baptist na-a, ẹkẹvuọvo ọ rọ ma hanvwe vwẹ uvie rẹ odjuvwu rho nọ.” (Mat. 11:11) Aphro herọ-ọ, oma vwerhen Jọn fikirẹ ebruphiyọ ri te re obọ. Kerẹ Jọn, buebun rẹ avwanre mrẹ ebruphiyọ. Ọvo usun rẹ ihwo tiọyena yen oniọvo ọvo re se Terry. Ọ vẹ aye rọyen Sandra ghwọrọ ikpe re vrẹ 50 vwẹ iruo rẹ ẹga ọkieje re. Terry da ta: “Mi riavwerhen rẹ uphẹn rẹ ẹga buebun. Me gare kerẹ ọkobaro, me ga vwẹ Bẹtẹl, me je ga kerẹ ọkobaro oghẹresan, oniruo okinriariẹ, vẹ oniruo ubrotọ, enẹna me rhoma ga kerẹ ọkobaro oghẹresan.” Re vwo vwo uphẹn rẹ ẹga vwevunrẹ ukoko na kẹ ohwo aghọghọ, ẹkẹvuọvo, ọke rẹ ẹdia rẹ avwanre hepha de wene, ọ guọnọ ẹgbaẹdavwọn a ke sa sẹro rẹ aghọghọ avwanre kirobo re che yono vwo nẹ udje ri Jọn.
DJE ỌDAVWARO PHIA ỌKIEJE
Orọnvwọn ọvo rọ nẹrhẹ Jọn ro brẹ ihwo phiyame sẹro rẹ aghọghọ rọyen, ọyehẹ ọdavwaro ro vwo kpahen uphẹn rẹ ẹga rọyen. Roro kpahen udje ọvo. Jesu vwo bromaphiyame nu, idibo ri Jesu ki buẹnphiyọ, jẹ ọ ri Jọn hanvwaphiyọ. Ọnana de kpokpo ẹwẹn rẹ idibo ri Jọn mamọ, ayen da ta kẹ: “Rabbi, ọ rọ vẹ owẹ gba herọ vwẹ obo ovrẹn ri Jọdan na, . . . vwẹ ame kẹ ihwo, ihwo ejobi re bro ra.” (Jọn 3:26) Jọn da kpahen: “Ọ rọ yanvwe ọpha ọye hẹ ọshare re ọpha; ugbeyan rẹ ọshare rẹ ọpha na, ro mudia kẹrẹ ro nyo ota rọye, oma ra vwerhọn vwẹ urhuru rẹ ọpha na ro nyo; vwẹ ọtiọye na aghọghọ mẹ na kẹ ọvọnvọn.” (Jọn 3:29) Jọn vwẹ oma rọyen vwọ vwanvwẹ Jesu-u, yẹrẹ ko rorori nẹ iruo ri Jesu nẹrhẹ uphẹn rẹ ẹga rọyen shekpotọ-ọ. Ukperẹ ọtiọyen, Jọn sẹro rẹ aghọghọ rọyen kidie ọ vwẹ ẹro ọghanghanre vwo ni uphẹn ro vwori kerẹ “ugbeyan rẹ ọshare rẹ ọpha na.”
Uruemu ri Jọn djephia na nẹrhẹ ọ sẹro rẹ aghọghọ rọyen dede nẹ iruo rọyen ghwa lọhọ-ọ. Kerẹ udje, Jọn ọyen ojigbo vwo nẹ ọke re vwo vwiẹ rhe, ọ je da udi ọganga-an. (Luk 1:15) Jesu vwọ ta ota kpahen akpeyeren ri kekpe ri Jọn yerin, ọ da ta: “Jọn ri Baptist rhere, ọ re emuọvo-o, ọ da emuọvo-o.” Ẹkẹvuọvo, Jesu vẹ idibo rọyen dia ojigbo-o, ayen hepha kerẹ ihwo efa. (Mat. 11:18, 19) Vwọba, dede nẹ Jọn ru emu rẹ igbunu vuọvo-o, ọ riẹnre nẹ a vwẹ ẹgba re vwo ru emu igbunu vwọ kẹ idibo ri Jesu kugbe ihwo evo ri nenire jovwo. (Mat. 10:1; Jọn 10:41) Ukperẹ Jọn vwọ tẹnrovi ofẹnẹ rọhẹ uvwre rẹ idibo rọyen vẹ i ri Jesu, o de muomaphiyọ iruo ri Jihova vwọ kẹ.
A da je vwẹ ẹro ọghanghanre vwo ni iruo rẹ avwanre ruẹ vwẹ ẹga ri Jihova, ka sa sẹro aghọghọ rẹ avwanre. Terry re djunute siẹvure, da ta: “Me nabọ tẹnrovi iruo ọvuọvo ra vwọ kẹ vwẹ.” Ro vwo roro kpahen akpeyeren rọyen vwẹ ẹga ọkieje, ọ da ta: “Mi viẹ idiekpọvwẹ-ẹ, ukperẹ ọtiọyen oma di mu uvwe vwerhan.”
Aghọghọ rẹ avwanre sa ganphiyọ siẹrẹ e de roro kpahen oboresorọ iruo re ruẹ vwẹ ukoko na yẹrẹ uphẹn ẹga rẹ avwanre vwọ ghanre. Uphẹn yena yen ra vwọ dia “otu rẹ iruiruo rẹ Ọghẹnẹ.” (1 Kọr. 3:9) Siẹrẹ a da nabọ vwẹrote orọnvwọn rọ pha ghanghanre, erhuvwu rọyen kọ cha nabọ teyenphia. Vwẹ idjerhe vuọvo na, a cha sẹro rẹ aghọghọ avwanre siẹrẹ a da vwẹ ọkieje vwo roro kpahen obo rọ ghanre te re vwo nene Jihova wiankugbe. Ọtiọyena, a rha cha vwẹ ẹgbaẹdavwọn rẹ avwanre vwọ vwanvwẹ e rẹ ihwo efa-a. E ji che roro nẹ iruo rẹ ihwo efa ruẹ ghanre nẹ e rẹ avwanre-e.—Gal. 6:4.
TẸNROVI ERỌNVWỌN RE GHANRE KẸ JIHOVA
Dede nẹ ọ sa dianẹ Jọn riẹnre nẹ o che ruiruo rọyen na kri-i, jẹ ọ nama roro nẹ o che vwoba kpregede-e. (Jọn 3:30) Vwẹ ukpe rẹ 30 C.E., omarẹ emeranvwe esan ri Jọn ghwe vwo bru Jesu phiyame nu, Ovie Hẹrọd de muo phiyọ uwodi. Dedena, Jọn ji ghwoghwo ghene. (Mak 6:17-20) Die yen chọn rọ uko vwọ sẹro rẹ aghọghọ rọyen vwẹ ọke rẹ edavwini nana? Ọ tẹnrovi obo re ma ghanre kẹ Jihova.
Jọn vwọ hẹ uwodi, o de nyo nẹ iruo aghwoghwo ri Jesu nabọ hẹrẹphiyọ. (Mat. 11:2; Luk 7:18) Jọn vwo imuẹro nẹ Jesu yen Mesaya na, ẹkẹvuọvo, o se roro: Mavọ yen Jesu che vwo ru orugba rẹ eta na eje ri Baibol na ta kpahen Mesaya na? Rọ vwọ dianẹ a cha vwẹ ogangan rẹ usuon vwọ kẹ Mesaya na, kẹ usuon ri Jesu na cha tonphiyọ kẹrẹkpẹ? Ọ cha nẹrhẹ e si ọyen nẹ uwodi? Kidie nẹ ọ guọnọ riẹn ẹkpahọnphiyọ rẹ enọ nana, Jọn da vuẹ idibo rọyen ivẹ nẹ ayen ra nọ Jesu onọ nana: “Wẹ hẹ ohwo rọ cha na gbinẹ avwanre ji phiẹrohọ ohwo ọfa?” (Luk 7:19) Ayen vwo rhivwin rhe, o muẹro nẹ Jọn cha nabọ kerhọ, ọke rẹ ayen vwo djisẹ rẹ emu igbunu ri Jesu ruru, vẹ ovuẹ rọ vwọ kẹ ayen vwo rhe nẹ, “Irhuẹro mrẹ orẹ, ikpono yanre, ihunvwoti e sivwi ayen, idierhọn nyẹme, a rhọvwọ irivwi, e gbe ikun esiri na kẹ ivwiogbere.”—Luk 7:20-22.
O muẹro nẹ eta yena bọn Jọn gan dẹn! Ọyena odjephia nẹ Jesu ru orugba rẹ aroẹmrẹ ri shekpahen Mesaya na. Dede nẹ, omaẹvwọphia ri Jesu cha nẹrhẹ e si Jọn nẹ uwodi-i, jẹ Jọn riẹnre nẹ ẹga rọyen dia ofefe-e. Otoro obo ro rhiẹromrẹ-ẹ, o vwo oboresorọ ọ vwọ ghọghọ.
Ra vwọ tẹnrovi iyẹnrẹn rẹ ẹyan-obaro rẹ aghwoghwo na vwẹ akpọneje sa nẹrhẹ a sẹro rẹ aghọghọ rẹ avwanre
Kerẹ Jọn, avwanre da tẹnrovi erọnvwọn ri ma ghanre kẹ Jihova, ke se chirakon rẹ edavwini vẹ aghọghọ. (Kọl. 1:9-11) E se ru ọnana womarẹ isese ri Baibol vẹ erorokodo. Ọnana cha nẹrhẹ a karophiyọ nẹ ẹga rẹ avwanre vwọ kẹ Jihova dia ofefe-e. (1 Kọr. 15:58) Sandra da ta: “Uyovwin ri Baibol ọvo ri mi se kẹdẹ kẹdẹ chọn vwẹ uko vwo siẹkẹrẹ Jihova. Ọ nẹrhẹ me tẹnrovi Jihova, ukperẹ oma mẹ.” Avwanre da je tẹnrovi iyẹnrẹn rẹ ẹyan-obaro rẹ iruo rẹ Uvie na, ọ cha nẹrhẹ avwanre tẹnrovi obo ri Jihova ruẹgba vwevunrẹ ukoko na. Sandra da ta: “Ọrhuẹrẹphiyotọ ri kemeranvwe kemeranvwe ri JW Broadcasting® nẹrhẹ avwanre siẹkẹrẹ ukoko na, ọ je chọn avwanre uko vwọ sẹro rẹ aghọghọ rẹ avwanre vwẹ iruo na.”
Dede nẹ ọmọke yen Jọn ro brẹ ihwo phiyame vwo ruiruo rẹ aghwoghwo rọyen, jẹ “[“ẹwẹn,” NW] vẹ ogangan rẹ Ilaija” yen o vwo ruo, kidie kerẹ Ilaija, “ọye ohwo kirobo rẹ avwanre epha na.” (Luk 1:17; Jems 5:17) Avwanre da vwẹrokere Jọn vwo dje ọdavwaro phia ji tẹnrovi ẹga ri Jihova ọkieje, otoro obo re phiare-e ka sa sẹro rẹ aghọghọ rẹ avwanre vwẹ iruo rẹ Uvie na.
